1. ¿Tlen okachi kintekipachoua oksekimej?

 AXKAN miakej san kintekipachoua tlen yejuan kinpanoua. Matikitakan tleka ijkon tikijtouaj. Miakej kitlaliaj miak tlamantli itech redes sociales para oksekimej makitakan tlen kichiuaj. Pero amo miakej kiueyichiuaj toTajtsin Dios. Ikinon axkan timomachtiskej tlen kijtosneki tikueyichiuaskej toTajtsin Dios uan tleka moneki ijkon tikchiuaskej. Noijki timomachtiskej ken uelis tikueyichiuaskej Jehová ijkon ken kinamiki uan noijki ayakmo miak poliui ye kiueyichiuas itoka.

¿TLEN KIJTOSNEKI TIKUEYICHIUASKEJ JEHOVÁ?

2. ¿Ken okiteititi Jehová sapanoua ueyititok ompa itech tepetl Sinaí? (Xikita dibujo).

² Biblia kijtoua tlajtoli “tikueyichiuaj” kijtosneki ijkon tikchiuaj porque akin tikueyichiuaj kichiua miak tlamantli tetlajtlachialti. Jehová okiteititi sapanoua ueyititok ijkuak okinmakixti israelitas ompa Egipto. Matimokuayejyekokan tlen opanok. Sapanoua miakej israelitas omonechikojkej ikxitlan tepetl Sinaí. Ompa omonechikojkej porque kikakiskiaj tlen kinmiluiskia toTajtsin Dios. Pero ijkuakon omixtlatlayouak ipan tepetl Sinaí, otlalolinki, tepetl opejki popoka, opejki tlatijtikuini, otlatlajtlatsinki uan chikauak omokak ijkuak okipitskej ikuako toro (Éx. 19:​16-18; 24:17; Sal. 68:8). Israelitas sapanoua omotlajtlachialtijkej ijkuak okitakej Jehová sapanoua ueyititok.

3. ¿Ken uelis tikueyichiuaskej Jehová?

³ ¿Uelis tikueyichiuaskej Jehová? Kema. Tikueyichiuaj  Jehová ijkuak tikintlapouiaj oksekimej ye kipia chikaualistli uan kualtsin iyelis. Noijki tikueyichiuaj ijkuak tikijtouaj ye techpaleuia ijkuak itlaj kuali tikchiuaj (Is. 26:12). Tekiua David ijkon okichi. Ye omotlatlaujti inmixpan israelitas uan okijto: “Jehová san te tiueyititok, tikpia chikaualistli, tikpia nochi tlen kuajkualtsin, tipetlantok uan san nochi te mitsnamiki porque nochi moaxka tlen onka iluikak uan tlaltikpak”. Ijkuak otlanki omotlatlaujti, “okiueyichijkej Jehová” tlen ompa omonechikojkej (1 Crón. 29:​11, 20).

4. ¿Ken okiueyichi Jesús iTajtsin?

⁴ Jesús nochipa okiueyichi iTajtsin ijkuak okatka nikan tlaltikpak. Nochipa okijtouaya iTajtsin okipaleuiaya ijkuak okinchiuaya milagros (Mar. 5:​18-20). Tlen okijtouaya okiteititiaya okiueyichiuaya Jehová uan noijki okiteititiaya okintlasojtlaya oksekimej. Se tonal Jesús otlamachtijtoka ompa sinagoga uan ompa okatka se siuatl tlen yokipiaya 18 xiuitl okipiaya se ejekatl. Ikinon “siuatl okuitlapantoloniuik uan amo ueli omomelauaya”. Sapanoua otlajyouiaya non siuatl. Jesús okiknomatki porque sapanoua otlajyouiaya. Ikinon okilui: “Siuatsintli, xipajti”. Satepan okintlali imauan ipan siuatl uan san niman omomela. Non siuatl “opejki kiueyichiua toTajtsin Dios” (Luc. 13:​10-13). Siuatl opajtik ikinon opejki kiueyichiua Jehová. Non siuatl techmachtia tejuan noijki uelis ijkon tikchiuaskej.

¿TLEKA TIKUEYICHIUAJ JEHOVÁ?

5. ¿Tleka moneki tiktlakaitaskej toTajtsin Dios?

