1. ¿Tleka tikpatioitaj tikilnamikiskej imikilis Jesús tlen mochiua sejse xiuitl? (Lucas 22:​19, 20).

 TEJUAN sapanoua tikpatioitaj tikilnamikiskej imikilis Jesús tlen mochiua sejse xiuitl. Jesús otlanauati matikilnamikikan non tonal miak ipati (xiktlajtolti Lucas 22:​19, 20). Yitiknekij tikilnamikiskej non tonal miak ipati. Matikitakan tleka ijkon tikijtouaj.

2. ¿Tleka yitiknekij maajsi tonal para tikilnamikiskej imikilis Jesús?

² Ijkuak tikilnamikij imikilis Jesús techpaleuia matikpatioitakan ye topatka omotemakak. Noijki techilnamiktia tlen uelis tikchiuaskej para tikteititiskej tiktlasojkamatiliaj tlen okichi Jesús (2 Cor. 5:​14, 15). Non tonal tikatej inuan tokniuan uan ‘timosepanyolchikauaj’ (Rom. 1:12). Sejse xiuitl touan monechikouaj tokniuan tlen ayakmo tetlapouiaj nion monechikouaj. Sekimej oksepa peua kitekichiuiliaj Jehová porque tokniuan kiteititiaj kintlasojtlaj. Miakej tlen touan monechikouaj kinpaktia tlen ompa tikchiuaj uan peua momachtiaj tlen kijtoua Biblia. Ikinon tikpatioitaj tikilnamikiskej imikilis Jesús porque techpaleuia matikchiuakan nochi non tlamantli.

3. ¿Tlen tikteititiaj ijkuak tikilnamikij imikilis Jesús? (Noijki xikita foto).

³ Tiknekij maajsi non tonal porque ompa tikteititiaj san  sekan tikatej akinmej tipouij itech ialtepe Jehová. Tinochtin tlen tikatej ipan nochi tlaltikpak timonechikouaj ijkon ken motlatijti tonaltsin ik kanin tichantij. Non tonal se tokni techtlapouia tleka miak ipati topatka omotemakak Jesús. Titlakuikaj ome tlakuikalmej, noijki kipanoltiaj pan uan vino. Naui uelta motlatlaujtiaj uan tikijtouaj “amén” ika nochi toyolo. Nochtin tlatlamantli hora monechikouaj uan kichiuaj san ipan 24 horas. Ijkon nochtin kilnamikij imikilis Jesús. Jehová uan Jesús yolpakij porque kitaj tikintlakaitaj.

4. ¿Tlen timomachtiskej?

⁴ Itech nin tlamachtil tikitaskej seki tlamantli. ¿Tlen moneki tikchiuaskej para timoyektlaliskej ijkuak tikilnamikiskej imikilis Jesús? ¿Ken uelis tikinpaleuiskej oksekimej touan mamonechikokan? ¿Ken uelis tikinpaleuiskej tokniuan tlen ayakmo touan monechikouaj nion tetlapouiaj? Nin tlamantli techpaleuis matikmatikan tlen tikchiuaskej ijkuak ajsis non tonal miak ipati.

¿TLEN MONEKI TIKCHIUASKEJ PARA TIMOYEKTLALISKEJ?

5. (1) ¿Tleka miak ipati matimokuayejyekokan topatka omotemakak Jesucristo? (Salmo 49:​7, 8). (2) Xikijto tlen omitsmachti video ¿Tleka omikik Jesús?

⁵ Techpaleuis matimoyektlalikan tla timokuayejyekouaj miak ipati topatka omotemakak Jesucristo. Tejuan toselti amo uelis timomakixtiskej imak tlajtlakoli uan mikilistli (xiktlajtolti Salmo 49:​7, 8; noijki xikita video ¿Tleka omikik Jesús?). a Jehová okiualtitlanki iKone topatka mamotemakaki. Ikinon yejuan sapanoua patio otechtlaxtlajkej (Rom. 6:23). Tla timokuayejyekouaj tlen okichijkej Jehová uan Jesús, okachi tikpatioitaskej tlen topatka okichijkej. Axkan matikitakan tlen okichijkej Jehová uan Jesús para techmakixtiskej. Achto tikitaskej tlen okichijkej para techtlaxtlauaskej.

