TLAMACHTIL 4
Jehová techteochiua ijkuak tikilnamikij imikilis Jesús
“Ijkí xikchiwakah para nonnechilnamikiskeh”(LUCAS 22:19).
TLAKUIKALI 19 ICena toTeko
XIKILNAMIKTO a
1, 2. ¿Tleka tikilnamikij imikilis Jesús?
YIKIPIA kanaj 2,000 xiuitl Jesús omotemakak topatka uan ijkon tejuan uelis nochipa tiyoltoskej. Youak ijkuak ayamo okimiktiayaj Jesús, okichi iCena iuan imachtijkauan, okikuajkej pan uan okonikej vino. Tlen okichi Jesús kiteititia techtlasojtla ikinon okinnauati imachtijkauan makilnamikikan (1 Cor. 11:23-26).
2 Akinmej tikchiuaj ken Cristo tiktlakamatij tlen Jesús otlanauati porque tiktlasojtlaj (Juan 14:15). Ijkuak tikilnamikiskej imikilis Jesús techpaleuis matikteititikan tikpatioitaj topatka omotemakak. Ijkon tikchiuaj ijkuak tiktlatlaujtiaj Jehová uan timokuayejyekouaj tleka omotemakak Jesús. Noijki techpaktia okachi titetlapouiskej uan tikinyoleuaskej miakej touan mamonechikokan. Amo tiknekij amitlaj matechtsakuili para tikilnamikiskej imikilis Jesús.
3. ¿Tlen tikitaskej?
3 Akinmej tiktekichiuiliaj Jehová timochijchikauaj para tikilnamikiskej imikilis Jesús. Ikinon axkan tikitaskej eyi tlamantli tlen ijkon kiteititia: (1) tikilnamikij imikilis Jesús ijkon ken otechnauati, (2) tikinyoleuaj oksekimej para touan mamonechikokan uan (3) tikilnamikij imikilis Jesús maski titlajyouiaj.
TIKILNAMIKIJ IMIKILIS JESÚS IJKON KEN OTECHNAUATI
4. ¿Tlen timomachtiaj ijkuak tikilnamikij imikilis Jesús uan tleka moneki tikpatioitaskej? (Lucas 22:19, 20).
4 Sejse xiuitl ijkuak tikilnamikij imikilis Jesús se tokni tlamachtia tlen kijtoua Biblia. Noijki techmachtia tleka omonekiaya matechmakixtikan uan noijki techiluia tleka uelis techtlapojpoluiskej porque omotemakak Jesús. Techiluia akinmej moneki kikuaskej pan uan koniskej vino uan tlen kijtosneki (xiktlajtolti Lucas 22:19, 20). Ijkuak tokni techmachtia uelis timokuayejyekoskej ken kinteochiuaskej akinmej chantiskej itech tlaltikpak (Is. 35:5, 6; 65:17, 21-23). Moneki tikpatioitaskej tlen techmachtia. Miakej amo kajsikamatij tleka Jesús omotemakak topatka ikinon amo okachi kipatioitaj. Noijki miakej amo kilnamikij imikilis Jesús ken otechnauati. ¿Tleka amo ijkon kichiuaj?
5. ¿Ken opejki miakej kilnamikij imikilis Jesús ijkuak oixpolikej apóstoles?
5 Satepan ijkuak oixpolikej iapóstoles Jesús, sekimej opejki kinkajkayauaj akinmej okichiuayaj ken Cristo (Mat. 13:24-27, 37-39). Yejuan “kitemachtiskeh tlan amo milák, para kinyakanaskeh akimeh kineltoka Dios” (Hech. 20:29, 30). Yejuan opejkej tlamachtiaj “tlan amo milák” uan okijtojkej Jesús amo omotemakak “san se welta para makimiktikah iwa ijkó matechtlapojpolwikah de totlajtlakolwah”. Biblia amo ijkon tlamachtia pero yejuan okijtouayaj miak uelta omonekiaya motemakas Jesús (Heb. 9:27, 28). Axkan miakej akinmej yolkualmej ijkon kineltokaj. Yauij teopan nochi semanas noso mojmostla para kichiuaskej tlen kixmatij ken eucaristía. b Oksekimej religiones amo okachi kilnamiki imikilis Jesús porque amo kajsikamatij tlen kijtosneki. Ualeua oksekimej mokuayejyekouaj: “¿Melauak nechtlapojpoluis toTajtsin Dios porque Jesús omotemakak nopatka?”. Sekimej ijkon mokuayejyekouaj porque kinmachtiaj imikilis Jesús amo uelis kinpaleuis. Pero, ¿tlen yokichijkej akinmej melauak kichiuaj ken Cristo?
