Onineski Quebec tlen poui Canadá uan ompa tlajtouaj francés. Notajtsin omotokayotiaya Louis uan nonantsin Zélia yejuan sapanoua onechtlasojtlayaj. Notajtsin amo okachi otlajtouaya uan okipaktiaya kitlajtoltis miak tlamantli. Ne onechpaktiaya nitlajkuilos uan oniknekiaya niyetos periodista.

Ijkuak onikpiaya 12 xiuitl otechtlajpaloto Rodolphe Soucy ye otekipanouaya iuan notajtsin uan oyaya iuan se iyolikni. Yejuan okatkaj iTlaixpantijkauan Jehová. Ne amo okachi onikinmixmatiaya iTlaixpantijkauan Jehová uan amo oniknekiaya nikmatis tlen okineltokayaj. Pero onikitak okipiayaj kualtsin inyelis uan ika Biblia otechnankiliayaj tlen otikintlajtlaniayaj. Notatajuan noijki okinpakti uan opejki timomachtiaj.

Pero ijkuakon ne oniaya escuela uan ompa otlamachtiayaj católicos. Ualeua onikintlapouiaya akinmej inmiuan onimomachtiaya tlen kijtoua Biblia. Pero okimatkej teopixkej tlen otlamachtiayaj. Se teopixki amo okitak itech Biblia tlen onikilui uan inmixpan nochtin onechilui nitlaixnamiki. Ijkuakon amo kuali onimomachili pero onikitak amo okatka itech Biblia tlen ompa otlamachtiayaj. Onikitak amo omonekiaya ompa niyetoskia uan onikinmilui notatajuan ayakmo ompa nimomachtiskia.

Onimomachtiaya Biblia pero amo san niman onikchi tlen onimomachtiaya porque onimomojtiaya nitetlapouis. Miakej okineltokayaj  tlen otlamachtiayaj católicos uan amo otechkauiliayaj ma titetlapouikan. Se tlakatl itoka Maurice Duplessis ye otlayekanaya ompa Quebec uan opouiaya itech non teopan. Okinpaleuiaya akinmej opouiayaj itech non religión uan okintlajyouiltiayaj iTlaixpantijkauan Jehová. Omonekiaya tiyetoskej tiyolchikauakej tla otiknekiayaj titetlapouiskej.

Se tokni itoka John Rae onechpaleui. Ye okiselito tlamachtil chiknaui tlen kichiuaj ompa Patterson. Ye okatka ixtlamatki pero amo omoueyinekiaya. John amo miak uelta onechilui tlen nikchiuaskia. Pero onechpaleui tlen okichiuaya uan okijtouaya. Ye amo kuali otlajtouaya francés, ik non, iuan onitetlapouiaya uan onikmachtiaya non tlajtoli. Onechpaktiaya nimouikas iuan tokni porque onechpaleui ma nikchiua tlen onimomachtiaya. Opanok majtlaktli xiuitl ijkuak onikinmixmatki iTlaixpantijkauan Jehová uan onimoapolakti 26 de mayo 1951.

Amo miakej otimonechikouayaj ompa Quebec pero nochtin okatkaj precursores. Non onechpaleui ma nimochiua niprecursor. Ijkuakon san ika Biblia otitetlapouiayaj. Amo otikinpiayaj amatlajkuilolmej, ik non, omonekiaya kuali tikmatiskiaj titetlapouiskej ika Biblia. Onikintemo textos tlen ika nimopaleuiskia ijkuak nitetlapouiskia. Miakej amo okinekiayaj kitlajtoltiskej Biblia tla amo achto okiluiayaj teopixki.

Satepan itech 1952 onimonamikti iuan Simone Patry. Se tokni tlen okitekichiuiliaya Jehová uan ochantiaya ompa Quebec. Otichantitoj ompa Montreal uan otikpixkej se totakotsin uan otiktokayotijkej Lise. Ayakmo onikatka niprecursor ijkuak yitimonamiktiskiaj. Pero ne uan Simone amo otiktemouayaj tikpiaskej miak tlamantli uan otimochijchikauayaj titetlapouiskej iuan tokniuan.