6. ¿Tlen okichijkej Jehová uan Jesús para techmakixtiskej?

⁶ Jehová otechtlaxtla ijkuak Jesús topatka omotemakak uan ijkon oksepa okiko tlen Adán okipolo. Adán amo okatka tlajtlakole ijkuak okichijchijkej. Pero ayakmo nochipa yoltoskia porque otlajtlakolchi uan ikoneuan noijki ijkon okinpanok. Jesús topatka omotemakak porque amo tlajtlakole uan ijkon oksepa okiko tlen Adán okipolo. Ijkuak Jesús okatka nikan tlaltikpak “amo keman otlajtlakolchi uan amo otlakajkaya” (1 Ped. 2:22). Jesús amo okatka tlajtlakole ijkuak topatka omotemakak ikinon oksepa tikpiaskiaj tlen Adán okipolo (1 Cor. 15:45; 1 Tim. 2:6).

7. Xikijto tlen okixnamik Jesús.

⁷ Ijkuak Jesús okatka nikan tlaltikpak, okixnamik miak tlamantli pero ye nochipa okitlakamatki toTajtsin Dios. Nochipa okintlakamatki ipapanuan maski okatkaj tlajtlakolejkej (Luc. 2:51). Xamo oksekimej okiluiayaj amo makintlakamati ipapanuan uan makikaua toTajtsin Dios pero ye amo keman ijkon okichi. Satepan okixnamik Satanás ijkuak okiyejyeko para makikaua toTajtsin Dios (Mat. 4:​1-11). Satanás okinekiaya Jesús matlajtlakolchiua uan ijkon ayakmo uelis topatka motemakaskia.

8. ¿Tlen okseki tlamantli okixiko Jesús?

⁸ Jesús okixnamik okseki tlamantli ijkuak otetlapouiaya. Akinmej okikokoliayaj okitlajyouiltijkej uan okiluijkej kimiktiskiaj (Luc. 4:​28, 29; 13:31). Okinxiko idiscípulos ijkuak okichiuayaj itlaj amo kuali (Mar. 9:​33, 34). Ijkuak okixkomakakej uan okijtojkej  kimiktiskej, okitlajyouiltijkej uan okipinauijkej. Satepan okimiktijkej ijkon ken se tlakatl tlen kichiua tlen amo kuali uan sapanoua otlajyoui (Heb. 12:​1-3). Jehová ayakmo okipaleui ijkuak yimikiskia ikinon san iselti omoka hasta oixpoliuik (Mat. 27:46). b

9. ¿Tlen tikmachiliaj ijkuak timokuayejyekouaj tlen okichi Jesús? (1 Pedro 1:8).

⁹ Nochi nin tlamantli kiteititia Jesús sapanoua patio otechtlaxtla ijkuak otechmakixti. Ikinon okachi tiktlasojtlaj ijkuak timokuayejyekouaj nochi tlen okichi para techmakixtis (xiktlajtolti 1 Pedro 1:8).

10. ¿Tlen okichi Jehová para topatka mamotemaka Jesús?

¹⁰ ¿Tlen okichi Jehová para topatka mamotemaka Jesús? Tejuan tikmatij Jehová sapanoua kuali omouikaya iuan iKone (Prov. 8:30). ¿Timokuayejyekouaj ken omomachili Jehová ijkuak okitak Jesús otlajyouijtoka nikan tlaltikpak? Xamo sapanoua omoyolkoko ijkuak okitak okitlajyouiltiayaj uan okitlauelitayaj.

11. ¿Tlen tlamantli techpaleuia matikajsikamatikan ken omomachili Jehová ijkuak okimiktijkej iKone?

¹¹ Akinmej yoixpoliuik se inkone kimatij sapanoua teyolkoko ijkuak ijkon kinpanoua. Tejuan tikneltokaj oksepa kinyolitiskej akinmej yoixpolikej pero non amo kijtosneki amo timoyolkokouaj ijkuak ixpoliui akin tiktlasojtlaj. Jehová ijkon omomachili itech xiuitl 33. Ye okitak ijkuak okitlajyouiltijkej iKone uan okimiktijkej (Mat. 3:17). c

12. ¿Tlen uelis tikchiuaskej axkan porque ok tikchixtokej maajsi tonal tikilnamikiskej imikilis Jesús?

