1. Xikijto ken okatka ifamilia Santiago.

 SANTIAGO okatka ikni Jesús uan ifamilia okitlasojtlayaj Jehová. * Itatajuan okatkaj José uan María, yejuan omochijchikauayaj kitekichiuiliskej Jehová. Ikni Santiago tlen achto oneski mochiuaskia Mesías. ¡ToTajtsin Dios okiteochi Santiago porque opouiaya itech non familia!

2. ¿Tlen uelis kitlajtlachialtiskia Santiago?

² Santiago uelis kitlajtlachialtiskia tlen okichi Jesús (Mat. 13:55). Ma tikitakan tlen okichi Jesús. Ijkuak yokipiaya 12 xiuitl kuali yokixmatiaya tlen okijtouaya iTlajtol toTajtsin Dios, ik non, okintlajtlachialti ixtlamatkej tlen otlayekanayaj Jerusalén (Luc. 2:46, 47). Tla Santiago otekipano iuan Jesús, kuali okixmatki. Nathan Knorr okijtouaya: “Timomachtia miak tlamantli ijkuak ikaj iuan titekipanoua”. * Xamo Santiago okitaya “Jesús okachi omoskaltijtiaya, iwa okachi oixtlamatia. Okipaktiaya n Totajtsi Dios iwa n tlakah okiseliayah” (Luc. 2:52). Ye omonekiaya achto yetoskia imachtijka Jesús pero amo ijkon opanok.

3. ¿Tlen okichi Santiago ijkuak Jesús opejki tetlapouia?

³ Santiago amo omochi imachtijka Jesús ijkuak ye otetlapouiaya (Juan 7:3-5). Xamo ye noijki okijto Jesús  “yokuatlapolo” (Mar. 3:21). Biblia amo kijtoua kox Santiago okatka iuan inantsin ijkuak okimiktijkej Jesús itech kuauitl (Juan 19:25-27).

4. ¿Tlen ome tlamantli timomachtiskej?

⁴ Satepan Santiago okineltokak Jesús iKone Jehová, okichi tlen ye otlamachti uan tokniuan tlen inmiuan omonechikouaya okitlakaitayaj. Axkan tikinnankiliskej ome tlajtlanilmej tlen techititis ken uelis tikchiuaskej ken Santiago. Se: ¿Tleka moneki tiyetoskej tiyolyamankej? Ome: ¿Ken uelis kuali titlamachtiskej?

5. ¿Tlen okichi Santiago ijkuak okimonextili Jesús?

⁵ ¿Keman Santiago omochi imachtijka Jesús? Ijkuak Jehová okiyoliti Jesús okimonextili Santiago “iwa satepa nochteh n tlatematiltijkeh” (1 Cor. 15:7). Tlen opanok okipaleui Santiago. Ye okatka iuan apóstoles itech se kali ijkuak okichixtokaj ipan ma uetsi espíritu santo (Hech. 1:13, 14). Satepan opouiaya iuan Cuerpo Gobernante tlen okatka itech achto siglo (Hech. 15:6, 13-22; Gál. 2:9). Ijkuak ayamo oajsiaya xiuitl 62, toTajtsin Dios okichi ma kinmijkuilili se carta tokniuan tlapejpenalmej. Tlen ijkuilitok itech non carta kinpaleuia akinmej chantiskej nikan tlaltikpak uan akinmej yaskej iluikak (Sant. 1:1). Itech achto siglo se tlakatl ixtlamatki tlen omotokayotiaya Josefo okijto ueyi teopixki judío Anán otlanauati ma kimiktikan Santiago. Ye nochipa okitlakamatki Jehová nikan tlaltikpak.

6. ¿Tlen okichi Santiago uan tlen okichijkej teopixkej?

