1, 2. ¿Tleka Jehová techkauilia ma tipouikan iuan ifamilia uan ken okichi?

JEHOVÁ techyoleua ma tipouikan iuan ifamilia. Pouij iuan ifamilia akinmej ixpan yomotemakakej uan kineltokaj Jesús topatka omikik. Tiyolpakij akinmej tipouij iuan ifamilia. Axkan kuali tikatej uan tikmatij satepan okachi tiyolpakiskej porque nochipa tiyoltoskej itech xochitlali uan oksekimej iluikak.

² Jehová techtlasojtla, ik non, okichi itlaj miak ipati uan ijkon uelis tipouiskej iuan ifamilia (Juan 3:16). Biblia kijtoua toTajtsin ‘Dios otechko saikpanoa patio’ (1 Cor. 6:20). Axkan iuan timouikaj porque ye okitemakak iKone topatka ma mikiki. Noijki ueli tiknotsaj toTajtsin maski sapanoua ueyititok. Ijkon ken otimomachtijkej itech okse tlamachtil, Jehová ye toTajtsin tlen sapanoua techtlasojtla uan amo onka okse ken ye.

3. ¿Tlen timotlajtlaniaj? (Xikita recuadro “ ¿Nechixmati Jehová?”).

³ Xamo noijki timotlajtlaniaj ken se tlakatl tlen okijkuilo Biblia, ye okijto: “¿Tlen ika niktlaxtlauilis Jehová nochi tlamantli kuali tlen nechmaka?” (Sal. 116:12). Amo uelis tiktlaxtlauiliskej toTajtsin Dios nochi tlen techmaka. Pero ye techtlasojtla, ik non, tejuan noijki tiknekij tiktlasojtlaskej. Tlatitlanil Juan okijkuilo: “Tejwah tiktlasojtla[h] Dios porke Ye achto otechtlasojtlak” (1 Juan 4:19). Ik non, ¿ken uelis tikteititiskej tiktlasojtlaj toTajtsin?

4. Ijkon ken kijtoua Santiago 4:8, ¿tleka moneki ma timochijchikauakan kuali timouikaskej iuan Jehová?

⁴ Jehová kineki iuan ma timouikakan uan kuali iuan ma timotlapouikan (xiktlajtolti Santiago 4:8). Techiluia nochipa iuan ma timotlapouikan uan ye nochipa techkakis (Rom. 12:12). Ye amo keman kijtos amo techkakis porque sotlaua noso amo majxilia. Pero ¿ken tikkakij? Ijkuak tiktlajtoltiaj Biblia uan amatlajkuilolmej tlen techpaleuiaj ma tikajsikamatikan iTlajtol. Noijki tikkakij tla kuali titlakakij ijkuak timonechikouaj. Tetajmej kualtsin mouikaj iuan inkoneuan ijkuak kuali inmiuan motlapouiaj. Tejuan noijki kuali timouikaskej iuan Jehová tla nochipa iuan timotlapouiaj.

5. ¿Ken uelis okachi kuali timotlapouiskej iuan Jehová?

⁵ ¿Ken timotlapouiaj iuan toTajtsin Dios? Ye kineki ma tikiluikan nochi tlen tikpiaj itech toyolo (Sal. 62:8). Ik non, ma timotlajtlanikan: “¿Nochipa san se tlamantli nikiluia Jehová ijkuak niktlatlaujtia? ¿Noso niktlatlaujtia ijkon ken ijkuak nimotlapouia iuan se noyolikni?”. Tejuan tiktlasojtlaj Jehová uan tiknekij iuan timouikaskej. Ik non, moneki nochipa iuan ma timotlapouikan tla tiknekij kuali iuan timouikaskej. Ma tikiluikan tlen tikmachiliaj, tleka tiyolpakij uan tlen techtekipachoua. Ma tikneltokakan ye uelis tikiluiskej ma techpaleui.

6. ¿Tlen moneki tikchiuaskej tla tiknekij timouikaskej iuan Jehová?

