1. ¿Tleka ualeua timomojtiaj?

 UALEUA tinochtin timomojtiaj. Biblia techmachtia amo matikinmauilikan akinmej yoixpolikej, ejekamej uan noijki amo matechmomojti tlen satepan panos. Pero axkan okachi mota “miak tlamantli temomojti”. Onka guerras, miakej kichiuaj tlen amo kuali uan onka miak kokolistli (Luc. 21:11). Xamo noijki tikinmauiliaj tekiuajkej, tofamilia noso oksekimej akinmej amo kinpaktia tlen tikneltokaj. Sekimej momojtiaj porque mokuayejyekouaj amo uelis kixikoskej tlen axkan kixnamikij noso tlen satepan kixnamikiskej.

2. ¿Tlen okipanok David ijkuak oajsito altepetl Gat?

² Matimokuayejyekokan tlen okipanok David tlen okatka itekipanojka toTajtsin Dios. Ye ualeua noijki omomojti. Ye oyajki altepetl Gat ijkuak tekiua Saúl okinekiaya kimiktis. David omomojti ijkuak okimatki tekiua Akís okimatki akin okatka ye. Non tekiua otlanauatiaya Gat uan okimatki David okatka chikauak uan okinmikti sapanoua miakej filisteos (1 Sam. 21:​10-12). Omomojti porque omokuayejyekouaya tekiua itlaj kitoktiskia. ¿Tlen okichi David para ayakmo momojtis?

3. ¿Tlen okichi David para ayakmo momojtis ijkon ken kijtoua Salmo 56:​1-3, 11?

 ³ Itech Salmo 56 David okijto ken omomachiliaya ijkuak okatka itech altepetl Gat. Ompa okiyekijto tleka omomojtiaya uan ken okipaleui makineltoka Jehová para ayakmo momojtis (xiktlajtolti Salmo 56:​1-3, 11). Amitlaj okipanok porque okineltokak Jehová. ToTajtsin Dios okipaleui David ijkuak okichi oksekimej mamokuayejyekokan ye okuatlapolo. Ikinon tekiua Akís omokuayejyeko amitlaj kintoktiskia uan ijkon David ocholo (1 Sam. 21:​13–22:1).

4. Xikyekijto ken uelis okachi tikneltokaskej Jehová.

⁴ Tejuan noijki ayakmo timomojtiskej tla tikneltokaj Jehová. ¿Ken uelis okachi tikneltokaskej Jehová ijkuak timomojtiaj? Matikijtokan se tepajti techiluia tikpiaj se kokolistli. Xamo timomojtiskej ijkuak ijkon techiluis. Pero xamo timoyolseuiskej porque non tepajti yokinpajti miakej tlen noijki okipiayaj non kokolistli. Noijki tikitaj tepajti kuali techkaki, techajsikamati ken timomachiliaj uan techiluia techmakas se pajtli tlen yokinpaleui miakej. Jehová noijki uelis techyolseuis tla timokuayejyekouaj tlen yokichi, tlen kichijtok uan tlen kichiuas satepan para techpaleuis. Salmo 56 kijtoua David ijkon okichi. Ijkuak timomachtijtiaskej seki versículos, matimokuayejyekokan ken uelis okachi tikneltokaskej Jehová uan ayakmo timomojtiskej.

¿TLEN YOKICHI JEHOVÁ?

5. ¿Tlen omokuayejyeko David para ayakmo momojtis? (Salmo 56:​12, 13).

⁵ Ijkuak David uelis itlaj kipanoskia, ye omokuayejyeko tlen tlamantli yokichijka Jehová (xiktlajtolti Salmo 56:​12, 13). Ye miak uelta ijkon okichi. Ualeua omokuayejyekouaya tlen okichijchi Jehová. Non okipaleui makilnamiki Jehová kipia miak chikaualistli uan techtlasojtla (Sal. 65:​6-9). Noijki omokuayejyekouaya ken Jehová yokinpaleuijka oksekimej (Sal. 31:19; 37:​25, 26). Pero okachi omokuayejyeko ken yokipaleuijka. Ye omokuayejyeko ken okipaleui  desde ijkuak okatka konetsintli (Sal. 22:​9, 10). Non okipaleui okachi makineltoka Jehová ika nochi iyolo.

6. ¿Tlen techpaleuis matikneltokakan Jehová ijkuak timomojtiaj?

