TLAMACHTIL 5
Namouan tiaskej
“Tiknekij namouan tiaskej porque otikkakej Dios kajki namouan” (ZAC. 8:23).
TLAKUIKALI 26 Jesús kijtos: “Ne otechpaleui”
XIKILNAMIKTO *
“Majtlaktli tlakamej” kineskayotiaj akinmej chantiskej nochipa nikan tlaltikpak uan yolpakij kipaleuiskej tlakatl “judío” tlen kineskayotia akinmej kinpejpena toTajtsin Dios. (Xikita párrafo 1 uan 2).
1. ¿Tlen okijto Jehová panoskia itech ninmej tonalmej?
JEHOVÁ okijto: “Itech non tonalmej majtlaktli tlakamej tlen tlatlamantli tlajtouaj itech altepemej kikitskiskej, kema, kikitskiskej ikue se tlakatl judío uan kijtoskej: ‘Tiknekij namouan tiaskej porque otikkakej Dios kajki namouan’” (Zac. 8:23). Tlakatl “judío” kineskayotia yejuan akinmej toTajtsin Dios okinpejpenki ika iespíritu santo uan noijki moixmatij ken “iaxkawah Dios” (Gál. 6:16). “Majtlaktli tlakamej” kineskayotiaj akinmej chantiskej nochipa nikan tlaltikpak. Nonmej tokniuan kimatokej Jehová okinpejpenki akinmej yaskej iluikak uan kitaj se ueyi tlateochiualistli inmiuan san sekan kitekichiuiliskej toTajtsin Dios.
2. ¿Tlen kijtosneki majtlaktli tlakamej yauij iuan akinmej okinpejpenki toTajtsin Dios?
2 Tejuan amo tikmatij tlen intoka nochtin akinmej ok katej nikan tlaltikpak uan satepan yaskej iluikak. * Pero akinmej chantiskej nikan tlaltikpak uelis inmiuan ‘yaskej’. ¿Ken uelis inmiuan yaskej? Biblia kijtoua majtlaktli tlakamej “kikitskiskej ikue se tlakatl judío uan kijtoskej: ‘Tiknekij namouan tiaskej porque otikkakej Dios kajki namouan’”. Nin texto tlajtoua san itech se judío. Pero ijkuak majtlaktli tlakamej kinotsaj non tlakatl judío kijtouaj “namejuan”. Nin kijtosneki miakej uan amo san se. Tlakatl “judío” kineskayotia nochtin akinmej yetoskej iluikak tlen toTajtsin Dios okinpejpenki. Akinmej amo yaskej iluikak kitekichiuiliaj toTajtsin Dios iuan akinmej yaskej iluikak. Akinmej mokauaskej nikan tlaltikpak amo kijtouaj yejuan tlapejpenalmej tlayekanaj porque kimatij san ye Jesús techyekantok (Mat. 23:10).
3. ¿Tlen tlajtlanilmej tikinnankiliskej?
3 Axkan sekimej tlapejpenalmej ok katej nikan tlaltikpak iuan oksekimej itekipanojkauan toTajtsin Dios. Ik non, xamo sekimej tokniuan motlajtlaniaj: ¿Ken moneki mokuayejyekoskej akinmej kinpejpena toTajtsin Dios ika iespíritu santo? ¿Ken moneki tikinmitaskej akinmej kikuaj pan uan konij vino ijkuak tikilnamikij imikilis Jesús? ¿Moneki timotekipachoskej tla sejse xiuitl okachi momiaktiliaj tlapejpenalmej? Itech nin tlamachtil tikinnankiliskej ninmej tlajtlanilmej.
¿KEN MONEKI MOKUAYEJYEKOSKEJ AKINMEJ KINPEJPENA TOTAJTSIN DIOS?
4. ¿Tlen kinnejmachtia toTajtsin Dios tlapejpenalmej itech 1 Corintios 11:27-29 uan tleka?
4 Itech 1 Corintios 11:27-29, Itlajtol totajtzin Dios [NHY] (xiktlajtolti), toTajtsin Dios kinnejmachtia tlapejpenalmej. ¿Ken uelis se tlapejpenal amo kinamikis kikuas pan uan konis vino? Tla kikuas pan uan konis vino uan amo kichiua nochi ken toTajtsin Dios kineki (Heb. 6:4-6; 10:26-29). Akinmej kinpejpena toTajtsin Dios kimatokej moneki yetoskej yolmelajkej tla kinekij kiseliskej ‘intlatliokolil non Ye kinmajmakas kan ilwikak por kateh iwan Cristo Jesús’ (Filip. 3:13-16).
