1. ¿Ken mota miakej familias ayakmo motlasojtlaj?

BIBLIA kijtoua itlamian tonalmej miakej amo tetlasojtlaskiaj (2 Tim. 3:1, 3). Axkan ijkon panotok. Miakej tlen yomonamiktijkej mokajkauaj inmixpan tekiuajkej, ik non, tetajmej ayakmo kuali katej uan inkoneuan kimachiliaj amikaj kintlasojtla. Uan oksekimej familias maski san sekan chantij amo kuali mouikaj. Se tlakatl tlen kinpaleuia familias kuali ma mouikakan okijto: “Tetajmej uan inkoneuan amo motlapouiaj, san kitaj inteléfono, incomputadora, intableta noso mauiltiaj ika videojuegos. Maski san sekan chantij yetoskia ken amo moixmatij”.

2, 3. (1) Ijkon ken kijtoua Romanos 12:10, ¿akinmej noijki moneki tikintlasojtlaskej? (2) ¿Tlen timomachtiskej?

² Amo tiknekij tikchiuaskej ken miakej tlen amo motlasojtlaj (Rom. 12:2). Moneki sapanoua tikintlasojtlaskej tofamiliares uan noijki tokniuan (xiktlajtolti Romanos 12:10). ¿Ken moneki tikintlasojtlaskej? Moneki tikintlasojtlaskej tokniuan ijkon ken tiktlasojtlaj tofamilia uan akinmej iuan timouikaj. Tla tikintlasojtlaj tokniuan, ijkon tikinpaleuiaj san sekan ma kitekichiuilikan Jehová ika pakilistli (Miq. 2:12).

³ Itech nin tlamachtil tikitaskej Biblia kijtoua ken omotlasojtlakej sekimej. Non techpaleuis ma tikitakan ken uelis tikteititiskej titetlasojtlaj.

4. ¿Ken techititia Santiago 5:11 Jehová techtlasojtla?

⁴ Jehová kipia kualtsin iyelis. Ijkon kijtoua Biblia: “Dios Ye n tlasojtlálistli” (1 Juan 4:8). Ijkuak tikmatij ijkon kipia iyelis, tiknekij iuan timouikaskej. Pero Biblia kijtoua noijki “satlawel tetlasojtlak” (xiktlajtolti Santiago 5:11). ¡Non techititia Jehová sapanoua techtlasojtla!

5. ¿Ken kiteititia Jehová techiknomati uan ken uelis tikchiuaskej ken ye?

⁵ Santiago 5:11 noijki kijtoua Jehová sapanoua techtlasojtla pero ompa noijki kijtoua teiknomati (Éx. 34:6). Jehová techititia techiknomati ijkuak techtlapojpoluia (Sal. 51:1). Biblia techititia Jehová techiknomati pero amo san ijkuak techtlapojpoluia. Ijkuak ikaj teiknomati kisa itech iyolo uan ijkuak kita ikaj tlajyouijtok kipaleuia. Biblia kiyekijtoua Jehová okachi techiknomati uan amo ken se siuatl tlen kipia ikone (Is. 49:15). Ijkuak titlajyouiaj Jehová techiknomati uan techpaleuia (Sal. 37:39; 1 Cor. 10:13). Ma tikchiuakan ken Jehová, ma kinmiknomatikan tokniuan, ma tikintlapojpoluikan uan amo ma tikinkokolikan tla itlaj amo kuali techchiuiliskej (Efes. 4:32). Tikinmititiskej tikinmiknomatij tla tikinpaleuiaj ijkuak tlajyouiaj. Ijkuak titetlasojtlaj noijki titeiknomatij, ijkon tikteititiaj tiknekij tikchiuaskej ken Jehová porque ye ijkon kipia iyelis (Efes. 5:1).

6. ¿Ken okiteititijkej Jonatán uan David omotlasojtlayaj?

⁶ Biblia kijtoua yiuejkika miakej omotlasojtlakej. Ma tikitakan ken omouikayaj Jonatán uan David. Biblia kijtoua David uan Jonatán opejkej mouikaj uan ‘Jonatán opejki kitlasojtla ken ye  omotlasojtlayaʼ (1 Sam. 18:1). Jehová okipejpenki David ma tlanauati ipatka Saúl, ye okatka itajtsin Jonatán. Saúl ochauatik, okualanki uan okinekiaya kimiktis David. Pero Jonatán amo okipaleui itajtsin ijkuak okinekiaya kimiktis David. Jonatán uan David okijtojkej nochipa mouikaskiaj uan mopaleuiskiaj (1 Sam. 20:42).

7. ¿Tlen uelis kichiuaskia amo ma mouikakan Jonatán uan David?

