1. ¿Ken uelis tikyolpaktiskej Jehová?

 MATIKIJTOKAN itlaj kualtsin otiktliokolijkej akin sapanoua tiktlasojtlaj uan kipaleuis miak. Timoyolkokoskej tla tikitaj amo kinejneki tlen otiktliokolijkej. Pero tipakiskej miak tla techtlasojkamatilis uan kinejnekis tlen otiktliokilijkej. ¿Tlen techmachtia nin tlamantli? Jehová topatka okitemakak iKone. Ye paki ijkuak tiktlasojkamatiliaj uan tikteititiaj tikpatioitaj topatka okitemakak iKone uan tiktlasojkamatiliaj techtlasojtla miak (Juan 3:16; Rom. 5:​7, 8).

2. ¿Tlen timomachtiskej?

² Xamo ayakmo okachi tikpatioitaskej Jesús topatka omotemakak ijkuak panoti xiuitl. Tipakij Jesús topatka omotemakak pero xamo yetoskia ken itlaj tiktlatiaj uan ompa tikilkauaj. Pero amo tiknekij ijkon matechpano ikinon moneki nochipa matimokuayejyekokan tlen topatka yokichijkej Jehová uan Jesús. Tlen axkan timomachtiskej techpaleuis matimokuayejyekokan tlen yokichijkej. Timomachtiskej ken techpaleuia axkan porque Jesús topatka omotemakak uan ken techpaleuis satepan. Noijki ken uelis tikteititiskej tiktlasojkamatiliaj Jehová sapanoua techtlasojtla. Saiktlami tikitaskej ken uelis tikteititiskej timotlasojkamatij ijkuak tikilnamikiskej imikilis Jesús.

¿KEN TECHPALEUIA AXKAN CRISTO PORQUE TOPATKA OMOTEMAKAK?

3. ¿Ken techpaleuia axkan Cristo porque topatka omotemakak?

³ Yitechpaleuijtok miak Cristo topatka omotemakak. Matikitakan tleka ijkon tikijtouaj. Jehová techtlapojpoluia porque  Cristo topatka omotemakak. Ye techtlapojpoluia porque techtlasojtla. Se tonal David okitlakuikili Jehová uan okijto: “Te, Jehová, tiyolkuali uan tikneki titetlapojpoluis” (Sal. 86:5; 103:​3, 10-13).

4. ¿Akinmej inpatka omotemakak Jesús? (Lucas 5:32; 1 Timoteo 1:15).

⁴ Miakej mokuayejyekouaj amo kinnamiki makintlapojpolui Jehová uan melauak amo technamiki matechtlapojpolui. Apóstol Pablo okijto: “Amo nechnamiki manechnotsakan apóstol”. Pero satepan okijto: “ToTajtsin Dios onechmakak nin tekitl porque kitetliokolia tlen kuali” (1 Cor. 15:​9, 10). Jehová techtlapojpoluia ijkuak timoyolkopaj. Ye ijkon kichiua porque techtlasojtla uan amo porque technamiki matechtlapojpolui. Ikinon tla timoyolkokouaj porque tikijtouaj amo technamiki Jehová matechtlapojpolui, matikilnamiktokan ye amo okitemakak iKone inpatka akinmej amo tlajtlakolchiuaj. Ye okitemakak iKone inpatka akinmej moyolkopaj (xiktlajtolti Lucas 5:32; 1 Timoteo 1:15).

5. ¿Tleka amikaj makijto yokimotlanili Jehová makiknomati?

⁵ Amo matimokuayejyekokan yotikmotlanilijkej Jehová matechiknomati porque yimiak xiuitl tiktekichiuiliaj. Ye kipatioita ken tiktekichiuiliaj (Heb. 6:10). Pero okitemakak iKone ken se tetliokolil uan amo okitemakak para ika techtlaxtlauis tlen tikchiuaj. Ikinon tla tikijtouaj yotikmotlanilijkej Jehová matechiknomati kijtosneki tikijtouaj amo omonekiaya topatka mamotemaka Jesús (noijki xikita Gálatas 2:21).