5. ¿Ken moneki mokuayejyekoskej akinmej kinpejpena toTajtsin Dios?
5 Iespíritu santo Jehová kinpaleuia akinmej yolyamankej uan amo moueyinekij (Efes. 4:1-3; Col. 3:10, 12). Ik non, akinmej kinpejpena toTajtsin Dios, amo momachiliaj okachi ueyititokej uan amo kinmitaj amitlaj inpati oksekimej tokniuan. Yejuan kimatokej oksekimej tokniuan noijki kinmaka espíritu santo toTajtsin Dios. Amo mokuayejyekouaj yejuan okachi kimatij tlen tlamachtia Biblia uan oksekimej amo okachi kimatij. Amo kiluiaj okse tokni: “Te noijki omitspejpenki toTajtsin Dios ika iespíritu santo uan moneki tikkuas pan uan tikonis vino ijkuak tikilnamikij imikilis Jesús”. Tokniuan tlapejpenalmej yolyamankej uan kimatokej san Jehová uelis kipejpenas akin yas iluikak.
6. Ijkon ken kijtoua 1 Corintios 4:7, 8, ¿tlen amo moneki kichiuaskej tlapejpenalmej?
6 Tokniuan tlapejpenalmej kimatokej se ueyi tlateochiualistli yaskej iluikak. Pero amo kinekij oksekimej tokniuan okachi kuali ma kinnotsakan (Filip. 2:2, 3). Noijki kimatokej ijkuak Jehová okinpejpenki amo okinmatilti oksekimej. Ik non, se tlapejpenal amo motlajtlachialtia tla oksekimej amo kineltokaj kox melauak okipejpenki toTajtsin Dios. Biblia noijki kijtoua amo san niman ma tikneltokakan ijkuak ikaj techiluia toTajtsin Dios okimakak se tekitl miak ipati (Apoc. 2:2). Akinmej kinpejpena toTajtsin Dios amo kinmiluijtinemij oksekimej yejuan yaskej iluikak. Ik non, yejuan amo moueyinekij porque tlapejpenalmej (xiktlajtolti 1 Corintios 4:7, 8).
7. ¿Tlen amo kichiuaj tokniuan tlapejpenalmej uan tleka?
7 Akinmej okinpejpenki toTajtsin Dios amo mouikaj san iuan akinmej noijki tlapejpenalmej. Noijki amo san motlapouijtokej iuan oksekimej tlapejpenalmej ken okinpejpenki toTajtsin Dios nion san sekan monechikouaj uan momachtiaj Biblia (Gál. 1:15-17). Tla ijkon kichiuaskej, amo uelis san sekan yetoskej nochtin tokniuan. Kixnamikiskej iespíritu santo toTajtsin Dios. Porque iespíritu santo toTajtsin Dios kichiua san sekan ma tiyetokan iuan tokniuan ika yolseuilistli (Rom. 16:17, 18).
¿KEN MONEKI TIKINMITASKEJ TOKNIUAN TLEN KINPEJPENA TOTAJTSIN DIOS?
Amo sapanoua ma tikinpatioitakan tlapejpenalmej nion akinmej tlayekanaj. (Xikita párrafo 8). *
8. ¿Tleka amo sapanoua ma tikinpatioitakan tokniuan tlen okinpejpenki toTajtsin Dios? (Xikita nota).
8 ¿Ken moneki tikinmitaskej tokniuan tlen kinpejpena toTajtsin Dios? Amo kuali sapanoua tikinpatioitaskej oksekimej noso tlapejpenalmej akinmej ikniuan Cristo (Mat. 23:8-12). Biblia kijtoua ma titlaneltokakan ken tlaneltokaj tlayekankej pero amo kijtosneki tikchiuaskej nochi tlen kichiuaj (Heb. 13:7, NHY). Noijki iTlajtol toTajtsin Dios kijtoua ma tikintlakaitakan. Porque tlayekankej “kichiwa[h] kuali inteki” uan “kitematiltiah iwa kitemachtiah itlajtol Dios” (1 Tim. 5:17). Tla sapanoua tikinpatioitaskej akinmej okinpejpenki toTajtsin Dios xamo yejuan amo kuali momachiliskej * noso uelis tikchiuaskej sapanoua ma moueyinekikan (Rom. 12:3). Tejuan amo tiknekij itlaj tikchiuaskej tlen uelis kichiuas se tokni tlapejpenal ma tlajtlakolchiua (Luc. 17:2).
