1-3. ¿Tlen kichiua ma tichokakan?

 ¿TIKILNAMIKI keman otichokak? Ualeua tichokaj porque tiyolpakij pero okachi tichokaj ijkuak timoyolkokouaj. Xamo noijki tichokaj porque oixpoliuik akin otiktlasojtlayaj. Se tokni tlen chanti Estados Unidos uan itoka Lorilei, * okijto: “Ualeua sapanoua onimoyolkokouaya porque oixpoliuik nochpoch uan amitlaj onechyolseuiaya. Onikmachiliaya amo nitlaxikoskia”.

² Onka okseki tlamantli tlen kichiua ma tichokakan. Se precursora tlen chanti Japón uan itoka Hiromi, okijto: “Ualeua nimosotlaua porque akinmej tikintlapouiaj amo techkakij, nichoka uan niktlatlaujtia Jehová ma nechpaleui ma nikajsis akin nikmachtis”.

³ ¿Se tonal yotechpanok ken nonmej tokniuan? (1 Ped. 5:9). Tejuan tiknekij tiyolpakiskej ijkuak tiktekichiuiliaj Jehová pero ualeua tichokaj porque oixpoliuik akin otiktlasojtlayaj, xamo timosotlauaj noso ualeua tikitaj oui tiktlakamatiskej Jehová (Sal. 6:6; 100:2). ¿Tlen tikchiuaskej ijkuak ijkon timomachiliaj?

4. ¿Tlen timomachtiskej?

⁴ Tlen okichi Jesús uelis techpaleuis. Ijkuak sapanoua omotekipachouaya ochokak (Juan 11:35; Luc. 19:41; 22:44; Heb. 5:7). Axkan timomachtiskej tleka Jesús ochokak. Tikitaskej tlen techmachtia uan tlen  techmachtia itech Jehová uan noijki tikitaskej tlen uelis tikchiuaskej ijkuak itlaj techtekipachoua uan tichokaj.

5. ¿Tlen techmachtia tlen okichi Jesús ijkon ken kijtoua Juan 11:32-36?

⁵ Itlamian xiuitl 32, se iyolikni Jesús tlen omotokayotiaya Lázaro omokoko uan satepan oixpoliuik (Juan 11:3, 14). Jesús okintlasojtlaya Lázaro, Marta uan María. Yejuan sapanoua omoyolkokouayaj porque oixpoliuik inmikni Lázaro. Satepan ijkuak oixpoliuik, Jesús oyajki Betania, kanin yejuan ochantiayaj. Ijkuak Marta okiluijkej ompa oyaya Jesús, san niman okinamikito, ye sapanoua omoyolkokouaya ijkuak okilui: “Noteko, tla nika tiyetoskia, nokni amo mikiskia” (Juan 11:21). Satepan ijkuak Jesús okitak María uan oksekimej ochokayaj noijki “ochokak” (xiktlajtolti Juan 11:32-36).

6. ¿Tleka Jesús ochokak non tonal?

⁶ ¿Tleka Jesús ochokak non tonal? Amochtli Perspicacia para comprender las escrituras kiyekijtoua: “Ijkuak oixpoliuik iyolikni tlen omotokayotiaya Lázaro uan okinmitak ikniuan omoyolkokouayaj, Jesús ‘oyoltelinki hasta oyolpatsiuik’”. * Xamo Jesús omokuayejyeko ken otlajyouiaya Lázaro ijkuak omokokouaya uan xamo okimatiaya ayakmo pajtiskia uan noijki ochokak ijkuak okinmitak Marta uan María omoyolkokouayaj porque oixpoliuik inmikni. Xamo noijki ijkon otimomachili ijkuak oixpoliuik se moyolikni noso se mofamiliar. Ma tikitakan tlen eyi tlamantli techmachtia tlen okichi Jesús.

7. ¿Tlen techmachtia itech Jehová ijkuak Jesús ochokak?

⁷ Jehová mitsajsikamati. Jesús “otechnextiliko akin Dios” (Heb. 1:3). Ijkuak  ochokak okiteititi ken momachilia iTajtsin (Juan 14:9). Tla timoyolkokoua porque oixpoliuik akin otiktlasojtlaya, xikilnamiki Jehová amo san kita ken timomachilia, ye kineki mitspaleuis uan mitsyolseuis (Sal. 34:18; 147:3).

8. ¿Ken tikmatij Jesús kinyolitis akinmej oixpolikej?

⁸ Jesús kineki kinyolitis akinmej oixpolikej. Ijkuak ayamo ochokaya, Jesús okilui Marta: “Mokni moyolitis” uan Marta okineltokak (Juan 11:23-27). Marta okitekichiuiliaya Jehová, ik non, okimatiaya Elías uan Eliseo okinyolitijkej sekimej (1 Rey. 17:17-24; 2 Rey. 4:32-37). Xamo noijki okimatiaya Jesús okinyoliti sekimej (Luc. 7:11-15; 8:41, 42, 49-56). Noijki uelis tikneltokas oksepa tikinmitas akinmej oixpolikej uan otikintlasojtlaya. Ijkuak Jesús okinyolseui iyolikniuan ochokak, non techititia ye kineki kinyolitis akinmej oixpolikej.

