1. ¿Ken timouikaj iuan Jehová?

 TINOCHTIN techpaktia tiyetoskej iuan akinmej tikintlasojtlaj. Akinmej yomonamiktijkej kinpaktia san sekan yetoskej, telpochmej uan ichpochmej kinpaktia yetoskej iuan inyolikniuan uan tinochtin techpaktia tiyetoskej iuan tokniuan. Pero okachi techpaktia timouikaskej iuan Jehová. Ijkon tikchiuaj ijkuak tiktlatlaujtiaj, tiktlajtoltiaj iTlajtol, timokuayejyekouaj ken techtlasojtla uan tlen kichiuas satepan. Sapanoua tikpatioitaj ijkon tikchiuaskej (Sal. 139:17).

2. ¿Tleka ualeua oui tikchiuaskej seki tlamantli para timouikaskej iuan Jehová?

² Maski tikchiuaj seki tlamantli para timouikaskej iuan Jehová ualeua tikitaj oui porque titekipanouaj, tikpaleuiaj tofamilia uan okseki tlamantli. Non uelis kichiuas ayakmo ma timotlatlaujtikan, ayakmo ma timomachtikan nion ma timokuayejyekokan tlen kijtoua Biblia.

3. ¿Tleka moneki timomaluiskej?

³ Pero moneki timomaluiskej porque xamo tikchijtoskej seki tlamantli maski amo tlajtlakoli timotonalpoloskej uan non kichiuas ayakmo ma tikchiuakan tlen moneki para timouikaskej iuan Jehová. Tinochtin uelis timoyolpaktiskej pero tla tiuejkauaj ijkon tikchiuaj satepan ayakmo timajxiliskej tikueyichiuaskej Jehová.  Ik non, ma tikitakan tlen okachi moneki tikchiuaskej (Prov. 25:27; 1 Tim. 4:8).

4. ¿Tlen timomachtiskej?

⁴ Axkan tikitaskej tleka moneki tikpejpenaskej tlen okachi moneki tikpatioitaskej. Noijki tikitaskej ken uelis okachi timouikaskej uan Jehová uan ken techpaleuis ijkon tikchiuaskej.

5. ¿Ken uelis kinpaleuis telpochmej uan ichpochmej Efesios 5:15-17 ma kipejpenakan tlen kichiuaskej?

⁵ Kuali xikpejpena tlen tikchiuas. Miakej telpochmej uan ichpochmej kintekipachoua ken yetoskej satepan. Akinmej kinmachtiaj itech escuela uan infamiliares akinmej amo iTlaixpantijkauan Jehová xamo kinmiluiaj ma kitakan tlen momachtiskej itech escuela para satepan kitlaniskej miak tomin. Pero xamo ayakmo majxiliskej kichiuaskej okseki tlamantli. Pero itatajuan uan tokniuan kinyoleuaj ma motemakakan ixpan Jehová uan ma kitekichiuilikan. ¿Tlen kinpaleuis telpochmej uan ichpochmej tlen kitlasojtlaj Jehová ma kipejpenakan tlen okachi moneki? Xiktlajtolti Efesios 5:15-17 (xiktlajtolti), ijkuak yotimokuayejyeko tlen ompa kijtoua satepan ximotlajtlani: “¿Tlen kineki Jehová ma nikchiua? ¿Tlen kiyolpaktis ma nikpejpena? ¿Tlen nechpaleuis ma nikchiua tlen okachi moneki?”. Ma tikilnamikikan axkan san panoua tlen amo kuali uan Jehová yikipojpolos nochi tlen kiyekana Satanás. Tiyetoskej tiixtlamatkej tla tikpejpenaj tikyolpaktiskej Jehová.

6. ¿Tlen okipejpenki María uan tleka kuali ijkon okichi?

