1. ¿Ken techpaleuia tikilnamikiskej imikilis Jesús sejse xiuitl?

 JEHOVÁ otechtliokoli itlaj miak ipati ijkuak topatka okitemakak iKone (2 Cor. 9:15). Tiktlasojkamatiliaj Jesús topatka omotemakak porque techpaleuia matimouikakan iuan Jehová uan noijki uelis nochipa tiyoltoskej. Jehová topatka okitemakak iKone ikinon tiktlasojkamatiliaj porque sapanoua techtlasojtla (Rom. 5:8). Jesús kineki matimotlasojkamatikan uan matikpatioitakan topatka omotemakak ikinon otlanauati sejse xiuitl matikilnamikikan imikilis (Luc. 22:​19, 20).

2. ¿Tlen timomachtiskej?

² Nin xiuitl tikilnamikiskej imikilis Jesús sábado 12 de abril 2025. Tinochtin tiknekij tikilnamikiskej non tonal miak ipati. Matimokuayejyekokan nochi tlen okichi Jehová uan iKone ijkuak tikilnamikiskej imikilis Jesús. Axkan tikitaskej tlen techmachtia Jehová ijkuak okitemakak iKone. Noijki tikitaskej tlen techmachtia Jesús ijkuak topatka omotemakak. Itech okse tlamachtil tikitaskej ken techpaleuia imikilis Jesús uan ken uelis tiktlasojkamatiliskej nochi tlen okichi.

¿TLEN TECHMACHTIA JEHOVÁ IJKUAK OKITEMAKAK IKONE?

3. ¿Ken uelis kinmakixtiskia se tlakatl miakej personas? (Xikinmita dibujos).

³ Jehová kipatioita kichiuas tlen kuali ikinon topatka okitemakak iKone (Deut. 32:4). ¿Tleka ijkon tikijtouaj?  Adán amo okitlakamatki toTajtsin Dios ikinon tinochtin otechkajteuili tlajtlakoli uan mikilistli (Rom. 5:12). Jehová okiualtitlanki iKone matechmakixtiki imak tlajtlakoli uan mikilistli. Pero ¿ken uelis kinmakixtis se tlakatl miakej personas? Apóstol Pablo okiyekijto: “Miakej omochijkej tlajtlakolejkej porque se tlakatl [noso Adán] amo otetlakamatki, pero miakej mochiuaskej yolkualmej porque se tlakatl [noso Jesús] otetlakamatki” (Rom. 5:19; 1 Tim. 2:6). Nin kiteititia tinochtin tikatej imak tlajtlakoli uan mikilistli porque se tlakatl amo okitlakamatki toTajtsin Dios. Ikinon omonekiaya matechmakixti se tlakatl tlen kitlakamati Jehová.

4. ¿Tleka Jehová amo uelis kinkauiliskia ixuiuan Adán tlen tetlakamatiskiaj nochipa mayoltokan?

⁴ ¿Melauak omonekiaya ixpoliuis Jesús para techmakixtis? ¿Amo uelis kinkauiliskia Jehová ixuiuan Adán tlen tetlakamatiskiaj nochipa mayoltokan? Tejuan titlajtlakolejkej ikinon xamo tikijtoskiaj kuali yetoskia tla ijkon kichiuaskia toTajtsin Dios pero ye nochi kuali tlen kichiua. Ikinon kuali okimatiaya Adán otlajtlakolchi uan amo uelis kitaskia ken amitlaj opanok.

5. ¿Ken tikmatij Jehová nochipa kichiuas tlen kuali?

⁵ Tla Jehová amo topatka kitemakaskia iKone uan kinkauiliskia ixuiuan Adán nochipa mayoltokan, kiteititiskia amo kintlakamati itlanauatiluan tlen kijtouaj tlen kuali uan tlen amo kuali. Non miakej kintekipachoskia porque mokuayejyekoskiaj satepan ye amo kintlakamatiskia itlanauatiluan uan amo kichiuaskiaj tlen yokijtoka. Amo matimotekipachokan porque Jehová okichi tlen kuali maski okitemakak iKone tlen sapanoua okitlasojtlaya. Ikinon tikmatij Jehová nochipa kichiuas tlen kuali.