⁶ Ijkuak timomojtiaj, matimotlajtlanikan: “¿Tlen yokichi Jehová?”. Matimokuayejyekokan tlen yokichijchi. Noijki techpaleuia okachi matikneltokakan Jehová ijkuak tikitaj kinmaluia totomej uan xochitl maski amo ueli kiueyichiuaj uan amo kipiaj inyelis ijkon ken ye. Non techititia tejuan okachi techmaluis (Mat. 6:​25-32). Noijki matimokuayejyekokan ken yokinpaleui akinmej kitekichiuiliaj. Xamo uelis timomachtiskej ken yokinpaleui itekipanojkauan tlen okatkaj yiuejkika noso ken kinpaleuia axkan tokniuan. a Noijki matimokuayejyekokan ken yotechpaleui. ¿Ken otechpaleui matikmatikan tlen tlamachtia Biblia? (Juan 6:44). ¿Ken yotechnankili ijkuak tiktlatlaujtiaj? (1 Juan 5:14). ¿Ken techpaleuia tlen okichi Jehová porque okitekauili topatka makimiktikan iKone? (Efes. 1:7; Heb. 4:​14-16).

7. ¿Ken okipaleui Vanessa tlen okipanok Daniel?

⁷ Se tokni tlen itoka Vanessa b uan chanti Haití okipanok itlaj temomojti. Se tlakatl tlen ochantiaya ik kanin ye chanti nochipa okinotsaya, okintitlaniliaya mensajes uan okiluiaya mayeto inovia. Ye okilui amo yetoskia inovia ikinon tlakatl sapanoua okualanki uan okilui itlaj kitoktiskia. ¿Tlen okichi Vanessa para ayakmo momojtis? Okichi seki tlamantli tlen uelis kipaleuiskia. Se tlayekanki okipaleui uan okinmitatoj tekiuajkej. Pero noijki okilnamik Jehová yokinpaleui itekipanojkauan tlen yiuejkika okatkaj. Ye okijto: “Achto onikilnamik tlen okipanok Daniel. Ye okitlamotlakej kanin okatkaj leones maski amitlaj okichi pero Jehová okipaleui. Onikilui Jehová nochi tlen yonikchi para amitlaj manechpano uan oniktlatlaujti manechpaleui. Satepan ayakmo onimomojti” (Dan. 6:​12-22).

¿TLEN KICHIJTOK JEHOVÁ?

8. ¿Tlen okineltokaya David? (Salmo 56:8).

⁸ David okimatiaya uelis itlaj kipanoskia ijkuak okatka altepetl Gat pero amo san omomojtijtoka. Ye omokuayejyeko ken okipaleuijtoka Jehová. Okitak ken okiyekanaya, okimaluiaya uan okajsikamatiaya ken omomachiliaya (xiktlajtolti Salmo 56:8). Noijki Jonatán uan teopixki Ahimélec tlen otlayekanaya okiyolchikauayaj David uan okipaleuiayaj porque inuan omouikaya (1 Sam. 20:​41, 42; 21:​6, 8, 9). David amitlaj okipanok maski tekiua Saúl okinekiaya kimiktis. Ye okineltokaya Jehová okimatiaya tlen okipanotoka uan ken omomachiliaya.

9. ¿Tleka tikijtouaj Jehová kimati tlen techpanoua?

⁹ Xamo tejuatsin itlaj tikixnamiki uan timomojtia. Pero xikilnamiki Jehová kimati tlen mitspanotok uan noijki kajsikamati ken timomachilia. Ijkon okinpanok israelitas tlen okatkaj tlakeualmej ompa Egipto. Jehová kuali okimatiaya ken omoyolkokouayaj uan ‘ken otlajyouiayaj’ (Éx. 3:7). Itech se tlakuikali, David okijto Jehová okajsikamatiaya tlen ye okipanotoka uan ken ‘omotekipachouaya’ (Sal. 31:7). Jehová noijki ‘otlajyouiaya’ ijkuak okinmitaya  israelitas otlajyouiayaj porque amo okitlakamatiayaj (Is. 63:9). Techyolchikaua porque tikmatij Jehová techajsikamati uan kineki techpaleuis ayakmo matimomojtikan.

10. ¿Tleka tikneltokaj Jehová kitekipachoua tlen techpanoua uan kineki techpaleuis?