⁶ Ma tikitakan tlen okachi moneki tikchiuaskej. Maski amo tlajtlakoli tlen tiknekij tikchiuaskej moneki kuali tikpejpenaskej. Ijkuak Jesús okintlajpaloto María uan Marta, ye oyolpakiaya porque okintlajpaloto, ik non, okinekiaya sapanoua. Pero María omotlalito inauak Jesús para kikakis tlen otlamachtiaya. Amo tlajtlakoli tlen okichi Marta pero María okipejpenki tlen okachi ipati (Luc. 10:38-42). Xamo María okilka tlen okikua non tonal pero amo keman okilka tlen okimachti Jesús. María okipatioitak kikakis Jesús, tejuan noijki moneki timajxiliskej para ma techmachti Jehová. ¿Ken uelis tikkauiliskej Jehová ma techmachti?

7. ¿Tleka moneki timotlatlaujtiskej, timomachtiskej uan timokuayejyekoskej?

⁷ Ma tikilnamikikan tikueyichiuaj Jehová ijkuak timotlatlaujtiaj, timomachtiaj uan timokuayejyekouaj. Ijkuak timotlatlaujtiaj timotlapouiaj iuan toTajtsin Jehová (Sal. 5:7). Ijkuak timomachtiaj Biblia tikseliaj “ixtlamatilis toTajtsin Dios” porque sapanoua ixtlamatki (Prov. 2:1-5). Ijkuak timokuayejyekouaj tlen timomachtiaj, tikitaj ken techtlasojtla Jehová uan tikilnamikij tlen kichiuas satepan para tinochtin. Kuali tla timajxiliaj ijkon tikchiuaskej. Pero ¿tlen techpaleuis ijkon ma tikchiuakan?

8. ¿Tlen techmachtia tlen okichi Jesús ijkuak okatka kanin tlauaki?

⁸ Ma timomachtikan kanin amo timokuayejyekojtoskej okse tlamantli.  Ma tikitakan tlen okichi Jesús. Ijkuak opejki tetlapouia nikan tlaltikpak 40 tonal oyajki kanin tlauaki (Luc. 4:1, 2). Ompa omotlatlaujti uan omokuayejyeko tlen okinekiaya iTajtsin uan non okipaleui ijkuak otlajyoui. ¿Tlen techmachtia tlen okichi Jesús? Xamo timiakej itech tofamilia uan tokalijtik amo tikpiaj kanin timomachtiskej, ¿uelis timomachtiskej kiauak? Ijkon kichiua Julie ijkuak kineki motlapouis iuan Jehová. Ye chanti ompa Francia iuan inamik, oui yetos iselti uan momachtis, ye okijto: “Mojmostla nio parque, ompa nika noselti uan ueli nimotlapouia iuan Jehová”.

9. Maski Jesús okichiuaya miak tlamantli, ¿ken okiteititi okipatioitak mouikas iuan Jehová?

⁹ Jesús nochipa okipiaya miak tekitl. San kanin oyaya miakej okinekiayaj ma kinkaki uan inmiuan ma yeto. Biblia kijtoua se tonal miakej okinekiaya kitaskej, ik non, “nochteh non ochantitokah itech non altepetl omoololojkeh kaltempa”. Maski Jesús inmiuan okatka nochipa omochijchika mouikas iuan Jehová. Ijkuak ok otlayouatoka oyajki iselti para motlapouis iuan iTajsin (Mar. 1:32-35).

10, 11. Ijkon ken kijtoua Mateo 26:40, 41, ¿tlen okinmilui imachtijkauan Jesús uan tlen okichijkej?

¹⁰ Jesús ayakmo tetlapouiskia porque non youak yikimiktiskiaj. Ye oyajki xochitlali Getsemaní kanin uelis motlapouiskia iuan iTajsin uan mokuayejyekoskia (Mat. 26:36). Ompa Jesús okinmilui imachtijkauan ken omonekiaya motlatlaujtiskej.

¹¹ Ijkuak oajsitoj xochitlali Getsemaní xamo yopanok tlajko youak. Jesús okinmilui iapóstoles ma ijsatokan uan ye oyajki omotlatlaujtito (Mat. 26:37-39). Ijkuak Jesús omokopki okinmajsito kochtokej, ik non, okinmilui: “Xiijsatokah iwa ximotiotsajtsilikah” (xiktlajtolti Mateo 26:40, 41). Ye okimatiaya imachtijkauan sapanoua omotekipachouayaj uan osotlauayaj, ik non, okinmiknomatki uan okinmilui: “Nomokuerpo amo chikawak”. Ijkuak ome uelta omotlatlaujtito uan omokopki oksepa okinmajsito okochtokaj uan amo omotlatlaujtijtokaj (Mat. 26:42-45).