6. ¿Ken techpaleuia matikitakan Jehová sapanoua otechtlasojtlak ijkuak okitemakak iKone? (1 Juan 4:​9, 10).

⁶ Jehová okiteititi yolkuali ijkuak okitemakak iKone pero okachi okiteititi techtlasojtla ijkuak ijkon okichi (Juan 3:16; xiktlajtolti 1 Juan 4:​9, 10). Jehová okiualtitlanki iKone topatka maixpoliui porque kineki nochipa matiyoltokan uan matipouikan iuan ifamilia. Adán ayakmo opouik iuan ifamilia Jehová ijkuak otlajtlakolchi. Ikinon tinochtin amo tipouij iuan ifamilia toTajtsin Dios. Pero ye okitemakak iKone uan non techpaleuis satepan matipouikan iuan ifamilia tla tikneltokaj uan  tiktlakamatij. Axkan Jehová techtlapojpoluia ikinon uelis iuan timouikaskej uan noijki inuan tokniuan. Nin kiteititia Jehová sapanoua techtlasojtla (Rom. 5:​10, 11).

7. ¿Ken okiteititi Jehová sapanoua techtlasojtla maski sapanoua otlajyoui iKone?

⁷ Tikajsikamatiskej Jehová techtlasojtla tla timokuayejyekouaj sapanoua miak ipati tlen okichi ijkuak topatka okitemakak iKone. Satanás kijtoua tikkauaskej toTajtsin Dios ijkuak titlajyouiskej. Ikinon okitekauili makitlajyouiltikan iKone uan ijkon omotak amo melauak tlen kijtoua Satanás (Job 2:​1-5; 1 Ped. 2:21). Jehová okiualitoka desde iluikak ijkuak iKone okipinauijkej, ijkuak soldados okiuitekej uan ijkuak okipilojkej itech kouitl. Noijki okitak ijkuak oixpoliuik iKone (Mat. 27:​28-31, 39). Jehová uelis itlaj kichiuaskia para amo ijkon makipano iKone. Uelis itlaj kichiuaskia ijkuak okiluijkej: “Ye kineltoka toTajtsin Dios ikinon ye makimakixti tla kineki kipaleuis” (Mat. 27:​42, 43). Pero tla kipaleuiskia iKone amo topatka motemakaskia uan amo tikchiaskiaj itlaj kuali satepan. Ikinon Jehová okitekauili makimiktikan iKone.

8. ¿Ken tikmatij Jehová omoyolkoko ijkuak otlajyoui iKone? (Noijki xikita dibujo).

⁸ Jehová amitlaj okichi ijkuak okitlajyouiltijkej iKone pero non amo kijtosneki amo okiyolkoko tlen okipanotoka. Jehová otechchijchi matiyolpakikan uan matikmachilikan okseki tlatlamantli. Ye otechchijchi ijkon ken ye ikinon tikijtouaj okiyolkoko ijkuak okitlajyouiltijkej iKone. Biblia kijtoua sekimej miak uelta okiyolkokojkej Jehová (Sal. 78:​40, 41). Matikitakan tlen okipanok Abrahán uan Isaac. Jehová okinauati Abrahán makitemaka ikone ken se tetliokolil (Gén. 22:​9-12; Heb. 11:​17-19). Matimokuayejyekokan ken omomachili Abrahán ijkuak yikimiktiskia ikone. Pero ¿ken omomachili Jehová ijkuak okitak okitlajyouiltijtoka iKone hasta ijkuak oixpoliuik? Amo uelis timokuayejyekoskej ken sapanoua omoyolkoko uan otlajyoui. (Xikita itech jw.org video tlen itoka Ejemplos de fe: Abrahán [parte 2]).

9. ¿Tlen techmachtia Romanos 8:​32, 38, 39?

