TLAMACHTIL 4
¿Tleka timonechikouaj ijkuak tikilnamikij imikilis Jesús?
“Ijkí xikchiwakah para nonnechilnamikiskeh” (LUC. 22:19).
TLAKUIKALI 20 Jehová okitemakak ikone
XIKILNAMIKTO *
1, 2. (1) ¿Keman okachi tikilnamikij akin oixpoliuik? (2) ¿Tlen otlanauati Jesús ijkuak ayamo okimiktiayaj?
IJKUAK ixpoliui ikaj akin tiktlasojtlaj maski panoua miak xiuitl ok tikilnamikij. Pero okachi tikilnamikij sejse xiuitl ijkuak oixpoliuik.
2 Sejse xiuitl sapanoua miakej timonechikouaj porque tikilnamikij imikilis akin sapanoua tiktlasojtlaj: Jesucristo (1 Ped. 1:8). Ijkon tikchiuaj porque tikilnamikij topatka okimiktijkej para techmakixtis porque titlajtlakolejkej uan tiixpoliuij (Mat. 20:28). Jesús okinekiaya imachtijkauan ma kilnamikikan ijkuak topatka okimiktijkej. Non youak ijkuak ayamo okimiktiayaj okichi iCena uan otlanauati: “Ijkí xikchiwakah para nonnechilnamikiskeh” (Luc. 22:19). *
3. ¿Tlen timomachtiskej?
3 Miakej monechikouaj para kilnamikiskej imikilis Jesús. Akinmej monechikouaj non tonal san sekimej yaskej iluikak, oksekimej chantiskej nikan tlaltikpak. Axkan tikitaskej tleka yejuan kinekij monechikoskej non tonal uan noijki tikitaskej ken techpaleuia timonechikoskej para tikilnamikiskej imikilis Jesús. Achto ma tikitakan tleka tlapejpenalmej kipatioitaj monechikoskej non tonal.
¿TLEKA MONECHIKOUAJ TLAPEJPENALMEJ?
4. ¿Tleka san tlapejpenalmej kikuaj pan uan konij vino ijkuak tikilnamikij imikilis Jesús?
4 Tlapejpenalmej kinekij kilnamikiskej sejse xiuitl imikilis Jesús porque ijkuakon kikuaj pan uan konij vino. ¿Tleka yejuan ijkon kichiuaj? Tikmatiskej tla tikilnamikij tlen okichi Jesús ijkuak ayamo okimiktiayaj. Ijkuak okichi Pascua satepan okichi tlen axkan moixmati ken iCena. Okinpanoltili pan 11 iapóstoles uan okinmilui ma kikuakan uan satepan okinpanoltili vino uan okinmilui ma konikan. Noijki okintlapoui itech ome tlajtolsenkaualistli: se yankuik uan se itech Tekiuajkayotl (Luc. 22:19, 20, 28-30). * Ome tlajtolsenkaualistli kinpaleuia apóstoles uan tlapejpenalmej ma yetokan tekiuajkej uan teopixkej ompa iluikak (Apoc. 5:10; 14:1). Tlapejpenalmej tlen ok katej nikan tlaltikpak, pouij itech non ome tlajtolsenkaualistli, ik non, ijkuak tikilnamikij imikilis Jesús san yejuan kikuaj pan uan konij vino.
5. ¿Tlen kimatij tlapejpenalmej?
5 Noijki tlapejpenalmej monechikouaj para kilnamikiskej imikilis Jesús uan ijkon mokuayejyekoskej tlen kiseliskej. Jehová okinmilui ompa iluikak kuali yetoskej uan amo keman ixpoliuiskej. Tlanauatiskej iuan Jesús iuan oksekimej tlen pouij itech 144,000 uan yetoskej ixpan Jehová (1 Cor. 15:51-53; 1 Juan 3:2). Tlapejpenalmej kimatij tlen Jehová kineki kinmakas. Tla kinekij yetoskej iluikak moneki nochipa kitlakamatiskej (2 Tim. 4:7, 8). Yolpakij ijkuak mokuayejyekouaj tlen kiseliskej (Tito 2:13). Uan ¿tlen kinpanos akinmej pouij itech “oksekimeh ichkameh”? (Juan 10:16). ¿Tleka monechikouaj para kilnamikiskej imikilis Jesús? Ma tikitakan seki tlamantli.
¿TLEKA MONECHIKOUAJ AKINMEJ POUIJ ITECH “OKSEKIMEH ICHKAMEH”?