12. ¿Tlen moneki tikchiuaskej tla tisotlauaj noso timotekipachouaj uan amo ueli timotlatlaujtiaj?

¹² Ma tikitakan keman moneki timotlatlaujtiskej. Xamo ualeua amo timotlatlaujtiaj porque sapanoua tisotlauaj.  Tinochtin ijkon techpanoua. ¿Tlen uelis tikchiuaskej? Sekimej tokniuan omotlatlaujtiayaj ijkuak yikochiskiaj pero satepan okitakej omonekiaya motlatlaujtiskej ijkuak ayamo okachi sotlauaj. Oksekimej para amitlaj kintlapololtis ijkuak motlatlaujtiaj, motlaliaj noso motlankuaketsaj. Pero tla sapanoua timotekipachouaj, ma tikiluikan Jehová ken timomachiliaj porque ye techiknomati uan techajsikamati (Sal. 139:4).

13. ¿Ken kichiuas toteléfono noso okseki tlamantli amo ma timokuayejyekokan tlen timomachtijtokej?

¹³ Amo ma timokuayejyekokan okse tlamantli ijkuak timomachtiskej. Timouikaskej iuan Jehová tla timotlatlaujtiaj pero noijki moneki ma timomachtikan iTlajtol uan ma timonechikokan iuan tokniuan. ¿Tlen uelis tikchiuaskej para kuali timomachtiskej Biblia uan kuali titlakaktoskej ijkuak timonechikouaj? Ma timotlajtlanikan: “¿Tlen kichiua okse tlamantli ma nimokuayejyeko?”. ¿Xamo ikaj mitsnotsas itech moteléfono, mitstitlaniliskej mensajes noso correos electrónicos? Non tlamantli techpaleuia uan miakej kitekitiltiaj. Pero sekimej ixtlamatkej kijtouaj ijkuak ikaj kineki san se tlamantli mokuayejyekos kita oui tla ompa kipia se teléfono. Se akin tlamachtia psicología okijto: “Amo timokuayejyekos tlen tikchijtok porque timokuayejyekojtos okse tlamantli”. Ijkuak otiayaj uejueyij nechikolmej otechiluiayaj amo ma tsilini toteléfono para oksekimej kuali ma tlakaktokan. Axkan noijki amo ma tikkauakan ma tsilini toteléfono noso okseki tlamantli ijkuak timomachtiaj uan timotlatlaujtiaj porque non uelis techtlapololtis.

14. Ijkon ken kijtoua Filipenses 4:6, 7, ¿ken techpaleuis Jehová para san ma timokuayejyekojtokan tlen timomachtiaj?

¹⁴ Ma tikiluikan Jehová ma techpaleui san ma timokuayejyekokan tlen timomachtiaj. Tla timomachtiaj noso timonechikouaj uan tikitaj peua timokuayejyekouaj okse tlamantli, ma tikiluikan Jehová ma techpaleui. Tla  itlaj sapanoua techtekipachoua xamo amo timokuayejyekoskej tlen ye techmachtia pero moneki timochijchikauaskej. Ma tiktlatlaujtikan Jehová para amo san ma kimalui toyolo, noijki ma kimalui tlen timokuayejyekouaj (xiktlajtolti Filipenses 4:6, 7).

15. ¿Ken techpaleuia tla timochijchikauaj timouikaj iuan Jehová?

¹⁵ Techpaleuis miak tla timotlapouiaj iuan Jehová, tiktlajtoltiaj uan timokuayejyekouaj tlen kijtoua iTlajtol. ¿Ken uelis techpaleuis? Se: kuali tikpejpenaskej tlen tikchiuaskej. Biblia kijtoua “akin nemi iuan akin ixtlamatki ye noijki yetos ixtlamatki” (Prov. 13:20). Ik non, tla timochijchikauaj timouikaj iuan Jehová tiyetoskej tiixtlamatkej porque ye ixtlamatki. Tikajsikamatiskej ken uelis tikyolpaktiskej uan amo tikchiuaskej tlen uelis kiyolkokos.

