1, 2. ¿Tlen tlamantli tikixnamikij?

 UELIS san niman mopatlas tonemilis ijkuak itlaj techpanoua. Matikitakan tlen okinpanok sekimej tokniuan. Se tonal, se tepajti okilui tokni Luis a okipiaya cáncer uan san seki metstli yoltoskia. Monika kuali okitekichiuiliaya Jehová iuan inamik tlen okatka tlayekanki. Pero se tonal okimatki inamik yimiak xiuitl okikajkayajtoka. Se ichpochtli itoka Olivia okiski kanin ochantiaya porque ejekakiauiskia. Ijkuak omokopki okitak ikal oxixinki. San niman omopatlak innemilis nonmej tokniuan. ¿Tejuatsin noijki ijkon yomitspanok?

² Tejuan noijki tikixnamikij miak tlamantli uan timokokouaj ijkon ken akinmej amo kitekichiuiliaj Jehová. Noijki techixnamikij akinmej kikokoliaj ialtepe toTajtsin Dios uan techtlajyouiltiaj. Jehová kitekauilia matechpano tlen amo kuali pero techiluia techpaleuis (Is. 41:10). Uelis tiyolpakiskej, kuali tikpejpenaskej tlen tikchiuaskej uan amo tikkauaskej Jehová maski titlajyouiskej porque ye touan kajki. Matikitakan naui tlamantli tlen kichiua Jehová para techpaleuis matikixnamikikan tlen techpanoua. Noijki tikitaskej tlen moneki tikchiuaskej para matechpaleui tlen Jehová kichiua.

 JEHOVÁ NOCHIPA TECHMALUIS

3. ¿Tlen uelis techpanos ijkuak itlaj tikixnamikij?

³ Ijkuak itlaj techpanoua xamo amo kuali timokuayejyekouaj uan tikitaj oui tikpejpenaskej tlen tikchiuaskej. ¿Tleka ijkon techpanoua? Porque timoyolkokouaj uan timotekipachouaj ikinon amo kuali timokuayejyekouaj uan amo tikmatij tlen tikchiuaskej. Ijkon omomachilijkej ome tokniuan tlen okijtojkej tlen okinpanok itech párrafo 1. Olivia okijto: “Onimomojtiaya uan amo onikmatiaya tlen nikchiuas ijkuak ejekakiauitl okixixini nokal”. Ijkuak inamik Monika okikajkaya, ye okijto: “Sapanoua onimoyolkokouaya, yetoskia ken ikaj onechtsoponili se cuchillo ipan noyolo. Ayakmo ueli itlaj onikchiuaya. Amo keman onimokuayejyeko ijkon nechpanoskia”. ¿Ken yokijto Jehová techpaleuis ijkuak itlaj tikixnamikij?

4. ¿Tlen techiluia Jehová kichiuas ijkon ken kijtoua Filipenses 4:​6, 7?

⁴ ¿Tlen kichiua Jehová? Biblia kijtoua toTajtsin Dios techmakas “iyolseuilis” (xiktlajtolti Filipenses 4:​6, 7). ToTajtsin Dios techyolseuia porque kuali iuan timouikaj. Iyolseuilis toTajtsin Dios sapanoua kualtsin uan “amikaj kajsikamati”. ¿Se tonal yotiktlatlaujti Jehová ika nochi moyolo uan satepan kuali otimomachili? Ijkon otimomachili porque toTajtsin Dios omitsmakak “iyolseuilis”.

5. ¿Ken kimaluia “iyolseuilis toTajtsin Dios” toyolo uan totlayejyekol?

⁵ Filipenses 4:7 kijtoua “iyolseuilis toTajtsin Dios” noijki ‘kimaluia toyolo uan totlayejyekolʼ. Tlajtoli ‘kimaluia’ okijtouayaj para kijtoskej soldados okimaluiayaj se altepetl uan ijkon amitlaj makitoktikan. Ijkon akinmej ompa ochantiayaj amo omomojtiayaj porque okimatiayaj soldados otlamaluijtokaj. Tejuan noijki kuali timomachiliaj uan timoyolseuiaj ijkuak “iyolseuilis toTajtsin Dios” kimaluia toyolo uan totlayejyekol (Sal. 4:8). Uelis timoyolseuiskej maski amo san niman moyektlalis tlen techpanotok ijkon ken okipanok Ana (1 Sam. 1:​16-18). Ijkuak kuali timomachiliaj okachi kuali timokuayejyekouaj uan kuali tikpejpenaj tlen tikchiuaskej.

