TLAMACHTIL 3
TLAKUIKALI 35 Ma tikchiuakan tlen okachi ipati
Makipakti Jehová tlen tikpejpenaskej tikchiuaskej
“Tipeuaj timochiuaj tiixtlamatkej ijkuak tiktlakaitaj Jehová uan tla tikixmatij akin Santo, timochiuaj tiixtlamatkej” (PROV. 9:10).
NIN TLEN TIMOMACHTISKEJ
¿Ken techpaleuia matikmatikan tlen moneki, matiyetokan tiixtlamatkej uan matikajsikamatikan tlen moneki ijkuak tikpejpenaskej tlen tikchiuaskej?
1. ¿Tlen mojmostla tikchiuaj uan tleka oui?
MOJMOSTLA moneki tikpejpenaskej tlen tikchiuaskej. Seki tlamantli amo oui tikpejpenaj tikchiuaskej. Amo oui tikpejpenaj tlen tikkuaskej uan tlen hora tikochiskej. Pero okseki tlamantli oui tikpejpenaskej. Oui tikpejpenaj ken timopajtiskej, ken tiyolpakiskej, tlen okachi kipaleuis tofamilia noso ken uelis okachi tikueyichiuaskej toTajtsin Dios. Tiknekij matechpaleui tlen tikpejpenaskej tikchiuaskej uan noijki makipaleui tofamilia. Pero tiknekij okachi tikyolpaktiskej Jehová (Rom. 12:1, 2).
2. ¿Tlen techpaleuis kuali matikpejpenakan tlen tiknekij tikchiuaskej?
2 Axkan timomachtiskej eyi tlamantli tlen techpaleuis kuali matikpejpenakan tlen tikchiuaskej. Achto matitlajtlanikan nochi tlen moneki. Satepan matimokuayejyekokan ken kita Jehová tlen tikpejpenaskej tikchiuaskej. Saiktlami kuali matimokuayejyekokan tlen tikchiuaskej. Noijki tikitaskej tlen techpaleuis matikmatikan tlen kuali uan tlen amo kuali (Prov. 2:11).
MATITLAJTLANIKAN NOCHI TLEN MONEKI
3. Xikyekijto tlen tlamantli techpaleuis kuali matikpejpenakan tlen tikchiuaskej.
3 Achto matitlajtlanikan nochi tlen moneki uan ijkon kuali tikpejpenaskej tlen tiknekij tikchiuaskej. ¿Tleka moneki ijkon matikchiuakan? Matimokuayejyekokan ikaj mokokoua uan yaui kitati tepajti. Tepajti amo san niman kiluis tlen pajtli moneki konis tla ayamo itlaj kitlajtlania noso ayamo kita kanin kikokoua. Tejuan noijki amo san niman tikpejpentikisaj tlen tikchiuaskej tla ayamo tikmatij nochi tlen moneki. Pero ¿tlen techpaleuis matikmatikan nochi tlen moneki?
4. Ijkon ken kijtoua Proverbios 18:13, ¿tlen techpaleuis matikmatikan tlen moneki ijkuak itlaj tikpejpenaskej? (Noijki xikita foto).
4 Moneki matitlajtlanikan seki tlamantli tlen techpaleuis matikmatikan tlen tikchiuaskej. Matikijtokan ikaj techiluia matimijtotitij. ¿Tiaskej? Tla amo kuali tikixmatij akin iluichiuas noso amo tikmatij ken kichiuas iluitl, xamo tiktlajtlaniskej: “¿Kanin iluichiuas uan tlen tonal iluichiuas? ¿Keski ompa yetoskej? ¿Akin kitas kuali mamochiua iluitl? ¿Akinmej ompa yetoskej? ¿Tlen kichiuaskej? ¿Tlakoniskej?”. Tla ijkon tiktlajtlaniskej techpaleuis kuali matikpejpenakan tlen tikchiuaskej (xiktlajtolti Proverbios 18:13).