6. ¿Tleka Pablo omochijchika kitekichiuilis toTajtsin Dios?

⁶ Pablo okimatiaya amo uelis kimotlaniliskia makitlapojpolui toTajtsin Dios. Pero ¿tleka omochijchika kitekichiuilis? Ijkon okichi porque okinekiaya kiteititis okitlasojkamatiliaya toTajtsin Dios okiknomatki (Efes. 3:7). Tejuan noijki tipakij tiktekichiuiliaj Jehová porque tiknekij tiktlasojkamatiliskej techiknomati. Amo ijkon tikchiuaj porque tiknekij tikmotlaniliskej matechiknomati.

7. ¿Tlen okse tlamantli kiteititia Cristo techpaleuia topatka omotemakak? (Romanos 5:1; Santiago 2:23).

⁷ Noijki timouikaj iuan toTajtsin Dios porque Jesús topatka omotemakak. a Yichikome otimomachtijkej ijkuak tinesij amo timouikaj iuan Jehová. Pero iKone topatka omotemakak uan ye techpaleuia inauak matimotokikan Jehová uan techpaleuia kuali iuan matimouikakan (xiktlajtolti Romanos 5:1; Santiago 2:23).

8. ¿Tleka moneki matiktlasojkamatilikan Jehová porque techkauilia matiktlatlaujtikan?

⁸ Tikpatioitaj tiktlatlaujtiskej Jehová porque techkauilia iuan matimouikakan. Ye amo san techkaki ijkuak timonechikouaj. Noijki techkaki ijkuak tisejse tiktlatlaujtiaj. Ijkuak timotlatlaujtiaj techpaleuia okachi matimouikakan iuan Jehová uan amo san timoyolseuiaj (Sal. 65:2; Sant. 4:8; 1 Juan 5:14). Jesús nochipa omotlatlaujtiaya ijkuak okatka nikan tlaltikpak. Ye okimatiaya iTajtsin okikakiaya uan non okipaleuiaya okachi iuan mamouika (Luc. 5:16). Sapanoua timotlasojkamatij porque Jesús topatka omotemakak. Non techkauilia matimouikakan iuan Jehová uan matiktlatlaujtikan.

 ¿KEN TECHPALEUIS SATEPAN PORQUE CRISTO TOPATKA OMOTEMAKAK?

9. ¿Ken techpaleuis satepan porque Cristo topatka omotemakak?

⁹ ¿Ken techpaleuis satepan porque Cristo topatka omotemakak? ToTajtsin Dios techpaleuis nochipa matiyoltokan. Miakej kijtouaj amo keman uelis nochipa tiyoltoskej porque yimiak xiuitl miakej ixpoliuij. Pero ijkuak Jehová otechchijchi okinekiaya nochipa matiyoltokan. Miakej kintlajtlachialtia ijkuak tikijtouaj uelis nochipa tiyoltoskej. Pero okachi techtlajtlachialtia Jehová topatka okitemakak iKone para uelis nochipa tiyoltoskej (Rom. 8:32).

10. ¿Tlen yikinekij tlapejpenalmej mapano uan akinmej yetoskej tlaltikpak?

¹⁰ Axkan ok tiixpoliuij pero Jehová kineki desde axkan matimokuayejyekokan ken tiyetoskej ijkuak nochipa tiyoltoskej. Tlapejpenalmej yikinekij nochipa yoltoskej ompa iluikak uan kichiaj tlanauatiskej iuan Cristo (Apoc. 20:6). Oksekimej yikinekij nochipa yoltoskej itech xochitlali kanin ayakmo tlajyouiskej (Apoc. 21:​3, 4). ¿Tikchiaj nochipa tiyoltoskej ipan tlaltikpak? Nin tetliokolil sapanoua miak ipati porque Jehová otechchijchi para nochipa matiyoltokan ipan tlaltikpak. Non techpaleuis sapanoua matipakikan.

