1. ¿Tleka miakej ayakmo kineltokaj tlen kijtoua Biblia?

 AXKAN miakej ayakmo kineltokaj tlen kijtouaj oksekimej. Miakej kintlajtlachialtia tlen kichiuaj tekiuajkej, ixtlamatkej uan akinmej kipiaj tomin pero amo kimatij kox melauak kichiuaj tlen kuali. Noijki amo okachi kintlakaitaj teopixkej ikinon miakej ayakmo kineltokaj tlen kijtoua Biblia porque teopixkej amo kichiuaj tlen ompa kijtoua.

2. Ijkon ken kijtoua Salmo 119:160, ¿tlen moneki tikneltokaskej?

² Akinmej tiktekichiuiliaj Jehová tikneltokaj ye kijtoua tlen melauak uan kineki kuali matiyetokan (Sal. 31:5; Is. 48:17). Tikmatij uelis tikneltokaskej tlen kijtoua Biblia porque nochi tlen ompa kijtoua melauak (xiktlajtolti Salmo 119:160). Tikneltokaj ijkon ken okijto se tlakatl tlen momachtia ken okitlajtolkopkej Biblia: “Nochi tlen toTajtsin Dios yokijto melauak uan nochi mochiua. Akinmej pouij itech ialtepe toTajtsin Dios kineltokaj tlen ye yokijto porque kimatij amo tlakajkayaua”.

3. ¿Tlen tikitaskej?

³ ¿Ken uelis tikinpaleuiskej oksekimej makineltokakan iTlajtol toTajtsin Dios? Axkan tikitaskej tlen kijtoua Biblia amo mopatla, nochipa mochiuaj profecías tlen ompa ijkuilitokej uan uelis kinpaleuis oksekimej makipatlakan innemilis.

4. ¿Tleka miakej kijtouaj Biblia mopatla?

⁴ Jehová okichi 40 tlakamej tlen okitekichiuiliayaj makijkuilokan Biblia. Pero axkan amo tikpiaj tlen yejuan okijkuilojkej porque san tikpiaj copias. Ikinon axkan miakej amo kimatij kox melauak tlen okijkuilojkej nonmej tlakamej tlen kajki axkan itech Biblia. ¿Ken tikmatij tlen kijtoua Biblia amo mopatla?

5. ¿Ken okichijkej copias kanin oijkuilitoka Escrituras Hebreas? (Xikita dibujo tlen kajki itech página 1).

⁵ Jehová otlanauati makijkuilokan iTlajtol para amo mapoliui. Ye noijki okinnauati akinmej otlanauatiayaj Israel makichiuakan copias kanin okatkaj itlanauatiluan. Noijki okinmilui levitas makinmiluikan israelitas tlen okijtouayaj tlanauatilmej (Deut. 17:18; 31:24-26; Neh. 8:7). Ijkuak judíos omokopkej Jerusalén, sekimej tlakamej okinchijkej copias kanin oijkuilitoka Escrituras Hebreas noso Antiguo Testamento (Esd. 7:6, notas). Yejuan okitakej tlen okijkuilojkej mayeto ijkon ken okijkuilojkej yiuejkika. Satepan okinpojkej tlajtolmej uan hasta letras para kitaskiaj kox nochi kuali oijkuilitoka. Pero maski yejuan ijkon okichijkej, omotlapololtijkej porque noijki okatkaj tlajtlakolejkej. Okitakej kanin omotlapololtijkej porque okinchijkej miakej copias. ¿Ken okichijkej?

6. ¿Ken uelis kimatiskej kanin omotlapololtijkej akinmej okinchiuayaj copias?

⁶ Axkan sekimej ixtlamatkej momachtiaj ken okitlajtolkopkej Biblia, kitaj kanin omotlapololtijkej akinmej okinchijkej copias. ¿Ken kichiuaj? Matikijtokan kanaj 100 tlakamej kinmiluiaj makijkuilokan se texto itech okse amatl, pero se tlakatl omotlapololti. ¿Ken uelis kimatiskej kanin omotlapololti? Moneki kinmitaskej nochi copias. Ijkon kichiuaj ixtlamatkej akinmej momachtiaj ken okitlajtolkopkej Biblia, yejuan kinmitaj nochi copias tlen yiuejkika okinmijkuilojkej uan ijkon kitaj kanin omotlapololtijkej noso kanin amo okitlalijkej itlaj tlen omonekiaya kiuikas.