6. ¿Tlen uelis tikchiuaskej para toTajtsin Dios matechmaka iyolseuilis? (Noijki xikita foto).

⁶ ¿Tlen moneki tikchiuaskej? Akinmej ochantiayaj itech se altepetl ueli okiluiayaj se soldado makinmalui. Tejuan noijki uelis tikiluiskej Jehová matechmalui. Matiktlatlaujtikan hasta matechmaka “iyolseuilis” (Luc. 11:9; 1 Tes. 5:17). Ijkon  okichijkej Luis uan isiua tlen itoka Ana. Luis okiluijkej san seki metstli yoltoskia. Ye okijto: “Oui tikpejpenaskej ken timopajtiskej ijkuak techiluiaj sapanoua timokokouaj. Pero otimoyolseuijkej porque otimotlatlaujtijkej maski otitlajyouijtokaj”. Tokniuan okijtojkej nochipa okitlatlaujtiayaj Jehová makinyolseui uan makinmaluili inyolo. Noijki okitlatlaujtijkej makinpaleui mayetokan ixtlamatkej para kuali kipejpenaskej tlen kichiuaskej. Yejuan okitakej Jehová okinpaleui. Nochipa xiktlatlaujti Jehová tla itlaj mitspanotok. Ijkon tikitas ken mitsyolseuia, kimaluia moyolo uan motlayejyekol (Rom. 12:12).

JEHOVÁ TECHPALEUIS AMO OKACHI MATIMOYOLKOKOKAN

7. ¿Ken uelis timomachiliskej ijkuak itlaj tikixnamikij?

⁷ Ijkuak itlaj tikixnamikij xamo amo kuali timomachiliaj uan amo kuali timokuayejyekouaj. Xamo timomachiliaj ijkon ken se barco tlen kajki ijtik mar uan chikauak kitlauiteki ejekakiauitl. Ana ijkon omomachili ijkuak oixpoliuik inamik. Ye okijto: “Ualeua sapanoua onimoyolkokouaya uan onimotlajtlaniaya tleka ijkon onimomachiliaya. Pero ualeua onikualaniaya porque Luis ayakmo nouan okatka”. Ana noijki okijto ualeua omomachiliaya iselti uan omosotlauaya porque omonekiaya kichiuas seki tlamantli tlen Luis okichiuaya. Omomachiliaya ken yetoskia ijtik mar ijkuak ejekakiaui. ¿Ken techpaleuia Jehová ijkuak amo kuali timomachiliaj uan amo tikmatij tlen tikchiuaskej?

8. ¿Tlen techiluia Jehová kichiuas ijkon ken kijtoua Isaías 33:6?

⁸ ¿Tlen kichiua Jehová? Ye yokijto techpaleuis kuali matimomachilikan (xiktlajtolti 1 Pedro 5:10). Se barco tlen kajki ijtik mar uelis chikauak molinis ijkuak ejekakiaui. Para amo okachi mamolini, inajnakastlan barco kipia seki tlamantli tlen kajki ijtik mar tlen kipaleuia amo okachi mamolini. Ijkon akinmej ompa yauij amo momojtiaj uan amitlaj kinpanoua. Pero non tlamantli tlen kipia barco okachi kipaleuia ijkuak kinejnemitijtokej. Noijki Jehová techpaleuis kuali matiyetokan ijkuak itlaj techpanoua pero moneki nochipa matiktekichiuilijtokan.

9. ¿Ken techpaleuia tlen techmaka ialtepe Jehová? (Noijki xikita foto).