Matitlajtlanikan nochi tlen moneki. (Xikita párrafo 4). a
5. ¿Tlen tikchiuaskej tla yitikmatij tlen moneki?
5 Tla yitikmatij nochi tlen moneki, axkan matimokuayejyekokan tlen panos tla tikpejpenaskej tikchiuaskej tlen tiknekij. Matikitakan tleka ijkon tikijtouaj. ¿Tlen tikchiuaskej tla tikmatiskej ompa yetoskej akinmej amo kintlakamatij itlanauatiluan Jehová noso kitemakaskej alcohol uan koniskej san tlen kinekiskej? ¿Ayakmo mochiuas iluitl ken moneki noso peuas kichiuaskej tlen amo kuali? (1 Ped. 4:3). ¿Tiaskej non iluitl maski non tonal moneki timonechikoskej noso moneki titetlapouitiuij? Tla tikitaskej nochi non tlamantli techpaleuis kuali matikpejpenakan tlen tikchiuaskej. Pero moneki tikchiuaskej okse tlamantli. Moneki matimokuayejyekokan ken kita Jehová tlen tiknekij tikchiuaskej (Prov. 2:6).
MATIMOKUAYEJYEKOKAN KEN KITA JEHOVÁ TLEN TIKNEKIJ TIKCHIUASKEJ
6. ¿Tleka moneki matikiluikan Jehová matechpaleui ijkon ken kijtoua Santiago 1:5?
6 Matikiluikan Jehová matechpaleui matikajsikamatikan ken kita tlen tiknekij tikchiuaskej. Ye techmaka ixtlamatilistli ‘ika nochi iyolo uan amo kualani ijkuak tiktlajtlaniliaj’ (xiktlajtolti Santiago 1:5). Non ixtlamatilistli techpaleuis matikajsikamatikan kox kipaktis Jehová tlen tiknekij tikchiuaskej.
7. Xikyekijto ken uelis tikmatiskej ken mokuayejyekoua Jehová.
7 Kuali matikitakan ken technankilis Jehová tla yotikiluijkej matechpaleui. Matikijtokan tipaxialotiuij kanin amo titlaixmatij. Tla timixpoloskej xamo tikiluiskej ikaj tlen ik ompa chanti matechilui kanin ik tiaskej. Pero amo tiktlajtlaniskej uan san niman tiaskej. Achto moneki kuali tikkakiskej tlen techiluis. Noijki ijkon matikkakikan Jehová ijkuak tikiluiaj matechpaleui. Matikinmitakan tlen tlanauatilmej techpaleuiskej kuali matikpejpenakan tlen tikchiuaskej uan noijki ken timoyekanaskej ika principios bíblicos (Mat. 6:33; Rom. 13:13; 1 Cor. 15:33).
8. ¿Tlen moneki tikchiuaskej tla tiknekij okachi titlatemoskej? (Noijki xikita foto).
8 Xamo ualeua moneki ikaj matechpaleui matiktemokan tlen tiknekij tikmatiskej. Xamo se tokni tlen kipia chikauak itlaneltokilis uelis techiluis seki tlamantli tlen techpaleuis kuali matikpejpenakan tlen tikchiuaskej. Pero okachi techpaleuis tla toneuian titlatemoskej. Tikpiaj miak tlamantli tlen ika timomachtiskej. Tikpiaj amatlajkuilol Tlen ika momachtiaj iTlaixpantijkauan Jehová uan amochtli Textos bíblicos techpaleuiaj matikchiuakan ken Cristo. Matikilnamiktokan tiknekij makipakti Jehová tlen tiknekij tikpejpenaskej tikchiuaskej.
Matikilnamiktokan tlen mokuayejyekoua Jehová. (Xikita párrafo 8). b
9. ¿Ken tikmatiskej kox kipaktia Jehová tlen tikpejpenaskej tikchiuaskej? (Efesios 5:17).