Opanok majtlaktli xiuitl uan onimokuayejyeko oksepa nimochiuaskia niprecursor. Itech 1962 onechiluijkej kinmachtiskiaj tlayekankej ompa Canadá, ik non, onikselito Tlamachtil itech Tekiuajkayotl uan ouejka se metstli. Non se metstli onichantik iuan Camille Ouellette. Onechpakti ken otetlapouiaya maski okipiaya isiua uan ikoneuan. Ijkuakon amo miakej  tokniuan omochiuayaj precursores tlen yokipiayaj inkoneuan. Pero tokni Camille omochijchika yetos precursor. Onechyolchika ma nimokuayejyeko kox uelis okachi niktekichiuiliskia Jehová. Amo opanok miak metstli uan oksepa onimochi niprecursor. Sekimej amo okinpakti pero ne onimochi niprecursor uan onikneltokaya Jehová nechteochiuaskia tla okachi niktekichiuiliskia.

Itech 1964 Simone uan ne otechiluijkej ma tiyetokan tiprecursores especiales ompa Quebec kanin otineskej. Ompa otikatkaj seki xiuitl. Ijkuakon ayakmo okachi okintlajyouiltiayaj tokniuan ijkuak otetlapouiayaj.

Se sábado tiotlak onechkitskijkej ompa Sainte-Marie, se altepetsintli tlen amo uejka okatka ompa Quebec. Se policía onechtsakuato porque onitetlapouiaya. Satepan onechuikakej ixpan se juez tlen itoka Baillargeon omotaya kuejsi uan otemomojtiaya. Onechtlajtlani akin nechpaleuiskia ijkuak nechixkomakaskiaj. Onikilui nechpaleuiskia Glen How, * se abogado tlen miakej okixmatiayaj uan okatka iTlaixpantijka Jehová. Baillargeon omomojti uan okijto: “Ye amo nikneki ma mitspaleui”. Glen How miakej okixmatiayaj porque okinpaleui miakej tokniuan. Satepan onechilui ayakmo itlaj nechchiuiliskiaj.

Amo otikajsiayaj kanin timonechikoskiaj porque otechtlajyouiltiayaj ompa Quebec. Otechtlanetijkej kanin okinkalakiayaj carros. Amo otikpiayaj kanin timototoniskej ijkuak oseuaya. Tokniuan okipiayaj se tepostli tlen okitlaliliayaj aceite uan okixotlaltiayaj uan ijkon otimototoniayaj. Ijkuak otimonechikouayaj, otimototoniayaj uan otimotlapouiayaj tlen kualtsin otechpanok.

Axkan tikitaj yomomiaktilijkej tokniuan. Kanaj itech 1960 amo miakej tlanechikolmej okatkaj Côte-Nord uan la península de Gaspé tlen poui Quebec. Axkan miakej tokniuan monechikouaj itech miakej kalmej kuajkualtsitsintin.

Itech 1970 Simone uan ne otechiluijkej ma titlapaleuikan itech se circuito uan 1973 onechtlalijkej tlayekanki itech distrito. Ijkuakon Laurier Saumur * uan David Splane * miak tlamantli onechmachtijkej porque noijki okatkaj tlayekankej itech circuito uan okatkaj ixtlamatkej. David uan ne otimoyolchikauayaj ijkuak otlamiaya se ueyi nechikol porque otiknekiayaj kuali titlamachtiskej. Nikilnamiki se tonal onechilui: “Onechpakti ken otitlamachti saiktlami. Kuali tlen otikchi pero ne nikinkixtiskia  kanaj eyi tlamachtilmej ika tlamachtil tlen otiktemakak”. Ne miak tlamantli onikijtouaya ijkuak onitlamachtiaya, ik non, omonekiaya okachi kuali nitlamachtis.

Tlayekanki itech distrito okinyolchikauaya akinmej tlayekanaj itech circuito. Pero ompa Quebec miakej tokniuan onechixmatiayaj uan ijkuak ompa oniaya, okinekiayaj nouan tetlapouiskej. Onechpaktiaya inmiuan nitetlapouis pero ayakmo onimajxiliaya niyetos inmiuan tlayekankej itech circuito. Se tlayekanki itech circuito onechyekilui: “Kuali titetlapouia iuan tokniuan pero amo xikilkaua nin semana ne otechtlajpaloko. Ne noijki moneki techyolchikauas”. Onechpaleui tlen onechilui porque omonekiaya nikchiuas ken moneki.