7. ¿Ken tikmatij akinmej okinchiuayaj copias sapanoua omochijchikajkej?

⁷ Akinmej okichijkej copias kanin oijkuilitoka Biblia sapanoua omochijchikauayaj. Se copia tlen okichijkej kanaj itech xiuitl 1008-1009 tlen okachi ajsitok itech Escrituras Hebreas itoka Códice de Leningrado. Pero ayamo kipia miak xiuitl okajsikej oksekimej copias uan textos tlen amo ajsitokej, tlen kipiaj kanaj 1000 xiuitl okachi yiuejkika okijkuilojkej uan amo ken Códice de Leningrado. Xamo timokuayejyekoskej copias tlen okajsikej uan Códice de Leningrado omopatlak tlen ompa oijkuilitoka porque yopanotoka miak xiuitl. Pero ¿melauak ijkon opanok? Ixtlamatkej tlen momachtiaj ken okitlajtolkopkej Biblia okitakej copias tlen okajsikej uan Códice de Leningrado amo omopatlak. Tlen kijtoua Biblia amo omopatlak maski opanok miak xiuitl.

8. ¿Omopatlakej copias tlen okichijkej kanin oijkuilitoka Escrituras Griegas Cristianas?

⁸ Tokniuan itech achto siglo noijki okinchiuayaj copias itech Escrituras Hebreas uan noijki okinchiuayaj copias kanin okatkaj 27 amochmej tlen kipia Escrituras Griegas Cristianas (noso Nuevo Testamento), nonmej copias okintlajtoltiayaj ijkuak omonechikouayaj uan  ijkuak otetlapouiayaj. Se tlakatl ixtlamatki tlen momachtia ken okitlajtolkopkej Biblia, okitak copias tlen yiuejkika okinmijkuilojkej uan noijki okitak copias tlen kajki itech Escrituras Griegas Cristianas. Ijkuak okinmitak nonmej copias okijto: “Katej miakej copias uan ajsitokej”. Se amochtli okijto: “Uelis tikneltokaskej tlen yiuejkika okijkuilojkej ajsitok uan kipia nochi tlen toTajtsin Dios otlanauati makijkuilokan” (Anatomy of the New Testament).

9. ¿Tlen techmachtia Isaías 40:8?

⁹ Akinmej okinchijkej copias omochijchikajkej ikinon uelis tikneltokaskej ijkuak tiktlajtoltiaj Biblia ajsitok tlen ompa ijkuilitok. b Jehová amo okitekauili itlaj makipatlakan (xiktlajtolti Isaías 40:8). Pero sekimej mokuayejyekoua maski Biblia amo omopatlak amo kijtosneki melauak iTlajtol toTajtsin Dios. Axkan timomachtiskej tleka tikneltokaj Biblia melauak iTlajtol Jehová.

10. Xikijto se profecía tlen yomochi uan tlen okiteititi melauak tlen kijtoua 2 Pedro 1:21 (xikinmita fotos).

¹⁰ Biblia kinpia miakej profecías tlen yomochijkej uan sekimej yikipiaj miak xiuitl okinmijkuilojkej. Tlen yiuejkika opanok techititia seki profecías yomochijkej. Tejuan tikneltokaj tlen kijtouaj profecías porque tikmatij Jehová otlanauati makijkuilokan (xiktlajtolti 2 Pedro 1:21). Matimokuayejyekokan tlen okipanok ueyi altepetl Babilonia kanaj itech xiuitl 778 achto itech xiuitl se. Jehová okilui Isaías makijkuilo Babilonia kimoaxkatiskiaj. Noijki okijto akin kimoaxkatiskia altepetl, motokayotiskia Ciro uan hasta okijto ken kichiuaskia (Is. 44:27–45:2). Isaías noijki okijto satepan Babilonia kipojpoloskiaj uan amikaj ompa chantiskia (Is. 13:19, 20). Nochi  tlen okijkuilo omochi, itech xiuitl 539 achto itech xiuitl se. Medos uan persas okimoaxkatijkej altepetl Babilonia, okipojpolojkej uan hasta axkan amikaj ompa chanti (xikita video Biblia okijto kimoaxkatiskiaj Babilonia itech punto 5 tlamachtil 3 itech amochtli Tiyoltos uan tiyolpakis).