9. ¿Ken uelis tikintlakaitaskej akinmej kinpejpena toTajtsin Dios?
9 ¿Ken uelis tikintlakaitaskej akinmej kinpejpena toTajtsin Dios? Amo ma tikintlajtlanikan ken okimatkej kox yaskej iluikak. Non tlamantli amo toteki (1 Tes. 4:11; 2 Tes. 3:11). Noijki amo ma tikijtokan akin tlapejpenal inamik noijki tlapejpenal, itatajuan noso oksekimej ifamiliares. Porque ijkuak ikaj kipejpenaj amo uelis kinpanoltiliskej oksekimej. San toTajtsin Dios kinpejpena (1 Tes. 2:12). Noijki amo ma tikintlajtlanikan tlen kinpinatis. Amo keman ma tiktlajtlanikan isiua se tlapejpenal ken momachilia porque inamik yas iluikak uan ye chantis nikan tlaltikpak itech xochitlali. Ma tikilnamiktokan Jehová techmakas tlen tiknekij ijkuak tiyetoskej xochitlali (Sal. 145:16).
10. ¿Tleka amo sapanoua ma tikinpatioitakan oksekimej?
10 Amo sapanoua ma tikinpatioitakan tlapejpenalmej. Porque ijkon timomaluiskej. ¿Tleka ijkon tikijtouaj? Biblia kijtoua tlapejpenalmej xamo ayakmo yetoskej yolmelajkej ixpan Jehová (Mat. 25:10-12; 2 Ped. 2:20, 21). Pero tla amo sapanoua tikinpatioitaj oksekimej, amo tikchiuaskej nochi tlen yejuan kichiuaj maski tlapejpenalmej noso yikipiaj miak xiuitl kitekichiuiliaj Jehová (Jud. 16). Tla yejuan ayakmo yetoskej yolmelajkej ixpan Jehová uan kinkauaskej tokniuan tlen inmiuan monechikouaj, tejuan amo timoyolkokoskej uan ok titlaneltokaskej uan amo tikkauaskej Jehová.
¿MONEKI TIMOTEKIPACHOSKEJ TLA SEJSE XIUITL OKACHI MOMIAKTILIAJ AKINMEJ KIJTOUAJ YASKEJ ILUIKAK?
11. ¿Kox miakej kikuaj pan uan konij vino?
11 Yikipia seki xiuitl amo omomiaktiliayaj akinmej okikuayaj pan uan okoniayaj vino ijkuak tikilnamikij imikilis Jesús. Pero ayamo kipia miak xiuitl okachi momiaktilijtokej. ¿Moneki techtekipachos? Amo. Ma tikitakan seki tlamantli tlen techpaleuis ma tikajsikamatikan tleka amo ma techtekipacho.
12. ¿Tleka amo ma techtekipacho tla momiaktiliaj tlapejpenalmej?
12 “Toteko [Jehová] kinmixmatok nochteh iaxkawah” (2 Tim. 2:19). Jehová kinmixmati akinmej melauak tlapejpenalmej. Pero tokniuan amo kimatij akinmej melauak tlapejpenalmej maski kinpouaj tlen kikuaj pan uan konij vino. Ik non, kijtouaj okachi momiaktilijtokej tlapejpenalmej maski amo melauak tlapejpenalmej. Sekimej ayakmo kikuaj pan uan ayakmo konij vino. Oksekimej amo kuali mokuayejyekouaj noso kuatlapolouaj uan kijtouaj tlanauatiskej iuan Jesús ompa iluikak. Ik non, amo kuali tikmatij ok keski tlapejpenalmej katej nikan tlaltikpak.
13. ¿Kijtoua Biblia keski ok yetoskej tlapejpenalmej nikan tlaltikpak ijkuak peuas ueyi tlajyouilistli?
13 Ipan nochi tlaltikpak yetoskej tlapejpenalmej ijkuak uits Jesús uan kinuikas iluikak (Mat. 24:31). Biblia kijtoua itlamian tonalmej ok yetoskej sekimej tlapejpenalmej nikan tlaltikpak (Apoc. 12:17). Pero Biblia amo kijtoua ok keski nikan yetoskej ijkuak peuas ueyi tlajyouilistli.
¿Moneki timotekipachoskej tla ikaj kikua pan uan koni vino ijkuak tikilnamikij imikilis Jesús? (Xikita párrafo 14).
14. ¿Tlen techmachtia Romanos 9:11, 16 ijkuak toTajtsin Dios kinpejpena akinmej yaskej iluikak?
