1. ¿Tlen kijtoa Biblia itech Moisés uan tlen okichi?

BIBLIA kijtoa Moisés “ye akin okatka okachi yolkuali itech nochi tlakamej tlen okatkaj nikan tlaltikpak” (Núm. 12:3). ¿Kijtosneki Moisés omomojtiaya uan amo okimatiaya tlen kichiuaskia? Miakej mokuayejyekoaj ijkon iyelis akin yolyamanki. Pero amo melauak tlen kijtoaj. Moisés okatka se tlakatl chikauak, amo omomojtiaya uan okatka yolchikauak. Jehová okipaleui uan ijkon kixnamikiskia tekiua tlen ochantiaya Egipto. Noijki kanaj tres millones tlaltikpaktlakamej okinuikak kanin tlauaki. Noijki okinpaleui israelitas ma kintlanilikan akinmej okinteuiayaj.

2. ¿Tleka moneki ma tiyetokan tiyolyamankej?

² Tejuan amo techpanoa ken Moisés pero nochipa tikixnamikij ouijkayotl noso miakej moueyinekij uan non amo techpaleuia ma tiyetokan tiyolyamankej. Pero moneki timochijchikauaskej tiyetoskej tiyolyamankej. Jehová kijtoa ‘akinmej yolkualmej kinmakas tlaltikpak’ (Sal. 37:11). Ik non, ma timotlajtlanikan: “¿Nikteititia niyolyamanki? ¿Oksekimej nechitaj niyolyamanki?”. Tla tiknekij tikinnankiliskej ninmej tlajtlanilmej, moneki tikmatiskej tlen kijtosneki tiyetoskej tiyolyamankej.

3. ¿Tlen ika tikneskayotiskej yolyamanilistli?

³ Tiyetoskej tiyolyamankej * yetoskia ken ijkuak tikijtsomaj  se blusa. ¿Tleka ijkon tikijtoaj? Ijkuak tikijtsomaj se blusa, moneki tiktekitiltiskej hilo tlen tlatlamantli itlapalo uan ijkon kualtsin motas. Noijki tla tiknekij tiyetoskej tiyolyamankej, moneki tikpiaskej okseki tlamantli. Moneki tiyetoskej tiyolyamankej, titetlakamatiskej, amo ma tikualanikan uan ma tiyetokan tiyolchikauakej. Moneki tikpiaskej nin tlamantli tla tiknekij tikyolpaktiskej Jehová. ¿Tleka ijkon tikijtoaj?

4. ¿Tlen naui tlamantli moneki tikpiaskej uan tleka?

⁴ San akinmej yolyamankej kitlakamatij toTajtsin Dios uan kichiuaj tlen ye kineki. Noijki Jehová kineki ma timoyekuikakan iuan oksekimej (Gál. 5:23; Tito 3:2). Pero Satanás sapanoa kualani ijkuak tikchiuaj tlen Jehová kineki. Ik non, maski tiyolyamankej uan kuali timouikaj iuan oksekimej, akinmej kipaleuiaj Satanás sapanoa techkokoliaj (Juan 15:18, 19). Ik non, moneki tiyetoskej tiyolchikauakej.

5, 6. (1) ¿Tleka Satanás kinkokoliaj akinmej yolyamankej? (2) ¿Tlen tlajtlanilmej tikinnankiliskej?

⁵ Akinmej amo yolyamankej sapanoa moueyinekij, san niman kualanij uan amo kitlakamatij Jehová. Ijkon kichiua Satanás. Ik non, kinkokolia akinmej yolyamankej porque amo kuali iyelis. Noijki akinmej yolyamankej, kiteititiaj Satanás san tlakajkayaua uan amo uelis kinchiualtis ayakmo ma kitekichiuilikan Jehová (Job 2:3-5).

⁶ ¿Keman oui tiyetoskej tiyolyamankej? ¿Tleka moneki ma timochijchikauakan tiyetoskej tiyolyamankej? Para uelis tikinnankiliskej ninmej tlajtlanilmej ma timomachtikan tlen okipanok Moisés, eyi telpokamej tlen okatkaj hebreos uan noijki Jesús.

7, 8. ¿Tlen okichi Moisés ijkuak oksekimej okualankej?

⁷ Ijkuak tikinnauatiaj oksekimej. Xamo oui tiyetoskej tiyolyamankej ijkuak tikinnauatiaj oksekimej porque amo tetlakamatij uan kijtoaj amo kuali tlen tikchiuaj. ¿Ijkon yotechpanok? ¿Tlen tikchiuaskia tla se tokalchanejka amo tetlakamati? Ma tikitakan tlen okichi Moisés.

