1. ¿Tleka Jehová okitlali matimonamiktikan?

 JEHOVÁ “paki” uan kineki tinochtin matipakikan (1 Tim. 1:11). Ye techmaka miak tlamantli para matipakikan (Sant. 1:17). Ikinon ye kita ken se tetliokolil ijkuak se tlakatl uan se siuatl monamiktiaj. Yejuan kimoluiaj nochipa motlasojtlaskej, motlakaitaskej uan momaluiskej. Ikinon pakij porque motlasojtlaj miak (Prov. 5:18).

2. ¿Tlen kinpanoua sekimej tlen yomonamiktijkej?

² Teyolkoko miak porque axkan miakej amo kichiuaj tlen okijtojkej ijkuak omonamiktijkej ikinon amo pakij. Akinmej tekipanouaj itech Organización Mundial de la Salud okijtojkej miakej tlakamej kiuitekij insiua, kinmiluiaj tlen teyolkoko noso kintlajyouiltiaj. Sekimej tlakamej kiteititiaj kitlasojtlaj insiua ijkuak teixpan katej pero kitlajyouiltiaj ijkuak amikaj kinmita. Noijki sekimej siuamej tlajyouiaj porque innamik kitaj pornografía.

3. ¿Tleka sekimej tlakamej kitlajyouiltiaj insiua?

³ ¿Tleka sekimej tlakamej kitlajyouiltiaj insiua? Xamo inpapa ijkon okichiuaya ikinon ayakmo kitaj tlajtlakoli ijkon kichiuaskej. Oksekimej tlakamej ijkuak omoskaltijkej okinmititijkej moneki kititiskej siuatl akin tlanauatia. Sekimej amo okinmititijkej mamoyolseuikan uan amo san makualantokan. Sekimej tlakamej kitaj pornografía ikinon ayakmo kinpatioitaj siuamej. Noijki san kajauilmatij ijkuak se tlakatl uan se siuatl san sekan motekaj. Ixtlamatkej kijtouaj okachi ijkon opejki kichiuaj tlakamej ijkuak opejki kokolistli COVID-19. Pero nochi non tlamantli amo kijtosneki uelis kintlajyouiltiskej siuamej.

4. ¿Tlen amo moneki makichiuakan tokniuan uan tleka?

 ⁴ Tlakamej tlen kichiuaj ken Cristo moneki momaluiskej para amo mokuayejyekoskej ijkon ken tlakamej a tlen amo kitekichiuiliaj toTajtsin Dios. ¿Tleka amo ijkon makichiuakan? Porque uelis kichiuaskej tlen amo kuali mokuayejyekouaj. Matikitakan tlen opanok itech tlanechikol tlen okatka Roma itech achto siglo. Ijkuakon akinmej omonechikouayaj okatkaj tlapejpenalmej. Opanok seki xiuitl uan Pablo okintlajkuilili tokniuan tlen opouiayaj itech non tlanechikol. Okinmilui: “Ayakmo xikchiuakan tlen kichiuaj akinmej chantij tlaltikpak” (Rom. 12:​1, 2). Tlen okinmilui okiteititiaya ok okichijtokaj tlen oksekimej okichiuayaj uan noijki ijkon omokuayejyekouayaj. Ikinon Pablo okinmilui ayakmo ijkon mamokuayejyekokan nion ayakmo ijkon makichiuakan. Nin noijki kinpaleuia tlakamej tlen yomonamiktijkej. Pero teyolkoko porque miakej tokniuan mokuayejyekouaj ijkon ken akinmej amo kitekichiuiliaj toTajtsin Dios uan kitlajyouiltiaj insiua. b ¿Ken kineki Jehová makitakan tlakamej insiua? Kinnankilia texto tlen ika peua tlamachtil.

5. ¿Ken kineki Jehová makitakan tlakamej insiua ijkon ken kijtoua 1 Pedro 3:7?