⁶ Santiago okatka yolyamanki. Ma tikitakan tlen okichi Santiago satepan uan tlen okichijkej teopixkej. Ijkuak Santiago okitak miak tlamantli tlen okiteititiaya Jesús okatka iKone toTajtsin Dios otlaneltokak, ijkon okiteititi okatka yolyamanki. Teopixkej tlen okatkaj Jerusalén amo ijkon okichijkej. Yejuan amo uelis kijtoskiaj Jesús amo okiyoliti Lázaro. Pero amo okinekiayaj kineltokaskej Jehová okiualtitlanki Jesús uan okinekiayaj kimiktiskej ye uan Lázaro (Juan 11:53; 12:9-11). Satepan ijkuak Jehová okiyoliti Jesús itlaj  okichijkej para oksekimej amo ma kimatikan tlen opanok (Mat. 28:11-15). Teopixkej omoueyinekiayaj, ik non, amo okineltokakej Jesús okatka Mesías.

7. ¿Tleka amo ma timoueyinekikan?

⁷ Techmachtia: Amo ma timoueyinekikan uan ma tikkauilikan Jehová ma techmachti. Ijkon ken se kokolistli uelis kijtlakos toyolo, tla timoueyinekij tikitaskej oui tikchiuaskej tlen Jehová techiluia. Fariseos omoueyinekej, ik non, maski okitakej nochi tlen okiteititiaya Jesús okatka iKone toTajtsin Dios uan okipiaya iespíritu santo, amo okineltokakej (Juan 12:37-40). Amo kuali tlen okichijkej, ik non, toTajtsin Dios amo kinyolitis (Mat. 23:13, 33, TNM). Ik non, ma tikkauilikan iTlajtol toTajtsin Dios uan iespíritu santo ma techpaleui ma tikpiakan kuali tonemilis, ma kipatla tlen timokuayejyekouaj uan tlen tiknekij tikchiuaskej (Sant. 3:17). Santiago okatka yolyamanki, ik non, okikauili Jehová ma kimachti. Axkan tikitaskej non okipaleui kuali ma tlamachti.

8. ¿Tlen techpaleuis kuali ma titlamachtikan?

⁸ Santiago amo miak omomachti. Tlayekankej judíos okijtouayaj Pedro uan Juan “amo kanaj omoixtlamachtijkeh” uan noijki ijkon okitayaj Santiago (Hech. 4:13). Pero amochtli tlen kipia itoka kiteititia kuali otlamachti. Ijkon ken Santiago xamo tejuan amo okachi otimomachtijkej itech escuela. Pero iespíritu santo Jehová uan ialtepe techpaleuiaj, ik non, noijki uelis kuali titlamachtiskej. Ma tikitakan ken okichi Santiago uan ma tikitakan ken uelis tikchiuaskej ijkon ken ye okichiuaya.

9. ¿Ken otlamachtiaya Santiago?

⁹ Santiago amo okijto tlen amo uelis kajsikamatiskiaj. Ik non, akinmej okikakiayaj okajsikamatkej tlen uelis kichiuaskiaj. Amo oui okinmachti akinmej kichiuaj ken Cristo ijkuak okinmititi  amo ma tekokolikan ijkuak kintlajyouiltiskiaj. Ye okijto: “Kateh ika pakílistli akimeh okixikojkeh n tlaijyowílistli: Nomejwah nonkimatokeh kenomi Job okixiko nochi n tlaijyowílistli, iwa yononkitakeh tlan okimák sa iksemi n Toteko Dios. Porke n Toteko Dios satlawel tetlasojtlak iwa teiknoma” (Sant. 5:11). Santiago omopaleui ika iTlajtol toTajtsin Dios para tlamachtis. Ijkon okinpaleui oksekimej ma kajsikamatikan Jehová kinteochiua akinmej nochipa kitlakamatij ijkon ken okichi Job. Santiago amo oui otlamachti para oksekimej kajsikamatiskiaj, ijkon okiteititi otlamachtiaya Jehová.

10. ¿Ken uelis titlamachtiskej ijkon ken Santiago?

