1, 2. ¿Tlen kixnamikij tokniuan uan ken momachiliaj?

MA TIKITAKAN eyi tlamantli. Se telpochtli okiluijkej kipia se kokolistli tlen sapanoua tesotlaua. Se tokni yikipia kanaj cincuenta xiuitl uan okiluijkej ayakmo tekipanos kanin otekipanouaya uan amo kajsi okse tekitl maski yokitemo. Se tokni yikipia miak xiuitl uan kimachilia ayakmo kitekichiuilia Jehová ken achto okichiuaya.

² Xamo timokuayejyekouaj amitlaj topati tla tikixnamikij se ouijkayotl ken yotikijtojkej. Xamo ayakmo tiyolpakij ijkuak itlaj techpanoua, ayakmo kuali timomachiliaj uan ayakmo kuali timouikaj iuan oksekimej.

3. ¿Ken techita Satanás uan akinmej kinnauatia?

³ Nochi tlen kiyekana Satanás kiteititia amo techpatioita. Satanás kijtoua tejuan amitlaj topati. Okikajkaya Eva ijkuak okilui iselti ma monauati maski kuali okimatiaya mikiskia tla amo kitlakamatiskia toTajtsin Dios. Nochipa kinnauatia tlasemankej, akinmej pouij itech política uan akinmej kinyekanaj religiones tlen san tlakajkayauaj. Ik non, amo techtlajtlachialtia yejuan amo techpatioitaj nion techtlakaitaj.

4. ¿Tlen timomachtiskej?

⁴ Pero Jehová kineki kuali ma tikmachilikan uan techpaleuia ijkuak itlaj tikixnamikij tlen kichiua ma timomachilikan amitlaj topati (Sal. 136:23; Rom. 12:3). Itech nin tlamachtil  tikitaskej ken techpaleuia Jehová. Ijkuak timokokouaj, ijkuak amo tikpiaj tomin uan ijkuak yitikpiaj miak xiuitl porque ayakmo tiktekichiuiliaj Jehová ken achto otikchiuayaj. Axkan ma tikitakan tleka uelis tikneltokaskej toTajtsin Dios techpatioita.

5. ¿Ken tikmatij Jehová techpatioita?

⁵ Jehová techpatioita maski otechchijchi ika tlali (Gén. 2:7). Ma tikitakan seki tlamantli tlen kiteititia Jehová techpatioita. Jehová otechchijchi ma tikteititikan ken iyelis (Gén. 1:27). Ijkon kiteititia san tejuan otechchijchi okachi tiixtlamatkej uan amo ken yolkamej uan okseki tlamantli. Noijki technauatia ma tikmaluikan tlaltikpak uan yolkamej (Sal. 8:4-8).

6. ¿Tlen okse tlamantli techititia Jehová techpatioita maski titlajtlakolejkej?

⁶ Jehová nochipa techpatioita maski otlajtlakolchi Adán. Sapanoua techpatioita, ik non, okitemakak iKone uan ijkon techtlapojpoluia (1 Juan 4:9, 10). Sapanoua techpaleuia okitemakak iKone porque ijkon kinyolitis akinmej yoixpolikej tlen yolkualmej uan akinmej amo yolkualmej (Hech. 24:15). ITlajtol toTajtsin Dios kijtoua ye amo san techpatioita ijkuak tichikajtokej, ijkuak tikpiaj tomin uan ijkuak ayamo tikpiaj miak xiuitl (Hech. 10:34, 35).

7. ¿Tlen okachi kiteititia Jehová techpatioita?

⁷ Akinmej tiktekichiuiliaj Jehová tikneltokaj techpatioita. Ye otechyoltilanki uan yokitak otikselijkej iTlajtol (Juan 6:44). Ijkuak opejki tikixmatij Jehová, ye noijki opejki touan mouika (Sant. 4:8). Jehová nochipa majxilia techmachtis. Kimati tlen tikchiuaj axkan uan tlen uelis tikchiuaskej satepan. Noijki kiteititia techtlasojtla ijkuak techyektlalia (Prov. 3:11, 12). Nochi nin kiteititia toTajtsin Dios techpatioita.

8. ¿Ken techpaleuis tlen kijtoua Salmo 18:27-29 amo ma tikmachilikan amitlaj topati?

⁸ Tekiua David okimatiaya Jehová okitlasojtlaya uan okipaleuiaya. Non okipaleui otlaxiko ijkuak sekimej okitayaj amitlaj ipati (2 Sam. 16:5-7). Sapanoua timoyolkokouaj ijkuak tikixnamikij ouijkayotl uan amo tikmatij tlen tikchiuaskej. Pero Jehová techpaleuis ma tikixnamikikan ouijkayotl uan amo ma timokuayejyekokan amitlaj topati (xiktlajtolti Salmo 18:27-29). Nochipa tiyolpakiskej tiktekichiuiliskej Jehová tla tikneltokaj ye techpaleuis (Rom. 8:31). Ma tikitakan eyi tlamantli tlen kiteititia Jehová techpatioita uan techtlasojtla.