⁷ Tetlajtlachialtia Jonatán uan David kuali omouikayaj maski miak tlamantli kichiuaskia amo ma mouikakan. Jonatán okatka okachi ueyi amo ken David, kanaj 30 xiuitl. Uelis kijtoskia David ok okatka telpochtli uan amo okimatiaya miak tlamantli, ik non, amo uelis iuan mouikaskia. Pero Jonatán amo keman omokuayejyeko David amitlaj ipati.

8. ¿Tleka Jonatán uan David kuali omouikayaj?

⁸ Jonatán uelis kualaniskia iuan David uan uelis kijtoskia ye okinamikiaya yetoskia tekiua porque itajtsin okatka Saúl (1 Sam. 20:31). Pero Jonatán okatka yolyamanki uan okitlakamatki Jehová, ik non, okipaleui David ijkuak Jehová okitlali ma yeto ueyi tekiua maski non okikualani Saúl (1 Sam. 20:32-34).

9. ¿Ken tikmatij Jonatán amo okualanki iuan David?

⁹ Jonatán sapanoua okitlasojtlaya David, ik non, amo iuan okualanki. Jonatán okimatiaya kitekitiltis arco, okatka soldado uan amo omomojtiaya. Biblia kijtoua tlaltikpaktlakamej okijtouayaj ye uan itajtsin yetoskia ken okachi omotlalouayaj amo ken águilas uan okatkaj chikauakej okachi ken leones (2 Sam. 1:22, 23). Ik non, Jonatán uelis moueyinekiskia ika tlen okichi. Pero ye amo okititi David okimatiaya kichiuas okachi miak tlamantli nion okualanki porque kuali okisaya tlen David okichiuaya. Jonatán okipatioitaya David porque okatka yolchikauak uan otlaneltokaya itech Jehová. Jonatán opejki kitlasojtla David ijkuak okimikti Goliat. ¿Ken uelis noijki ijkon tikintlasojtlaskej tokniuan?

10. ¿Tlen kijtosneki ‘ma timosepantlasojtlakah ika nochi toyolo’?

¹⁰ Biblia kijtoua: “Moneki ximosepantlasojtlakah ika nochi nomoyolo” (1 Ped. 1:22). Jehová ijkon kichiua. Ye sapanoua techtlasojtla uan amo keman techkauas tla nochipa tiktlakamatij (Rom. 8:38, 39). Ika griego tlajtoli “sepa”, kijtosneki ijkuak ikaj mochijchikaua tetlasojtlas. Xamo non moneki tikchiuaskej iuan tokniuan. Biblia kijtoua tlen moneki tikchiuaskej ijkuak ikaj techkualania, ompa kijtoua: “Xikmatikan xikinxikokan oksekimej ika tlasojtlalistle. Xikchiwakan de xisetitokan [...]. Iwan ijkón ankipiaskej yolosewilistle se iwan oksé” (Efes. 4:1-3, Itlajtol totajtzin Dios [NHY]). Tla tiknekij tiyetoskej ika yolseuilistli iuan tokniuan amo san ma kitakan tlen amo kuali kichiuaj, ma tikinmitakan ken Jehová kinmita (1 Sam. 16:7; Sal. 130:3).

11. ¿Tleka oui tikintlasojtlaskej tokniuan ijkon ken tiktlasojtlaj tofamilia?

¹¹ Oui tikintlasojtlaskej tokniuan ken tofamilia uan okachi tla san tikitaj tlen amo kuali kichiuaj. Ijkon yopanok itech achto siglo. Ma tikitakan tlen okinpanok Evodia iuan Síntique. Yejuan amo okitayaj  oui tetlapouiskej iuan apóstol Pablo. Pero Evodia iuan Síntique oui okitayaj mouikaskej, ik non, Pablo okinmilui “mamoyekwikakah kemi iknimeh inawak Toteko” (Filip. 4:2, 3).

12. ¿Tlen moneki tikchiuaskej para tikintlasojtlaskej tokniuan ijkon ken tofamilia?

¹² ¿Tlen moneki tikchiuaskej para tikintlasojtlaskej tokniuan ijkon ken tofamilia? Okachi ma tikinmixmatikan, ijkon tikinmajsikamatiskej uan tikintlasojtlaskej. Uelis inmiuan timouikaskej maski yikipiaj miak xiuitl noso okachi telpokamej uan ichpokamej noso oksekan inmialtepe. Ijkon omouikayaj David uan Jonatán, maski ye okatka okachi ueyi amo ken David, kanaj 30 xiuitl. ¿Itech motlanechikol katej akinmej yikipiaj miak xiuitl noso katej telpokamej uan ichpokamej? Ximochijchikaua okachi inmiuan ximouika. Tla ijkon tikchiuas tikteititis tikintlasojtla nochtin tokniuan (1 Ped. 2:17).

