1. ¿Ken timokuayejyekoua kajki Jehová?

 ¿SE TONAL yotimokuayejyeko ken mota Jehová? ¿Ken timokuayejyekoua mota Jehová ijkuak tiktlatlaujtia? Biblia kijtoua ken kajki Jehová maski amo ueli tikitaj. Ompa kijtoua toTajtsin Dios yetoskia ken “se tonaltsin uan tlen ika timopaleuiaj”. Noijki kijtoua Jehová “yetoskia ken tlitl tlen nochi kitlatia” (Sal. 84:11; Heb. 12:29). Ijkuak profeta Ezequiel itlaj okimonextili okijto Jehová yetoskia ken tetl tlen itoka zafiro, tepostli tlen petlani uan kualtsin petlantok ijkon ken kosamalotl (Ezeq. 1:​26-28). Xamo timotlajtlachialtiaj uan uelis timomojtiskej ijkuak timokuayejyekouaj ken mota Jehová.

2. ¿Tleka sekimej kitaj oui kineltokaskej kintlasojtla toTajtsin Dios?

² Xamo oui tikneltokaskej Jehová techtlasojtla porque amo tikitaj. Sekimej itlaj okinpanok uan amo okintlasojtlakej inpapanuan ikinon mokuayejyekouaj Jehová amo keman kintlasojtlas. Tla tejuan ijkon otechpanok Jehová kajsikamati ken timomachiliaj uan tleka ualeua oui iuan timouikaskej. Jehová techpaleuia matikajsikamatikan ye techtlasojtla ikinon itech Biblia techiluia ken iyelis.

3. ¿Tleka tikitaskej ken techtlasojtla Jehová?

³ Jehová moixmati ken tlasojtlalistli (1 Juan 4:8). Biblia kijtoua Jehová “tlasojtlalistli”. Nochi tlen kichiua kiteititia tetlasojtla. Jehová nochtin kintlasojtla hasta akinmej  amo kitlasojtlaj (Mat. 5:​44, 45). Axkan tikitaskej ken techtlasojtla Jehová. Okachi tiktlasojtlaskej tla okachi tikixmatiskej.

JEHOVÁ SAPANOUA TECHTLASOJTLA

4. ¿Ken timomachilia tejuatsin tikmati Jehová tetlasojtla? (Noijki xikita foto).

⁴ “Jehová sapanoua tetlasojtla” (Sant. 5:11). Biblia kijtoua Jehová yetoskia ken se temama tlen tetlasojtla (Is. 66:​12, 13). Matimokuayejyekokan se temama tlen kimaluia ikonetsin. Ika miak tlasojtlalistli kinapaloua uan kualtsin kitlapouia. Ijkuak kikaki choka noso mokokoua san niman kitati para kimakas tlen kineki. Uelis tikneltokaskej Jehová noijki ijkon kichiua ijkuak tejuan timoyolkokouaj. Ikinon se tlakatl tlen okijkuilo Salmo, okijto: “Ijkuak opejki sapanoua nimotekipachoua, te otechyolchika uan otechyolseui” (Sal. 94:19).

5. ¿Tleka tejuatsin tikijtoskia Jehová nochipa tetlasojtla?

⁵ Jehová nochipa tetlasojtla (Sal. 103:8). Ye techtlasojtla maski ualeua timotlapololtiaj. Israelitas miak uelta okiyolkokojkej Jehová pero ijkuak omoyolkopayaj ye okinmititiaya okintlasojtlaya. Se tonal okilui ialtepe: “Porque onimitspatioitak ikinon nimitstlakaita uan nimitstlasojtla” (Is. 43:​4, 5). Yiuejkika ijkon opanok pero Jehová amo kipatla iyelis. Uelis tikneltokaskej tejuan noijki techtlasojtla. Ye amo techkaua maski ualeua titlajtlakolchiuaj. Ijkuak timoyolkopaj uan oksepa iuan timouikaj, ye techtlasojtla ijkon ken achto okichiuaya. Ye yokijto ‘melauak techtlapojpoluis’ (Is. 55:7). Biblia kijtoua Jehová techpaleuia ‘kuali matiyetokan’ ijkuak techtlapojpoluia (Hech. 3:19).

6. ¿Tlen techmachtia Zacarías 2:8?