6. ¿Tleka akinmej pouij itech “oksekimeh ichkameh” monechikouaj sejse xiuitl?
6 Akinmej pouij itech “oksikimeh ichkameh” monechikouaj para kilnamikiskej imikilis Jesús pero amo kikuaj pan nion konij vino. Itech 1938 opejki kinyoleuaj ma monechikokan akinmej chantiskej nikan tlaltikpak. Revista tlen okixmatiayaj La Torre del Vigía tlen okiski 1 de marzo 1938, okijto akinmej pouij itech oksekimej ichkamej moneki monechikoskej para kitaskej ken kichiuaj. Noijki okijto: “Ijkuakon yejuan noijki moneki yolpakiskej. Ijkon ken ijkuak akinmej yauij kanin monamiktiaj, yolpakij kitaskej ken monamiktiaj”. Akinmej pouij itech “oksikimeh ichkameh” noijki yolpakij kilnamikiskej imikilis Jesús.
7. ¿Tleka akinmej pouij itech “oksekimeh ichkameh” kinekij kikakiskej tlamachtil ijkuak kilnamikij imikilis Jesús?
7 Akinmej pouij itech “oksikimeh ichkameh” mokuayejyekouaj tlen kiseliskej. Kinekij kikakiskej tlamachtil tlen kitemakaj ijkuak kilnamikij imikilis Jesús porque ompa kijtouaj tlen kichiuaskej Cristo uan 144,000, ijkuak tlanauatiskej mil xiuitl nikan tlaltikpak. Jesús uan akinmej iuan tlanauatiskej kichiuaskej tlaltikpak ma yeto se xochitlali uan kinpaleuiskej nochtin ayakmo ma kipiakan tlajtlakoli. Akinmej kilnamikij imikilis Jesús sapanoua yolpakij porque mokuayejyekouaj ken mochiuas tlen kijtoua Isaías 35:5, 6; 65:21-23 uan Apocalipsis 21:3, 4. Tla mokuayejyekouaj ken yetoskej itech xochitlali iuan akinmej kintlasojtlaj, okachi kineltokaskej tlen Jehová kinmakas uan non kinpaleuis nochipa ma kinekikan kitekichiuiliskej (Mat. 24:13; Gál. 6:9).
8. ¿Tleka akinmej pouij itech “oksekimeh ichkameh” noijki monechikouaj para kilnamikiskej imikilis Jesús?
8 Akinmej pouij itech “oksekimeh ichkameh” noijki monechikouaj uan kilnamikij imikilis Jesús porque kintlasojtlaj tlapejpenalmej uan kinekij kinpaleuiskej. ITlajtol toTajtsin Dios kijtoua tlapejpenalmej uan akinmej mokauaskej nikan tlaltikpak san sekan kiueyichiuaskiaj Jehová. Ma tikitakan seki profecías tlen ijkon kiteititia.
9. Ijkon ken kijtoua Zacarías 8:23, ¿akinmej pouij itech “oksekimeh ichkameh” ken kinmitaj tlapejpenalmej?
9 (Xiktlajtolti Zacarías 8:23). Nin Profecía kiteititia akinmej pouij itech “oksekimeh ichkameh” mouikaj iuan tokniuan tlapejpenalmej. Tlajtoli “tlakatl judío” uan “namouan” kijtosneki yejuan tlapejpenalmej tlen ok katej nikan tlaltikpak (Rom. 2:28, 29). “Majtlaktli tlakamej tlen tlatlamantli tlajtouaj itech altepemej” kijtosneki yejuan akinmej pouij itech “oksekimeh ichkameh”. Tlajtoli ‘kikitskiaj ikue’ kijtosneki nochipa kinpaleuiaj tlapejpenalmej uan san sekan kiueyichiuaj Jehová. Ik non, inmiuan tlapejpenalmej san sekan kilnamikij imikilis Jesús.
10. ¿Tlen yokichi Jehová para ma mochiua tlen kijtoua Ezequiel 37:15-19, 24, 25?