9. Xikyekijto ken uelis tikpaleuis akin moyolkokoua porque oixpoliuik akin okitlasojtlaya, ijkon ken okichi Jesús.

⁹ Uelis tikinyolseuis akinmej moyolkokouaj. Jesús amo san ochokak iuan Marta uan María, ye okinkak ken omomachiliayaj uan okinyolseui. Tejuan noijki uelis tikinyolseuiskej akinmej moyolkokouaj porque oixpoliuik ikaj akin okitlasojtlayaj. Se tlayekanki tlen itoka Dan uan chanti Australia okijto: “Ijkuak oixpoliuik nosiua oniknekiaya ikaj ma nechpaleui. Miakej tokniuan iuan insiuauan san tlen hora onechkakiayaj, amo onikinkuejsouaya ijkuak onichokaya. Ijkuak onisotlauaya yejuan onechpaleuiayaj. Okichipauayaj nocarro, onechtlakouiayaj uan otlakualchiuayaj. Yejuan miak uelta nouan omotlatlaujtijkej, okiteititijkej melauak okatkaj nokniuan uan noyolikniuan porque onechpaleuijkej ijkuak onimoyolkokouaya” (Prov. 17:17).

10. ¿Tlen kijtoua opanok Lucas 19:36-40?

¹⁰ Jesús oyajki Jerusalén 9 de nisán xiuitl 33. Ijkuak yoajsiaya itech non altepetl miakej okisojkej intlaken para ompa ma pano, ijkon okiteititijkej okiseliayaj Jesús ken tekiua uan non tonal miakej oyolpakiayaj (xiktlajtolti Lucas 19:36-40). Xamo imachtijkauan okintlajtlachialti tlen okichi satepan. Ijkuak yoajsiaya itech non altepetl ochokak uan okijto tlen kinpanoskia akinmej ompa ochantiayaj (Luc. 19:41-44).

11. ¿Tleka ochokak Jesús?

¹¹ Jesús omoyolkoko porque maski kuali okiselijkej, miakej judíos amo kiseliskiaj iTekiuajkayo toTajtsin Dios. Ik non, Jerusalén kipojpoloskiaj uan akinmej mokauaskiaj kinuikaskiaj ken tlakeualmej (Luc. 21:20-24). Teyolkoko pero omochi tlen Jesús yokijtojka, miakej judíos amo okiselijkej. Axkan, ¿tlen kichiuaj akinmej tikintlapouiaj itech iTekiuajkayo toTajtsin Dios? Maski timochijchikauaj tikinmachtiskej ika Biblia, miakej amo kinekij techkakiskej. ¿Tlen techmachtia ijkuak Jesús ochokak? Ma tikitakan eyi tlamantli.

12. ¿Tlen techmachtia itech Jehová ijkuak Jesús ochokak?

¹² Jehová tetlasojtla. Ijkuak Jesús ochokak techilnamiktia Jehová nochtin kintekipachoua, “amo kineki aka  mamoixpolo, yej tinochteh matimoyolpatlakah inawak” (2 Ped. 3:9). Tejuan tikteititiaj tikintlasojtlaj oksekimej ijkuak timochijchikauaj ma ajsi itech inyolo tlen tikintlapouiaj (Mat. 22:39). *

13, 14. (1) ¿Ken okiteititi Jesús oteiknomatiaya? (2) ¿Ken uelis noijki titeiknomatiskej?

¹³ Jesús omochijchika tetlapouis. Ye otetlasojtlaya, ik non, nochipa okinmachti oksekimej (Luc. 19:47, 48). Oteiknomatiaya, ik non, miakej okinpaleui. Ualeua miakej okinekiayaj kikakiskej, ik non, ye uan imachtijkauan “asta ayakmó oweletiah otlakuayah” (Mar. 3:20). Jesús omotlapoui iuan se tlakatl tlen okitato maski yiyouak (Juan 3:1, 2). Maski amo nochtin omochijkej imachtijkauan Jesús, nochtin okintlapouijkej tlen kijtoua iTlajtol toTajtsin Dios. Axkan noijki tiknekij nochtin ma kimatikan tlen kijtoua Biblia (Hech. 10:42). Tla tiknekij ijkon tikchiuaskej, xamo moneki tikpatlaskej ken titetlapouiaj.

¹⁴ Xikpatla tlen moneki. Tla nochipa tikintlapouitiuij ijkuak amo katej inkalijtik, amo keman tikinmajsiskej akinmej kinekij kimatiskej tlen kijtoua Biblia. Se precursora tlen itoka Matilda okijto: “Ne uan nonamik tlatlamantli hora titetlapouiaj, kualkan titetlapouiaj kanin tlanemakaj, tlajko tonal titetlapouiaj ika carritos porque miakej ik ompa panouaj uan ijkuak yitiotlak tikintemotiuij inkalijtik porque okachi miakej tikinmajsij”. Amo ma titetlapouikan ijkuak tejuan tiknekij, ma titetlapouitij ijkuak okachi tikinmajsiskej. Tla ijkon tikchiuaj Jehová yolpakis.