¹⁰ Pero ualeua amo tikitaj ken techpaleuia Jehová ijkuak sapanoua titlajyouiaj. ¿Tlen uelis tikchiuaskej? Matiktlatlaujtikan matechpaleui matikitakan ken techpaleuijtok (2 Rey. 6:​15-17). Satepan matimokuayejyekokan: ¿Yotechyolchika se tlamachtil noso tlen otlanankili se tokni kanin timonechikouaj? ¿Yotechyolchika tlen otiktlajtoltijkej itech se amatlajkuilol, tlen otikitakej itech se video noso tlen otikkakej itech se tlakuikali? ¿Se tokni yotechititi se texto noso otechilui itlaj tlen otechyolchika? Jehová techpaleuijtok ijkuak tokniuan techtlasojtlaj uan techmaka miak tlamantli tlen techpaleuia okachi matitlaneltokakan. Pero ualeua tikilkauaj non tlamantli (Is. 65:13; Mar. 10:​29, 30). Nochi non kiteititia Jehová kitekipachoua tlen techpanoua uan uelis tikneltokaskej ye techpaleuis (Is. 49:​14-16).

11. ¿Tlen okipaleui tokni Aida ayakmo mamomojti?

¹¹ Se tokni tlen itoka Aida uan chanti Senegal itlaj okixnamik uan okitak ken Jehová okipaleuijtoka. Ipapanuan okinekiayaj makitlani miak tomin para kipiaskej tlen ika mopanoltiskej uan makinmalui porque ye otlayekanaya. Pero ye amo okinekiaya kipias miak tlamantli porque okinekiaya mochiuas precursora ikinon amo okitlaniaya miak tomin. Ifamiliares okualankej uan okiteneuayaj. Ye okijto ken omomachiliaya: “Onimomojtiaya amo uelis nikinpaleuiskia nopapanuan uan oksekimej amo kuali manechitakan. Oniktlajtlakolti Jehová porque onitlajyouijtoka”. Pero se tonal okikak se tlamachtil tlen sapanoua okipaleui. Aida okijto: “Tokni tlen otlamachtijtoka otechilnamikti Jehová kimati tleka timoyolkokouaj. Tlayekankej uan oksekimej tokniuan noijki onechpaleuijkej manikita Jehová nechtlasojtla. Non onechpaleui kuali manimomachili.  Opejki okachi niktlatlaujtia Jehová uan onimoyolseui ijkuak onikitak ye onechnankiliaya”. Satepan okajsik se tekitl tlen okipaleui mayeto precursora, makinpaleui ipapanuan uan oksekimej. Ye okijto: “Axkan okachi nikneltoka Jehová. Nechpaleuia ayakmo manimomojti ijkuak niktlatlaujtia”.

¿TLEN KICHIUAS JEHOVÁ SATEPAN?

12. ¿Tlen okineltokaya David ijkon ken kijtoua Salmo 56:9?

¹² (Xiktlajtolti Salmo 56:9). Nin versículo kijtoua okse tlamantli tlen okichi David para ayakmo momojtis ijkuak okinekiayaj kimiktiskej. Ye omokuayejyeko Jehová kipaleuiskia satepan. Okineltokaya toTajtsin Dios kipaleuiskia ijkuak monekiskia. Porque Jehová yokijtojka David yetoskia tekiua ompa Israel (1 Sam. 16:​1, 13). David okineltokaya ijkon mochiuaskia porque Jehová ijkon okijto.

13. ¿Tlen kichiuas Jehová satepan?

¹³ ¿Tlen yokijto Jehová kichiuas? Jehová amo kijtoua axkan amo titlajyouiskej. c Axkan uelis itlaj tikixnamikiskej pero Jehová yokijto kipojpolos nochi tlen techtlajyouiltia ijkuak tichantiskej itech xochitlali (Is. 25:​7-9). Jehová kipia chikaualistli para kinyolitis akinmej yoixpolikej, techpajtis uan kinmixpolos akinmej techkokoliaj (1 Juan 4:4).

14. ¿Tlen uelis timokuayejyekoskej?

