1, 2. (1) ¿Tlen tikmachiliaj ijkuak timokuayejyekouaj tlen okipanok Jesús? (2) ¿Tlen tikitaskej?

 IJKUAK se tofamiliar ixpoliui amo kuali timomachiliaj. Ijkuak timokuayejyekouaj ken otlajyoui sapanoua timoyolkokouaj. Xamo ijkuak timokuayejyekouaj tlen okichiuaya, tlen otechmachti uan tlen otechilui para matiyolpakikan techpaleuia kuali matimomachilikan.

² Ijkon techpanoua ijkuak tikilnamikij ken okimiktijkej Jesús. Sapanoua timoyolkokouaj ijkuak tiktlajtoltiaj itech Biblia tlen okipanok, noijki ijkuak tikilnamiki imikilis uan ijkuak timokuayejyekouaj ken techpaleuia topatka omotemakak (1 Cor. 11:24, 25). Pero noijki tiyolpakij ijkuak timokuayejyekouaj tlen okichi Jesús ijkuak okatka nikan tlaltikpak. Noijki techyolchikaua ijkuak timokuayejyekouaj tlen axkan kichijtok uan tlen kichiuas satepan. Axkan tikitaskej tla timokuayejyekouaj nochi tlen okichi Jesús uan tla tikilnamikij ye techtlasojtla, techpaleuis matiktlasojkamatilikan.

3. ¿Tleka moneki tikintlasojkamatiliskej tlen Jehová uan Jesús yokichijkej topatka?

³ Ijkuak timokuayejyekouaj tlen okichi Jesús nikan tlaltikpak uan ijkuak timokuayejyekouaj tleka topatka omotemakak, techpaleuia matiktlasojkamatilikan. Ijkuak Jesús okatka nikan tlaltikpak otlamachti tlen kichiuas  iTekiuajkayo toTajtsin Dios. Tejuan sapanoua tikpatioitaj tlen otlamachti. Noijki kuali timouikaj iuan Jehová uan Jesús porque ye omotemakak topatka. Tla tikneltokaj Jesús omotemakak topatka, satepan uelis nochipa tiyoltoskej uan tikinmitaskej tofamiliares tlen yoixpolikej (Juan 5:28, 29; Rom. 6:23). Tejuan amo technamiki tikseliskej nochi tlen Jehová techmakas uan amo keman uelis tikintlaxtlauiliskej tlen ye uan Jesús yokichijkej (Rom. 5:8, 20, 21). Pero, ¿ken uelis tikteititiskej tikintlasojkamatiliaj?

4. ¿Tlen okichi María Magdalena para kiteititis okitlasojkamatiliaya Jesús tlen okichi ipatka? (Xikita dibujo).

⁴ Matimokuayejyekokan tlen okipanok se siuatl judía tlen omotokayotiaya María Magdalena. Ye otlajyouiaya porque okipiaya chikome amo kuali ejekamej. Xamo ye omokuayejyekouaya nochipa tlajyouiskia. ¿Timokuayejyekouaj tlen okimachili ijkuak Jesús okikixtili amo kuali ejekamej? Xamo sapanoua okitlasojkamatili Jesús. Ikinon opejki kichiua ken Cristo uan okipaleui ika tlen okipiaya ijkuak ye otetlapouijtinemiaya (Luc. 8:1-3). Maski María okipatioitaya tlen Jesús okichi ipatka amo okajsikamatiaya tlen kichiuaskia satepan. Jesús omikik para nochtin akinmej kineltokaj, nochipa mayoltokan (Juan 3:16). María okiteititi okitlasojkamatili Jesús porque nochipa iuan okatka. Ijkuak Jesús okipilojkej okatka inauak para kipaleuis uan kinyolchikauas oksekimej (Juan 19:25). Ijkuak Jesús oixpoliuik, María iuan oksekimej siuamej okikojkej “ajwiálistli para kixawiliskiah ikuerpo n Jesús” (Mar. 16:1, 2). Jehová sapanoua okiteochi María porque nochipa okipaleui iKone. Noijki sapanoua oyolpakik ijkuak Jehová okiyoliti Jesús uan noijki ijkuak iuan omotlapoui uan amo miakej imachtijkauan ijkon okichijkej (Juan 20:11-18).