⁶ Xiktlajtolti Zacarías 2:8. Jehová kijtoua tejuan tiyetoskiaj ken ixtololouan. Toixtololouan sapanoua miak inpati uan moneki tikinmaluiskej. Ikinon yetoskia ken Jehová techiluiskia: “Ijkuak ikaj itlaj namechtoktia, yetoskia ken ne itlaj nechtoktiaj”. Jehová techtlasojtla ikinon kimati ken timomachiliaj uan nochipa techmaluis. Ye noijki moyolkokoua ijkuak timoyolkokouaj. Ikinon uelis tikiluiskej: “Techmalui ijkon ken tikinmaluia moixtololouan” (Sal. 17:8).

7. ¿Tleka moneki matikneltokakan Jehová techtlasojtla?

 ⁷ Jehová kineki matikneltokakan ye techtlasojtla. Pero Jehová techajsikamati ijkuak timotlajtlaniaj kox techtlasojtla ijkuak itlaj tikixnamikij. Ikinon miak ipati matikneltokakan Jehová techtlasojtla. ¿Tlen uelis techpaleuis? Moneki matikitakan ken kiteititia Jehová kitlasojtla Jesús. Noijki ken kintlasojtla tlapejpenalmej uan ken techtlasojtla. Matikitakan ken kichiua.

JEHOVÁ TECHILUIA TECHTLASOJTLA

8. ¿Tleka Jesús okineltokak iTajtsin okitlasojtlaya?

⁸ Jehová iuan iKone yiuejkika san sekan katej. Ikinon kuali mouikaj uan sapanoua motlasojtlaj. Yejuan yiuejkika kuali mouikaj. Itech Mateo 17:5 Jehová okijto kitlasojtla Jesús. Ye amo san okijto ‘kichiua mapakiʼ. Ye okijto: “Nin noKone niktlasojtla”. Ijkon okijto porque okinekiaya matikmatikan ye kitlasojtla uan okipatioitaya tlen kichiuaskia (Efes. 1:7). Jesús okineltokaya iTajtsin kitlasojtla. Ikinon nochipa okijto iTajtsin okitlasojtlaya (Juan 3:35; 10:17; 17:24).

9. ¿Tlen kiteititia Jehová kintlasojtla tlapejpenalmej? (Romanos 5:5).

⁹ Jehová noijki kinmiluia kintlasojtla tlapejpenalmej (xiktlajtolti Romanos 5:5). Ijkuak omoijkuilo nin versículo okinekiayaj kijtoskej Jehová sapanoua kintlasojtla tlapejpenalmej ijkon ken ijkuak chikauak yaui se aueyatl. Non kiteititia Jehová sapanoua kintlasojtla. Ijkon tlapejpenalmej kimatij toTajtsin Dios ‘kintlasojtla’ (Judas 1). Yejuan kineltokaj tlen okijto apóstol Juan: “¡Xikitakan ken sapanoua techtlasojtla toTajtsin Dios! Ye technotsa tiikoneuan” (1 Juan 3:1). Pero Jehová amo san kintlasojtla tlapejpenalmej. Ye kijtoua kintlasojtla nochtin itekipanojkauan. Matikitakan ken kiteititia.

10. ¿Tlen kiteititia Jehová sapanoua techtlasojtla?

¹⁰ ¿Tlen yokichi Jehová tlen kiteititia sapanoua techtlasojtla? Ijkon okiteititi ijkuak topatka okitemakak iKone. Tlen Jehová okichi okiteititi amikaj uelis techtlasojtlas ijkon ken ye techtlasojtla (Juan 3:16; Rom. 5:8). Ye okitemakak iKone uan okika topatka maixpoliui uan ijkon uelis techtlapojpoluis para kuali iuan matimouikakan (1 Juan 4:10). Kuali tikajsikamatiskej ken techtlasojtlaj Jehová uan Jesús ijkuak okachi timokuayejyekouaj tlen topatka okichijkej (Gál. 2:20). Jehová amo san okitemakak iKone san porque ijkon omonekiaya kichiuas. Ye ijkon okichi porque techtlasojtla. Ijkon otechititi ijkuak okika makitlajyouiltikan uan makixpolokan akin sapanoua kitlasojtla.

11. ¿Tlen techmachtia Jeremías 31:3?