14 Jehová kimati keman kinnotsas tlapejpenalmej ma yakan iluikak (Rom. 8:28-30). Jehová opejki kinpejpena akinmej yaskej iluikak ijkuak okiyoliti Jesús. Nochtin tokniuan tlen okatkaj achto siglo okatkaj tlapejpenalmej. Pero satepan miakej okijtouayaj okichiuayaj ken Cristo pero san otlakajkayauayaj. Pero Jehová okinpejpenki tlen melauak okichiuayaj ken Cristo maski ayakmo miakej okatkaj. Yejuan yetoskiaj ken trigo tlen omoskalti itlajkotia amo kuali xiuitl (Mat. 13:24-30). Jehová ok kinpejpena akinmej pouiskej itech 144,000. * Noijki xamo kinpejpenas sekimej ijkuak yitlamis tlen amo kuali. Ik non, tejuan amo uelis tikiluiskej tleka ijkon kichiua (xiktlajtolti Romanos 9:11, 16). * Amo tiknekij tikchiuaskej ken akinmej okijto Jesús okixnamikej inteko ijkuak okiluijkej tleka okintlaxtlaui ken yejuan tla satepan opejki tekipanouaj (Mat. 20:8-15).
15. ¿Ken tikmatij amo nochtin akinmej yaskej iluikak pouij iuan “tlakeuali yolmelajki uan ixtlamatki” ijkon ken kijtoua Mateo 24:45-47, TNM?
15 Amo nochtin akinmej yaskej iluikak pouij iuan “tlakeuali yolmelajki uan ixtlamatki” (xiktlajtolti Mateo 24:45-47, TNM). Ijkon ken itech achto siglo, axkan Jehová uan Jesús amo miakej kintekitiltiaj para ma techmakakan tlen ika tikchikauaskej totlaneltokilis noso tlen ika titlamachtiskej. Yiuejkika amo miakej tlapejpenalmej okijkuilojkej Escrituras Griegas Cristianas. Axkan noijki amo miakej kiyekanaj ialtepe Jehová uan kinmakaj oksekimej tlen ika kichikauaskej intlaneltokilis.
16. ¿Tlen otimomachtijkej?
16 Ma tikitakan tlen otimomachtijkej. Jehová yokijto itekipanojkauan chantiskej nikan tlaltikpak uan amo miakej yaskej iluikak tlanauatiskej iuan Jesús. Jehová kiteochiua “judío” uan noijki “majtlaktli tlakamej” uan tinochtin techiluia ma tiktlakamatikan uan ma tiyetokan tiyolmelajkej. Ik non, moneki tinochtin ma tiyetokan tiyolyamankej uan san sekan ma tiktekichiuilikan. Noijki kuali ma timouikakan iuan tokniuan tlen inmiuan timonechikouaj. Yitlamis tlen amo kuali, ik non, ma tiktekichiuilijtokan Jehová uan san sekan ma tiyetokan iuan Cristo (Juan 10:16).
^ párr. 5 Nin xiuitl tikilnamikiskej imikilis Jesús martes 7 metstli abril. ¿Ken moneki tikinmitaskej akinmej kikuaj pan uan konij vino ijkuak tikilnamikij imikilis Jesús? ¿Moneki timotekipachoskej tla sejse xiuitl okachi momiaktiliaj akinmej kijtouaj yaskej iluikak? Nin tlamachtil uan tlen okiski itech revista Akin Tetlapouijtok enero 2016, techpaleuis ma tikinnankilikan ninmej tlajtlanilmej.
^ párr. 2 Salmo 87:5, 6, kijtoua xamo satepan toTajtsin Dios kitematiltis intoka nochtin akinmej tlanauatiskej iuan Jesús ompa iluikak (Rom. 8:19).
^ párr. 8 Xikita revista Akin Tetlapouijtok enero 2016 itech recuadro “Akin tetlasojtla tetlakaita”.
^ párr. 14 Maski Hechos 2:33 kijtoua Jesús kitemaka espíritu santo, ye Jehová kinmatiltia akinmej yaskej iluikak.
^ párr. 14 Xikita revista Akin Tetlapouijtok 1 de mayo 2007 kanin kijtoua “Sekimej techtlajtlaniaj”.
TLAKUIKALI 34 Nikpias noyolo ajsitok
^ párr. 56 FOTO: Ximokuayejyeko ken motas tla itech se ueyi nechikol kiyaualoskej se tokni uan isiua tlen tekitij kanin kinyekanaj iTlaixpantijkauan Jehová uan kinkixtiliaj fotos. Kiteititiskej amo tetlakaitaj.