⁵ Tikueyichiuaj Jehová porque tiktlakaitaj. Onka miak tlamantli tlen kiteititia moneki tiktlakaitaskej toTajtsin Dios. Ye kipia miak chikaualistli uan amo keman tlami (Sal. 96:​4-7). Nochi tlen yokichijchi kiteititia sapanoua ixtlamatki. Ye techmaka yolilistli uan nochi tlen moneki para matiyoltokan (Apoc. 4:11). Ye amo keman tekaua (Apoc. 15:4). Nochi kuali kisa tlen ye kichiua uan kichiua tlen kijtoua (Jos. 23:14). Ikinon profeta Jeremías okilui: “Amo onka okse ken te maski katej ixtlamatkej itech altepemej uan itech tekiuajkayomej” (Jer. 10:​6, 7). Nochi non kiteititia moneki tiktlakaitaskej toTajtsin Dios. Pero noijki moneki tiktlasojtlaskej.

6. ¿Tleka tiktlasojtlaj Jehová?

⁶ Tikueyichiuaj Jehová porque tiktlasojtlaj ika nochi toyolo. Jehová teiknomati porque kipia kualtsin iyelis ikinon tiktlasojtlaj (Sal. 103:13; Is. 49:15). Techiknomati ijkuak titlajyouiaj uan kiyolkokoua tlen techpanoua (Zac. 2:8). Ye techpaleuia inauak matimotokikan uan iuan matimouikakan (Sal. 25:14; Hech. 17:27). Noijki yolyamanki porque “ye tlachia tlakxitlan para kitas iluikak uan tlaltikpak, keualtia akin yolyamanki” (Sal. 113:​6, 7). Tiyolpakij tikueyichiuaskej toTajtsin Dios porque kualtsin iyelis (Sal. 86:12).

7. ¿Tlen tekitl miak ipati tikchiuaj?

⁷ Tikueyichiuaj Jehová porque tiknekij oksekimej makixmatikan. Miakej amo kixmatij toTajtsin Dios uan kineltokaj tlen amo melauak. Ijkon kichiuaj porque Satanás kinkajkayaua uan “amo kinkauilia matlachiakan” para makixmatikan toTajtsin Dios (2 Cor. 4:4). Satanás kinkajkayaua uan kineki makineltokakan  toTajtsin Dios momakopa, amo tetlasojtla uan ye itlajtlakol nochi tlen panoua ipan tlaltikpak. Pero tejuan tikmatij tlen melauak tlamachtia Biblia uan tiknekij tikinpaleuiskej oksekimej makixmatikan toTajtsin Dios uan makiueyichiuakan (Is. 43:10). Axkan tikinmitaskej seki versículos tlen moajsij itech Salmo 96 kanin kijtoua matikueyichiuakan Jehová. Non techpaleuis matikitakan ken tikueyichiuaskej Jehová ijkon ken kinamiki.

¿KEN UELIS TIKUEYICHIUASKEJ JEHOVÁ IJKON KEN KINAMIKI?

8. ¿Ken uelis tikueyichiuaskej toTajtsin Dios? (Salmo 96:​1-3).

⁸ (Xiktlajtolti Salmo 96:​1-3). Tlen tikijtouaj uelis kiueyichiuas Jehová. Ninmej versículos techyoleuaj matiktlakuikilikan Jehová, matikteochiuakan itoka, matiktematiltikan kuali tlajtoli tlen temakixtia uan nochtin matikinmatiltikan toTajtsin Dios sapanoua ueyititok. Tikueyichiuaj Jehová ijkuak tikchiuaj nochi non tlamantli. Nochtin akinmej okitekichiuilijkej toTajtsin Dios omochijchikajkej okiueyichijkej itoka uan okinmiluijkej oksekimej ken okinmakixti (Dan. 3:​16-18; Hech. 4:29). ¿Ken uelis tikchiuaskej ijkon ken yejuan okichijkej?

9, 10. ¿Tlen techmachtia tlen okichi Angelina? (Noijki xikita foto).

⁹ Matikitakan tlen okichi se tokni itoka Angelina a uan chanti Estados Unidos. Ye omoyolchika uan okiueyichi itoka toTajtsin Dios kanin tekipanoua. Ijkuak yikin opejki tekipanoua, okinyolejkej nochtin mamonechikokan uan ijkon moixmatiskiaj. Angelina okinmititi seki fotos uan ijkon makitakan ye paki yetos iTlaixpantijka Jehová. Pero se tlakatl tlen iuan otekipanouaya opejki kijtoua ye okiskaltijkej ken iTlaixpantijka Jehová uan opejki kipinauia tlen tikneltokaj. Angelina okijto: “Opejki nimomojtia. Pero onimotlajtlani: ‘¿Niktekauilis makijtokan tlen amo melauak noso nikueyichiuas toTajtsin Dios?’”.