⁹ ¿Tlen moneki tikchiuaskej? Matimochijchikauakan matimotlatlaujtikan ijkuak timoyolkokouaj, matimonechikokan uan matitetlapouikan. Jehová techajsikamatis  maski amo tikchiuaskej miak tlamantli ijkon ken achto otikchiuayaj (noijki xikita Lucas 21:​1-4). Ximomachti uan ximokuayejyeko tlen timomachtia. Ialtepe Jehová yotechmakak miakej tlamachtilmej uan videos tlen techpaleuiaj amo okachi matimoyolkokokan. Uelis timomachtiskej ika JW Library^®, Tlen ika momachtiaj iTlaixpantijkauan Jehová uan Índice de las publicaciones Watch Tower. Monika tlen yokijto tlen okipanouaya, okijto okipaleui nin tlamantli ijkuak okimachiliaya moyolkokos. Ualeua okitemouaya tlen kijtosneki tlajtoli ijkuak ikaj kualani, tlakajkayaua noso tekaua. Ye okitlajtoltiaya tlen okitemouaya uan ijkon okichiuaya hasta ijkuak yikuali omomachiliaya. Monika okijto: “Onimotekipachouaya miak ijkuak opeuaya onimomachtiaya pero kuali onimomachiliaya ijkuak onitlamiaya. Onikmachiliaya ken yetoskia Jehová onechnapalouaya (onechnauajtekiaya). Ijkuak onimomachtijtoka onikitaya Jehová okajsikamatiaya ken onimomachiliaya uan onechpaleuiaya”. Jehová noijki techpaleuis amo okachi matimotekipachokan ijkuak timoyolkokouaj (Sal. 119:​143, 144).

JEHOVÁ TECHPALEUIS

10. ¿Ken timomachiliaj ijkuak itlaj techpanoua?

¹⁰ Xamo timomachiliskej ijkon ken ijkuak ikaj motlaloua uan mokxinekuiloua ikinon ayakmo totoka motlaloua. Xamo ayakmo tikchiuaskej seki tlamantli ijkon ken achto otikchiuayaj noso ayakmo tiknekiskej tikchiuaskej tlen achto otechpaktiaya. Xamo san tiknekiskej tikochiskej ijkon ken okipanok Elías (1 Rey. 19:​5-7). ¿Ken techpaleuia Jehová ijkuak ijkon timomachiliaj?

11. ¿Ken okachi techpaleuia Jehová? (Salmo 94:18).

¹¹ ¿Tlen kichiua Jehová? Ye yokijto techpaleuis (xiktlajtolti Salmo 94:18). Akin motlaloua uan mokxinekuiloua moneki makipaleuikan para nejnemis. Tejuan noijki moneki ikaj matechpaleui para uelis tiktekichiuilijtoskej Jehová. Ijkuak ijkon techpanos, ye techiluia: “Ne, Jehová nimoDios, nikkitskijtok moyekma, Akin mitsiluia: ‘Amo ximomojti. Ne nimitspaleuis’” (Is. 41:13). Tekiua David okitak Jehová okipaleui ijkuak okinmixnamik akinmej okikokoliayaj uan okseki tlamantli. Ikinon okilui Jehová: “Moyekma nechpaleuia” (Sal. 18:35). ¿Ken techpaleuia Jehová?

12. ¿Akinmej uelis techpaleuiskej tla sapanoua timoyolkokouaj?

 ¹² Ualeua Jehová techpaleuia ijkuak kinyolinia oksekimej matechpaleuikan. Ijkon okipaleui David ijkuak omoyolkokouaya. Okiyolini Jonatán makiyolchikauati kanin okatka (1 Sam. 23:​16, 17). Jehová noijki okipaleui Elías ijkuak okilui Eliseo makipaleuiti (1 Rey. 19:​16, 21; 2 Rey. 2:2). Jehová noijki uelis kinyolinis tofamiliares matechpaleuikan, toyolikniuan uan noijki tlayekankej. Pero ualeua tiknekij san toselti tiyetoskej ijkuak sapanoua timoyolkokouaj. Amo tlajtlakoli tla ijkon timomachiliaj. Pero ¿tlen moneki tikchiuaskej para matechpaleui Jehová?

13. ¿Tlen moneki tikchiuaskej tla tiknekij matechpaleui Jehová? (Noijki xikita foto).