⁹ Jehová okiteititi sapanoua otechtlasojtlak ijkuak topatka okitemakak iKone. Tlen okichi toTajtsin Dios amo uelis kichiuas se toyolikni nion se tofamiliar (xiktlajtolti Romanos 8:​32, 38, 39). Tejuan timotlasojtlaj pero Jehová okachi techtlasojtla. Matikitakan tleka ijkon tikijtouaj. Tejuan tiknekij nochipa tiyoltoskej. Pero Jehová okachi  kineki nochipa matiyoltokan. Noijki tiknekij matechtlapojpolui pero Jehová okachi kineki techtlapojpoluis. Ye san kineki matiktlasojkamatilikan topatka okitemakak iKone, matikneltokakan uan matiktlakamatikan. Nin techititia Jehová sapanoua techtlasojtla ijkuak topatka okitemakak iKone. Ijkuak tiyetoskej itech xochitlali okachi tikmatiskej nochi tlen okichi Jehová (Ecl. 3:11).

¿TLEN TECHMACHTIA JESÚS IJKUAK TOPATKA OMOTEMAKAK?

10. (1) ¿Tlen okitekipachouaya Jesús? (2) ¿Ken okiteititi Jesús amo melauak tlen okijto Satanás? (Noijki xikita recuadro “ Jesús okiteititi Satanás san tlakajkayaua”).

¹⁰ Jesús kitekipachoua ken kitaj oksekimej iTajtsin (Juan 14:31). Ye kimiktiskiaj ken se temikti uan kiteluiskiaj okixnamik iTajtsin. Ikinon okitekipachouaya ken kitaskiaj oksekimej Jehová. Ye okilui: “NoTajtsin, tla uelis techkixtili nin copa” (Mat. 26:39). Jesús amo okika iTajtsin maski oixpoliuik. Ijkon okiteititi amo melauak tlen okijto Satanás.

11. ¿Ken okiteititi Jesús otetlasojtlaya? (Juan 13:1).

¹¹ Jesús okiteititi kitekipachoua tlen techpanoua ijkuak topatka omotemakak pero okachi okitekipacho tlen okinpanouaya idiscípulos (Prov. 8:31; xiktlajtolti Juan 13:1). Jesús okimatiaya sapanoua tlajyouiskia ijkuak yetoskia nikan tlaltikpak. Ye sapanoua tlajyouiskia ijkuak kimiktiskiaj. Jesús otetlapoui ika nochi iyolo uan amo ijkon okichi porque omonekiaya ijkon kichiuas. Ye otetlapouiaya ika nochi iyolo, otlamachtiaya uan okinpaleuiaya oksekimej. Noijki okinmikxipajpajki iapóstoles ijkuak yikimiktiskiaj. Okinyolchika uan  okinmachti okseki tlamantli (Juan 13:​12-15). Ijkuak Jesús okipilojkej itech kouitl, okiyolchika ichteki tlen inakastlan okipilojkej uan okilui Juan makimaluili imama (Luc. 23:​42, 43; Juan 19:​26, 27). Jesús okiteititi sapanoua okintlasojtlaya akinmej okinmachtiaya uan inpatka omotemakak.

12. ¿Tlen okseki tlamantli topatka kichijtok Jesús?

¹² Cristo “san se uelta oixpoliuik” pero ok kichixtok okseki tlamantli (Rom. 6:10). ¿Tlen kichixtok? Ye sapanoua tekipanojtok para techmakas miak tlamantli tlen techpaleuia porque topatka omotemakak. Matimokuayejyekokan tlen tekitl kichixtok ken tekiua, tlen tekitl kipia axkan ken Ueyi teopixki uan ken “kiyekana tlanechikol” (1 Cor. 15:25; Efes. 5:23; Heb. 2:17). Ye kinnechikojtok tlapejpenalmej uan akinmej chantiskej nikan tlaltikpak. Nin tekitl kitlamis ijkuak ayamo tlami ueyi tlajyouilistli (Mat. 25:32; Mar. 13:27). a Axkan noijki kiyektlalia miak tlamachtil para matikpiakan chikauak totlaneltokilis (Mat. 24:45). Ye ok techpaleuijtos ijkuak tlanauatis mil xiuitl. Jesús amo san topatka omotemakak. ToTajtsin Dios okitemakak iKone para makichiua okseki tlamantli tlen techpaleuis.