11. ¿Ken mochijtok profecía tlen ijkuilitok itech Daniel 2:41-43?

¹¹ Sekimej profecías yomochijkej, pero noijki axkan mochijtokej oksekimej. Matimomachtikan se profecía tlen axkan mochijtok. Daniel okijkuilo se profecía, okijto itlamian tonalmej tlanauatiskia se ueyi tekiua uan axkan moixmati ken Reino Unido uan Estados Unidos (xiktlajtolti Daniel 2:41-43). Profecía okijto non tekiuajkayotl “yetos chikauak” ken hierro uan “noijki yamanki” ken sokitl. Axkan ijkon panotok, porque nonmej ome altepemej okiteititijkej chikauakej ken hierro ijkuak opanokej ome guerras tlen omochijkej itech nochi tlaltikpak uan hasta axkan ok kipiaj miak tlamantli tlen ika moteuiskej. Pero akinmej chantij itech nonmej altepemej moxexelouaj ijkuak amo kinpaktia ken kinnauatiaj uan kichiuaj protestas noso okseki tlamantli. Se tlakatl tlen kita tlen kichiuaj políticos itech nochi tlaltikpak okijto: “Políticos tlen katej Estados Unidos amo san sekan tekipanouaj uan xexelitokej maski kipiaj tlen okachi yankuik”. Reino Unido noijki ijkon kipanoua, akinmej ompa chantij xexelitokej uan amo nochtin san se tlamantli mokuayejyekouaj. Ikinon amo mouikaj iuan altepemej tlen katej Unión Europea. Reino Unido uan Estados Unidos xexelitokej uan amo ueli tlanauatiaj ken yejuan kinekij.

12. ¿Ken techpaleuiaj profecías tlen katej itech Biblia?

¹² Okachi tikneltokaj toTajtsin Dios kichiuas tlen okijto porque tikmatij miakej profecías yomochijkej. Tikmachiliaj ken akin okijkuilo Salmo, ye okijto: “Nikneki techmakixti, porque nikneltoka motlajtol” (Sal. 119:81). Jehová techtlasojtla ikinon Biblia kijtoua: “Namechmakas tlen okachi kuali” (Jer. 29:11). San toTajtsin Dios techmakas tlen yokijto uan amo yejuan tlakamej. Ikinon okachi matimomachtikan profecías tlen katej itech Biblia porque non techpaleuis okachi matikneltokakan iTlajtol toTajtsin Dios.

13. ¿Tleka noijki tikneltokaj tlen kijtoua Biblia? (Salmo 119:66, 138).

¹³ Noijki tikneltokaj tlen kijtoua Biblia porque akinmej kichiuaj tlen ompa kijtoua kinpaleuia kuali mayetokan (xiktlajtolti Salmo 119:66, 138). Sekimej tlen yomonamiktijkej okinekiayaj mokajkauaskej ixpan tekiuajkej, pero axkan san sekan katej uan yolpakij porque momachtiaj Biblia. Noijki inkoneuan amo tlajyouiaj uan kintlasojtlaj (Efes. 5:22-29).

14. ¿Ken okipaleui Biblia makipatla inemilis Jack?