¹⁰ Techmachtia: Amo oui ma titlamachtikan uan ma tikteititikan tlen kijtoua Biblia. Amo ma tikinmititikan akinmej tikinmachtiaj sapanoua tiixtlamatkej, ma tikinmititikan tlen Jehová tlamachtia uan ken kineki kinpaleuis (Rom. 11:33). Ijkon uelis tikchiuaskej tla tikinmachtiaj tlen kijtoua Biblia. Amo ma tikinmiluikan tlen uelis tikchiuaskiaj tla techpanoskia ken yejuan, ma tikinpaleuikan yejuan inselti ma mokuayejyekokan tlen okipanok itekipanojkauan Jehová tlen ijkuilitok itech Biblia. Noijki ma tikinpaleuikan ma kajsikamatikan ken mokuayejyekoua Jehová uan ken momachilia. Ijkon kichiuaskej tlen momachtiaj porque kinekiskej kiyolpaktiskej.

11. ¿Tlen okinpanouaya sekimej tokniuan uan tlen okinmilui Santiago ma kichiuakan? (Santiago 5:13-15).

¹¹ Santiago omokuayejyeko ken moneki. Carta tlen okijkuilo kiteititia ye okimatiaya tlen okinpanouaya tokniuan uan okinmilui tlen kichiuaskiaj. Sekimej amo san niman okichiuayaj tlen okinmiluiaya (Sant. 1:22). Oksekimej okachi omouikayaj iuan akinmej okipiayaj miak tomin (Sant. 2:1-3). Uan oksekimej okijtouayaj miak tlamantli tlen amo kuali (Sant. 3:8-10). Nonmej tokniuan okichiuayaj tlen amo kuali pero Santiago amo okijto amo kipatlaskiaj innemilis. Okinyektlapoui uan okinyole akinmej amo okipiayaj chikauak intlaneltokilis ma kintemokan tlayekankej para ma kinpaleuikan (xiktlajtolti Santiago 5:13-15).

12. ¿Ken uelis timokuayejyekoskej ken moneki ijkuak tikinpaleuiskej akinmej tikinmachtiaj?

¹² Techmachtia: Ma tikinmitakan oksekimej ken moneki pero noijki ma timokuayejyekokan ken moneki. Miakej tlen tikinmachtiaj kitaj oui kichiuaskej tlen kijtoua Biblia (Sant. 4:1-4). Xamo amo san niman kipatlaskej innemilis uan noijki amo san niman kichiuaskej tlen Jesús otlamachti. Ijkon ken Santiago ma tikinmiluikan akinmej tikinmachtiaj tlen moneki kichiuaskej. Pero noijki ma timokuayejyekokan ken moneki: ma tikneltokakan Jehová kinyoltilanas akinmej yolyamankej uan kinpaleuis ma kipatlakan innemilis (Sant. 4:10).

13. ¿Tlen okijto Santiago? (Sant. 3:2).

¹³ Santiago omokuayejyeko ken moneki ijkuak itlaj okichiuaya. Ye amo omokuayejyeko okatka okachi ueyititok porque Jesús okatka ikni noso porque okachi okitekichiuiliaya Jehová. Ye okinmilui tokniuan “notlasojikniwah” (Sant. 1:16, 19; 2:5). Amo okiteititi nochi kuali okichiuaya uan ijkon okichi  ijkuak okijto ualeua tinochtin “titlajtolpanoah” (xiktlajtolti Santiago 3:2).

14. ¿Tleka amo moneki timokuayejyekoskej nochi kuali tikchiuaj?

¹⁴ Techmachtia: Ma tikilnamikikan tinochtin titlajtlakolejkej. Amo ma timokuayejyekokan okachi tiixtlamatkej uan amo ken akinmej tikinmachtiaj. ¿Tleka amo ijkon ma tikchiuakan? Porque tla akinmej tikinmachtiaj mokuayejyekouaj tejuan nochi tikmatij uan amo timotlapololtiaj, kijtoskej amo uelis kitekichiuiliskej Jehová. Pero tla tikinmiluiaj tejuan noijki timochijchikauaj tikchiuaskej tlen kijtouaj principios bíblicos uan tla noijki tikinmiluiaj ken yotechpaleui Jehová ma tikpatlakan tonemilis, tikinpaleuiskej ma kajsikamatikan yejuan noijki uelis kitekichiuiliskej.