¹¹ Axkan yotikitakej Jehová kijtoua techtlasojtla uan amo san kimachilia techtlasojtla (xiktlajtolti Jeremías 31:3). Jehová otechpaleui matikixmatikan porque techtlasojtla (noijki xikita Deuteronomio 7:​7, 8). Amikaj uelis kichiuas amo matechtlasojtla Jehová (Rom. 8:​38, 39). ¿Ken timomachilia tejuatsin ijkuak timokuayejyekoua ye techtlasojtla? Matikitakan tlen kijtoua Salmo 23 uan ken okipaleui David makilnamikto Jehová kitlasojtla. Noijki tikitaskej ken techpaleuia tikmatiskej Jehová techtlasojtla.

¿KEN TIMOMACHILIAJ IJKUAK TIKITAJ JEHOVÁ TECHTLASOJTLA?

12. ¿Tlen techmachtia Salmo 23?

¹² Xiktlajtolti Salmo 23:​1-6. Itech Salmo 23, David okijto okineltokaya Jehová okitlasojtlaya uan okimaluiaya. Ompa David okijto Jehová yetoskia ken se tlajpixki tlen kuali iuan omouikaya. David amo omomojtiaya porque okimatiaya Jehová okiyekanaya uan  noijki okikauiliaya makipaleui. Okimatiaya Jehová nochipa kitlasojtlaskia. Matikitakan tlen okipaleui David ijkon makineltoka.

13. ¿Tleka David okimatiaya Jehová okimaluiaya?

¹³ “Amitlaj nechpolos”. David okimatiaya Jehová okimaluiaya porque nochipa okimakaya tlen okipolouaya. Noijki okimatiaya kuali iuan omouikaya uan okiseliaya tlen okichiuaya. Ikinon David okineltokaya Jehová nochipa kimakaskia tlen omonekiaya maski san tlen kipanoskia. Amo omotekipachouaya uan oyolpakiaya porque okineltokaya Jehová okitlasojtlaya uan nochipa kimaluiskia (Sal. 16:11).

14. ¿Ken kiteititia Jehová techtlasojtla?

¹⁴ Jehová okachi techmaluia ijkuak itlaj tikixnamikij. Matikitakan tlen okipanok Claire a tlen yikipia kanaj 20 xiuitl tlapaleuia Betel. Ye okijto amo okimatiaya tlen kichiuas ijkuak ifamilia opejki tlajyouia. Ipapa okipixki se kokolistli itech ikuatitix, se ikni okikixtijkej itech tlanechikol, tlen okinemakayaj ayakmo omonemakak uan okinkixtilijkej inkalijtik. ¿Ken okiteititi Jehová okinmaluiaya? Claire okijto: “Jehová mojmostla okinmakak nofamilia tlen okinpolouaya. Nochipa okinmakak miak tlamantli tlen ne amo keman onimokuayejyeko kinmakaskia. Nochipa nikilnamiki ken okiteititi Jehová kintlasojtla. Non nechpaleuia manitlaxiko ijkuak itlaj nikixnamiki”.

15. ¿Tlen okipaleui David matlaxiko? (Noijki xikita dibujo).

¹⁵ “Nechpaleuia oksepa maniyeto nichikauak”. David okipanok miak tlamantli ikinon sapanoua omotekipachouaya (Sal. 18:​4-6).  Pero ye okitaya Jehová okitlasojtlaya uan non okipaleui mamoyolchikaua. Ye okimachili ken yetoskia Jehová okiuikak “itech tlali kanin tlaxoxouia” uan ‘kanin onka miak atl para mamoseui’. Ijkon otlaxiko uan oyolpakik ijkuak okitekichiuili (Sal. 18:​28-32).

16. ¿Ken yotikitak Jehová mitsyolchikaua?

¹⁶ Ijkuak itlaj tikixnamikij noijki uelis tikijtoskej: “Jehová tetlasojtla ika nochi iyolo ikinon amo tiixpoliuij” (Lam. 3:22; Col. 1:11). Matikitakan tlen okipanok Rachel. Sapanoua omoyolkoko ijkuak inamik ayakmo okinek kitekichiuilis Jehová uan okikajte. Nochi nin opanok ijkuak opanotoka kokolistli COVID-19. ¿Ken okipaleui Jehová? Rachel okijto: “Jehová onechititi nechtlasojtla. Onechinmakak noyolikniuan tlen nouan okatkaj, onechtlamakayaj, onechintitlaniliayaj mensajes uan onechinmijkuililiayaj textos tlen teyolchikauaj. Noijki onechixuetskiliayaj uan onechilnamiktiayaj Jehová nechmaluia”.