10 (Xiktlajtolti Ezequiel 37:15-19, 24, 25). Tlen kijtoua non profecía kiteititia Jehová kichiua san sekan ma kitekichiuilikan tlapejpenalmej uan akinmej pouij itech oksekimej ichkamej. Profecía tlajtoua itech ome kuajmej. Akinmej yaskej iluikak yetoskia ken itlako “Judá” (itech non tribu okinpejpenayaj akinmej tlanauatiskiaj altepetl Israel) uan akinmej mokauaskej nikan tlaltikpak yetoskiaj ken itlako “Efraín”. * Jehová kinsetiliskia para ma mochiua “san se tlakotl”. Kijtosneki san sekan kitekichiuiliskej ijkuak ualtlanauatis iTekiua, Cristo Jesús. Sejse xiuitl tlapejpenalmej uan akinmej pouij itech “oksekimeh ichkameh” monechikouaj para kilnamikiskej imikilis Jesús, ijkon ‘nochteh kateh sansikah iwa san kajki se tlájpixki’ (Juan 10:16).
11. “Ichkameh” tlen ijkuilitok itech Mateo 25:31-36, 40, ¿ken kinpaleuiaj ikniuan Cristo?
11 (Xiktlajtolti Mateo 25:31-36, 40). Itech nonmej textos ijkuilitok “ichkameh”, kijtosneki yejuan yolkualmej tlen yoltoskej ijkuak tlamis nochi tlen amo kuali uan mokauaskej nikan tlaltikpak. Kinpaleuiaj tlapejpenalmej itech se ueyi tekitl: tetlapouiaj uan tlamachtiaj itech nochi tlaltikpak (Mat. 24:14; 28:19, 20).
12, 13. Akinmej pouij itech “oksikimeh ichkameh”, ¿ken noijki kipaleuiaj ikniuan Cristo?
12 Sejse xiuitl seki semanas achto ijkuak ayamo kilnamikij imikilis Jesús akinmej pouij itech “oksikimeh ichkameh” kinpaleuiaj ikniuan Cristo. ¿Ken kichiuaj? Tetlapouiaj itech nochi tlaltikpak uan kinyoleuaj oksekimej noijki ma kilnamikikan imikilis Jesús (xikita recuadro “ ¿Timoyektlalijtok para tikilnamikis imikilis Jesús?”). Itech nochi tlaltikpak kiyektlaliaj nochi tlen moneki para non tonal, maski kanin monechikouaj amo katej tokniuan tlen kikuaskej pan uan koniskej vino. Akinmej pouij itech “oksikimeh ichkameh” yolpakij kinpaleuiskej ikniuan Cristo. Kimatokej ixpan Jesús yetoskia ken ye kipaleuiaj (Mat. 25:37-40).
13 ¿Tleka tinochtin moneki timonechikoskej para tikilnamikiskej imikilis Jesús?
¿TLEKA TINOCHTIN TIMONECHIKOUAJ?
14. ¿Ken yokiteititijkej Jehová uan Jesús sapanoua techtlasojtlaj?
14 Timotlasojkamatij techtlasojtlaj Jehová uan Jesús. Jehová yotechititi techtlasojtla. Pero okachi techititia techtlasojtla porque okiualtitlanki iKone topatka ma kitlajyouiltikan uan ma miki (Juan 3:16). Jesús noijki otechititi techtlasojtla porque okinek topatka ma kimiktikan (Juan 15:13). Amo keman uelis tikintlaxtlauiliskej nochi tlen okichijkej pero kema uelis tikteititiskej timotlasojkamatij ijkuak tikpiaj tonemilis ken toTajtsin Dios kineki (Col. 3:15). Ijkuak timonechikouaj tikilnamikij imikilis Jesús tikteititiaj timotlasojkamatij uan tikinmititiaj tikintlasojtlaj ye uan Jehová.
15. ¿Tleka motlasojkamatij tlapejpenalmej uan akinmej pouij itech “oksikimeh ichkameh”?
15 Sapanoua tiktlasojkamatij Jesús topatka omotemakak (Mat. 20:28). Tlapejpenalmej motlasojkamatij porque tlen okichi Jesús kinpaleuia ma kineltokakan yaskej iluikak. Tlaneltokaj itech imikilis Jesús, ik non, Jehová kinmita yolkualmej uan kinmita ken ikoneuan (Rom. 5:1; 8:15-17, 23). Uan akinmej pouij itech “oksikimeh ichkameh” kipatioitaj inpatka omotemakak Jesús porque ijkon toTajtsin Dios uelis kinselis, uelis kitekichiuiliskej uan uelis momakixtiskej ijkuak yetos ueyi tlajyouilistli (Apoc. 7:13-15). Ijkuak nonmej ome grupos sejse xiuitl kilnamikij imikilis Jesús, kiteititiaj motlasojkamatij inpatka omotemakak.