¹² Axkan ok tikchiaj maajsi tonal tikilnamikiskej imikilis Jesús ikinon matimomachtikan iuan tofamilia noso toselti tlen okseki tlamantli okichi Jesús para techmakixtis. Matimomachtikan ika amatlajkuilol Tlen ika momachtiaj iTlaixpantijkauan Jehová noso okseki amatlajkuilolmej para okachi tikmatiskej non tlamantli. d Matikintlajtoltikan textos tlen katej itech amatlajkuilol Toteki akinmej tikchiuaj ken Cristo (Tlen timomachtiskej itech nechikol). Noijki matikitakan video tlen kualkan timomachtiaj para non tonal. Tla ijkon timoyektlaliskej uelis tikinpaleuiskej oksekimej touan makilnamikikan imikilis Jesús (Esd. 7:10).

 MATIKINPALEUIKAN OKSEKIMEJ TOUAN MAKILNAMIKIKAN IMIKILIS JESÚS

13. ¿Tlen moneki tikchiuaskej para tikinpaleuiskej oksekimej touan makilnamikikan imikilis Jesús?

¹³ ¿Ken uelis tikinpaleuiskej oksekimej touan makilnamikikan imikilis Jesús? Matikinmiluikan touan mamonechikokan. Matikijkuilokan akinmej tiknekij tikinmiluiskej touan mamonechikokan uan amo san matikinxejxelokan amatsitsintin ijkuak titetlapouiaj. Uelis tikinmiluiskej tofamiliares touan mamonechikokan, akinmej inuan titekipanouaj, akinmej inuan timomachtiaj uan oksekimej tlen tikinmixmatij. Tla tlamij amatsitsintin tlen tikinxejxelouaj, matikintitlanilikan se enlace electrónico akinmej tiknekij tikinmiluiskej touan mamonechikokan. Xamo miakej touan monechikoskej (Ecl. 11:6).

14. ¿Tlen techmachtia tlen okipanok inamik se tokni?

¹⁴ Matikilnamiktokan se amatsintli uelis ikaj kipaleuis touan mamonechiko. Matikitakan tlen okipanok se tokni tlen inamik amo okitekichiuiliaya Jehová. Tokni amo okichiaya inamik iuan mauia ijkuak okilnamikej imikilis Jesús. Ye miak uelta yokiluijka iuan mauia pero inamik amo keman oyaya. ¿Tleka inamik omonechikoto? Ye okijto se tlayekanki okimakak se amatsintli kanin kijtoua touan mamonechiko. Inamik tokni omonechiko non xiuitl ijkuak otikilnamikej imikilis Jesús uan noijki satepan.

15. ¿Tlen moneki tikilnamiktoskej ijkuak tikinmiluiskej oksekimej touan makilnamikikan imikilis Jesús?

¹⁵ Matikilnamiktokan xamo techtlajtlaniskej seki tlamantli akinmej tikinmiluiskej touan mamonechikokan porque amo keman touan monechikouaj. Ikinon achto matimokuayejyekokan tlen uelis techtlajtlaniskej uan ken tikinnankiliskej (Col. 4:6). Xamo techtlajtlaniskej: “¿Tlen nankichiuaj ompa kanin nanmonechikouaj? ¿Keski hora uejkaua? ¿Ken moneki nimotlakentis? ¿Moneki itlaj niktlaxtlauas para nikalakis? ¿Nechtlajtlaniliskej tomin?”. Ikinon matikintlajtlanikan kox kinekij itlaj kimatiskej uan matikinnankilikan.  Noijki uelis tikinmititiskej videos Ma tikilnamikikan imikilis Jesús uan ¿Ken tikchiuaj tonechikoluan? Noijki mitspaleuis seki tlamantli tlen kijtoua amochtli Tiyoltos uan tiyolpakis tlamachtil 28.

16. ¿Tlen okseki tlamantli kinekiskej kimatiskej akinmej touan monechikoskej?