5. ¿Ken uelis tikintlasojkamatiliskej Jehová uan Jesús tlen yokichijkej topatka?

 ⁵ Tejuan noijki uelis tikteititiskej tikintlasojkamatiliaj Jehová uan Jesús tlen yokichijkej topatka. Ijkon tikchiuaj ijkuak tikpaleuiaj iTekiuajkayo toTajtsin Dios ika tlen tikpiaj. Uelis ijkon tikchiuaskej ijkuak titlapaleuiaj kanin kinchijchiuaj kalmej kanin tikueyichiuaj Jehová.

6. ¿Ken timomachilia ijkuak tikajsikamati Jesús mopatka omotemakak?

⁶ Ijkuak timokuayejyekouaj Jehová uan Jesús sapanoua techtlasojtlaj techyolinia noijki matikintlasojtlakan (1 Juan 4:10, 19). Noijki ijkuak tikajsikamatij Jesús topatka omotemakak okachi tikintlasojtlaj. Pablo sapanoua okitlasojkamatiliaya tlen okichi Jesús. Ikinon okinmijkuilili tokniuan Gálatas: “Ikone n Totajtsi Dios, Akin satlawel onechtlasojtlak [...] omotemák makimiktikah nopatka” (Gál. 2:20). Tinochtin tiktlasojkamatiliaj tlen okichi Jesús porque ijkon kuali timouikaj iuan Jehová (Juan 6:44). ¿Ken timomachilia ijkuak timokuayejyekoua Jehová okitemakak iKone para kuali iuan ximouika? ¿Okachi tikintlasojtlaj Jehová uan Jesús? Ikinon ximotlajtlani: “¿Tlen nikchiuas para nikteititis nikintlasojtla?”

7. Ijkon ken mota itech foto, ¿ken uelis tikteititiskej tikintlasojtlaj Jehová uan Jesús? (2 Corintios 5:14, 15; 6:1, 2).

⁷ Tla tikintlasojtlaj Jehová uan Jesús, noijki tikintlasojtlaskej oksekimej (xiktlajtolti 2 Corintios 5:14, 15; 6:1, 2). Ijkuak tikintlapouiaj oksekimej ijkon tikteititiaj. Nochtin tikintlapouiaj maski  mayetokan okse inmialtepe, mayetokan ixchipajkej noso amo uan maski makipiakan tomin noso amo. Ijkon tikpaleuiaj Jehová porque “ye kineki mamomakixtikah nochteh iwa makixmatikah tlan milák” (1 Tim. 2:4).

8. ¿Ken uelis tikteititiskej tikintlasojtlaj tokniuan?

⁸ Noijki tikteititiaj tikintlasojtlaj Jehová uan Jesús ijkuak tikintlasojtlaj tokniuan (1 Juan 4:21). Ijkuak tokniuan tlajyouiaj tejuan tikinpaleuiaj. Tikinyolchikauaj ijkuak ixpoliuij akin okitlasojtlayaj, tikintlajpalouaj ijkuak mokokouaj uan tla motekipachouaj tikinpaleuiaj para kuali mamomachilikan (2 Cor. 1:3-7; 1 Tes. 5:11, 14). Noijki timotlatlaujtiaj inpatka porque tikmatij “n tiotsajtsílistli non se tlakatl yolchipawak kichiwa ika nochi iyolo” sapanoua tlapaleuia (Sant. 5:16).

9. ¿Tlen okachi moneki tikchiuaskej para tikteititiskej tikintlasojtlaj tokniuan?

⁹ Noijki tikteititiaj tikintlasojtlaj tokniuan ijkuak timochijchikauaj inmiuan timouikaskej. Timochijchikauaj titetlapojpoluiskej ijkon ken Jehová kichiua. Jehová okika iKone makimiktikan para techtlapojpoluis, ¿tejuan noijki tikintlapojpoluiaj tokniuan ijkuak techchiuiliaj tlen amo kuali? Amo tiknekij tiyetoskej ken tlakeuali amo yolkuali tlen okijto Jesús. Ye amo okitlapojpolui okse tlakeuali tlen okiuikiliaya tomin pero tekiua okitlapojpolui non tlakeuali amo yolkuali maski okiuikiliaya okachi miak tomin (Mat. 18:23-35). Ikinon tla amo kuali timouikaj iuan okse tokni san niman iuan matimotlapojpoluikan, ijkon ijkuak tikilnamikiskej imikilis Jesús timoyolseuijtoskej (Mat. 5:23, 24). Tla ijkon tikchiuaj, tikteititiskej sapanoua tikintlasojtlaj Jehová uan Jesús.