9. ¿Tlen tikmachiliaj ijkuak timokokouaj?

⁹ Ijkuak timokokouaj sapanoua timoyolkokouaj uan tikmachiliaj ayakmo itlaj topati. Xamo tipinauaj ma techitakan oksekimej ayakmo ueli itlaj tikchiuaj uan moneki techpaleuiskej tla tiknekij itlaj tikchiuaskej. Sekimej amo kimatij kox timokokouaj uan xamo amo kuali timomachiliaj porque ayakmo ueli itlaj tikchiuaj ken achto. Jehová techyolchikaua ijkuak timokokouaj. ¿Ken kichiua?

10. Ijkon ken kijtoua Proverbios 12:25, ¿tlen techpaleuis ijkuak timokokouaj?

¹⁰ Ijkuak timokokouaj timoyolchikauaj ijkuak techiluiaj se kuali tlajtoli (xiktlajtolti Proverbios 12:25). Jehová techiluia itech iTlajtol tlen mokuayejyekoua uan ijkon techilnamiktia ye techajsikamati maski  timokokouaj (Sal. 31:19; 41:3). Ik non, ma tiktlajtoltikan miak uelta iTlajtol uan ye techpaleuis kuali ma timomachilikan.

11. ¿Ken omomachili se tokni ijkuak Jehová okipaleui?

¹¹ Ma tikitakan tlen okipanok se tokni itoka Julio. * Okipixki se kokolistli ijkuak okatka telpochtli uan nin kokolistli okiouijtili uan okimachiliaya amitlaj ipati. Okijto: “Amo onikmatiaya tlen nikchiuas ijkuak opejki nimokokoua uan amo kuali onimomachiliaya ijkuak oksekimej onechitayaj. Onimoyolkokouaya uan onimotlajtlaniaya ken uelis nikpatlaskia nonemilis. Ayakmo onikmatiaya tlen nikchiuas, ik non, oniktlatlaujti Jehová ma nechpaleui”. ¿Ken okipaleui toTajtsin Dios? Ye okijto: “San tlen amo onimokuayejyekouaya. Ik non, onechiluijkej ma niktlajtolti Salmos tlen amo uejueyij uan ompa kijtoua Jehová kinmajsikamati itekipanojkauan. Mojmostla miak uelta onikintlajtoltiaya textos. Onimoyolchikauaya uan onimoyolseuiaya. Satepan oksekimej okitayaj yonixuetskaya. Oksekimej kijtouaj okinyolchikauaya porque onixuetskaya. Onikitak Jehová onechnankili. Onechpaleui ayakmo ma nimokuayejyeko amitlaj nopati. Opejki nimokuayejyekoua tlen kijtoua Biblia ijkuak ikaj mokokoua”.

12. ¿Tlen moneki tikchiuaskej tla tiknekij ma techpaleui Jehová ijkuak timokokouaj?

¹² Tla timokokouaj, ma tikneltokakan Jehová kajsikamati tlen techpanotok. Ma tiktlatlaujtikan ma techpaleui amo ma timokuayejyekokan amitlaj topati. Ma tiktemokan itech iTlajtol Jehová tlen kineki techiluis. Ma timokuayejyekokan itech  textos kanin techiluiaj Jehová kinpatioita akinmej kitekichiuiliaj. Tla ijkon tikchiuaskej, tikitaskej Jehová yolkuali uan kinpaleuia akinmej kitekichiuiliaj uan amo kikauaj (Sal. 84:11).

13. ¿Tlen uelis kipanos se teta ijkuak ayakmo kipia tekitl?

¹³ Nochtin tetajmej kinekij kinmakaskej tlen ika mopanoltiskej infamilia. Ma tikijtokan se tokni kiluiaj ayakmo tekipanos kanin otekipanouaya maski amitlaj okichi. Kitemoua tekitl pero amo kanaj kajsi, ik non, xamo mokuayejyekos amitlaj ipati. ¿Ken kipaleuis tla mokuayejyekos tlen kichiuas Jehová?

14. ¿Tleka Jehová kichiua tlen kijtoua?

¹⁴ Jehová nochipa kichiua tlen kijtoua (Jos. 21:45; 23:14). Onka seki tlamantli tlen techpaleuia ma tikajsikamatikan tleka kichiua tlen kijtoua. Kichiua tlen kijtoua porque tlamo kisokiotis itoka. Noijki itech iTlajtol techiluia ye kinmaluis itekipanojkauan yolmelajkej, ik non, kichiua tlen techiluia (Sal. 31:1-3). Noijki kichiua tlen techiluia porque kimati timoyolkokoskej akinmej tipouij itech ifamilia tla amo kichiuas tlen kijtoua. Kijtoua techmakas tlen ika timopanoltiskej uan nochipa techmachtia para ma tikpiakan chikauak totlaneltokilis. Nochi nin amikaj uelis kiluis amo ma kichiua (Mat. 6:30-33; 24:45, TNM).

15. (1) ¿Tlen ouijkayotl okixnamikej tokniuan tlen okatkaj achto siglo? (2) ¿Tlen techiluia Salmo 37:18, 19?