⁵ (Xiktlajtolti 1 Pedro 3:7). Jehová kinnauatia tokniuan makitlakaitakan insiua. Se tlakatl kitlakaita isiua ijkuak kitlasojtla. Axkan timomachtiskej seki tlamantli tlen kinpaleuis tokniuan makitlakaitakan insiua. Pero achto matikitakan seki tlamantli tlen amo moneki kichiuaskej tlakamej tlen yomonamiktijkej.

AMO XIKYOLKOKOKAN NAMOSIUA

6. ¿Kipaktia Jehová tlakamej makiuitekikan insiua? (Colosenses 3:19).

⁶ Amo xikuitekikan namosiua. Jehová amo kipaktia matiteuitekikan (Sal. 11:5). Amo kipaktia tlakamej makiuitekikan insiua (Mal. 2:16; xiktlajtolti Colosenses 3:19). 1 Pedro 3:7 tlen ika peua nin tlamachtil kijtoua tlakatl tlen kitlajyouiltia isiua ayakmo kuali mouikas iuan isiua. Xamo Jehová ayakmo kikakis ijkuak kitlatlaujtis.

7. Ijkon ken kijtoua Efesios 4:​31, 32, ¿ken moneki kinotsaskej tlakamej insiua? (Noijki xikita “Tlen okachi ipati”).

⁷ Amo xiktsatsajtsilikan namosiua nion xikuijuikaltikan. Sekimej tlakamej kitlauelnotsaj insiua uan kiluiaj tlen teyolkoko. Jehová amo kipaktia matikualanikan, matikualankamikikan, matitsatsajtsikan nion matiteyolkokokan (xiktlajtolti Efesios 4:​31, 32). c Jehová nochi kita uan nochi kikaki ikinon kitekipachoua ken kinotsaj tlakamej insiua uan noijki ijkuak katej san inselti. Se tlakatl ayakmo kuali mouikas iuan toTajtsin Dios tla kitlauelnotsa isiua (Sant. 1:26).

8. ¿Ken kita Jehová pornografía uan tleka?

⁸ Amo xikitakan pornografía. Jehová kikokolia pornografía. Tlakatl tlen kita tlen pitsotik kiteititia ayakmo kitlakaita isiua d uan ayakmo kuali mouika iuan Jehová. ToTajtsin Dios kineki tlakatl mayeto san iuan isiua. Tla ijkon kichiuas, amo kikajkayauas iuan okse siuatl nion mokuayejyekos ijkon kichiuas.  Jesús okijto tla se tlakatl “kiuelita se siuatl uan kineki iuan motekas, kijtosneki iyolipan yotlajtlakolchi” (Mat. 5:​28, 29). e

9. ¿Tleka Jehová kikokolia ijkuak se tokni kiluia isiua makichiua seki tlamantli tlen tetlajyalti ijkuak san sekan motekaj?

⁹ Amo xikiluikan namosiua makichiua seki tlamantli tlen tetlajyalti ijkuak san sekan nanmotekaj. Sekimej tlakamej kiluiaj insiua makichiua seki tlamantli tetlajyalti ijkuak san sekan motekaj. Ikinon siuatl momachilia sokio, tlajyouia uan kimachilia inamik amo kitlasojtla. Jehová amo kipaktia makichiuakan non tlamantli tlakamej porque kiteititiaj tlaixnekij. Jehová kineki tlakamej makitlasojtlakan insiua, makajsikamatikan ken momachilia uan tlen amo kineki kichiuas porque kikuejsoua itlalnamikilis (Efes. 5:​28, 29). Pero ¿tlen kipaleuis se tlakatl ayakmo makilui isiua makichiua seki tlamantli tlen tetlajyalti ijkuak san sekan motekaj? ¿Tlen kipaleuis makipatla ken mokuayejyekoua uan makipatla tlen kichiua?

¿TLEN KINPALEUIS TOKNIUAN AYAKMO MAKICHIUAKAN TLEN KIYOLKOKOUA INSIUA?

10. ¿Tlen kinmachtia Jesús tlakamej tlen yomonamiktijkej?