15. Ijkon ken kijtoua Lucas 22:39-44, ¿tlen okichi Jesús ijkuak yikimiktiskiaj?

¹⁵ Itech xiuitl 33, ijkuak yiyouak 14 de nisán. Jesús oyajki itech xochitlali  Getsemaní uan ompa okitlatlaujti Jehová (xiktlajtolti Lucas 22:39-44). Ijkuak sapanoua omotekipachojtoka “chikawak omotiotsajtsili iwa ochokak” (Heb. 5:7). Ijkuak yikimiktiskiaj Jesús, ¿tlen okitlajtlanili iTajtsin? Okilui ma kiyolchikaua para kitlakamatis. Jehová okikakili uan okititlanili se ángel ma kiyolchikauati.

16. ¿Tleka omotekipachouaya Jesús ijkuak omotlatlaujti itech xochitlali Getsemaní?

¹⁶ Jesús ochokak ijkuak omotlatlaujti itech xochitlali Getsemaní porque okitekipachouaya ma kijtokan okiuijuikalti toTajtsin Dios. Noijki okimatiaya omonekiaya tlapaleuis ma mochipaua itoka Jehová. Tla tikneki tiktlakamatis Jehová, ¿tlen mitsmachtia ijkuak Jesús ochokak? Ma tikitakan eyi tlamantli.

17. ¿Tlen techmachtia itech Jehová ijkuak Jesús sapanoua omotlatlaujti uan okikak?

¹⁷ Jehová techkaki ijkuak tiktlatlaujtiaj. Ye okikak ijkuak Jesús sapanoua okitlatlaujti. ¿Tleka okikak? Porque Jesús okipatioitak nochipa kitlakamatis iTajtsin uan amo okinekiaya ma kiteneuakan. Tla tejuan noijki tikpatioitaj tiktlakamatiskej Jehová uan amo tikkauaj ma kiteneuakan, ye techkakis ijkuak tiktlatlaujtiskej (Sal. 145:18, 19).

18. ¿Tleka tikijtouaj Jesús techiknomati?

¹⁸ Jesús kajsikamati ken timomachiliaj. Ijkuak sapanoua timoyolkokouaj techyolseuia tikpiaskej se toyolikni tlen techajsikamati porque xamo ye noijki ijkon yokipanok. Toyolikni ye Jesús, techajsikamati ijkuak amo kuali timomachiliaj uan ijkuak tiknekij ikaj ma techpaleui. Kimati ken tichijchitokej, ik non, techpaleuis para toTajtsin Dios ma techmaka “keman itla techpoloa” (Heb. 4:15, 16). Ijkon ken Jesús okikauili ma kiyolchikaua se ángel ijkuak okatka xochitlali Getsemaní, tejuan noijki ma tikkauilikan Jehová ma techpaleui ika se amatlajkuilol, se video, ijkuak tlamachtia se tokni noso ijkuak kineki techyolchikauas se tlayekanki noso se toyolikni.

19. Xikyekijto tlen mitsyolchikauas tla mitspanotok itlaj tlen amo kuali.

 ¹⁹ Jehová mitspaleuis ximoyolseui. ¿Ken uelis techyolchikauas Jehová? Ijkuak tiktlatlaujtia uelis tikseliskej “iyolsewilis Dios, non amaka weleti kajsikamati” (Filip. 4:6, 7). Jehová techyolseuia uan kichiua ma timokuayejyekokan ken moneki. Ijkon omomachili se tokni tlen itoka Luz. Ye okijto: “Ualeua noselti nimomachilia uan non kichiua ma nimokuayejyeko Jehová amo nechtlasojtla. Ijkuak ijkon nechpanoua san niman nimotlapouia iuan Jehová, nikiluia ken nimomachilia uan ye nechpaleuia kuali ma nimomachili”. Ijkon ken tokni Luz, timoyolseuiskej tla tiktlatlaujtiaj Jehová.

20. ¿Tlen techmachtia ijkuak Jesús ochokak?

²⁰ Axkan otimomachtijkej seki tlamantli ijkuak Jesús ochokak uan non techyolchikaua. Techmachtia uelis tikinyolseuiskej tokniuan tlen oixpoliuik akin okitlasojtlaya uan ma tikneltokakan Jehová uan Jesús techpaleuiskej ijkuak ijkon techpanos. Jehová uan Jesús teiknomatij, ik non, tejuan tikinmiknomatij akinmej tikintlapouiaj uan tikinmachtiaj. Noijki techmachtia Jehová uan Jesús kajsikamatij tlen tikmachiliaj uan kinekij techpaleuiskej ma titlaxikokan. Nochipa ma tikchiuakan tlen otimomachtijkej hasta ma mochiua tlen Jehová okijto: “Ye kinmixayowajwatsas nochteh” (Apoc. 21:4).