⁸ Jehová okipejpenki Moisés ma kinyekana israelitas uan okinauati ma kinmijkuilo tlanauatilmej tlen ika moyekanaskiaj israelitas. Ik non, toTajtsin Dios okipaleuiaya Moisés. Pero Míriam uan Aarón okualankej  porque okiluijkej Moisés tleka omonamikti iuan se siuatl tlen amo okatka israelita. Tla okse ijkon kichiuiliskia xamo kualaniskia. Pero Moisés amo okualanki uan okilui Jehová ayakmo ma kitlajyouilti Míriam (Núm. 12:1-13). ¿Tleka Moisés amo okualanki?

9. ¿Tlen okinekiaya Jehová ma kajsikamati Moisés?

⁹ Moisés amo okualanki porque okimatiaya Jehová amo kualani. Kanaj cuarenta xiuitl achto ijkuak ochantiaya Egipto, ye amo okatka yolyamanki. Sapanoa okatka kuejsi uan okimikti se tlakatl porque okitak amo yolkuali. Noijki omokuayejyeko toTajtsin Dios okipaktiaya tlen okichiuaya. Kanaj cuarenta xiuitl Jehová okipaleui ma kajsikamati amo san omonekiaya yetos yolchikauak. Noijki omonekiaya yetos yolyamanki uan ijkon uelis kinyekanaskia israelitas. Omonekiaya yetos yolyamanki, tetlakamatiskia uan amo san niman kualaniskia. Okajsikamatki tlen Jehová okimachti uan non okipaleui kuali ma kinyekana israelitas (Éx. 2:11, 12; Hech. 7:21-30, 36).

10. ¿Tleka moneki ma kichiuakan ken Moisés tlakamej tlen kinyekanaj inkalchanejkauan uan tlayekankej tlen kinyekanaj tokniuan?

¹⁰ Tlakamej tlen kinyekanaj inkalchanejkauan uan tlayekankej moneki ma kichiuakan ken Moisés. Amo san niman ma kualanikan tla amo kintlakamatij noso amo kintlakaitaj. Xiyetokan nanyolyamankej uan xikijtokan tlen amo kuali onankichijkej (Ecl. 7:9, 20). Xitetlakamatikan uan xikyektlalikan ouijkayotl ken Jehová kineki uan amo san niman xikualanikan (Prov. 15:1). Tla ijkon nankichiuaskej, nankiyolpaktiskej Jehová, nanyetoskej ika yolseuilistli uan nankiteititiskej nanyolyamankej.

11-13. ¿Tlen techmachtia tlen okichijkej eyi telpokamej tlen okatkaj hebreos?

¹¹ Ijkuak techtlajyouiltiaj. Yiuejkika tekiuajkej kintlajyouiltiaj tokniuan. ¿Tleka? Xamo kijtoaj otikchijkej itlaj amo kuali. Pero techtlajyouiltiaj porque otikpejpenkej “tiktlakitaskeh tlan Dios kijtoa iwa amo tlan kijtoah n tlakah” (Hech. 5:29). Sekimej techpinauiaj, techtsakuaj noso techuitekij. Pero Jehová techpaleuia amo ma timomakopakan nion ma tikualanikan ijkuak techtlajyouiltiaj.

¹² Ma timokuayejyekokan tlen okichijkej eyi telpokamej tlen okatkaj hebreos uan okinuikakej Babilonia. Se omotokayotiaya Hananías, okse Misael uan Azarías. * Akin otlanauatiaya ompa Babilonia otlanauati ma motlankuaketsakan ixpan imagen  tlen okichijchijkej ika oro. Yejuan kuali okiyekiluijkej tleka amo motlankuaketsaskiaj ixpan imagen. Yejuan okitlakamatkej toTajtsin Dios maski tekiua okinmilui kintlamotlaskiaj ijtik horno tlen okatka sapanoa totonik. Yejuan amo okijtojkej toTajtsin Dios san niman kinmakixtiskiaj. Pero toTajtsin Dios san niman okinmakixti. Pero okipejpenkej kitlakamatiskej maski tlajyouiskiaj (Dan. 3:1, 8-28). Ijkon okiteititijkej okatkaj yolyamankej uan okatkaj yolchikauakej. Noijki okiteititijkej amikaj uelis kichiuas ayakmo ma tikueyichiuakan Jehová uan maski techtlajyouiltiskej tekiuajkej (Éx. 20:4, 5).

¹³ ¿Ken uelis tikchiuaskej ken ninmej eyi telpokamej ijkuak techyejyekoskej kox tikatej tiyolmelajkej ixpan Jehová? Ma tiyetokan tiyolyamankej uan ma tikneltokakan Jehová techmaluis (Sal. 118:6, 7). Noijki ijkuak ikaj techteluis otikchijkej tlen amo kuali, amo ma tikualanikan uan ma tiktlakaitakan (1 Ped. 3:15). Noijki amo ma tikchiuakan itlaj tlen uelis kichiuas ayakmo ma timouikakan iuan Jehová.