17. ¿Tleka David okijto “amitlaj nechmomojtis”?

¹⁷ “Amitlaj nechmomojtis porque te techyekana”. Miakej okikokoliayaj David ikinon uelis itlaj kipanoskia. Pero Jehová okitlasojtlaya uan non okipaleui makilnamikto ye okipaleuiaya. Ikinon David okitlakuikili Jehová: “Onechpaleui ijkuak onimomojtiaya” (Sal. 34:4). David omomojtiaya pero otlaxiko porque okimatiaya Jehová okitlasojtlaya.

18. ¿Ken techpaleuia tikmatiskej Jehová techtlasojtla ijkuak tikixnamikij itlaj temomojti?

¹⁸ ¿Ken techpaleuia tikmatiskej Jehová techtlasojtla ijkuak tikixnamikij itlaj temomojti? Se precursora itoka Susi okijto ken omomachili ye uan inamik ijkuak inkone omomikti. Ye okijto: “Sapanoua tetlajyouilti ijkuak itlaj ijkon panoua uan amo tikmatij tlen tikchiuaskej. Pero Jehová techtlasojtla ikinon techmaluia uan techpaleuia”. Rachel tlen otikitakej itech párrafo 16, okijto: “Se youak sapanoua onimoyolkokouaya, onimomojtiaya uan onikmachiliaya ayakmo nitlaxikoskia. Ijkuakon onichokak uan onielsijsiuia ijkuak oniktlatlaujti Jehová. San niman onikmachili ken yetoskia onechnapalo Jehová uan onechyolseui. Okichi ijkon ken se temama kinapaloua ikonetsin uan kiyolseuia. Satepan onikochki. Nochipa nikilnamiktos tlen onechpanok”. Se tlayekanki itoka Tasos okitsakej naui  xiuitl porque amo omochi soldado. Ye okijto Jehová okitlasojtlaya ikinon okimalui. Tokni Tasos okijto: “Jehová onechmakak nochi tlen omonekiaya uan non onechpaleui okachi manikneltoka. Noijki onechpaleui ika iespíritu santo maniyolpaki maski amo kuali timomachiliaj ijkuak techtsakuaj. Non onechpaleui okachi manikneltoka Jehová uan okachi manikita nechtlasojtla. Ikinon onimochi precursor maski onitsaktoka”.

MATIMOUIKAKAN IUAN TOTAJTSIN DIOS TLEN SAPANOUA TECHTLASOJTLA

19. (1) ¿Ken tiktlatlaujtiskej Jehová tla tikilnamiktokej ye techtlasojtla? (2) ¿Tlen textos okachi mitsyolajsij tlen kiteititiaj Jehová mitstlasojtla? (Xikita recuadro “ Textos tlen techititiaj Jehová techtlasojtla”).

¹⁹ Tlen okinpanok tokniuan kiteititia Jehová “tetlasojtla” (2 Cor. 13:11). Ye kitekipachoua tlen tisejse techpanoua. Ijkon okachi tikneltokaj ye techtlasojtla (Sal. 32:10). Ijkuak timokuayejyekouaj ken yokiteititi techtlasojtla, okachi tikneltokaj ye kitekipachoua tlen techpanoua uan okachi iuan timouikaj. Ikinon matiktlatlaujtikan uan ika nochi toyolo matikiluikan matechtlasojtla. Uelis tikiluiskej nochi tlen techtekipachoua uan matikilnamiktokan ye techajsikamati uan kineki techpaleuis (Sal. 145:​18, 19).

20. ¿Tleka okachi timouikaj iuan Jehová ijkuak tikmatij techtlasojtla?

²⁰ Kualtsin tikmachiliaj ijkuak tikitaj Jehová techtlasojtla. Yetoskiaj ken ijkuak seua titlatlatiaj uan timototoniaj. Nochipa tiknekij iuan tiyetoskej. Jehová kualtsin techtlasojtla maski itlasojtlalis kipia miak chikaualistli. Tiyolpakij porque Jehová sapanoua techtlasojtla. Tinochtin tiknekij tikijtoskej ‘tiktlasojtlaj Jehová’ (Sal. 116:1).