10, 11. ¿Ken uelis tlayekankej kiteititiskej kintlasojtlaj Jehová uan Jesús? (1 Pedro 5:1, 2).

¹⁰ Tlayekankej noijki uelis kiteititiskej kintlasojtlaj Jehová uan Jesús ijkuak kinpaleuiaj tokniuan (xiktlajtolti 1 Pedro 5:1, 2). Ijkon Jesús okinauati makichiua Pedro. Ye okijto eyi uelta amo okixmatiaya ikinon okinekiaya kiteititis okitlasojtlaya Jesús. Ijkuak Jehová okiyoliti iKone, Jesús okitlajtlani: ‘¿Simón ikone n Juan, techtlasojtla okachi ke ninteh?’. Xamo Pedro kichiuaskia tlen Jesús kiluiskia para kiteititis okitlasojtlaya. Ikinon Jesús okinankili: ‘Xikmalui noichkawah’ (Juan 21:15-17). Ijkon Pedro opejki kinmaluia tokniuan uan ijkon okiteititi okitlasojtlaya Jesús.

¹¹ ¿Ken uelis kiteititiskej tlayekankej ijkuak tikilnamikiskej imikilis Jesús kitlakamatij tlen okinauati Pedro? Kiteititiskej kintlasojtlaj Jehová uan Jesús ijkuak kinpaleuiaj tokniuan mamouikakan iuan Jehová uan mochijchikauaj kinpaleuiskej akinmej ayakmo tetlapouiaj (Ezeq. 34:11, 12). Noijki uelis kinpaleuiskej akinmej touan momachtiaj uan akinmej touan monechikoskej ijkuak tikilnamikiskej imikilis Jesús. Tlayekankej moneki mokuayejyekoskej akinmej touan monechikoskej xamo kitekichiuiliskej Jehová uan kinpaleuiaj kuali mamomachilikan.

12. ¿Tleka uelis tiyetoskej tiyolchikauakej maski Jesús okijto titlajyouiskej? (Juan 16:32, 33).

¹² Ijkuak ayamo okimiktiayaj Jesús, ye okinmilui imachtijkauan: “Nomejwah  nontlaijyowiskeh itech nin tlaltíkpaktli, pero amo ximosotlawakah porke Ne yoníktlanki” (xiktlajtolti Juan 16:32, 33). ¿Tlen okipaleui matlaxiko Jesús maski okitlajyouiltijkej uan okimiktijkej akinmej okikokoliayaj? Ye okineltokiliaya Jehová. Jesús okimatiaya imachtijkauan noijki kintlajyouiltiskiaj ikinon okitlajtlanili Jehová makinpaleui (Juan 17:11). ¿Tleka techpaleuia matiyetokan tiyolchikauakej? Porque Jehová sapanoua chikauak uan uelis kintlanilis akinmej techkokoliaj (1 Juan 4:4). Ye kita nochi tlen techpanoua. Tla tikneltokaj Jehová uelis techpaleuis, tikxikoskej nochi tlen uelis techtlajyouiltis uan noijki tiyetoskej tiyolchikauakej.

13. ¿Ken okiteititi José okatka yolchikauak?

¹³ Matikilnamikikan tlen okipanok José akin ochantiaya Arimatea. Judíos sapanoua okitlakaitayaj uan noijki opouiaya itech Sanedrín. Pero ye omomojtiaya kijtos okatka imachtijka Jesús. Juan okijto “José okatka imomachti n Jesús san ichtaka porke okinmawiliaya [noso okinmojtiaya] n tiopixkeh judíojteh” (Juan 19:38). Maski okineltokaya tlen otlamachti Jesús, amo okinmilui oksekimej ye imachtijka. Xamo okinekiaya judíos ok makitlakaitakan. Pero Biblia kijtoua José “omoyolchika iwa okitlatlaujtito n Pilato makimaktili ikuerpo n Jesús” satepan ijkuak okimiktijkej (Mar. 15:42, 43). José okiteititi okineltokaya tlen Jesús otlamachti.