¹⁰ ¿Tlen kipaleuis se tokni ayakmo makichiua tlen kiyolkokoua isiua noso tlen kitlajyouiltia? Moneki mochijchikauas kichiuas ken Cristo. Jesús amo keman omonamikti pero ye okiteititi ken okintlasojtlaya idiscípulos. Tlen okichi Jesús kinpaleuia tlakamej tlen yomonamiktijkej (Efes. 5:25). Matikitakan ken uelis kinpaleuis tlakamej tlen Jesús okichi ijkuak okatka inuan iapóstoles uan tlen kinmachtia ken okintlapouiaya.

11. ¿Ken okinmitaya Jesús iapóstoles?

¹¹ Jesús okintlasojtlaya iapóstoles uan okintlakaitaya. Ye amo keman okintlajyouilti maski ye okatka inteko. Amo keman okinmilui ye otlanauatiaya ikinon omonekiaya kichiuaskej tlen ye okinnauatiaya. Jesús amo keman ijkon okichi porque ye okatka yolyamanki (Juan 13:​12-17). Ye okinmilui discípulos: “Ximochiuakan nodiscípulos porque ne niyolyamanki uan amo nimoueyineki. Ne namechyolseuis” (Mat. 11:​28-30). Akin yolyamanki amo kijtosneki amo yolchikauak. Okachi kuali kimati monauatis uan amo san kichiua tlen kimachilia.

12. ¿Ken okintlapouiaya Jesús oksekimej?

¹² Jesús kualtsin okintlapouiaya ijkuak oksekimej okinyolseuiaya ikinon kuali omomachiliayaj (Luc. 8:​47, 48). Noijki “amo otlauijuikalti ijkuak okiuijuikaltijkej” akinmej okikokoliayaj (1 Ped. 2:​21-23). Ualeua amitlaj okijtouaya ijkuak okiteluiayaj (Mat. 27:​12-14). Jesús kinmachtia miak tlamantli tlakamej tlen yomonamiktijkej.

13. ¿Ken kiteititia se tokni kitlasojtla isiua ijkon ken kijtoua Mateo 19:​4-6? (Noijki xikita foto).

¹³ Jesús okinmilui tlakamej amo makikajkayauakan insiua. Ye okinmilui tlen iTajtsin okijto: “Tlakatl [...] yetos iuan isiua” (xiktlajtolti Mateo 19:​4-6). Ika griego tlajtoli “iuan yetos” kijtosneki “iuan pepechitos”. Non kijtosneki sapanoua motlasojtlaskej akinmej yomonamiktijkej ken yetoskia pepechitokej. Ikinon tlajyouiaj ijkuak moxelouaj. Tlakamej amo kitaskej pornografía tla kuali mouikaj iuan insiua. San niman oksekan tlachiaj para ‘amo kitaskej tlen amitlaj ipati’ (Sal. 119:37). Kichiuaj ijkon ken Job okichi porque amo kinuelitaj oksekimej  siuamej nion kinekij inuan motekaskej (Job 31:1).

14. ¿Tlen tlamantli moneki kichiuas se tokni tla kineki oksepa kuali mouikas iuan Jehová uan noijki iuan isiua?

¹⁴ Tlakatl amo san moneki ayakmo makiuiteki isiua nion ayakmo makilui tlen kiyolkokoua. Noijki moneki kichiuas seki tlamantli para oksepa kuali mouikas iuan Jehová uan noijki iuan isiua. ¿Tlen moneki kichiuas? Se tlamantli tlen kipaleuis, moneki makita amo kuali tlen kichijtok. Jehová nochi kita uan amitlaj uelis tiktlatiliskej (Sal. 44:21; Ecl. 12:14; Heb. 4:13). Ome tlamantli tlen kipaleuis, ayakmo makiuiteki isiua uan makipatla inemilis (Prov. 28:13). Eyi tlamantli tlen kipaleuis, makilui Jehová uan isiua tlen amo kuali okichi uan makitlapojpoluikan (Hech. 3:19). Makitlatlaujti Jehová makipaleui makipatla ken mokuayejyekoua, tlen kijtoua, tlen kichiua uan makilui kineki kipatlas inemilis (Sal. 51:​10-12; 2 Cor. 10:5; Filip. 2:13). Naui tlamantli tlen kipaleuis, makichiua tlen kitlatlaujtia Jehová uan ayakmo makijto tlen teyolkoko nion makitlajyouilti isiua (Sal. 97:10). Makuili tlamantli tlen kipaleuis, san niman mamotlapoui inuan tlayekankej uan yejuan kipaleuiskej porque kitlasojtlaj (Sant. 5:​14-16). Chikuase tlamantli tlen kipaleuis, mamokuayejyeko tlen kichiuas ijkuak oksepa kinekis kichiuas tlen amo kuali. Noijki akin kita pornografía moneki kichiuas nin chikuase tlamantli. Jehová kiteochiuas akin mochijchikaua kipatlas inemilis (Sal. 37:5). Pero tokni amo san moneki ayakmo kichiuas tlen kiyolkokoua isiua. Noijki moneki kimatis ken kitlakaitas. Matikitakan ken uelis ijkon kichiuas.