15. ¿Tlen okipaleuiaya Santiago amo oui ma tlamachti? (Sant. 3:2-6, 10-12).

¹⁵ Tlen Santiago otlamachtiaya oajsiaya intech inyolo akinmej okikakiayaj. Okipaleui iespíritu santo Jehová pero xamo noijki okipaleui ken otlamachtiaya Jesús. Neskayomej tlen ika otlamachtiaya Santiago, amo oui omoajsikamatiayaj (xiktlajtolti Santiago 3:2-6, 10-12).

16. ¿Tleka moneki titlamachtiskej ika neskayomej?

¹⁶ Techmachtia: Ma titlamachtikan ika neskayomej tlen uelis kinpaleuis. Ijkuak kuali titlamachtiaj ika neskayomej, tikinpaleuiaj ma mokuayejyekokan akinmej tikinmachtiaj. Non kinpaleuis ma kilnamiktokan tlen tikinmachtiaj. Jesús okimatiaya tlamachtis ika neskayomej uan Santiago noijki ijkon otlamachti. Ma tikitakan ken okichi uan ken techpaleuis tla ijkon titlamachtiaj.

17. ¿Tleka techpaleuia tlen kijtoua Santiago 1:22-25?

¹⁷ (Xiktlajtolti Santiago 1:22-25). Santiago okinpaleui akinmej okinmachti ijkuak okijto se tlakatl omotak itech se teskatl. Santiago kuali okimatiaya tlen okinekiaya tlamachtis: tla tiknekij ma techpaleui iTlajtol toTajtsin Dios, amo san ma tiktlajtoltikan, moneki ma tikchiuakan tlen ompa kijtoua. Santiago okijto itlaj tlen nochtin kuali  okajsikamatkej: se tlakatl tlen mota itech se teskatl. ¿Tlen okinekiaya tlamachtis? Xoxo tla ikaj mota itech se teskatl uan amo kiyektlalia tlen amo kuali kajki. Noijki amo tiixtlamatkej tla tiktlajtoltiaj Biblia uan tikitaj itlaj moneki tikpatlaskej itech tonemilis uan amo tikchiuaj.

18. ¿Tlen eyi tlamantli moneki tikchiuaskej ijkuak tikijtoskej se neskayotl?

¹⁸ Ijkuak tikijtoskej se neskayotl moneki ma tikchiuakan eyi tlamantli ijkon ken okichi Santiago. Se, neskayotl tlen tikijtoskej ma kijto tlen titlamachtiaj. Ome, akin tikmachtiaj san niman ma kita non kipaleuia. Eyi, kuali ma moajsikamati tlen tiknekij tikmachtiskej. Tla amo tikmatij tlen neskayotl tikijtoskej, ma tikitakan Tlen ika momachtiaj iTlaixpantijkauan Jehová. Kanin kijtoua “Neskayomej”, ompa tikajsis miak tlamantli tlen mitspaleuis. Ma tikilnamikikan se neskayotl ken se micrófono, techpaleuia okachi ma tikajsikamatikan tlen timomachtiaj. Ik non, ma titlamachtikan ika neskayomej ijkuak tiknekij ma kajsikamatikan tlen okachi moneki. Tiknekij kuali titlamachtiskej porque tiknekij tikinpaleuiskej oksekimej noijki ma kitekichiuilikan Jehová.

19. ¿Ken tikteititiskej tikintlasojtlaj tokniuan?

¹⁹ Amo tikixmatij se tokni tlen amo motlapololtia pero tiktekichiuiliaj Jehová iuan tokniuan ken yetoskiaj tofamilia. Ma tikinmititikan tikintlasojtlaj, inmiuan nochipa ma timotlapouikan, ma timomachtikan tlen kichiuaj, nochipa inmiuan ma titetlapouikan uan ma titlamachtikan. Ijkuak tikchiuaj ken Santiago uan titlamachtiaj ken ye okichiuaya, tikueyichiuaj Jehová uan tikinpaleuiaj oksekimej iuan ma mouikakan.