16. ¿Tleka noijki tikilnamikij imikilis Jesús?
16 Tiktlakamatij Jesús. Tla tiaskej iluikak noso amo, tinochtin moneki tikchiuaskej tlen okijto Jesús ijkuak okichi iCena, ye okijto: “Ijkí xikchiwakah para nonnechilnamikiskeh” (1 Cor. 11:23, 24).
¿TLEKA TINOCHTIN TECHPALEUIA TIKILNAMIKISKEJ IMIKILIS JESÚS?
17. ¿Ken techpaleuia tikilnamikiskej imikilis Jesús?
17 Techpaleuia okachi ma timouikakan iuan Jehová (Sant. 4:8). Ijkuak tikilnamikij imikilis Jesús techpaleuia ma timokuayejyekokan tlen Jehová techmakas uan ken sapanoua yotechtlasojtlak (Jer. 29:11; 1 Juan 4:8-10). Tikneltokaj Jehová nochipa techtlasojtlas uan techmakas tlen yokijto. Ijkuak ijkon timokuayejyekouaj okachi tiktlasojtlaj Jehová uan okachi iuan timouikaj (Rom. 8:38, 39).
18. ¿Ken techpaleuia ma timokuayejyekokan tlen okichi Jesús?
18 Techpaleuia ma tikchiuakan ken Jesús (1 Ped. 2:21). Ijkuak ayamo tikilnamikij imikilis, timomachtiaj tlen okichi saiktlami semana ijkuak okatka nikan tlaltikpak, ken okimiktijkej uan ken toTajtsin Dios okiyoliti. Ijkuak tikilnamikij imikilis Jesús tikkakij se tlamachtil tlen techilnamiktia ye techtlasojtla (Efes. 5:2; 1 Juan 3:16). Ijkuak tiktlajtoltiaj uan timokuayejyekouaj tlen ye okichi, techyolinia ma tikchiuakan tlen ye okichi (1 Juan 2:6).
19. ¿Tlen moneki tikchiuaskej para nochipa ma techtlasojtla toTajtsin Dios?
19 Techpaleuia nochipa ma tiktlasojtlakan Jehová (Jud 20, 21). Ijkuak timochijchikauaj tiktlakamatiskej, titlapaleuiaj ma mochipaua itoka uan tla tikyolpaktiaj, ye techtlasojtlas (Prov. 27:11; Mat. 6:9; 1 Juan 5:3). Ijkuak timonechikouaj para tikilnamikiskej imikilis Jesús techyolinia ma tikiluikan Jehová: “¡Nikneki nochipa mouan nimouikas!”.
20. ¿Tleka moneki timonechikoskej para tikilnamikiskej imikilis Jesús?
20 Tla tiaskej iluikak noso timokauaskej nikan tlaltikpak, moneki tikilnamikiskej sejse xiuitl imikilis Jesús porque tiktlasojtlaj. Noijki tikilnamikij Jehová techtlasojtla, ik non, okiualtitlanki iKone ma techmakixtiki. Nin xiuitl tikilnamikiskej imikilis Jesús viernes 15 de abril 2022. Tiktlasojtlaj Jehová uan iKone, ik non, timonechikoskej para tikilnamikiskej imikilis Jesús.
TLAKUIKALI 16 Jehová okitlali Jesús ma tlanauati
^ Maski timokauaskej nikan tlaltikpak noso tiaskej iluikak, sejse xiuitl tikilnamikij imikilis Jesús. Tikitaskej itech Biblia tleka moneki tikilnamikiskej imikilis uan ken techpaleuia ijkon tikchiuaskej.
^ Okseki Biblias okitlajtolkopkej: “Ijkin xikchiuakan para techilnamikiskej” (Nuevo Testamento, de P. Ortiz) uan “Ijkon techilnamikikan” (Biblia de Jerusalén Latinoamericana).
^ Tla okachi tikneki tikmatis itech yankuik tlajtolsenkaualistli uan itech Tekiuajkayotl, xikita revista Akin Tetlapouijtok tlen okiski 2014 páginas 15 hasta 17, kipia tlamachtil: “Llegarán a ser ‘un reino de sacerdotes’”.
^ Tla okachi tikneki tikmatis tlen kijtosneki ome kuauitl tlen ijkuilitok itech Ezequiel capítulo 37, xikita amochtli La adoración pura de Jehová: ¡por fin restaurada! páginas 130 hasta 135 párrafos 3 hasta 17.