¹⁵ Ijkuak tikneltokaj tleka Jehová kichiua tlen kijtoua, tikmatij uelis techmakas tlen ika timopanoltiskej ijkuak amo tikpiaj tomin. Ma timokuayejyekokan tlen  okinpanok tokniuan tlen okatkaj achto siglo. Opejki kintlajyouiltiaj tokniuan tlen okatkaj Jerusalén, ik non, “nochteh ochocholojkeh omotlajtlaatitoh [...] iwa sanwel n tlatematiltijkeh omokajkeh” (Hech. 8:1). Ik non, tokniuan ayakmo okipiayaj tlen ika mopanoltiskej porque amo okipiayaj tomin. Ayakmo okipiayaj kanin chantiskej, ayakmo okipiayaj tekitl uan ayakmo okipiayaj tlen kinemakaskej. Pero Jehová nochipa okinpaleui uan yejuan oyolpakiayaj (Hech. 8:4; Heb. 13:5, 6; Sant. 1:2, 3). Jehová okinpaleui tokniuan yolmelajkej itech achto siglo uan tejuan noijki techpaleuis (xiktlajtolti Salmo 37:18, 19).

16. ¿Tleka ualeua timokuayejyekouaj xamo ayakmo tiktekichiuiliaj Jehová ken achto otikchiuayaj?

¹⁶ Ijkuak yitikpiaj miak xiuitl xamo timokuayejyekouaj ayakmo tiktekichiuiliaj Jehová ken achto otikchiuayaj. Nesi tekiua David ijkon okipanok ijkuak yokipiaya miak xiuitl (Sal. 71:9). ¿Ken techpaleuis Jehová?

17. ¿Tlen techmachtia tlen okipanok tokni Joanna?

¹⁷ Ma tikitakan tlen okipanok se tokni itoka Joanna. Okiluijkej kox uelis tlapaleuiskiaj ijkuak kiyektlaliskiaj kali kanin timonechikouaj pero ye amo okinekiaya yas. Okijto: “Yinikpia miak xiuitl, nonamik yoixpoliuik uan amitlaj nikmati nikchiuas, ik non, amo nikmati ken nitlapaleuis. Amitlaj nopati”. Se tiotlak okitlatlaujti Jehová ika nochi iyolo. Mostlatika oyajki kanin timonechikouaj uan ok omotlajtlaniaya kox omonekiaya tlapaleuis. Tokni tlen okinmititito ken kiyektlaliskej  kali kanin timonechikouaj, okijto sapanoua miak ipati ma tikselikan tlen Jehová techmachtia. Joanna okijto: “Onimokuayejyeko: ‘Ne nikkauilia ma nechmachti’. Opejki nichoka porque onikitak Jehová onechnankili. Opejki nikneltoka Jehová nechpatioita uan ye kineki nechmachtis”. Joanna kijtoua ken omomachiliaya ijkuak oajsito kanin timonechikouaj: “Onimomojtiaya ijkuak oniajsito, onimoyolkokouaya uan amo onikmatiaya tlen nikchiuas. Pero ijkuak otlanki nechikol, ayakmo onimoyolkoko uan onikitak uelis nitlapaleuiskia”.

18. ¿Ken kiteititia Biblia Jehová kipatioita tiktekichiuiliaj maski yitikpiaj miak xiuitl?

¹⁸ Amo ma tikilkauakan ijkuak yitikpiaj miak xiuitl ok uelis tiktekichiuiliskej Jehová (Sal. 92:12-15). Jesús otechititi Jehová kipatioita tiktekichiuiliaj maski ualeua timokuayejyekouaj ayakmo tiktekichiuiliaj ken achto otikchiuayaj (Luc. 21:2-4). Ik non, san ma timokuayejyekokan ken uelis okachi tiktekichiuiliskej Jehová. Ma tikitakan ken uelis tikchiuaskej. Ma tikintlapouikan oksekimej akin Jehová, ma timotlatlaujtikan inpatka tokniuan uan ma tikinyolchikauakan amo ma kikauakan Jehová. Jehová kijtoua “titlapalewijkeh itech iteki” porque tiktlakamatij uan amo san kita kox sapanoua tiktekichiuiliaj (1 Cor. 3:5-9).

19. ¿Tlen techiluia Romanos 8:38, 39?

¹⁹ Tiktlasojkamatiliaj Jehová porque techkauilia ma tikueyichiuakan uan ye melauak techpatioita. Ye otechchijchi ma tikchiuakan tlen ye kineki uan ma tiyolpakikan ijkuak tikueyichiuaj (Apoc. 4:11). Akinmej amo kitekichiuiliaj toTajtsin Dios xamo kijtouaj amitlaj topati pero Jehová techpatioita (Heb. 11:16, 38). Ayakmo tikmatij tlen tikchiuaskej ijkuak timokokouaj, ijkuak amo tikpiaj tomin uan ijkuak yitikpiaj miak xiuitl. Pero ma tikilnamiktokan amitlaj uelis kitsakuilis Jehová ma techtlasojtla (xiktlajtolti Romanos 8:38, 39).