11, 12. ¿Tlen tlamantli techpaktiskia tikchiuaskej itech xochitlali? (Noijki xikinmita dibujos).

¹¹ Matimokuayejyekokan ken tiyetoskej ijkuak tichantiskej itech xochitlali. Ijkuakon ayakmo timokokoskej uan ayakmo tiixpoliuiskej (Is. 25:8; 33:24). Jehová techmakas nochi tlen tiknekij. ¿Tlen mitspaktiskia timomachtis? ¿Mitspaktiskia okachi tikmatis tlen kichiuaj yolkamej? ¿Mitspaktiskia titlatsotsonas? ¿Mitspaktiskia tikinchiuas dibujos? Itech xochitlali monekis tlapaleuiskej akinmej kitaskej ken kinchijchiuaj kalmej, akinmej kalchiuaskej, akinmej tlatokaskej, akinmej tlakualchiuaskej,  akinmej kiyektlaliskej xochitl, akinmej kinchijchiuaskej teposmej tlen ika tekipanoskej uan okseki tekitl tlen moneki kichiuaskej (Is. 35:1; 65:21). Nochtin akinmej chantiskej nikan tlaltikpak uelis momachtiskej miak tlamantli porque ayakmo keman ixpoliuiskej.

¹² Melauak tipakiskej ijkuak tikinseliskej akinmej kinyolitiskej (Hech. 24:15). Noijki tipakiskej okachi tikixmatiskej Jehová uan nochi tlen okichijchi (Sal. 104:24; Is. 11:9). Tikueyichiuaskej Jehová ijkon ken moneki porque ayakmo titlajtlakolchiuaskej. ¿Tikixtopeuaskej nochi nin tlamantli para ‘timoyolpaktiskej maski san kanaj keski tonal ika tlen amo kuali kineki kichiuas tocuerpo’? (Heb. 11:25). Okachi matikpatioitakan nin tlamantli porque okachi kualtsin tiyetoskej itech xochitlali. Ajsis tonal ayakmo tikijtoskej tikchiaj tiyetoskej itech xochitlali porque ijkuakon melauak ompa tiyetoskej. Nochi non mochiuas porque toTajtsin Dios sapanoua otechtlasojtlak ijkuak okitemakak iKone topatka makimiktikan.

MATIKTEITITIKAN TIKTLASOJKAMATILIAJ JEHOVÁ SAPANOUA TECHTLASOJTLA

13. ¿Ken tikteititiskej tiktlasojkamatiliaj Jehová nochi tlen topatka yokichi? (2 Corintios 6:1).

¹³ ¿Ken uelis tikteititiskej tiktlasojkamatiliaj Jehová topatka okitemakak iKone? ‘Okachi matikpatioitakan tiktekichiuiliskej’ (Mat. 6:33). Matikilnamiktokan Jesús omikik inpatka nochtin “ikinon akinmej yoltokej amo makichiuakan san tlen yejuan kinekij. Makichiuakan tlen kineki Cristo porque ye inpatka oixpoliuik uan okiyolitijkej” (2 Cor. 5:15). Jehová sapanoua yolkuali uan yotechtlapojpolui. Ikinon matimochijchikauakan matiktekichiuilikan uan ijkon tikteititiskej tikajsikamatij nochi tlen topatka yokichi uan tiktlasojkamatiliaj miak (xiktlajtolti 2 Corintios 6:1).

14. ¿Ken tikteititiskej tikneltokaj Jehová techyekana?

¹⁴ Noijki tikteititiskej tiktlasojkamatiliaj Jehová sapanoua techtlasojtla tla tikneltokaj ye techyekana. ¿Ken uelis tikchiuaskej? Moneki matikilnamiktokan tlen kineki matikchiuakan ijkuak itlaj tikpejpenaskej tikchiuaskej, kox moneki timomachtiskej miak noso kanin titekipanoskej (1 Cor. 10:31; 2 Cor. 5:7). Okachi tikneltokaskej Jehová uan kuali iuan timouikaskej tla tikchiuaskej tlen tikneltokaj. Noijki okachi tikneltokaskej tlen tikchiaj satepan tikseliskej (Rom. 5:​3-5; Sant. 2:​21, 22).