16. ¿Ken techpaleuia timochijchikauaskej timouikaskej iuan Jehová?

¹⁶ Ome: okachi kuali titlamachtiskej. Ijkuak ikaj tikmachtiaj tiknekij ye noijki ma mouika iuan Jehová. Okachi tiktlasojtlaskej Jehová tla nochipa iuan timotlapouiaj noijki okachi tikmatiskej titlamachtiskej. Ijkon okichi Jesús. Ijkuak okintlapouiaya imachtijkauan tlen kichiua Jehová okiteititiaya sapanoua okitlasojtlaya, ik non, yejuan noijki okitlasojtlakej Jehová (Juan 17:25, 26).

17. ¿Ken techpaleuia timotlatlaujtiskej uan timomachtiskej?

¹⁷ Eyi: okachi titlaneltokaskej. Ijkuak tikiluiaj Jehová ma techyekana, ma techyolchikaua uan ma techpaleui, okachi titlaneltokaj porque tikitaj ken technankilia (1 Juan 5:15). Noijki okachi titlaneltokaj tla timomachtiaj Biblia porque ompa kijtoua “titlaneltokah ijkuak tikkakih” (Rom. 10:17). Tla tiknekij tikpiaskej chikauak totlaneltokilis, amo san moneki tikmatiskej miak tlamantli. ¿Tlen okseki moneki tikchiuaskej?

18. Xikijto tleka moneki timokuayejyekoskej.

¹⁸ Moneki timokuayejyekoskej tlen timomachtiaj. Ma tikitakan ken okichi akin okijkuilo Salmo 77. Sapanoua omotekipachouaya porque omokuayejyekouaya ye uan oksekimej israelitas ayakmo okinseliaya toTajtsin Dios. Sapanoua omotekipachouaya, ik non, amo ueli okochiaya (versículo 2-8). Ye  okilui Jehová: “nimokuayejyekos itech nochi tekitl tlen tikchiua uan nimokuayejyekos itech ken tikchiua” (versículo 12). Maski kuali okimatiaya ken Jehová okipaleui ialtepe, omotlajtlaniaya: “¿Kox toTajtsin Dios amo kilnamiki techpaleuis noso ayakmo techiknomati porque sapanoua kualantok? ” (versículo 9). Akin okijkuilo non salmo omokuayejyeko tlen Jehová kichiua uan ken yiuejkika okinmiknoma ialtepe (versículo 11). Ijkon salmista okachi okineltokak Jehová kipaleuiskia ialtepe (versículo 15). Tejuan noijki okachi titlaneltokaskej tla timokuayejyekouaj ken yokipaleui ialtepe uan ken yotechpaleui.

19. ¿Ken techpaleuia tla timochijchikauaj timouikaj iuan Jehová?

¹⁹ Naui: okachi tiktlasojtlaskej Jehová. Tla ijkon tikchiuaskej, tiktlakamatiskej Jehová, timochijchikauaskej tikyolpaktiskej uan titlaxikoskej maski san tlen techpanos (Mat. 22:37-39; 1 Cor. 13:4, 7; 1 Juan 5:3). ¡Okachi ipati timouikaskej iuan Jehová Dios! (Sal. 63:1-8).

20. ¿Tlen tikchiuas para okachi timouikas iuan Jehová?

²⁰ Ma tikilnamikikan tla timotlatlaujtiaj, timomachtiaj uan timokuayejyekouaj, tikueyichiuaj Jehová. Ma tikchiuakan ken Jesús para timouikaskej iuan Jehová, ma tikitakan kanin uan keman ijkon tikchiuaskej. Ijkuak tikueyichiuaj Jehová, ma tiktlatlaujtikan ma techpaleui para amo timokuayejyekojtoskej okse tlamantli. Tla timouikaj iuan Jehová, ye techteochiuas porque satepan nochipa tiyoltoskej (Mar. 4:24).