9 ¿Ken tikmatiskej kox kipaktia Jehová tlen tikpejpenaskej tikchiuaskej? Achto moneki kuali tikixmatiskej Jehová. Proverbios 9:10 kijtoua: “Tla tikixmatij akin Santo, timochiuaj tiixtlamatkej”. Nin kijtosneki tla tiknekij tiyetoskej tiixtlamatkej moneki tikmatiskej ken iyelis Jehová, tlen kichiuas, tlen kipaktia uan tlen kikokolia. Ikinon matimotlajtlanikan: “¿Tlen tikpejpenaskej tikchiuaskej tla yitikmatij tlen kipaktia Jehová?” (xiktlajtolti Efesios 5:17).
10. ¿Tleka okachi tikpatioitaj timoyekanaskej ika principios bíblicos?
10 Tiknekij tikyolpaktiskej Jehová pero ualeua amo kinpaktis tofamilia noso toyolikniuan tlen tikpejpenaskej tikchiuaskej. Matikitakan tleka ijkon tikijtouaj. Matimokuayejyekokan se teta uan isiua kinekij kuali mayeto inmichpoch ikinon kiluiaj mamonamikti iuan se tlakatl tlen kipia tomin maski amo okachi kitekichiuilia Jehová. Tetajmej amo kinekij matlajyoui inmichpoch. Pero ¿ichpochtli akin kipaleuis mamouika iuan Jehová? ¿Kox kipaktis Jehová? Techpaleuis tlen kijtoua Mateo 6:33. Ompa kijtoua ‘okachi matikpatioitakan tiktekichiuiliskej toTajtsin Dios’. Tejuan tikintlakaitaj topapanuan uan noijki akinmej chantij itech toaltepe. Pero okachi tikpatioitaj tikyolpaktiskej Jehová.
KUALI MATIMOKUAYEJYEKOKAN TLEN TIKCHIUASKEJ
11. Ijkon ken kijtoua Filipenses 1:9, 10, ¿tlen techpaleuis kuali matikpejpenakan tlen tikchiuaskej?
11 Tla yotikintemojkej seki principios bíblicos tlen ika timoyekanaskej, kuali matimokuayejyekokan tlen tikpejpenaskej tikchiuaskej (xiktlajtolti Filipenses 1:9, 10). ¿Ken uelis ijkon tikchiuaskej? Matimokuayejyekokan tlen panos tla tikchiuaskej tlen yotikpejpenkej. Ualeua amo oui tikpejpenaj tlen tiknekij pero ualeua xamo oui ijkon tikchiuaskej. Tla kuali timokuayejyekoskej techpaleuis kuali matikpejpenakan tlen tikchiuaskej maski ualeua oui.
12, 13. ¿Ken techpaleuis tla kuali timokuayejyekouaj kanin titekipanoskej?
12 Matikijtokan se tokni okitemoto kanin tekipanos para kimakas ifamilia tlen moneki. Ome personas okiluijkej kimakaskej tekitl. Tokni kita tlen tekitl kichiuas, tlen hora kalakis uan tlen hora kisas, kita kox uejka mokaua uan okseki tlamantli. Tekitl tlen okiluijkej kimakaskej amo kixnamiki Biblia. Xamo kipejpenas se tekitl tlen okachi kipaktia noso tlen okachi kitlaxtlauiskej. Pero moneki mokuayejyekos okseki tlamantli tla kineki kuali kipejpenas kanin tekipanos.
13 Moneki motlajtlanis: “¿Ok nimajxilis nimonechikos tla nikselis nin tekitl? ¿Ok nimajxilis nikinyolchikauas nofamilia uan nikinpaleuis kuali mamouikakan iuan Jehová?”. Miak ipati ijkon matimotlajtlanikan porque non techpaleuis okachi matikpatioitakan tiktekichiuiliskej Jehová uan matikmaluikan tofamilia. Ijkon tikpejpenaskej tikchiuaskej tlen okachi kuali uan Jehová techteochiuas.