15. ¿Ken tikteititiskej tiktlasojkamatiliaj Jehová tlen yokichi ijkuak tikilnamikiskej imikilis Jesús?

¹⁵ Noijki tikteititiskej tiktlasojkamatiliaj Jehová sapanoua techtlasojtla tla timochijchikauaskej tikchiuaskej seki tlamantli ijkuak yitikilnamikiskej imikilis Jesús. Tejuan  yotikijtokej tiaskej non tonal miak ipati pero uelis tikinmiluiskej oksekimej touan makilnamikitij imikilis Jesús (1 Tim. 2:4). Ijkuak tikinyoleuaskej, matikinyekiluikan tlen tikchiuaskej itech non nechikol miak ipati. Uelis tikinmititiskej videos tlen katej itech jw.org tlen intoka ¿Tleka omikik Jesús? uan Ma tikilnamikikan imikilis Cristo. Tlayekankej kinyoleuaskej akinmej ayakmo touan monechikouaj nion tetlapouiaj. Matimokuayejyekokan ken pakiskej akinmej katej iluikak uan akinmej katej nikan tlaltikpak tla ikaj oksepa kitekichiuilis Jehová (Luc. 15:​4-7). Ijkuak tikilnamikiskej imikilis Jesús amo san matikintlajpalokan tokniuan. Noijki matikintlajpalokan akinmej ompa yaskej uan akinmej yiuejkika touan omonechikouayaj (Rom. 12:13).

16. ¿Tleka moneki okachi matitetlapouikan ijkuak yitikilnamikiskej imikilis Jesús?

¹⁶ ¿Uelis okachi titetlapouiskej ijkuak yitikilnamikiskej imikilis Jesús? Ijkon tikteititiskej tiktlasojkamatiliaj Jehová uan Jesús nochi tlen topatka yokichijkej. Tla okachi titetlapouiskej tikitaskej Jehová techpaleuia uan okachi tikneltokaskej (1 Cor. 3:9). Noijki ijkuak yitikilnamikiskej imikilis Jesús matikintlajtoltikan textos tlen katej itech amatlajkuilol Nochipa matimomachtikan iTlajtol toTajtsin Dios uan noijki programa tlen kipia Toteki akinmej tikchiuaj ken Cristo. Nonmej textos uelis tikinnejnekiskej ijkuak timomachtiskej.

17. ¿Tlen kipaktia Jehová? (Noijki xikita recuadro “ Matikteititikan tiktlasojkamatiliaj Jehová techtlasojtla”).

¹⁷ Amo matimotekipachokan tla amo uelis okachi titetlapouiskej. Matikilnamiktokan Jehová kita tlen tikpiaj toyolipan uan amo kita tlen tikchiua iuan tlen kichiuaj oksekimej. Ye paki porque tikpatioitaj topatka okitemakak iKone (1 Sam. 16:7; Mar. 12:​41-44).

18. ¿Tleka sapanoua tiktlasojkamatiliaj Jehová uan Jesús tlen okichijkej?

¹⁸ Tiktlasojkamatiliaj miak Jesús topatka omotemakak porque non techkauilia matechtlapojpolui toTajtsin Dios, iuan matimouikakan uan tikchiaj nochipa tiyoltoskej. Matikteititikan tiktlasojkamatiliaj Jehová sapanoua techtlasojtla ikinon techteochiua miak ijkon ken yotimomachtijkej (1 Juan 4:19). Noijki matikteititikan tiktlasojkamatiliaj Jesús sapanoua otechtlasojtlak ijkuak topatka omotemakak (Juan 15:13).