14. ¿Tlen tikchiuaj ijkuak timotekipachoaj?

¹⁴ Ijkuak timotekipachoaj. Tinochtin techtekipachoa miak tlamantli. Xamo techtekipachoa kox kuali tikchiuaskej toexamen kanin timomachtiaj noso okse tekitl tlen moneki tikchiuaskej. Xamo techtekipachoa kox kuali kisas ijkuak techchiuiliskej se operación. Noijki xamo amo tikmatij kox kuali kisas estudio tlen techchiuiliskej. Ik non, xamo oui tiyetoskej tiyolyamankej ijkuak itlaj techtekipachoa. Xamo peuas techkualanis seki tlamantli tlen achto amo otechkualaniaya. Noijki xamo peuas tikinmajuaskej oksekimej uan san tlen amo tikinmiluiskej. Tla ijkon timomachiliaj, ma tikilnamikikan tlen okichi Jesús.

15. Ijkon ken kijtoa Isaías 53:7, 10, ¿ken techmachtia Jesús ma tiyetokan tiyolyamankej maski techtlajyouiltiskej?

¹⁵ Ijkuak Jesús yikimiktiskiaj, sapanoa okitlajyouiltijkej. Okimatiaya sapanoa kitlajyouiltiskia uan kimiktiskiaj (Juan 3:14, 15; Gál. 3:13). Jesús okijto sapanoa omotekipachoaya ijkuak amo miak metstli opoliuiaya kimiktiskej (Luc. 12:50). Ijkuak ayakmo miak tonal opoliuiaya kimiktiskej, okijto: “Satlawel nimoyolkokoa”. Noijki okiteititi okatka yolyamanki uan okitlakamatiaya iTajtsin ijkuak okijto: “¿Mach weletis nikilis: ‘Notajtsi, techmakixti itech nin tlaijyowílistli’? Amó, mach weletis ijkó nikilis porke saman para ye Ne oniwala. Notajtsi, maweyijkachito Motoka” (Juan 12:27, 28). Ijkuak okikitskijkej, ye okatka yolchikauak uan omotemakak inmak akinmej okikokoliayaj toTajtsin Dios. Sapanoa okitlajyouiltijkej ijkuak okimiktijkej. Ye nochipa okatka yolyamanki maski sapanoa omotekipachoaya uan otlajyoui. Tlen okichi Jesús techmachtia uelis tiyetoskej tiyolyamankej maski timotekipachoskej (xiktlajtolti Isaías 53:7, 10).

16. ¿Ken okiteititi Jesús okatka yolyamanki?

¹⁶ Non yoak ijkuak yikimiktiskiaj Jesús, itlatitlaniluan itlaj okichijkej uan Jesús kiteititiskia kox okatka yolyamanki. Ma timokuayejyekokan ken omomachiliaya non yoak. Omonekiaya kiteititis Jesús kox okatka yolmelajki ijkuak kimiktiskiaj uan ijkon tinochtin techpaleuiskia. ¿Ken kichiuaskia? (Rom. 5:18, 19). Tlen kichiuaskia Jesús tlapaleuiskia ma mota kox kuali iyelis iTajtsin noso amo (Job 2:4). Ijkuak okichijtoka iCena, imachtijkauan opejki mokualaniaj. Okinekiayaj kimatiskej “akin  okachi weyijkatitoskia”. Non tiotlak yomokualanijkaj porque okinekiayaj kimatiskej akin okachi oueyititoka. Miak uelta yokinmiluijka amo ijkon ma kichiuakan. Pero maski ijkon okichiuayaj, Jesús amo keman okualanki. Ye kuali okinmilui ken omonekiaya kipiaskej inyelis. Satepan okinyolchika porque okatkaj yolmelajkej (Luc. 22:24-28; Juan 13:1-5, 12-15).

17. ¿Ken uelis tikchiuaskej ken Jesús?

¹⁷ ¿Tlen tikchiuaskiaj tla ijkon techpanoskia? Ijkon ken Jesús okichi, amo ma tikualanikan maski timotekipachoskej. Ma tiktlakamatikan Jehová ika nochi toyolo ijkuak techiluia: “Xitexikokah iwa ximotlapojpolwikah” (Col. 3:13). Tikchiuaskej tlen kijtoa Jehová tla tikilnamiktoskej tinochtin tikijtoaj tlen amo kuali uan tikinkualaniaj oksekimej (Prov. 12:18; Sant. 3:2, 5). Noijki ma tikinyolchikauakan akinmej kipiaj kuali inyelis (Efes. 4:29).

