1. Ijkon ken tekiua David, ¿xamo tlen motlajtlaniaj sekimej tokniuan?

TINOCHTIN tiknekij kuali tiyetoskej uan tiknekij tikpiaskej yolseuilistli. Amikaj kipaktiaj motekipachos pero ualeua tinochtin tikixnamikij ouijkayotl. Xamo sekimej tokniuan momachiliaj ken tekiua David, ye okitlajtlani Jehová: “¿Hasta keman nimotekipachojtos uan mojmostla nimoyolkokojtos?” (Sal. 13:2).

2. ¿Tlen timomachtiskej?

² Maski ualeua tinochtin san timotekipachojtokej, onka miak tlamantli tlen uelis techpaleuis ayakmo san ma timotekipachojtokan. Itech nin tlamachtil tikitaskej tlen uelis techtekipachos. Satepan tikitaskej chikuase tlamantli tlen techpaleuis ma timoyolseuikan maski tikpiaskej ouijkayotl.

3. ¿Tlen uelis techtekipachos uan kox uelis itlaj tikyektlaliskej?

³ Ualeua uelis okachi timotekipachoskej porque seki tlamantli amo uelis tikyektlaliskej. Ken ijkuak sejse xiuitl patioua tlakuali, totlaken uan kanin tichantij. Amo uelis tikmatiskej keman techiluiskej akinmej inmiuan titekipanouaj noso timomachtiaj ma tikchiuakan itlaj tlen pitsotik noso ma titlakajkayauakan. Noijki tejuan amo uelis tikchiuaskej ayakmo ikaj ma kitlajyouiltikan. Nochi ijkon panoua porque miakej amo kichiuaj tlen kijtouaj principios bíblicos. Satanás tlanauatijtok nikan tlaltikpak uan kimati sekimej ‘okachi kintekipachos tlan onka itech nin tlaltíkpaktliʼ uan ijkon amo kitekichiuiliskej Jehová (Mat.  13:22; 1 Juan 5:19). Ik non, miakej tlajyouiaj uan non kintekipachoua.

4. ¿Tlen timokuayejyekoskej tla san timotekipachojtokej?

⁴ Ijkuak tikpiaj ouijkayotl xamo san itech non timokuayejyekojtokej. Xamo techtekipachoua porque amo tiktlanij miak tomin uan amo ueli tikpiaj tlen moneki noso timokokouaj uan amo ueli titekipanouaj noso otechkixtijkej kanin otitekipanouayaj. Xamo timokuayejyekouaj amo tiktlakamatiskej Jehová ijkuak oksekimej kinekiskej ma tikchiuakan tlen amo kuali uan non techtekipachoua. Noijki xamo timotekipachouaj porque amo tikmatij tlen tikchiuaskej ijkuak Satanás uan akinmej kipaleuiaj kinekiskej kitlajyouiltiskej ialtepe Jehová. Xamo timotlajtlaniaj: “¿Amo kuali tla nechtekipachojtos non?”.

5. ¿Tlen kijtosneki ijkuak Jesús okijto: “Amo ximotekipachokah”?

⁵ Jesús okinmilui imachtijkauan: “Amo ximotekipachokah” (Mat. 6:25). Non amo kijtosneki Jesús okijto amitlaj ma techtekipacho. Yiuejkika sekimej itekipanojkauan Jehová itlaj sapanoua okintekipachouaya pero non amo kijtosneki Jehová ayakmo okinseli (1 Rey. 19:4; Sal. 6:3). * Tlen Jesús okijto, okiteititi amo kineki san ma tiktemojtokan tlen moneki tikpiaskej porque non kichiuas san ma timotekipachojtokan uan ayakmo okachi ma tiktekichiuilikan Jehová. Ik non, ¿tlen uelis tikchiuaskej ijkuak itlaj sapanoua techtekipachos? (Xikita recuadro “ ¿Ken tikchiuaskej?”).

6. ¿Tlen uelis techyolseuis ijkon ken kiteititia Filipenses 4:6, 7?

⁶ (1) Nochipa ma timotlatlaujtikan. Techyolseuis tla tiktlatlaujtiaj Jehová ika nochi toyolo ijkuak titlajyouiaj (1 Ped. 5:7). Jehová technankilis uan techmakas iyolseuilis “non amaka weleti kajsikamati” (xiktlajtolti Filipenses 4:6, 7). Jehová techmakas iespíritu santo para amo okachi ma timotekipachokan (Gál. 5:22).