6. ¿Tlen opanok itech 1872?
6 Kanaj itech 1 870 sekimej tokniuan tlen okinyekanayaj Charles Russell, opejki momachtiaj iTlajtol toTajtsin Dios. Yejuan okinekiayaj kajsikamatiskej tleka omotemakak Jesús topatka uan ken uelis kilnamikiskiaj imikilis. Itech 1872, ijkuak omomachtijkej iTlajtol toTajtsin Dios okajsikamatkej tleka Jesús otechmakixti uan okintlapouijkej oksekimej porque okitlalijkej itech amochmej, periódicos uan revistas. Satepan sejse xiuitl opejki kilnamikij imikilis Jesús ijkon ken okichiuayaj tokniuan itech achto siglo.
7. ¿Ken techpaleuia tlen okichijkej tokniuan tlen omomachtijkej Biblia?
7 ¿Ken techpaleuiaj tlen okichijkej tokniuan tlen omomachtijkej Biblia? Jehová okinteochi tokniuan porque omochijchikajkej uan axkan tikajsikamatij tleka omotemakak Jesús uan ken techpaleuia tlen okichi (1 Juan 2:1, 2). Noijki otikajsikamatkej, Biblia tlamachtia sekimej akinmej okitlakamatkej toTajtsin Dios yaskej iluikak uan ayakmo ixpoliuiskej pero oksekimej nochipa yoltoskej nikan tlaltikpak. Noijki okachi timouikaj iuan Jehová ijkuak timokuayejyekouaj ken sapanoua techtlasojtlaj uan noijki ken techpaleuia imikilis Jesús (1 Ped. 3:18; 1 Juan 4:9). Tejuan tikinyoleuaj oksekimej touan makilnamikikan imikilis Jesús ijkon ken otechnauati uan tikchiuaj ijkon ken okichijkej tokniuan itech achto siglo.
TIKINYOLEUAJ OKSEKIMEJ TOUAN MAMONECHIKOKAN
¿Ken okachi uelis tiktekichiuiliskej Jehová ijkuak tikilnamikiskej imikilis Jesús? (Xikinmita párrafos 8 hasta 10). e
8. ¿Tlen tikchiuaj tiiTlaixpantijkauan Jehová para oksekimej touan makilnamikikan imikilis Jesús? (Xikinmita fotos).
8 TiiTlaixpantijkauan Jehová yitikpiaj miak xiuitl tikinyoleuaj oksekimej touan makilnamikikan imikilis Jesús. Itech 1881 nin revista okinyole tokniuan tlen ochantiayaj Estados Unidos mamonechikokan itech se kali ompa Allegheny (Pensilvania) para makilnamikikan imikilis Jesús. Satepan sejse nechikolmej opejki kilnamikij imikilis Jesús. Pero itech 1 940 okinmiluijkej tokniuan uelis kinyoleuaskiaj akinmej okinekiayaj touan monechikoskej. Itech 1960 tokniuan tlen tlapaleuiaj Betel opejki kintitlaniliaj tlanechikolmej amatsitsintin para kinyoleuaskiaj oksekimej, tiiTlaixpantijkauan Jehová yiuejkika tikinmakaj oksekimej amatsitsintin para tikinyoleuaskej touan mamonechikokan. ¿Tleka timochijchikauaj ijkon tikchiuaskej?
9, 10. ¿Akinmej noijki tikinyoleuaj makilnamikikan imikilis Jesús? (Juan 3:16).
9 Tejuan tikinyoleuaj oksekimej touan makilnamikikan imikilis Jesús porque tiknekij makimatikan tlen Jehová uan Jesús yokichijkej topatka (xiktlajtolti Juan 3:16). Noijki tiknekij tlen kikakiskej uan kitaskej non youak, makinyolini makitekichiuilikan Jehová. Pero ijkuak tikinyoleuaj oksekimej touan makilnamikikan imikilis Jesús amo san yejuan kinpaleuiaj.