NOCHIPA MATIMOMACHTIKAN

13. ¿Tlen techpaleuis matikitakan Jehová uan Jesús sapanoua techtlasojtla?

¹³ Tla timokuayejyekoskej non techpaleuis okachi tikitaskej sapanoua techtlasojtlaj Jehová uan Jesucristo. Uelis tiktlajtoltiskej se noso ome Evangelios ijkuak yitikilnamikiskej imikilis. Pero amo matiktlajtoltikan miak capítulos. Okachi kuali matiktemokan tlen techpaleuis okachi matiktlasojtlakan Jehová uan Jesús. Noijki matikinmiluikan oksekimej tlen timomachtiaj.

14. Ijkon ken kijtoua Salmo 119:​97, ¿tlen techpaleuis okachi matimomachtikan tleka Jesús topatka omotemakak? (Noijki xikita foto).

¹⁴ Tla yimiak xiuitl tiktekichiuiliaj toTajtsin Dios, xamo timotlajtlaniaj kox tikajsiskej okseki tlamantli tlen kiteititia Jehová kichiua tlen kuali, techtlasojtla uan topatka okitemakak iKone. Pero tla timomachtiskej nin tlamantli, nochipa tikajsiskej itlaj yankuik. ¿Tlen techpaleuis matimomachtikan? Matimomachtikan amatlajkuilolmej  tlen ialtepe Jehová techmaka. Noijki okachi matitlatemokan ijkuak tikajsij se texto tlen amo tikajsikamatij. Satepan matimokuayejyekokan tlen otikajsikej uan tlen techmachtia itech Jehová, Jesús uan ken sapanoua techtlasojtlaj (xiktlajtolti Salmo 119:97).

15. ¿Tleka moneki tiktemoskej tlen okachi miak ipati kajki itech Biblia?

¹⁵ Amo matimotekipachokan tla amo tikajsij itlaj yankuik ijkuak timomachtiaj noso ijkuak tiktlajtoltiaj Biblia. Ijkuak timomachtiaj Biblia yetoskia ken tiktemouaj oro. Miakej uejkauaj miak tonal noso horas kitemouaj oro. Yejuan amo mosotlauaj kitemouaj oro maski amo ueyitsin kajsij. Pero tlen tikajsij itech Biblia okachi miak ipati uan amo ken oro (Sal. 119:127; Prov. 8:10). Ikinon amo matimosotlauakan uan matiktlajtoltikan Biblia uan matimomachtikan (Sal. 1:2).

16. ¿Ken uelis tikchiuaskej ijkon ken Jehová uan Jesús?

¹⁶ Matimochijchikauakan matikchiuakan tlen timomachtiaj. Jehová amo techikoita ikinon tejuan amikaj matikchikoitakan. Jesús kitlasojtla Jehová uan oksekimej. Noijki okiueyichi itoka toTajtsin Dios maski okitlajyouiltijkej. Tejuan noijki ijkon matikchiuakan maski ualeua oui tikinpaleuiskej tokniuan. Noijki matikinmiluikan oksekimej ken kinpaleuia Jesús topatka omotemakak.

17. ¿Tlen timomachtiskej chikome?

¹⁷ Okachi tiktlasojtlaskej Jehová uan Jesús tla tikajsikamatij tleka topatka omotemakak uan noijki okachi tikpatioitaskej. Tla ijkon tikchiuaskej, Jehová uan Jesús okachi techtlasojtlaskej (Juan 14:21; Sant. 4:8). Ikinon matimomachtikan nochi tlen Jehová techmaka kanin kijtoua tleka Jesús topatka omotemakak. Chikome timomachtiskej ken techpaleuia Jesús topatka omotemakak. Noijki tikitaskej tlen uelis tikchiuaskej para tikteititiskej tiktlasojkamatiliaj Jehová porque sapanoua techtlasojtla.