7. ¿Tlen moneki tikchiuaskej ijkuak tiktlatlaujtiskej toTajtsin Dios?

⁷ Ijkuak tiktlatlaujtiskej Jehová nochi ma tikiluikan. Ma tiktlapouikan tlen techtekipachoua uan tlen tikmachiliaj. Tla uelis tikyektlaliskej, ma tikiluikan ma techmaka ixtlamatilis para tikmatiskej tlen tikchiuaskej uan ma techyolchikaua para uelis tikchiuaskej. Tla amo uelis tikyektlaliskej, ma tiktlatlaujtikan Jehová ma techpaleui para amo okachi timotekipachoskej. Tla tikiluiaj tlen techtekipachoua, satepan tikitaskej ken technankilia Jehová. Tla tikitaj amo technankilia, amo ma timosotlauakan uan ok ma tiktlatlaujtikan. Jehová kineki ma tikiluikan nochi tlen techpanoua uan noijki kineki nochipa ma tiktlatlaujtikan (Luc. 11:8-10).

8. ¿Tlen noijki moneki tikijtoskej ijkuak timotlatlaujtiaj?

⁸ Ijkuak tiktlatlaujtiskej Jehová uan tikiluiskej ken timomachiliaj, ma timokuayejyekokan maski tikpiaj ouijkayotl noijki tikpiaj miak tlamantli tlen ye yotechmakak uan ma tiktlasojkamatilikan. Pero ¿tlen moneki tikchiuaskej tla amo tikmatij ken tikiluiskej Jehová tlen  tikmachiliaj? Ma tikilnamikikan Jehová uelis techkakis maski san tikiluiskej: “¡Nimitstlatlaujtia techpaleui!” (2 Crón. 18:31; Rom. 8:26).

9. ¿Tlen uelis tikchiuaskej tla itlaj techmomojtia?

⁹ (2) Ma tikneltokakan Jehová techpaleuis uan amo ma tikneltokakan san tejuan uelis tikyektlaliskej tlen techpanoua. Itech siglo 8 achto itech xiuitl 1, akinmej ochantiayaj Judá sapanoua omomojtiayaj porque asirios okinekiayaj kinteuiskej uan kinmoaxkatiskej ialtepe, ik non, judíos okinmiluijkej ma kinpaleuikan akinmej ochantiayaj Egipto (Is. 30:1, 2). Ken ijkon okipejpenkej, Jehová okinmilui itlaj amo kuali kinpanoskia (Is. 30:7, 12, 13). Ye okitekitilti Isaías para ma kinmilui tlen omonekiaya kichiuaskej para momakixtiskej. Isaías okijto: “Nanyetoskej chikauakej tla nanmoyolseuijtokej uan nantlaneltokaj” itech Jehová (Is. 30:15b).

10. Xikijto ken uelis tikteititiskej tikneltokaj Jehová techpaleuis.

¹⁰ Ma tikitakan ken uelis tikteititiskej tikneltokaj Jehová techpaleuis. Ximokuayejyeko ikaj mitsiluia xitekipanoti kanin okachi mitstlaxtlauiskej pero monekis titekipanos miak horas uan non kichiuas ayakmo okachi xiktekichiuili Jehová. Xamo se tlakatl noso se siuatl tlen iuan titekipanoua uan amo iTlaixpantijka Jehová kinekis iuan xinemi. Noso ¿tlen tikchiuas tla se mofamiliar mitsiluis ayakmo mouan mouikas porque tiktekichiuilia Jehová? Oui tla ijkon techpanos pero Jehová techpaleuis ma tikchiuakan tlen kuali (Mat. 6:33; 10:37; 1 Cor. 7:39). ¿Tikneltokaskej techpaleuis uan tikchiuaskej tlen techiluia?

11. ¿Itech akinmej uelis timomachtiskej para tikxikoskej ijkuak techtlajyouiltiskej?

