Sekimej tlakamej omoskaltijkej itech seki altepemej kanin kinmitaj siuamej amitlaj inpati. Se tokni itoka Hans tlen tlapaleuia ken tlayekanki itech circuito ompa Bolivia, okijto: “Sekimej tlakamej omoskaltijkej itech seki altepemej kanin tlakamej okachi moueyinekij. Mokuayejyekouaj yejuan okachi inpati uan amo ijkon ken siuamej. Ikinon amo kintlakaitaj siuamej”. Se tokni itoka Shengxian tlen tlapaleuia ken tlayekanki ompa Taiwán, okijto: “Kanin nichanti, tlakamej kijtouaj siuamej amo moneki kinmiluiskej tlakamej tlen mokuayejyekouaj. Tla se tlakatl kijtos tlen okijto se siuatl uelis ayakmo kitlakaitaskej”. Oksekimej tlakamej kinchikoitaj siuamej maski mota amo ijkon kichiuaj. Mokamanaluiaj ika tlen kichiuaj siuamej uan ijkon kiteititiaj amo kintlakaitaj.

Pero tlakamej akinmej okinmachtijkej siuamej amitlaj inpati, moneki kipatlaskej tlen mokuayejyekouaj uan uelis kinpatioitaskej siuamej (Efes. 4:​22-24). ¿Tlen kinpaleuis? Uelis kichiuaskej ijkon ken Jehová kichiua. Nin tlamachtil techpaleuis matikmatikan ken kinpatioita Jehová siuamej. Noijki tikitaskej ken uelis kiteititiskej tokniuan kinpatioitaj siuamej ijkon ken Jehová kichiua uan ken tlayekankej noijki uelis ijkon kichiuaskej.

¿KEN KITEITITIA JEHOVÁ KINPATIOITA SIUAMEJ?

Jehová techititia ken moneki tikinmitaskej siuamej. Ye techiknomati uan tinochtin techtlasojtla (Juan 3:16). Ye sapanoua kintlasojtla siuamej uan kinmita ken ichpochuan. Matikitakan seki tlamantli tlen kiteititia kintlasojtla uan kintlakaita.

Amo kinchikoita. Jehová okinchijchi tlakatl uan siuatl ijkon ken ye (Gén. 1:27). Amo okichijchi tlakatl okachi ixtlamatki nion okachi  makimati kichiuas miak tlamantli. Ye okichijchi tlakatl uan siuatl para kuali makajsikamatikan iTlajtol uan makipiakan kuali inyelis ijkon ken ye kipia. Jehová amo san kinpatioita tlakamej (2 Crón. 19:7). Jehová kinpatioita siuamej uan tlakamej porque tlaneltokaj. Noijki nochtin kinmiluia uelis nochipa yoltoskej nikan tlaltikpak noso iluikak uan yetoskej tekiuajkej uan teopixkej (2 Ped. 1:1). Nin kiteititia Jehová amo kinchikoita siuamej.

Kinkaki. Jehová kitekipachoua tlen kinpanoua siuamej uan ken momachiliaj. Ijkon okiteititi ijkuak Raquel uan Ana okitlatlaujtijkej uan ye okinkak uan okinnankili (Gén. 30:22; 1 Sam. 1:​10, 11, 19, 20). Noijki Jehová okichi makijkuilokan itech iTlajtol ijkuak tlakamej okinkakej siuamej. Ijkon okichi Abrahán ijkuak Jehová okinauati makichiua tlen isiua okilui (Gén. 21:​12-14). Tekiua David okikak Abigail uan hasta ye okijto Jehová okititlanki iuan mamotlapouiti (1 Sam. 25:​32-35). Jesús okikak imama porque ye kichiua ijkon ken iTajtsin kichiua (Juan 2:​3-10). Nin kiteititia Jehová kintlakaita siuamej ijkuak kinkaki.

Kineltoka kichiuaskej tlen kinmiluia. Matikitakan tleka ijkon tikijtouaj. Jehová okilui Eva matlapaleui makimaluikan tlaltikpak (Gén. 1:28). Jehová okijto Eva kipaleuiskia inamik porque tekitl tlen kichiuaskia noijki miak ipati. Noijki okinnauati Débora uan Huldá makinmiluikan akinmej opouiayaj itech ialtepe tlen omonekiaya kichiuaskej. Hasta okiluijkej tlen omonekiaya kichiuas se juez uan se tekiua (Juec. 4:​4-9; 2 Rey. 22:​14-20). Axkan Jehová noijki kineltoka siuamej uelis kichiuaskej tekitl tlen kinmaka. Sekimej tetlapouiaj, sekimej precursoras noso oksekimej misioneras. Sekimej kitaj ken kinchijchiuaskej kalmej, oksekimej kalchiuaj uan oksekimej kitaj kuali mayetokan kalmej kanin timonechikouaj noso ompa Betel. Sekimej tlapaleuiaj Betel noso kanin tlajtolkopaj. Jehová kinpaleuia miakej siuamej makichiuakan tlen ye kineki (Sal. 68:11). Nochi nin kiteititia Jehová kimati siuamej uelis kichiuaskej miak tlamantli.