14. ¿Ken techpaleuis tla tiixtlamatkej uan tla titetlasojtlaj?
14 Tla tiixtlamatkej techpaleuis kuali matimokuayejyekokan ken kitaskej oksekimej tlen tikpejpenaskej tikchiuaskej uan ijkon ‘amo tikinmikxitlanuiskej’ (Filip. 1:10). Miak ipati ijkon matikchiuakan ijkuak tikpejpenaj ken timotlakentiskej uan ken timoyektlaliskej. Xamo tejuan techpaktia ken timotlakentiaj. Pero xamo tokniuan uan oksekimej amo kuali kitaj. Tla tiixtlamatkej techpaleuis kuali matimokuayejyekokan ken timotlakentiskej uan amo titeyolkokoskej. Tla titetlasojtlaj tikchiuaskej tlen kinpaleuis oksekimej uan amo timoueyinekiskej (1 Cor. 10:23, 24, 32; 1 Tim. 2:9, 10). Ijkon tikteititiskej titetlasojtlaj uan titetlakaitaj.
15. ¿Tlen moneki timokuayejyekoskej ijkuak tikpejpenaskej itlaj tikchiuaskej?
15 Kuali matimokuayejyekokan tlen tikchiuaskej tla moneki tikpejpenaskej itlaj miak ipati. Jesús otechmachti achto matikitakan tlen techpoloua (Luc. 14:28). Ikinon matimokuayejyekokan kox uejkauas tlen tikchiuaskej, kox monekis miak tomin uan kox moneki timochijchikauaskej para tikchiuaskej tlen yotikijtojkej. Ualeua monekis tikinmiluiskej tofamiliares matechpaleuikan matikchiuakan tlen yotikpejpenkej. ¿Tleka miak ipati ijkon matikchiuakan? Porque xamo techpaleuiskej matikitakan moneki tikpatlaskej seki tlamantli noso uelis tikpejpenaskej okse tlamantli tlen okachi techpaleuis. Noijki matikintlajtlanikan tofamiliares tlen mokuayejyekouaj uan matikkakikan tlen techiluiskej. Ijkon okachi techpaleuiskej matikchiuakan tlen otikpejpenkej tikchiuaskej (Prov. 15:22).
MATIKPEJPENAKAN TLEN OKACHI KUALI
16. ¿Tlen moneki tikchiuaskej tla tiknekij kuali tikpejpenaskej tlen tikchiuaskej? (Noijki xikita recuadro “ ¿Tlen techpaleuis kuali matikpejpenakan tlen tikchiuaskej?”).
16 Tla tikchiuaskej tlen yotimomachtijkej, kuali tikpejpenaskej tlen tikchiuaskej. Yitikmatij nochi tlen moneki uan yotikintemojkej seki principios bíblicos tlen techpaleuiskej matikchiuakan tlen kipaktia Jehová. Ikinon matikiluikan Jehová makiteochiua tlen otikpejpenkej tikchiuaskej.
17. ¿Tlen techpaleuis kuali matikpejpenakan tlen tikchiuaskej?
17 Xamo yimiak uelta kuali okiski tlen otikpejpenkej tikchiuaskej. Pero matikilnamiktokan san Jehová techpaleuia kuali matikpejpenakan tlen tikchiuaj uan amo porque kuali timokuayejyekouaj noso porque tiixtlamatkej. San Jehová techpaleuia matikmatikan tlen moneki, matiyetokan tiixtlamatkej uan matikajsikamatikan tlen okachi miak ipati (Prov. 2:1-5). Jehová techpaleuis matikpejpenakan tlen ye kipaktia (Sal. 23:2, 3).
TLAKUIKALI 28 ¿Ken nimouikas iuan Jehová?