¹¹ (3) Ma timomachtikan tlen yiuejkika sekimej okichijkej. Biblia techtlapouia itech sekimej tlen okichijkej tlen amo kuali uan oksekimej okichijkej tlen kuali, kiteititiaj miak ipati amo san ma timotekipachojtokan uan ma tikneltokakan Jehová techpaleuis. Ijkuak non timomachtiskej ma tikitakan tlen okinpaleui itekipanojkauan Jehová ma moyolseuikan ijkuak sekimej okinekiayaj kintlajyouiltiskej. Ma tikitakan tlen okinpanok apóstoles, yejuan amo omomojtijkej ijkuak akinmej otlanauatiayaj sanedrín okinmiluijkej ayakmo ma tetlapouikan okijtojkej: “Tejwah tikpiah tiktlakitaskeh tlan Dios kijtoa iwa amo tlan kijtoah n tlakah” (Hech. 5:29). Yejuan amo omomojtijkej maski okinuitekej. Porque okimatiayaj Jehová kinpaleuiskia. Ik non, otetlapouijkej (Hech. 5:40-42). Noijki ijkon okipanok Esteban, kuali omoketoka uan amo omomojti ijkuak kimiktiskiaj, “ixko omotaya kemi ixko se ángel” (Hech. 6:12-15). Ye okimatiaya Jehová oyolpakiaya porque okichijtoka tlen kineki.

12. Ijkon ken kijtoua 1 Pedro 3:14 uan 4:14, ¿tleka uelis tiyolpakiskej maski techtlajyouiltiskej?

¹² Apóstoles kuali okimatiayaj Jehová okinpaleuiaya porque okinmakak ichikaualis para ma kinchiuakan milagros (Hech. 5:12-16; 6:8). Axkan Jehová amo techmaka ichikaualis para tikchiuaskej milagros pero tiktekichiuiliaj, ik non, techmaka iTlajtol uan techititia techtlasojtla porque techiluia techmakas iespíritu santo uan techselis tla techtlajyouiltiaj (xiktlajtolti 1 Pedro 3:14; 4:14). Ik non, amo san  ma timotekipachojtokan nion ma timokuayejyekojtokan tlen tikchiuaskej tla satepan techtlajyouiltiskej. Ma timochijchikauakan okachi ma tikneltokakan Jehová uelis techpaleuis uan techmakixtis. Ijkon ken imachtijkauan Jesús ma tikilnamikikan tlen ye okinmilui: “Ne nomechinmakas n tlájtolteh non nomejwah nonkintenkixtiskeh, iwa nion se de akin nomechkokolia kixikos nion nomechtlajtolkopas”. Noijki ye techiluia: “Iwa tla nochi nonkixikoskeh, nonmomakixtiskeh” (Luc. 21:12-19). Noijki ma tikilnamikikan ijkuak se itekipanojka Jehová ixpoliui, ye kilnamiki nochi tlen okichi uan satepan kiyolitis.

13. ¿Ken techpaleuis tla timomachtiskej tlen okinpanok sekimej tlen amo okineltokakej Jehová kinpaleuiskia?

¹³ Noijki uelis timomachtiskej itech akinmej amo okineltokakej Jehová kinpaleuiskia. Tla timomachtiskej tlen okinpanok, techpaleuis amo ma tikchiuakan ijkon ken yejuan. Ma tikitakan tlen okipanok tekiua Asá. Ijkuak opejki tlanauatia ompa altepetl Judá okineltokak Jehová kinpaleuiskia ijkuak moteuiskiaj iuan miakej soldados. Jehová okinteochi uan otlatlankej (2 Crón. 14:9-12). Satepan tekiua Baasá tlen otlanauatiaya ompa altepetl Israel uan amo okachi miakej soldados okinpiaya, okinekiaya kiteuis ialtepe Asá. Pero ye ayakmo okineltokak Jehová kinmakixtiskia, ik non, okintlaxtlaui sirios para ma kinpaleuikan (2 Crón. 16:1-3). Ijkuak sapanoua omokoko uan yiixpoliuiskia, amo okilui Jehová ma kipaleui (2 Crón. 16:12).

14. ¿Tlen techmachtia tlen okichi Asá?