¹⁴ Biblia yokinpaleui miakej makipatlakan innemilis, hasta akinmej okichiuayaj tlen sapanoua amo kuali. Matikitakan ken okipaleui Biblia makipatla inemilis Jack c ijkuak otsaktoka. Ye sapanoua okualaniaya uan otlateuiaya.  Miakej okixmatiaya ye sapanoua amo yolkuali ikinon tekiuajkej okijtojkej kimiktiskej. Pero se tonal okikak ijkuak tokniuan otlamachtijtokaj ika Biblia, yejuan kualtsin okitlapouijkej uan ye okipakti, non okichi makineki momachtis. Jack opejki kichiua tlen kijtoua Biblia uan okipatlak inemilis. Satepan ye opejki tetlapouia uan omoapolakti. Okintlapouiaya akinmej iuan otsaktokaj tlen kichiuas iTekiuajkayo toTajtsin Dios uan okinmachti naui tlakamej. Ijkuak oajsik tonal para kimiktiskej Jack ayakmo sapanoua okualaniaya uan ayakmo okipaktiaya moteuis. Se abogado okijto: “Yikipia 20 xiuitl onikixmatki Jack pero yonikitak sapanoua yomopatlak, tlen omomachti iuan iTlaixpantijkauan Jehová sapanoua okipaleui uan okipatili inemilis”. Maski Jack okimiktijkej, tlen okichi techmachtia uelis tikneltokaskej iTlajtol toTajtsin Dios techpaleuis matikpatlakan tonemilis (Is. 11:6-9).

15. ¿Tleka tiitekipanojkauan Jehová amo tikchiuaj ken oksekimej? (Xikinmita fotos).

¹⁵ Tiitekipanojkauan Jehová timoyolseuijtokej uan san sekan tiktekichiuiliaj porque timochijchikauaj tikchiuaj tlen kijtoua Biblia (Juan 13:35; 1 Cor. 1:10). Tejuan kuali timouikaj maski axkan políticos moxexelouaj, miakej techikoitaj uan miakej amo kuali mouikaj. Se telpochtli tlen chanti África tlen itoka Jean, okitlajtlachialti ijkuak okitak tejuan kuali timouikaj. Ijkuak opejki guerra ompa ialtepe omochi soldado, pero ocholo itech okse altepetl kanin okinmixmatki iTlaixpantijkauan Jehová. Ye okijto: “Onimomachti akinmej melauak kichiuaj ken Cristo motlasojtlaj uan amo mokajkalakiaj itech política nion moxexelouaj”. Noijki okijto: “Oniknekiaya nitlapaleuis itech noaltepe maski  nechmiktiskia, pero opejki nimomachtia Biblia ikinon onikijto niktekichiuilis nochipa Jehová”. Jean okipatlak inemilis uan ayakmo omoteui, axkan kinmachtia Biblia oksekimej para mamoyolseuijtokaj. Tlen kijtoua Biblia miakej okinpatili innemilis, non techpaleuia matikneltokakan Biblia melauak iTlajtol toTajtsin Dios.

16. ¿Tleka moneki nochipa tikneltokaskej Biblia?

¹⁶ Tikatej itlamian tonalmej uan axkan okachi panoua tlen amo kuali ikinon moneki tikteititiskej okachi titlaneltokaj. Xamo sekimej kinekiskej matimokuayejyekokan tlen kijtoua Biblia amo melauak uan kijtoskej “tlakeuali yolmelajki uan ixtlamatki” amo okitlali Jehová para matechyekana. Pero amo techkajkayauaskej tla tejuan tikneltokaj Biblia melauak iTlajtol toTajtsin Dios uan techmachtia tlen melauak. Nochipa tikintlakamatiskej itlanauatiluan Jehová uan tikijtoskej ken salmista tlen okijto: “Nochipa nikchiuas tlen technauatia” (Sal. 119:112). Amo moneki tipinauaskej ijkuak titetlapouiskej uan titlamachtiskej tlen kijtoua Biblia (Sal. 119:46). Ijkuak techtlajyouiltiskej monekis titlaxikoskej “ika chikawálistli iwa pakílistli” (Col. 1:11; Sal. 119:143, 157).

17. ¿Tlen techilnamiktis texto para xiuitl 2023?

¹⁷ Sapanoua tiktlasojkamatiliaj Jehová porque otechpaleui matikixmatikan iTlajtol. Itech nochi tlaltikpak miakej amo kimatij tlen kichiuaskej, pero tejuan techpaleuia Biblia uan tikmatij tlen moneki tikchiuaskej satepan. Noijki Biblia kijtoua kuali tiyetoskej ijkuak tlanauatis iTekiuajkayo toTajtsin Dios. Ikinon texto para xiuitl 2023 techpaleuis okachi matikneltokakan Biblia melauak iTlajtol toTajtsin Dios (Sal. 119:160).