Itech 1976 sapanoua onitlajyoui. Nosiua omokoko uan oixpoliuik. Oniyolpakik iuan oniktekichiuili Jehová porque sapanoua okitlasojtlaya. Nochipa onitetlapoui uan non onechpaleui amo okachi ma nimoyolkoko uan niktlasojkamatilia Jehová porque onechpaleui ijkuak oixpoliuik nosiua. Satepan onimonamikti iuan Carolyn Elliott ye okatka precursora uan tlajtoua inglés. Onikixmatki ompa Quebec porque ompa otetlapouito. Carolyn kitekipachoua tlen kinpanoua oksekimej. Motlapouia iuan tokniuan tlen pinauaj uan akinmej inselti momachiliaj. Noijki sapanoua nechpaleuia nika ken tlayekanki itech circuito.

Enero 1978 onechiluijkej ma nitlamachti ompa Quebec ijkuak mochiuaskia Tlamachtil tlen kiseliaj Precursores. Onimomojtiaya porque amo onikmatiaya tlen nitlamachtiskia ijkon ken precursores momojtiaj ijkuak peua momachtiaj. Pero omomachtitoj miakej precursores tlen yikipiaj miak xiuitl kitekichiuilijtokej Jehová uan kimatij miak tlamantli. Ik non, miak tlamantli onimomachti.

 Itech non xiuitl omochi se ueyi nechikol Internacional itech Estadio Olímpico de Montreal. Ueyi nechikol omotokayoti “Fe victoriosa”. Ijkuakon omonechikojkej kanaj ochenta mil. Onechiluijkej ma nimotlapoui iuan periodistas. Okinekiayaj kimatiskej tlen tikchiuaskej uan oniyolpakik porque okijtojkej kuali tlen tikchiuaskiaj. Itech radio uan itech televisión kanaj veinte horas okipanoltijkej tlen otechtlajtlanijkej uan okijkuilojkej miak tlamantli.

Omopatlak nonemilis itech 1996. Nochipa oniktekichiuiliaya Jehová ompa Quebec kanin tlajtouaj francés. Pero onechtitlankej Toronto kanin tlajtouaj inglés. Onimotekipachouaya porque amo onikmatiaya kox kuali nitlamachtis ika inglés porque amo kuali onikmatiaya non tlajtoli. Omonekiaya nochipa nimotlatlaujtis uan okachi nikneltokaskia Jehová.

Sapanoua oniyolpakik onikatka ome xiuitl ompa Toronto. Carolyn onechpaleui ma nitlajto okachi kuali inglés uan tokniuan noijki onechyolchikajkej. San niman opejki timouikaj iuan miakej tokniuan.

Onechpaktiaya nitetlapouis viernes tiotlak maski mostlatika mochiuaskia ueyi nechikol itech circuito uan omonekiaya tikchiuaskej miak tlamantli. Xamo sekimej motlajtlaniaj tleka onechpaktiaya nitetlapouiti non semana ijkuak otikpiaya miak tekitl. Pero ne onechpaleuiaya nimotlapouis iuan oksekimej. Axkan noijki ok kuali nimomachilia nitetlapouia.

Itech 1998 Carolyn uan ne otechtitlankej Montreal ma titetlapouitij ken tiprecursores especiales. Miak xiuitl onechiluijkej ma nikita ken titetlapouiskej kanin miakej panouaj uan ma nimotlapoui iuan akinmej kinekij kimatiskej tlen tikchiuaj tiiTlaixpantijkauan Jehová. Ne uan Carolyn tikintlapouiaj akinmej uitsej Canadá uan kinekij kimatiskej tlen tlamachtia Biblia uan tejuan techpaktia tikinmachtiskej.

Sapanoua niktlasojkamatilia Jehová porque yikipia sesenta y ocho xiuitl onimoapolakti. Sapanoua niyolpaki nitetlapouis uan nikinpaleuis oksekimej ma kimatikan tlen tlamachtia Biblia. Nochpoch Lise uan inamik okinmiskaltijkej inkoneuan uan satepan omochijkej precursores regulares. Niyolpaki porque Lise mochijchikaua tetlapouis. Nikintlasojkamatilia tokniuan onechpaleuijkej uan onechmachtijkej ken nitlamachtiskia uan ken nikpaleuiskia ialtepe Jehová. Tla tikneltokaj techpaleuis iespíritu santo Jehová, uelis tiktekichiuiliskej maski san kanin tiyetoskej (Sal. 51:11). Nochipa niktlasojkamatilis Jehová porque nechkauilia ma nikueyichiua itoka (Sal. 54:6).