10 Tejuan noijki tikinyoleuaj touan makilnamikikan imikilis Jesús tokniuan akinmej ayakmo tetlapouiaj. Ijkon tikchiuaj para tikinmilnamiktiskej Jehová kintlasojtla. Tiyolpakij ijkuak miakej touan monechikouaj. Non youak uelis kilnamikiskej ken oyolpakiayaj ijkuak okitekichiuiliayaj Jehová. Matikitakan tlen okipanok Mónica. c Ijkuak miakej okachi omokokouayaj ika COVID-19, ye oksepa opejki tetlapouiaj. Itech 2021 ijkuak okilnamik imikilis Jesús, okijto: “Sapanoua onikpatioitak nikilnamikis imikilis Jesús nin xiuitl porque yopanok 20 xiuitl amo onitetlapouiaya uan oksepa opejki ijkon nikchiua, nikinyoleua oksekimej touan mamonechikokan. Onikchi ika nochi noyolo porque ijkon onikteititi nikintlasojkamatilia tlen Jehová uan Jesús yokichijkej nopatka” (Sal. 103:1-4). Maski amo nochtin kinekiskej touan monechikoskej, tejuan timochijchikauaj para tikinyoleuaskej uan Jehová kipatioita tlen tikchiuaj.
11. ¿Ken techteochijtok Jehová porque timochijchikauaj tikinyoleuaskej oksekimej touan makilnamikikan imikilis Jesús? (Ageo 2:7).
11 Jehová sapanoua techteochiua porque timochijchikauaj tikinyoleuaskej oksekimej touan makilnamikikan imikilis Jesús. Itech xiuitl 2021 maski opanotoka COVID-19, otikilnamikej imikilis Jesús 21 millones trescientos sesenta y siete mil seiscientos tres. TiiTlaixpantijkauan Jehová tikatej kanaj 8 millones ikinon uelis tikijtoskej okachi miakej otimonechikojkej. Pero Jehová amo okachi kipatioita keski timonechikouaj ye okachi kipatioita akinmej timonechikouaj (Luc. 15:7; 1 Tim. 2:3, 4). Jehová techpaleuia matikinmajsikan akinmej yolkualmej ijkuak tikinyoleuaj touan makilnamikikan imikilis Jesús (xiktlajtolti Ageo 2:7).
TIKILNAMIKIJ IMIKILIS JESÚS MASKI TITLAJYOUIAJ
Jehová techteochiua tla timochijchikauaj tikilnamikiskej imikilis Jesús. (Xikita párrafo 12). f
12. ¿Tlen tlamantli xamo kichiuas amo matikilnamikikan imikilis Jesús? (Xikita foto).
12 Jesús okijto ijkuak yitlamis nochi tlen amo kuali techtlajyouiltiskej tofamiliares, ayakmo techkauiliskej matimonechikokan nion matitetlapouikan, noijki yetos guerras, miakej mokokoskej uan panos okseki tlamantli tlen amo kuali (Mat. 10:36; Mar. 13:9; Luc. 21:10, 11). Nochi non xamo kichiuas amo matikilnamikikan imikilis Jesús. ¿Tlen okichijkej tokniuan tlen yokinpanok non tlamantli tlen amo kuali uan ken yokinpaleui Jehová?
13. ¿Ken okiteochi Jehová tokni Artiom porque omochijchika kilnamikis imikilis Jesús maski otsaktoka?
13 Ijkuak techtsakuaj. Tokniuan akinmej tsaktokej mochijchikauaj kilnamikiskej imikilis Jesús. Matikitakan tlen okipanok tokni Artiom. Ijkuak otikilnamikej imikilis Jesús xiuitl 2020 tokni otsaktoka itech se cuarto tlen okipiaya 17 metros ik ueyak uan 17 metros ik patlauak uan ompa kanaj makuili okintsakuayaj. Maski otsaktoka tokni okitemo seki tlamantli tlen okipaleui makineskayoti pan uan vino uan ye okipanolti tlamachtil para kilnamikiskia imikilis Jesús. Pero akinmej iuan otsaktoka otlachichinayaj uan otlateneuayaj. ¿Tlen okichi tokni Artiom? Okinmilui tla ueliskiaj san se hora amo tlachichinaskiaj nion tlateneuaskiaj uan yejuan ijkon okichijkej. Ye okijto: “Onikinmilui uelis nikinmachtis tleka moneki tikilnamikiskej imikilis Jesús”. Maski amo okinekej tokni makinmachti, ijkuak okitakej ken tokni okilnamik imikilis Jesús okinekej kimatiskej okachi.