¹⁰ Ijkuak otlanki okijto tlen okinekiaya non tlakatl, Angelina san ichtaka omotlatlaujti. Satepan okiyektlapoui uan okilui:  “Ne noijki ijkon onechiskaltijkej uan axkan niiTlaixpantijka Jehová”. Amo kuali tlen opanotoka pero ye omoyolseui. Okinmititi seki fotos akinmej inuan otekipanouaya uan ompa omotaya ken kitekichiuilia Jehová inuan iyolikniuan. Noijki satepan okinyekilui tlen kineltoka (1 Ped. 3:15). Ijkuak otlanki okintlapoui, tlakatl omoyolseui uan okijto noijki okipanok miak tlamantli kualtsin ijkuak okiskaltijkej ken iTlaixpantijka Jehová. Angelina okijto: “ToTajtsin Dios kinamiki manikueyichiua itoka uan nipaki ijkon nikchiuas”. Tejuan noijki tikpatioitaj tikueyichiuaskej Jehová ijkuak oksekimej amo kitlakaitaj.

11. ¿Ken kichijtiuitsej tokniuan tlen moijtoua itech Salmo 96:8?

¹¹ (Xiktlajtolti Salmo 96:8). Tikueyichiuaj Jehová ijkuak tiktemakaj ika nochi toyolo tlen tikpiaj. Tejuan akinmej tiktekichiuiliaj toTajtsin Dios tiktemakaj tlen tikpiaj (Prov. 3:9). Matikitakan tleka ijkon tikijtouaj. Israelitas okitemakakej tomin tlen ika okichijchijkej templo uan noijki okitemakayaj tomin para makiyektlalikan (2 Rey. 12:​4, 5; 1 Crón. 29:​3-9). Sekimej idiscípulos Cristo “okipaleuiayaj Jesús uan iapóstoles ika tlen okipiayaj” (Luc. 8:​1-3). Achto siglo noijki tokniuan okititlankej seki tlamantli para kinpaleuiskiaj tokniuan (Hech. 11:​27-29). Tejuan noijki uelis tiktemakaskej totomin ika nochi toyolo para tikueyichiuaskej toTajtsin Dios.

12. ¿Ken tikueyichiuaj Jehová ijkuak tiktemakaj tlen tikpiaj ika nochi toyolo? (Noijki xikita foto).

¹² Matikitakan se tlamantli tlen kiteititia tikueyichiuaj Jehová ijkuak tiktemakaj tlen tikpiaj ika nochi toyolo. 2020 ompa Zimbabue sapanoua otlauaki uan miakej apismikiskiaj. Matikitakan tlen okipanok se tokni itoka Prisca. Ye nochipa otetlapouiaya miércoles uan viernes. Noijki otetlapouito ijkuak omonekiaya tlaxouati. Akinmej ik ompa ochantiayaj okipinauiayaj porque amo okitekipanouaya itlala. Okiluiayaj apismikiskia. Pero ye okinmiluiaya: “Jehová amo keman kinkaua akinmej kitekichiuiliaj”. Satepan ika tomin tlen tiktemakaj ika nochi toyolo okititlanilijkej Prisca tlakuali uan okseki tlamantli tlen okipolouaya. Sekimej tlen ik ompa ochantiayaj omotlajtlachialtijkej  uan okiluijkej: “ToTajtsin Dios amo keman mitskaua. Tiknekij okachi tikixmatiskej”. Ijkuakon chikome personas opejki monechikouaj.

13. ¿Tlen moneki tikchiuaskej tla tiknekij tikueyichiuaskej toTajtsin Dios ijkon ken kijtoua Salmo 96:9?