14. ¿Tlen moneki tikchiuaskej tla techpanotok ijkon ken José?

¹⁴ ¿Mitspanotok ijkon ken José akin ochantiaya Arimatea? ¿Timomojtia tikijtos tiiTlaixpantijka Jehová kanin titekipanoua noso kanin timomachtia? ¿Timomojtia peuas titetlapouis noso timoapolaktis? Amo xikinkauili tlen oksekimej makijtokan mamitsmomojti. Xikilui Jehová mamitspaleui xikchiua tlen ye kiyolpaktia uan ijkuak mitsnankilis, okachi tikneltokilis uan timoyolchikauas (Is. 41:10, 13).

15. ¿Tlen opanok ijkuak Jesús okinmonextili imachtijkauan? (Lucas 24:52, 53).

¹⁵ Imachtijkauan Jesús sapanoua omoyolkokojkej ijkuak okimiktijkej. ¿Ken timomachiliskia tla ompa tiyetoskia? Imachtijkauan sapanoua omotekipachojkej porque Jesús okatka inyolikni (Luc. 24:17-21). Ijkuak Jehová okiyoliti  Jesús okinmonextili imachtijkauan uan okinmilui profecías tlen kijtoua Biblia yopanotoka. Noijki okinmilui tlen omonekiaya kichiuaskej (Luc. 24:26, 27, 45-48). Opanok 40 tonalmej uan Jesús oyajki iluikak, imachtijkauan ayakmo omoyolkokouayaj uan oyolpakiayaj. Yejuan okimatiayaj Jesús oyoltoka uan kinpaleuiskia makitekichiuilikan Jehová ikinon oyolpakiayaj uan nochipa okiueyichiuayaj toTajtsin Dios (xiktlajtolti Lucas 24:52, 53; Hech. 5:42).

16. ¿Ken uelis tikchiuaskej ken imachtijkauan Jesús?

¹⁶ ¿Ken uelis tikchiuaskej ken imachtijkauan Jesús? Moneki mojmostla matiyolpakikan ijkuak tiktekichiuiliaj Jehová uan amo san ijkuak tikilnamikiskej imikilis Jesús. Moneki tikpaleuiskej iTekiuajkayo toTajtsin Dios. Sekimej tokniuan ayakmo okachi tekipanouaj para tetlapouiskej, monechikoskej uan momachtiskej Biblia iuan infamilias. Noijki sekimej tokniuan amo kitemouaj kipiaskej miak tlamantli para okachi tlapaleuiskej kanin monechikouaj noso tetlapouiskej kanin amo miakej tetlapouiaj. Moneki timochijchikauaskej para tiktekichiuiliskej Jehová, tla ijkon tikchiuaj ye sapanoua techteochiuas (Prov. 10:22; Mat. 6:32, 33).

17. ¿Tlen moneki tikchiuaskej ijkuak yitikilnamikiskej imikilis Jesús? (Xikita foto).

¹⁷ Yitiknekij maajsi tonal martes 4 de abril para tikilnamikiskej imikilis Jesús. Pero amo moneki tikchiaskej maajsi non tonal para timokuayejyekoskej Jehová uan Jesús sapanoua techtlasojtlaj uan tlen yokichijkej topatka. Noijki ijkuak yitikilnamikiskej imikilis Jesús ijkon matikchiuakan. Xikintemo uan ximomachti apéndices 16-A uan 16-B tlen intoka “Saiktlami semana ijkuak Jesús okatka Tlaltikpak” tlen kajki itech Amatlajkuilol tlen mitspaleuis timomachtis iTlajtol toTajtsin Dios. Noijki xikintemo textos tlen mamitspaleui xitetlasojkamati, xitetlasojtla, ximoyolchikaua uan xiyolpaki. Ximokuayejyeko ken uelis tikteititis melauak tikintlasojkamatilia ika nochi moyolo tlen Jehová uan Jesús yokichijkej topatka. Xikneltoka Jesús sapanoua kipatioita ijkuak timochijchikauaj tikilnamikiskej imikilis (Apoc. 2:19).