14. ¿Tlen otikchijkej tiiTlaixpantijkauan Jehová para tikilnamikiskej imikilis Jesús maski opanotoka COVID-19?
14 COVID-19. Ijkuak opanotoka non kokolistli tiiTlaixpantijkauan Jehová kema otikilnamikej imikilis Jesús maski amo otimonechikojkej. d Akinmej okipiayaj internet okitayaj tlamachtil ika videoconferencia. Pero, ¿ken okitakej tlamachtil tokniuan tlen amo okipiayaj internet? Itech sekimej altepemej tokniuan okipanoltijkej tlamachtil ika radio noso ika televisión. Noijki tokniuan tlen tlapaleuiaj Betel okitlajtolkopkej grabaciones tlen okipiayaj tlamachtilmej ika 500 tlatlamantli tlajtolmej. Para tokniuan tlen chantij kanin amo kajki internet makilnamikikan imikilis Jesús uan sekimej tokniuan okinuikilijkej grabaciones.
15. ¿Tlen techmachtia tlen okipanok Sue?
15 Techtlajyouiltiaj tofamiliares. Miakej kitaj oui kilnamikiskej imikilis Jesús porque infamiliares kintlajyouiltiaj. Ijkon okipanok se siuatl tlen itoka Sue uan touan momachtia. Itech xiuitl 2021 ijkuak kilnamikiskia imikilis Jesús, Sue okilui tokni akin okimachtiaya amo kilnamikiskia imikilis Jesús porque ifamilia amo kikauiliskiaj. Tokni okitlajtoltili Lucas 22:14. Okilui ijkuak titlajyouiaj matikchiuakan ken Jesús uan matikiluikan Jehová tlen techpanotok uan matikneltokakan ye techpaleuis. Mostlatika ijkuak kilnamikiskia imikilis Jesús, Sue omoyektlali, okitak video tlen kualkan timomachtiaj non tonal uan noijki yokipiaya pan uan vino. Ijkuak oajsik hora, omokaltsak kanin kochi uan okikak tlamachtil para kilnamikis imikilis Jesús ika iteléfono. Satepan okitlajkuilili tokni akin kimachtia: “Yala sapanoua otinechyolchika. Jehová onechpaleui para manimochijchikaua nikilnamikis imikilis Jesús. Axkan sapanoua niyolpaki uan niktlasojkamatilia”. Tla ijkon mitspanotok, ¿tikneltoka Jehová mitspaleuis?
16. ¿Tleka tikneltokaj Jehová techteochiuas tla timochijchikauaj tikilnamikiskej imikilis Jesús? (Romanos 8:31, 32).
16 Jehová sapanoua kiyolpaktia ijkuak timochijchikauaj tikilnamikij imikilis Jesús. Ikinon moneki tikneltokaskej Jehová techteochiuas tla tiktlasojkamatiliaj tlen okichi topatka (xiktlajtolti Romanos 8:31, 32). Ximochijchikaua tikilnamikis imikilis Jesús nin xiuitl uan okachi xiktekichiuili Jehová.
TLAKUIKALI 18 Tiktlasojkamatij imikilis Jesús
a Martes 4 de abril 2023 itech nochi tlaltikpak sapanoua timiakej tikilnamikiskej imikilis Jesús uan miakej yikin monechikoskej. Noijki ijkon kichiuaskej oksekimej iTlaixpantijkauan Jehová tlen ayakmo omonechikouayaj. Noijki oksekimej mochijchikauaskej touan kilnamikiskej imikilis Jesús. Tla te noijki timochijchikauas tikilnamikis imikilis Jesús, xikilnamikto Jehová yolpaki porque ijkon tikchiuas.
b Miakej akinmej ijkon kineltokaj mokuayejyekouaj ijkuak ijkon kichiuaj, pan uan vino mokopa icuerpo uan ieso Cristo. Ijkuak ijkon kichiuaj kineltokaj Cristo oksepa motemaka.
c Itech nin tlamachtil sekimej otikinpatilijkej intoka.
d Noijki xikita itech jw.org sekimej tlamachtilmej tlen intoka “Conmemoración del 2021”.