⁶ Noijki ma tiktlasojkamatilikan Jehová nochi tlen techmaka tla tiknekij kuali iuan timouikaskej. Tikmatij melauak tlen okijto salmista: “Otikchijchi miak tlamantli, Jehová noDios, nochi kuali otikchijchi uan nochipa totech timokuayejyekoua, amo onka okse ken te. Tla nikijtos nochi tlen otikchijchi, amo keman nitlamis porque sapanoua miak” (Sal. 40:5). Amo san ma timokuayejyekokan tiktlasojkamatiliskej toTajtsin Dios nochi tlen kichiua. Tlen tikchiuaj uan tlen tikijtouaj kiteititia tiktlasojkamatiliaj Jehová. Amo tikchiuaj ken axkan miakej kichiuaj. Miakej ayakmo kitlasojkamatiliaj toTajtsin Dios tlen kinmaka. Non kiteititia tikatej itlamian “iksemi tonatijmeh” porque miakej ayakmo motlasojkamatij (2 Tim. 3:1, 2). Amo keman ma tikchiuakan ken akinmej amo motlasojkamatij.

7. ¿Tlen kineki Jehová ma tikchiuakan uan tleka?

⁷ Tetajmej kinekij kuali ma mouikakan inkoneuan uan amo ma mokualanikan. Jehová noijki kineki kuali ma mouikakan ikoneuan. Tejuan timotlasojtlaj uan non kiteititia melauak tikchiuaj ken Cristo (Juan 13:35). Se itekipanojka Jehová okijkuilo: “¡Xikitakan! ¡Sapanoua kuali uan teyolpaktia san sekan ma yetokan tokniuan!” (Sal. 133:1). ¿Tejuan noijki timomachiliaj ken salmista? Ijkuak tikintlasojtlaj tokniuan tikteititiaj noijki tiktlasojtlaj Jehová (1 Juan 4:20). Sapanoua kualtsin tikatej iuan tokniuan ‘nonkualtentlakah iwa teiknomatih’ (Efes. 4:32).

8. Ijkon ken kijtoua 1 Juan 5:3, ¿tleka tiktlakamatij Jehová?

⁸ Jehová kinmiluia konemej ma kintlakamatikan intatajuan. Noijki kineki tejuan  ma tiktlakamatikan (Efes. 6:1). Ye otechchijchi, techmakatok toyolilis uan ye toTajtsin tlen okachi ixtlamatki, ik non, kinamiki ma tiktlakamatikan. Pero tiktlakamatij Jehová porque tiktlasojtlaj (xiktlajtolti 1 Juan 5:3). Onka miak tlamantli tlen kiteititia moneki ma tiktlakamatikan pero ye amo techchiualtia ijkon ma tikchiuakan. Techkauilia ma tikpejpenakan tlen tikchiuaskej, ik non, ye yolpaki ijkuak tiktlakamatij porque tiktlasojtlaj.

9, 10. ¿Tleka moneki ma tikmatikan tlen kineki toTajtsin Dios uan ma tikchiuakan tlen techiluia?

⁹ Tetajmej kinmiluiaj inkoneuan tlen kichiuaskej porque kinekij kuali ma yetokan. Ik non, kinmiluiaj tlen moneki kichiuaskej. Konemej tlen kichiuaj tlen kinmiluiaj intatajuan kiteititiaj kinneltokiliaj uan kintlakaitaj. Pero okachi moneki ma tikmatikan tlen kineki Jehová ma tikchiuakan uan ma tiktlakamatikan. Ijkon tikteititiaj tiktlasojtlaj uan tiktlakaitaj uan non techpaleuia kuali ma tiyetokan (Is. 48:17, 18). Pero san tlajyouiaj akinmej amo kitlakaitaj toTajtsin Dios uan amo kitlakamatij (Gál. 6:7, 8).

¹⁰ Tla tikpiaj tonemilis ken Jehová kipaktia, amitlaj techpanos, kuali timomachiliskej uan kuali iuan timouikaskej. Jehová kimati tlen okachi techpaleuia. Se tokni itoka Aurora uan chanti Estados Unidos, okijto: “Nikmati ijkuak tiktlakamatij Jehová  okachi kuali tikatej”. Nochipa ijkon panoua. Ma timotlajtlanikan: “¿Ken nechpaleuia ijkuak niktlakamati Jehová?”.

11. ¿Ken techpaleuia ijkuak tiktlatlaujtiaj Jehová?