¿KEN UELIS KITEITITISKEJ TOKNIUAN KINPATIOITAJ SIUAMEJ IJKON KEN JEHOVÁ KICHIUA?

Nochtin tlakamej moneki kuali mamokuayejyekokan uan makitakan kox tlen kichiuaj kiteititia kinpatioitaj siuamej ijkon ken Jehová kinpatioita. Moneki matechpaleuikan para ijkon tikchiuaskej. Matikitakan tleka ijkon tikijtouaj. Se máquina de rayos X kinextia kox toyolo kipia se kokolistli. ITlajtol toTajtsin Dios uan se toyolikni uelis techpaleuiskej matikmatikan kox tikinmitaj siuamej ijkon ken Jehová kinmita. Matikitakan tlen uelis tikchiuaskej.

Matikiluikan se toyolikni matechpaleui (Prov. 18:17). Matimotlapouikan iuan se toyolikni tlen teajsikamati uan tetlasojtla. Matiktlajtlanikan: “¿Te tikita nikinpatioita siuamej? ¿Kox kitaj nikintlakaita? ¿Tikita moneki itlaj nikpatlas?”. Tla techiluia itlaj moneki tikyektlaliskej, kuali matikkakikan uan amo matikualanikan. Matimochijchikauakan matikchiuakan tlen otechilui.

Matimomachtikan iTlajtol toTajtsin Dios. Para tikmatiskej kox tikintlakaitaj siuamej moneki tikitaskej kox timokuayejyekouaj ijkon ken Biblia tlamachtia uan kox tikchiuaj tlen ompa kijtoua (Heb. 4:12). Ijkuak timomachtiaj Biblia tikitaj sekimej tlakamej okinpatioitakej siuamej uan oksekimej amo. Matimotlajtlanikan tejuan ken akinmej tikchiuaj. Ikinon tlakamej amo mamopaleuikan san ika se texto para kiteititiskej ken moneki kinmitaskej siuamej. Moneki makinmitakan okseki textos tlen kiteititiaj ken moneki kinmitaskej siuamej. 1 Pedro 3:7 kijtoua matikpatioitakan siuatl porque yetoskia ken “se komitl tlen san niman tlapani”. b ¿Kijtosneki nin versículo tlakatl okachi ixtlamatki uan okachi kimati itlaj kichiuas? Amo. Matikitakan tlen kijtoua Gálatas 3:​26-29 para kuali tikajsikamatiskej  tlen okijto Pedro. Ompa kijtoua Jehová okinpejpenki tlakamej uan siuamej para matlanauatikan iuan Jesús ompa iluikak. Techpaleuis matikintlakaitakan siuamej tla kuali timomachtiaj Biblia uan tiktlajtlaniaj se toyolikni tlen uelis tikchiuaskej.

¿KEN KITEITITIAJ TLAYEKANKEJ KINPATIOITAJ SIUAMEJ?

Ijkuak tlayekankej kinpatioitaj siuamej, oksekimej tokniuan noijki ijkon kichiuaj. ¿Ken kiteititiaj tlayekankej ijkon kichiuaj? Matikitakan seki tlamantli tlen kiteititia kintlakaitaj uan kintlasojtlaj.

Xikinmiluikan tlen kuali kichiuaj. Tlayekankej kinpaleuis tlen okichi apóstol Pablo. Ye okinmilui kuali tlen okichiuayaj siuamej ijkuak okintlajkuilili tokniuan tlen okatkaj Roma (Rom. 16:12). Xamo sapanoua opakej siuamej ijkuak okikakej tlen okijkuilo Pablo. Axkan tlayekankej noijki kinmiluiaj siuamej kipiaj kuali inyelis uan kuali kitekichiuiliaj Jehová. Ikinon yejuan kimachiliaj kintlakaitaj uan kintlasojtlaj. Tlen kijtos se tlayekanki uelis kiyolchikauas se siuatl para amo keman makikaua Jehová (Prov. 15:23).

Tlayekankej kinmiluiaj ika nochi inyolo tlen kuali kichiuaj. ¿Tleka ijkon kichiuaj? Matikitakan tlen okijto Jessica. Ye okijto: “Techpaktia matechiluikan kuali tlen tikchiuaj. Pero okachi timoyolchikauaj ijkuak techiluiaj tlen tlamantli kuali otikchijkej. Timoyolchikauaj ijkuak techiluiaj kuali tlen kichiuaj tokoneuan ijkuak timonechikouaj noso ijkuak tikualikaj akin tikmachtiaj kanin timonechikouaj”. Ijkuak tlayekankej kinmiluiaj tlen kuali kichiuaj siuamej, yejuan kimachiliaj kinpatioitaj uan kintlasojtlaj.