18. (1) ¿Ken kinpaleuia Jehová akinmej yolyamankej ma kipejpenakan tlen kichiuaskej? (2) ¿Tlen moneki tikchiuaskej para ma techpaleui toTajtsin Dios?

¹⁸ Kuali tikpejpenaskej tlen tikchiuaskej. Tla tiyolyamankej, Jehová nochipa techpaleuis ma tikpejpenakan tlen tikchiuaskej. Noijki techiluia techkakis ijkuak tiktlatlaujtiskej (Sal. 10:17). Noijki Biblia techiluia ye techyekanas. Biblia kijtoa: “Ye kinyekanas akinmej yolyamankej ma kichiuakan tlen kuali uan kinmachtis ken moneki nemiskej” (Sal. 25:9). Jehová techyekana ika iTlajtol, ika amatlajkuilolmej * uan ika videos. Noijki “tlakeuali yolmelajki uan ixtlamatki” kiyektlalia miak tlamantli para timomachtiskej ijkuak timonechikoaj (Mat. 24:45-47, TNM). Pero tejuan moneki timochijchikauaskej ma tiyetokan tiyolyamankej uan ma timomachtikan tlen Jehová techmaka uan ma tiktlakamatikan ika nochi toyolo.

19-21. (1) ¿Tlen tlamantli amo kuali okichi Moisés ompa Qadés? (2) ¿Tlen techmachtia tlen okipanok Moisés?

¹⁹ Amo okachi tikchiuaskej tlen amo kuali. Oksepa ma timokuayejyekokan tlen okipanok Moisés. Miak xiuitl okatka yolyamanki uan okiyolpakti Jehová. Pero ijkuak opanok kanaj cuarenta xiuitl Moisés ayakmo okatka yolyamanki. Ikni tlen omotokayotiaya Míriam, tlen okipaleui ompa Egipto, oixpoliuik uan okitokakej ompa Qadés.  Ijkuakon, israelitas opejki kualanij porque okinpoloaya seki tlamantli. Biblia kijtoa opejki kixnamikij Moisés porque amo okipiayaj atl. Okualantokaj maski Jehová okitekitilti Moisés ma kinchiua milagros uan noijki ye kuali okinyekanaya. Okitlajtlakoltiayaj Moisés porque amo okipiayaj atl (Núm. 20:1-5, 9-11).

²⁰ Moisés sapanoa okualanki ijkuak ijkon okichijkej israelitas. Okinmajuak uan okinmilui kichiuaskia se milagro. Amo okitlapoui tepexitl uan ijkon okiteititi amo okitlakamatki Jehová. Ome uelta okiuitek tepexitl uan okiski miak atl. Ijkon okichi porque okualanki uan ayakmo okatka yolyamanki (Sal. 106:32, 33). Jehová amo okikauili ma kalaki itech tlali tlen okijto kimakaskia porque ayakmo okatka yolyamanki (Núm. 20:12).

²¹ ¿Tlen techmachtia tlen okipanok Moisés? Achto, techmachtia nochipa ma timochijchikauakan ma tiyetokan tiyolyamankej. Tla amo timomaluiskej, san niman timoueyinekiskej uan san tlen amo tikijtoskej uan tikchiuaskej tlen amo kuali. Noijki techmachtia, tla timotekipachoaj uelis tisotlauaskej. Pero moneki timochijchikauaskej tiyetoskej tiyolyamankej maski titlajyouiskej.

22, 23. (1) ¿Tleka moneki timochijchikauaskej tiyetoskej tiyolyamankej? (2) ¿Tlen kijtosneki Sofonías 2:3?

²² Jehová techmaluis. Ayakmo miak poliui uan Jehová kinmixpolos akinmej amo yolkualmej uan san yoltoskej akinmej yolkualmej. Itech tlaltikpak nochtin kipiaskej yolseuilistli (Sal. 37:10, 11). ¿Tejuan ompa tiyetoskej? Ompa tiyetoskej tla tikchiuaskej tlen Jehová kineki (xiktlajtolti Sofonías 2:3).

²³ ¿Tleka Sofonías okijto “xamo” techmakixtiskej? ¿Kijtosneki Jehová amo techpaleuis? Amo. Kijtosneki tejuan moneki timochijchikauaskej tikchiuaskej tlen moneki. Jehová uelis techmakixtis ijkuak tlaixkomakas uan ijkon tikpiaskej yolilistli tlen amo keman tlamis. Pero moneki timochijchikauaskej tiyetoskej tiyolyamankej uan tikyolpaktiskej Jehová.