¹⁴ Ijkuak timomojtis ximokuayejyeko tlen kichiuas Jehová satepan. Ximokuayejyeko ken tiyetoskej ijkuak Satanás ayakmo yetos uan ijkuak ayakmo yetoskej akinmej kichiuaj tlen amo kuali. Ijkuakon san yetoskej akinmej kichiuaj tlen kuali uan yolik politias tlajtlakoli. Itech ueyi nechikol regional 2014 okipanoltijkej se tlamachtil tlen techpaleuis matimokuayejyekokan tlen tikchiaj tikseliskej. Ompa otikitakej se tokni okiluiaya ifamilia tlen kijtoskia 2 Timoteo 3:​1-5 tla yetoskia se profecía tlen mochiuaskia itech xochitlali. Okijto: “Itech xochitlali tiyolpakiskej. Porque nochtin motlasojtlaskej, kinpaktis iTlajtol toTajtsin Dios, amo moueyinekiskej uan yetoskej yolyamankej, kitlakaitaskej toTajtsin Dios, kintlakamatiskej inpapanuan, motlasojkamatiskej uan amo tekauaskej, kintlasojtlaskej infamilia, teajsikamatiskej, amo kinteneuaskej oksekimej para kuali makinmitakan, kimatiskej monauatiskej, yetoskej yolkualmej, kinpaktis kichiuaskej tlen kuali, amo tekajkayauaskej uan kuali mokuayejyekoskej tlen kichiuaskej, sepa amo moueyinekiskej, amo san moyolpaktiskej uan ika nochi inyolo kichiuaskej tlen toTajtsin Dios kineki. Te nochipa inuan ximouika”. ¿Timotlapouiaj inuan tokniuan uan tofamilia ken tiyetoskej ijkuak tichantiskej itech xochitlali?

15. ¿Tlen okipaleui tokni Tanja ayakmo mamomojti?

¹⁵ Se tokni itoka Tanja uan chanti Macedonia del Norte ayakmo omomojti porque omokuayejyeko tlen yokijto Jehová kichiuas. Ipapanuan sapanoua okualankej ijkuak opejki momachtia Biblia. Tanja okijto: “Opanok tlen onechmomojtiaya. Nonantsin onechuitekiaya ijkuak oniajsiaya nokalijtik porque onimonechikouaya. Nopapanuan onechiluijkej nechmiktiskiaj tla nimochiuaskia iTlaixpantijka Jehová”. Ipapanuan okiluijkej oksekan machantiti porque yejuan ayakmo okinekiayaj inuan machanti. ¿Tlen okichi? Ye okijto:  “Onimokuayejyeko nochipa niyolpakiskia tla amo nikkauaskia Jehová. Onikijtouaya Jehová nechteochiuaskia itech xochitlali uan kichiuaskia manikilkaua nochi tlen onechpanok maski axkan nikpoloskia seki tlamantli”. Tanja amo okika Jehová uan ye okipaleui makajsi kanin chantis. Omonamikti iuan se tokni tlen kitlasojtla Jehová uan san sekan okachi kitekichiuiliaj.

MATIMOCHIJCHIKAUAKAN OKACHI MATIKNELTOKAKAN JEHOVÁ

16. ¿Tlen techpaleuis matiyetokan tiyolchikauakej ijkuak mochiuas tlen kijtoua Lucas 21:​26-28?

¹⁶ “Nochtin sapanoua momojtiskej” ijkuak peuas ueyi tlajyouilistli. Pero akinmej tiktekichiuiliaj Jehová tiyetoskej tiyolchikauakej uan amitlaj techmomojtis (xiktlajtolti Lucas 21:​26-28). ¿Tleka? Porque tejuan nochipa tikneltokaj Jehová. Tokni Tanja okijto tlen okipanok kipaleuia makixnamiki okseki tlamantli. Okijto: “Yonikitak Jehová nochipa techpaleuia uan techteochiua. Ualeua sekimej mokuayejyekouaj nochi ueli kichiuaj pero amo uelis kichiuaskiaj tla Jehová amo kinkauiliskia makichiuakan. Amo nochipa titlajyouijtoskej maski ualeua tikitaj oui tlen techpanotok”.

17. ¿Ken techpaleuis texto para nin xiuitl 2024? (Xikita foto tlen kajki página 1).

¹⁷ Axkan panotok miak tlamantli tlen uelis techmomojtis pero tejuan amo timomojtiaj ijkon ken David amo omomojti. Texto para xiuitl 2024 kijtoua tlen David okilui Jehová. Okijto: “Ijkuak nimomojtia, nikneltoka te techpaleuis” (Sal. 56:3). Se amochtli okiyekijto tlen kijtosneki nin versículo: “David amo san omokuayejyekouaya tlen amo kuali okipanotoka noso tlen okimomojtiaya. Ye okineltokaya akin uelis kimakixtiskia”. Tla itlaj tikixnamiki xikilnamikto texto para nin xiuitl. Ximokuayejyeko tlen yokichi Jehová, tlen kichijtok uan tlen satepan kichiuas. Ijkon uelis tikijtos ken David okijto: “Nikneltoka toTajtsin Dios nechpaleuis; amo nimomojtia” (Sal. 56:4).