Xikinkakikan. Tlayekankej tlen yolyamankej amo kijtouaj san yejuan nochi kuali kichiuaj. Ikinon kintlajtlaniaj siuamej ken uelis kichiuaskej seki tlamantli uan kuali kinkakij ijkuak yejuan  kijtouaj tlen mokuayejyekouaj. Ijkon tinochtin timopaleuiaj uan siuamej pakij porque kijtouaj tlen mokuayejyekouaj. ¿Ken kinpaleuia tlayekankej ijkuak kinkakij siuamej? Se tlayekanki itoka Gerardo tlen tlapaleuia Betel, okijto: “Okachi kuali nikchiua noteki ijkuak nikintlajtlania siuamej ken uelis nikchiuas seki tekitl. Ualeua yejuan okachi yimiak xiuitl kichijtokej se tekitl”. Miakej kimatij kanin titetlapouiaj porque tlapaleuiaj ken precursoras. Se tlayekanki itoka Bryan, okijto: “Siuamej sapanoua tlapaleuiaj itech ialtepe Jehová. Noijki matikchiuakan tlen yejuan kuali kichiuaj”.

Tlayekankej kipatioitaj tlen siuamej mokuayejyekouaj. ¿Tleka miak ipati ijkon makichiuakan? Se tlayekanki itoka Edward, okijto: “Techpaleuia tlen mokuayejyekoua se siuatl porque okachi kimati ken kichiuas seki tlamantli. Non techpaleuia okachi matiteajsikamatikan uan matiteiknomatikan” (Prov. 1:5). Tlayekankej kintlasojkamatiliaj siuamej ijkuak kijtouaj tlen mokuayejyekouaj uan ken kitaj seki tlamantli maski tlayekankej amo uelis kichiuaskej nochi tlen yejuan kijtouaj.

Xikinmachtikan. Tlayekankej kiteititiaj ixtlamatkej ijkuak kinmachtiaj siuamej makichiuakan seki tekitl. Uelis kinmachtiskej ken kinyekanaskej tokniuan tlen tetlapouitiuij ijkuak amo kajki se tokni tlen yomoapolakti. Noijki uelis kinmititiskej ken kitekitiltiskej seki tepostli uan máquinas tlen ika kalchiuaj noso ijkuak kiyektlaliaj se kali kanin timonechikouaj. Tlayekankej tlen tlapaleuiaj Betel yokinmachtijkej siuamej makichiuakan tlatlamantli tekitl. Yokinmachtijkej makiyektlalikan se kali, matlakouakan, matlapaleuikan contabilidad uan okseki tekitl kichiuaj. Ijkon tlayekankej kiteititiaj kineltokaj kuali kichiuaskej tekitl tlen kinmakaj siuamej.

Miakej siuamej uelij kinpaleuiaj oksekimej porque kichiuaj tlen tlayekankej yokinmachtijkej. Sekimej siuamej okinmachtijkej makalchiuakan ikinon ijkuak kanaj tlaxixini kinyektlaliliaj inkaluan tokniuan. Oksekimej tetlapouiaj kanin miakej panouaj ijkon ken okinmiluijkej tlayekankej uan ijkon kinpaleuiaj oksekimej siuamej noijki ijkon makichiuakan. ¿Tlen kijtouaj siuamej ijkuak tlayekankej kinmachtiaj? Jennifer okijto: “Se tlayekanki omajxili onechmachti ijkuak onitlapaleui kanin okichijkej se kali kanin timonechikouaj. Non tokni onechiluiaya kuali tlen onikchiuaya porque okitaya noteki. Onechpaktiaya iuan nitekipanos porque ye okineltokaya kuali nikchiuaskia tekitl uan ne kuali onimomachiliaya”.

SIUAMEJ KUALI MOMACHILIAJ IJKUAK TIKINMITAJ KEN YETOSKIAJ TOFAMILIA

Tejuan tikintlasojtlaj siuamej ijkon ken kintlasojtla Jehová. Tikinmitaj ken yetoskiaj tofamilia (1 Tim. 5:​1, 2). Tipakij san sekan tikueyichiuaj Jehová. Tipakij porque yejuan kitaj tikintlasojtlaj uan tikinpaleuiaj. Vanessa okijto: “Niktlasojkamatilia Jehová porque nipoui itech ialtepe kanin katej miakej tlakamej tlen kichiuaj kuali manimomachili”. Se tokni tlen chanti Taiwán okijto: “Niktlasojkamatilia Jehová uan akinmej pouij itech ialtepe porque techpatioitaj uan kajsikamatij ken timomachiliaj. Non nechpaleuia okachi manitlaneltoka uan okachi manikpatioita nipoui itech ialtepe Jehová”.

Jehová paki porque tlakamej mochijchikauaj kinpatioitaskej siuamej ijkon ken ye kichiua (Prov. 27:11). Se tlayekanki itoka Benjamin tlen chanti Escocia, okijto: “Tlakamej tlen amo kitekichiuiliaj Jehová amo kintlakaitaj siuamej. Ikinon tiknekij kuali mamomachilikan siuamej ijkuak touan monechikouaj”. Matimochijchikauakan matikchiuakan ijkon ken Jehová kichiua. Matikinpatioitakan siuamej ijkon ken moneki uan noijki matikintlasojtlakan (Rom. 12:10).