¹⁶ Akinmej touan monechikoskej xamo satepan kinekiskej kimatiskej okseki tlamantli. Xamo kinekiskej kimatiskej tleka amo miakej okonikej vino noso tleka amikaj okonik. Xamo kinekiskej kimatiskej keski uelta tikilnamikij imikilis Jesús. Kox san se tlamantli tikchiuaj ijkuak timonechikouaj. Seki tlamantli techyekiluiaj ijkuak tikilnamikij imikilis Jesús pero xamo kinekiskej okachi matikinyekiluikan. Seki tlamantli uelis tikinnankiliskej ika se tlamachtil tlen kajki itech jw.org tlen itoka “¿Tleka iTlaixpantijkauan Jehová amo kichiuaj iCena toTeko ken oksekimej religiones?”. Tiknekij tikinpaleuiskej oksekimej ijkuak tikinmiluiskej touan mamonechikokan. Tikinpaleuiskej ijkuak ajsis non tonal uan satepan ijkuak yotikilnamikej imikilis Jesús (Hech. 13:48).

MATIKINPALEUIKAN AKINMEJ AYAKMO TETLAPOUIAJ NION MONECHIKOUAJ

17. ¿Tlen uelis kichiuaskej tlayekankej para kinpaleuiskej akinmej ayakmo tetlapouiaj nion monechikouaj? (Ezequiel 34:​12, 16).

¹⁷ ¿Tlen uelis kichiuaskej tlayekankej para kinpaleuiskej akinmej ayakmo tetlapouiaj nion monechikouaj ijkuak yitikilnamikiskej imikilis Jesús? Moneki makintlasojtlakan uan makiteititikan kintekipachoua tlen kinpanoua (xiktlajtolti Ezequiel 34:​12, 16). Tokniuan tlen nantlayekanaj uelis nankintlajpalotiuij nochtin nonmej tokniuan ijkuak ayamo tikilnamikij imikilis Jesús. Xikinmiluikan namechtekipachoua ken katej uan xikinmiluikan nankinekij nankinpaleuiskej. Xikinmiluikan touan makilnamikikan imikilis Jesús uan kuali xikinselikan ijkuak ajsitiuij. Satepan oksepa xikintlajpalotij uan xikinpaleuikan oksepa makitekichiuilikan Jehová (1 Ped. 2:25).

18. ¿Ken uelis tikinpaleuiskej tokniuan tlen ayakmo touan omonechikouayaj? (Romanos 12:10).

 ¹⁸ Tinochtin uelis tikinpaleuiskej tokniuan tlen ayakmo tetlapouiaj nion monechikouaj. ¿Ken uelis tikinpaleuiskej? Kuali matikinselikan, matikteititikan tikintlasojtlaj uan matikintlakaitakan (xiktlajtolti Romanos 12:10). Matikilnamiktokan xamo nonmej tokniuan okitakej oui oksepa touan monechikotiuij. Xamo omokuayejyekojkej ken tikinseliskiaj. e Ikinon amo matikintlajtlanikan tlen amo toteki nion matikinmiluikan itlaj tlen uelis kinyolkokos (1 Tes. 5:11). Yejuan ok tokniuan uan tipakij touan kiueyichiuaj Jehová (Sal. 119:176; Hech. 20:35).

19. ¿Ken techpaleuia ijkuak tikilnamikij imikilis Jesús?

¹⁹ Tlen axkan otimomachtijkej techpaleuia matikajsikamatikan tleka Jesús otlanauati sejse xiuitl matikilnamikikan imikilis. Sapanoua techpaleuia ijkuak ijkon tikilnamikij uan noijki kinpaleuia oksekimej (Is. 48:​17, 18). Noijki okachi tikintlasojtlaj Jehová uan Jesús. Tikteititiaj tikintlasojkamatiliaj nochi tlen yokichijkej para techpaleuiskej. Okachi timouikaj inuan tokniuan uan tikinmiluiaj oksekimej tlen moneki kichiuaskej para makinpaleui imikilis Jesús uan Jehová kinteochiuas. Ikinon matimochijchikauakan matikilnamikikan imikilis Jesús.