¿KEN UELIS NANKITLAKAITASKEJ NAMOSIUA?

15. ¿Ken uelis kiteititiskej tokniuan kitlasojtlaj insiua?

¹⁵ Xikteititikan nankitlasojtlaj namosiua. Sekimej tokniuan tlen yomonamiktijkej sapanoua pakij porque mojmostla kiteititiaj sapanoua kitlasojtlaj insiua (1 Juan 3:18).  Tokniuan uelis kiteititiskej kitlasojtlaj insiua maski amo moneki kichiuaskej miak tlamantli. Uelis kimakitskiskej insiua ijkuak nejnentiuij noso uelis kinapaloskej noso kinauajtekiskej. Noijki uelis kitlajkuililiskej uan makitlajtlanikan kox yotlakua. Noijki kiteititiskej kitlasojtlaj insiua tla kitliokoliskej xochitl noso okseki tlamantli. Tokniuan tlen ijkon kichiuaj kiteititiaj kitlakaitaj insiua uan non kinpaleuia okachi kuali mamouikakan.

16. ¿Tleka tlakamej moneki kipatioitaskej insiua?

¹⁶ Xikpatioitakan namosiua. Tokniuan kiteititiaj kitlasojtlaj insiua ijkuak kiluiaj kipatioitaj uan ye kuali momachilia. Tlakamej kitlasojkamatiliaj insiua porque nochipa kinpaleuiaj (Col. 3:15). Ijkon siuatl kuali momachilia, kita inamik kitlasojtla uan kitlakaita (Prov. 31:28).

17. ¿Ken kiteititiaj tokniuan kitlakaitaj insiua?

¹⁷ Xiktlasojtlakan namosiua uan xiktlakaitakan. Tokniuan kitaj insiua ken se tetliokolil tlen sapanoua miak ipati tlen okinmakak Jehová (Prov. 18:22; 31:10). Ikinon kipatioitaj insiua, kimaluiaj, kitlasojtlaj uan kitlakaitaj. Noijki ijkon kichiuaj ijkuak san inselti katej noso ijkuak san sekan motekaj. Tokniuan amo kiluiaj insiua makichiua seki tlamantli tetlajyalti ijkuak motekaj. Non tlamantli amo kipaleuia kuali mamomachili uan kikuejsoua itlalnamikilis. f Tokniuan noijki mochijchikauaj kipiaskej chipauak intlalnamikilis ixpan Jehová (Hech. 24:16).

18. ¿Tlen moneki kichiuaskej tokniuan? (Noijki xikita recuadro “ Naui tlamantli tlen namechpaleuis xikteititikan nankitlakaitaj namosiua”).

¹⁸ Xikilnamiktokan Jehová kita uan kipatioita ijkuak nankitlakaitaj namosiua. Ayakmo xikchiuakan tlen kiyolkokoua namosiua. Okachi kuali xiktlasojtlakan uan xiktlakaitakan. Ijkon nankiteititiskej nankitlasojtlaj uan nankipatioita. Noijki kuali nanmouikaskej iuan Jehová tla nankitlakaitaskej namosiua (Sal. 25:14).