¹¹ Ualeua oui tikitaj titetlakamatiskej. Pero tla tiktlatlaujtiaj toTajtsin Dios non techpaleuia ma tiktlakamatikan. Tinochtin titlajtlakolejkej, ik non, moneki nochipa ma timochijchikauakan ma tiktlakamatikan Jehová. Se salmista okilui toTajtsin Dios: “Techpaleui ma nimitstlakamati” (Sal. 51:12). Se precursora regular itoka Denise, okijto: “Ijkuak nikita oui niktlakamatis tlen nechnauatia Jehová, nikiluia ma nechpaleui ma nikchiua tlen kuali”. Ma tikneltokakan toTajtsin Dios technankilis tla noijki ijkon tiktlatlaujtiskej (Luc. 11:9-13).

12. ¿Tlen techiluia Efesios 5:1 ma tikchiuakan?

¹² (Xiktlajtolti Efesios 5:1). Tejuan ‘titepilwah de Dios’, ik non, timochijchikauaj tikchiuaj ken ye kichiua. Tikteititiaj ken iyelis Jehová ijkuak titetlakaitaj, titetlasojtlaj uan titetlapojpoluiaj. Akinmej amo kixmatij toTajtsin Dios kitaj tlen kuali tikchiuaj uan non kinpaleuia ma kinekikan kixmatiskej (1 Ped. 2:12). Tla tetajmej kintlasojtlaj inkoneuan ijkon ken Jehová techtlasojtla, non xamo kinpaleuis ma kinekikan mouikaskej iuan toTajtsin Dios.

13. ¿Tlen techpaleuis tla tipinauaj tikintlapouiskej oksekimej akin toTajtsin Dios?

 ¹³ Konemej kinpaktia uan yolpakij kinmiluiskej oksekimej tlen kichiua intajtsin. Tejuan noijki tiyolpakij tikpiaj toTajtsin uan tiknekij oksekimej ma kixmatikan. Timomachiliaj ken tekiua David, ye okijkuilo: “Niyolpakis itech Jehová” (Sal. 34:2). Pero xamo tipinauaj uan amo timixeuiaj tikintlapouiskej oksekimej akin toTajtsin Dios. ¿Tlen techpaleuis amo ijkon ma techpano? Ma timokuayejyekokan ken yolpakis Jehová tla tikinmiluiskej oksekimej ken kinpaleuis tla kixmatiskej. Jehová techpaleuis ma tiyetokan tiyolchikauakej. Noijki techpaleuis ijkon ken okinpaleui tokniuan tlen okatkaj achto siglo (1 Tes. 2:2).

14. ¿Tleka moneki ma tikinpaleuikan oksekimej ma mochiuakan imachtijkauan Jesús?

¹⁴ Jehová nochtin kintlasojtla uan yolpaki ijkuak kita noijki tikintlasojtlaj oksekimej maski tlatlamantli inmialtepe (Hech. 10:34, 35). Tikteititiaj titetlasojtlaj tla tikintlapouiaj oksekimej kuali tlajtolmej (Mat. 28:19, 20). ¿Ken kinpaleuis oksekimej tla ijkon tikchiuaskej? Okachi kuali yetoskej tla techkakiskej uan satepan uelis kipiaskej yolilistli tlen amo keman tlamis (1 Tim. 4:16).

15, 16. ¿Tleka tiyolpakij?

¹⁵ Jehová sapanoua techtlasojtla uan kineki ma yolpakikan akinmej pouij iuan ifamilia (Is. 65:14). Uelis tiyolpakiskej maski ualeua titlajyouiaj. Tikmatij toTajtsin Dios sapanoua techtlasojtla. Noijki techpaleuia ma tikajsikamatikan tlen kijtoua iTlajtol (Jer. 15:16). Tipouij iuan ifamilia Jehová uan tinochtin tiktlasojtlaj. Noijki timotlasojtlaj uan tikchiuaj tlen ye technauatia (Sal. 106:4, 5).

¹⁶ Noijki tiyolpakij porque tikmatij satepan okachi kuali tiyetoskej. Jehová kinmixpolos akinmej amo yolkualmej uan iTekiuajkayo tlapaleuis tlaltikpak ma mochiua se xochitlali. Noijki Jehová techiluia kinyolitis akinmej yoixpolikej uan inmiuan tiyetoskej (Juan 5:28, 29). ¡Melauak kualtsin yetos! Noijki ayakmo miak poliui uan nochtin akinmej chantij iluikak uan akinmej chantiskej nikan tlaltikpak, kiueyichiuaskej Jehová porque san ye kinamiki.