¹³ ¿Tlen moneki tikchiuaskej? Amo toselti matiyetokan porque ijkuak toselti tikatej san timokuayejyekouaj tlen techpanotok. Ijkuak ijkon techpanoua xamo amo kuali tikpejpenaskej tlen tikchiuaskej (Prov. 18:1). Ualeua moneki tiyetoskej toselti ijkuak itlaj techpanoua. Pero tla san tiknekij toselti tiyetoskej tikteititiskej amo tiknekij matechpaleui Jehová. Ikinon maski amo kuali timomachiliskej matikinkauilikan tofamiliares matechpaleuikan, toyolikniuan uan noijki tlayekankej. Matikilnamiktokan Jehová kinyolinia matechpaleuikan (Prov. 17:17; Is. 32:​1, 2).

JEHOVÁ TECHYOLSEUIS

14. ¿Tlen uelis techmomojtis?

¹⁴ Xamo ualeua sapanoua timomojtiskej. Biblia kijtoua sekimej itekipanojkauan toTajtsin Dios omomojtijkej porque akinmej okinkokoliayaj itlaj okintoktijkej noso okixnamikej okseki tlamantli (Sal. 18:4; 55:​1, 5). Tejuan noijki uelis ijkon techpanos. Xamo techixnamikij akinmej inuan timomachtiaj, akinmej inuan titekipanouaj, tofamiliares noso tekiuajkej. Xamo noijki timomojtiaj porque timokokouaj uan uelis tiixpoliuiskej. Ijkuak ijkon techpanoua xamo amo tikmatiskej tlen tikchiuaskej uan techpanos ijkon ken ijkuak se chokotsin momojtia. ¿Ken techpaleuia Jehová ijkuak ijkon techpanoua?

15. ¿Tlen techiluia Jehová kichiuas ijkon ken kijtoua Salmo 94:19?

¹⁵ ¿Tlen kichiua Jehová? Ye techyolseuia uan kichiua kuali matimomachilikan  (xiktlajtolti Salmo 94:19). Matikijtokan se takotsin momojtia uan amo ueli kochi porque ejekakiaui, tlapejpetlani uan tlatijtikuini. Pero ipapa yaui kinapaloti uan kiyolseuia hasta makochi. Takotsin ayakmo momojtia porque ipapa kinapalojtok maski ok ejekakiaui. Ijkuak tejuan timomojtiaj xamo noijki tiknekij matechnapalo toTajtsin Dios hasta matimoyolseuikan. ¿Tlen moneki tikchiuaskej tla tiknekij matechyolseui Jehová?

16. ¿Tlen moneki tikchiuaskej tla tiknekij matechyolseui Jehová? (Noijki xikita foto).

¹⁶ ¿Tlen moneki tikchiuaskej? Matimochijchikauakan nochipa matiktlatlaujtikan Jehová uan matiktlajtoltikan Biblia (Sal. 77:​1, 12-14). Ijkon ijkuak itlaj techtekipachos san niman tiktemoskej toTajtsin Dios. Matikiluikan Jehová tlen techtekipachoua, tlen techmomojtia uan matikkauilikan matechnankili uan matechyolseui ika Biblia (Sal. 119:28). Ijkuak ijkon techpanos uelis timoyolchikauaskej ika seki amochmej tlen kipia Biblia. Uelis tiktlajtoltiskej amochtli Job, Salmos, Proverbios uan tlen okijto Jesús itech Mateo capítulo 6. Tikitaskej ken techyolseuia Jehová tla tiktlatlaujtiaj uan tiktlajtoltiaj Biblia.

17. ¿Tlen moneki tikilnamiktoskej?

¹⁷ Matikilnamiktokan Jehová nochipa techpaleuis maski san tlen tlamantli techpanos. Amo keman techkauas toselti matiyetokan (Sal. 23:4; 94:14). Jehová yokijto techmaluis, kichiuas kuali matimomachilikan, techpaleuis uan techyolseuis. Isaías okilui Jehová: “Tikinmaluis akinmej mitstemouaj para xikinpaleui, nochipa tikinyolseuijtos porque mitsneltokaj” (Is. 26:3). Ikinon matikneltokakan Jehová uan matikkauilikan matechpaleui. Ijkon uelis titlaxikoskej maski san tlen tlamantli techpanos.