¹³ (Xiktlajtolti Salmo 96:9). Matikpiakan chipauak tonemilis uan ijkon tikueyichiuaskej Jehová. Teopixkej tlen otlapaleuiayaj itech itemplo Jehová omonekiaya momajtekiskej uan mokxipajpakaskej (Éx. 40:​30-32). Tejuan noijki moneki tiyetoskej tichipauakej uan matikixtopeuakan tlen toTajtsin Dios kikokolia (Sal. 24:​3, 4; 1 Ped. 1:​15, 16). Ikinon moneki ‘tikkauaskej tonemilis tlen achto otikpiayaj’ uan ‘matikpiakan yankuik tonemilis’. Nin kijtosneki amo matikchiuakan tlen amo kuali uan tlen sokio. Matimokuayejyekokan ijkon ken Jehová mokuayejyekoua uan matikpiakan toyelis ijkon ken ye kipia iyelis (Col. 3:​9, 10). ToTajtsin Dios uelis kinpaleuis makipatlakan inyelis akinmej okichijkej tlen amo kuali uan uelis kipiaskej yankuik innemilis.

14. ¿Tlen techmachtia tlen okipanok Jack? (Noijki xikita foto).

¹⁴ Matikitakan tlen okipanok se tlakatl tlen omotokayotiaya Jack pero okiluiayaj Demonio porque oteuitekiaya uan okichiuaya miak tlamantli amo kuali. Ikinon okitsakej uan otlanauatijkej makimiktikan. Ijkuak ayamo okimiktiayaj, se tokni tlen ompa oyaya tetlapouiti opejki kimachtia ompa kanin otsaktoka. Jack okipatlak inemilis uan satepan omoapolakti. Ijkuak oajsik tonal yikimiktiskiaj, sekimej tlen ompa otlamaluiayaj okichokilijkej porque ye yokipatlaka inemilis. Se soldado tlen otlayekanaya okijto: “Jack ye akin okachi okichiuaya tlen amo kuali pero axkan ye okachi kualtsin iyelis”. Ijkuak opanok chikome tonal okimiktijkej, sekimej tokniuan okipanoltitoj nechikol ompa kanin otsaktoka Jack. Ijkuakon okitakej oajsito se tlakatl tlen amo keman omonechikouaya. Tlakatl ompa oyajki porque okitak Jack okipatlak inemilis uan okinekiaya kimatis tlen omonekiaya kichiuas para kiueyichiuas Jehová. Tlen okipanok Jack techmachtia uelis  tikueyichiuaskej toTajtsin Dios tla timochijchikauaj tikpiaskej chipauak tonemilis (1 Ped. 2:12).

¿KEN KIUEYICHIUAS TOTAJTSIN DIOS ITOKA?

15. ¿Tlen kichiuas Jehová para kiueyichiuas itoka? (Salmo 96:​10-13).

¹⁵ (Xiktlajtolti Salmo 96:​10-13). Kanin tlami Salmo 96 kijtoua Jehová ye se tekiua tlen kuali teixkomaka. Ayakmo miak poliui toTajtsin Dios kiueyichiuas itoka. Ijkon kichiuas ijkuak teixkomakas. Ayakmo miak poliui uan kipojpolos “Ueyi Babilonia” porque okisokioti itoka tlen chipauak (Apoc. 17:​5, 16; 19:​1, 2). Xamo ijkuak kinpojpoloskej religiones tlen san tlakajkayauaj miakej kinekiskej touan kiueyichiuaskej toTajtsin Dios. Satepan uits Armagedón uan Jehová kipojpolos nochi tlen Satanás kiyekana. Kinmixpolos akinmej kikokoliaj uan kisokiotiaj itoka. Pero kinmakixtis akinmej kitlasojtlaj, kitlakamatij uan pakij kiueyichiuaj (Mar. 8:38; 2 Tes. 1:​6-10). Ijkuak tlamis tlanauatis Cristo mil xiuitl, nochtin kinyejyekoskej uan toTajtsin Dios kichipauas itoka (Apoc. 20:​7-10). Ijkuakon “itech tlaltikpak nochtin kimatiskej Jehová ueyititok ijkon ken onka miak atl itech ueyi atl” (Hab. 2:14).

16. ¿Tlen moneki tikchiuaskej? (Noijki xikita dibujo).

¹⁶ Tipakiskej miak ijkuak nochtin kiueyichiuaskej itoka toTajtsin Dios ijkon ken kinamiki. Ikinon axkan ok matimochijchikauakan matikueyichiuakan. Tokniuan tlen pouij itech Cuerpo Gobernante kipatioitaj ijkon matikchiuakan. Ikinon okipejpenkej Salmo 96:8 mayeto texto para nin xiuitl 2025: “Xikueyichiuakan itoka Jehová ken kinamiki”.