¹⁴ Achto ijkuak Asá okipiaya ouijkayotl okiluiaya Jehová ma kipaleui pero satepan ayakmo okineltokak kipaleuiskia uan san iselti okinekiaya mopaleuis. Xamo Asá okitaya kuali kinmiluis sirios ma kipaleuikan ma kiteuikan altepetl Israel. Pero amo ijkon opanok Jehová okilui ika se profeta: “Ken otimopaleui itech ueyi tekiua tlen kajki Siria uan amo itech Jehová moTajtsin Dios, isoldados ueyi tekiua itech Siria momak ocholojkej” (2 Crón. 16:7). Tejuan noijki moneki timomaluiskej para amo tikneltokaskej tejuan toselti uelis timopaleuiskej uan amo tiktemoskej Jehová ma techpaleui. Ualeua moneki san niman tikitaskej tlen tikchiuaskej pero kuali tikpejpenaskej tla amo san tikchijtikisaj tlen timokuayejyekouaj uan tikneltokaj Jehová techpaleuis.

15. ¿Tlen uelis tikchiuaskej ijkuak tiktlajtoltiaj Biblia?

¹⁵ (4) Ma tikinmilnamikikan versículos. Ijkuak tikintlajtoltiskej seki versículos kanin kijtouaj amo ma timomojtikan uan ma tikneltokakan Jehová techpaleuis, ma tikinmilnamiktokan tlen techpaleuiskej. Xamo techpaleuis tla tikintlajtoltiaj noso tikinmijkuilouaj uan tikinmojpauiaj. Jehová okinauati Josué mojmostla ma kitlajtolti itlanauatil uan itech ma mokuayejyeko, ijkon yetoskia ixtlamatki. Noijki kipaleuiskia amo ma momojti uan ma kiyekana ialtepe Jehová (Jos. 1:8, 9). Itech iTlajtol toTajtsin Dios katej versículos tlen techpaleuiaj ma timoyolseuikan maski seki tlamantli uelis techtekipachos (Sal. 27:1-3; Prov. 3:25, 26).

16. ¿Ken kintekitiltia Jehová tokniuan para ma techyolchikauakan uan ma tikneltokakan Jehová techpaleuis?

¹⁶ (5) Nochipa ma tiyetokan iuan tokniuan.  Jehová kintekitiltia tokniuan para ma techyolchikauakan uan ma tikneltokakan Jehová techpaleuis. Ijkuak timonechikouaj techpaleuia tlen ompa timomachtiaj, ompa tikinkakij ken tlanankiliaj tokniuan uan inmiuan timotlapouiaj (Heb. 10:24, 25). Noijki timoyolchikauaskej ijkuak tikiluiskej se toyolikni ken timomachiliaj. Ye uelis techyolchikauas ‘ijkuak techiluis se kuali tlajtoli’ uan ijkon amo okachi timotekipachoskej (Prov. 12:25).

17. Ijkon ken kijtoua Hebreos 6:19, ¿ken techpaleuis tla tikilnamiktoskej tlen tikseliskej satepan?

¹⁷ (6) Ma tikilnamiktokan tlen tikseliskej satepan. Tla tikneltokaj tlen kichiuas iTekiuajkayo toTajtsin Dios, techpaleuia amo okachi ma timotekipachojtokan maski tikpiaskej ouijkayotl, non yetoskia ken se “ankla non kitsoponia ijtik atl” (xiktlajtolti Hebreos 6:19). Ma timokuayejyekokan tlen Jehová yokijto kichiuas para satepan ayakmo timotekipachoskej (Is. 65:17). Ma timokuayejyekokan itech xochitlali ayakmo techpanos tlen amo kuali uan tinochtin tiyetoskej ika yolseuilistli. Noijki para tikilnamiktoskej tlen tikseliskej satepan, ma titetlapouikan tlen Jehová yokijto kichiuas uan ma tikinmachtikan oksekimej ma kichiuakan ken Cristo. Tla ijkon tikchiuaj, ‘tikseliskeh nochi tlan kuali, tlan tikchixtokeh ika pakílistli’ (Heb. 6:11).

18. ¿Tlen panos satepan uan tlen uelis tikchiuaskej?

¹⁸ Ijkuak ayakmo miak poliuis para tlamis nochi tlen amo kuali tikpiaskej okachi ouijkayotl uan okachi timotekipachoskej. Texto tlen motekitiltis 2021 techititia tla tiknekij timoyolseuijtoskej moneki tikneltokaskej Jehová techpaleuis uan amo ma tikneltokakan san tejuan toselti uelis timopaleuiskej. Nochtin ma tikneltokakan tlen Jehová yokijto: “Nanyetoskej chikauakej tla nanmoyolseuijtokej uan nantlaneltokaj” (Is. 30:15).