13. ¿Tleka amo uelis timouikaskej iuan nochtin tokniuan?

¹³ Tla tikintlasojtlaj tokniuan ken tofamilia, ¿kijtosneki okachi ma timouikakan iuan nochtin? Amo, amo uelis. Amo tlajtlakoli okachi timouikaskej iuan sekimej tokniuan porque kinpaktia kichiuaskej seki tlamantli tlen tejuan tikchiuaj. Jesús kuali omouikaya iuan iapóstoles pero okachi omouikaya iuan Juan (Juan 13:23; 15:15; 20:2). Pero Jesús amo san sekimej okinpatioitak. Ma tikitakan tleka ijkon tikijtoua, ijkuak Juan uan Santiago okiluijkej Jesús ma kintlali inakastlan itech iTekiuajkayo toTajtsin Dios, ye okinmilui: “Pero [amo] Ne Akin kijtos akin motlalis ik noyekma noso ik noopochma” (Mar. 10:35-40). Tejuan noijki ma tikchiuakan ken Jesús okichi uan amo san sekimej ma tikinpatioitakan (Sant. 2:3, 4). Tla ijkon tikchiuaskej tokniuan san sekan yetoskej uan kuali mouikaskej (Jud. 17-19).

14. Ijkon ken kijtoua Filipenses 2:3, TNM, ¿tleka amo ma timotlatlanikan iuan tokniuan?

 ¹⁴ Tla tikintlasojtlaj tokniuan amo inmiuan timotlatlaniskej. Ma tikilnamikikan Jonatán amo okualanki ijkuak okimatki David yetoskia tekiua. Ma tikchiuakan ken Jonatán uan amo ma tikkualanikan tla tokniuan kimatij kichiuaskej tlen tejuan amo tiuelij tikchiuaj. Ma tikchiuakan tlen okijto Pablo, ye okijto amo ma timoueyinekikan uan ma tikinmitakan oksekimej okachi ueyititokej (xiktlajtolti Filipenses 2:3, TNM). Ma tikilnamikikan nochtin tokniuan uelis tlapaleuiskej itech tlanechikol. Tla tiyolyamankej tikitaskej tlen kuali kichiuaj tokniuan uan tikchiuaskej tlen yejuan kichiuaj (1 Cor. 12:21-25).

15. ¿Tlen mitsmachtia tlen okipanok Tanya uan ifamilia?

¹⁵ Ijkuak techpanoua itlaj tlen amo kuali, Jehová techyolseuia ijkuak tokniuan kiteititiaj techtlasojtlaj uan techpaleuiaj. Ma tikitakan tlen okipanok se tonal sábado se familia tlen oyajki itech se ueyi nechikol internacional itech 2019 ompa Estados Unidos, ueyi nechikol omotokayotiaya: “Nochipa titetlasojtlaskej”. Tanya kinpia eyi ikoneuan, ijkuak yomokopatoj ueyi nechikol uan yoyayaj hotel kanin omokalojtijkej, okse carro okiteuito icarro tokni. Ye okijto: “Amikaj itlaj okipanok pero sapanoua otimomojtijkej uan ompa otimokajkej itech autopista. Ijkuakon otikitakej se tokni tlen noijki oyajki ueyi nechikol. Ye okatka itech  inakastlan autopista uan otechilui ma titlejkokan itech icarro. Pero amo san ye omoketski, noijki makuili tokniuan tlen inmialtepe Suecia. Tokniuan siuamej otechnapalojkej noso otechnauatejkej notakotsin uan ne, non otechpaleui. Maski otikinmiluijkej amitlaj otechpanok, tokniuan touan omokajkej. Maski oajsito ambulancia touan omokajkej uan otechpaleuijkej. Otikitakej Jehová sapanoua techtlasojtla. Tlen otechpanok otechpaleui okachi ma tikintlasojtlakan tokniuan uan okachi ma tiktlasojtlakan uan tiktlasojkamatilikan Jehová”. ¿Tikilnamiki ijkuak itlaj omitspanok uan se tokni omitspaleui?

16. ¿Tleka moneki timotlasojtlaskej?

¹⁶ ¿Tlen panos tla tikintlasojtlaj tokniuan ken tikintlasojtlaj tofamilia? Tikinyolseuiskej ijkuak tlajyouiskej uan ijkon san sekan tikueyichiuaskej Jehová ika pakilistli. Noijki ijkon tikteititiskej tikchiuaj ken Cristo, oksekimej kitaskej uan noijki kinekiskej kitekichiuiliskej Jehová. Pero tlen okachi ipati, tikueyichiuaskej itoka Jehová porque ye “Teta non nochipa techiknomati iwa nochipa techyolchikawa” (2 Cor. 1:3). Ik non, ma timochijchikauakan nochipa ma timotlasojtlakan.