1. ¿Tlen omonekiaya kichiuas akin okinekiaya motlapouis iuan tekiua ompa Persia?

MA TIMOKUAYEJYEKOKAN tikatej itech altepetl Persia tlen yikipia kanaj dos mil quinientos xiuitl. Otiajkej altepetl Susa kanin kajki palacio porque otiknekiayaj timotlapouiskej iuan tekiua. Pero achto omonekiaya titlajtlaniskej kox uelis tikitatiuij porque tlamo uelis techmiktiskej tla san ijkon tiajsitiuij (Est. 4:11).

2. ¿Ken kineki Jehová ma tiknotsakan ijkuak iuan timotlapouiaj?

² Tiktlasojkamatiliaj Jehová porque ye amo kichiua ken tekiuajkej tlen okatkaj Persia. Maski Jehová sapanoua ueyititok, ye kineki iuan ma timotlapouikan san keman tiknekiskej. Ye amo kichiua ken tekiuajkej tlen katej nikan tlaltikpak. Noijki kinotsaj ken akin otlachijchi, akin kipia sapanoua miak chikaualistli uan toTeko akin Ueyititok. Pero ye kineki ma tiknotsakan: “Totajtsi” porque nin tlajtoli kiteititia iuan timouikaj (Mat. 6:9). Techyolchikaua tikmatij Jehová kineki kuali iuan ma timouikakan.

3. ¿Tleka uelis tiknotsaskej Jehová ye toTajtsin uan tlen timomachtiskej?

³ Jehová uelis tiknotsaskej ken toTajtsin porque ye techmaka toyolilis (Sal. 36:9). Moneki tiktlakamatiskej porque ye toTajtsin. Ye techteochiuas uan tiyolpakiskej tla tikchiuaskej tlen ye technauatia (Heb. 12:9, TNM). Uelis  tikseliskej yolilistli tlen amo keman tlamis maski tiaskej iluikak noso tichantiskej nikan tlaltikpak. Pero axkan noijki ok techpaleuia. Itech nin tlamachtil tikitaskej ken techititia Jehová techtlasojtla uan tleka tikneltokaj amo keman techkauas. Achto ma tikitakan tleka tikneltokaj toTajtsin sapanoua techtlasojtla uan techmaluia.

4. ¿Tleka miakej kitaj oui kinotsaskej Jehová ken toTajtsin?

⁴ ¿Tikitaj oui tiknotsaskej Jehová ken toTajtsin? Miakej kimachiliaj amitlaj inpati ixpan toTajtsin Dios. Amo kineltokaj kitekipachoua tlen techpanoua. Pero toTajtsin ye techtlasojtla uan amo kineki ijkon ma timomachilikan. Ye techmaka toyolilis uan kineki ma tikixmatikan uan iuan ma timouikakan. Ik non, ijkuak tlatitlanil Pablo okatka Atenas, okinmilui akinmej ompa okatkaj: Jehová “Dios amo wejka kajki de tejwah tinochteh” (Hech. 17:24-29). ToTajtsin Dios kineki iuan ma timotlapouikan ijkon ken se chokotsin motlapouia iuan itajtsin tlen sapanoua kitlasojtla.

5. ¿Tlen techmachtia tlen okipanok se tokni?

⁵ Miakej kitaj oui kitaskej Jehová ken itajtsin porque intatajuan amo okachi okintlasojtlakej noso amo keman okintlasojtlakej. Se tokni okijto: “Notajtsin otechuijuikaltiaya. Ijkuak opejki nimomachtia Biblia onimokuayejyekouaya amo keman nimouikaskia iuan toTajtsin tlen kajki iluikak. Pero ayakmo ijkon onimokuayejyeko ijkuak kuali onikixmatki Jehová”. ¿Noijki ijkon techpanoua? Tla ijkon techpanoua, amo ma timoyolkokokan porque uelis iuan timouikaskej. ToTajtsin sapanoua techtlasojtla uan amo onka okse ken ye.

6. Ijkon ken kijtoua Mateo 11:27, ¿tlen kichiua Jehová para ma tikitakan ye ken toTajtsin uan techtlasojtla?

⁶ ¿Tlen kichiua Jehová para ma tikitakan ye toTajtsin uan techtlasojtla? Otlanauati ma kijkuilokan itech Biblia tlen okichi uan tlen okijto Jesús (xiktlajtolti Mateo 11:27). Jesús nochipa okiteititi ken iyelis itajtsin, ik non, okijto: “Akin yonechitak kijtosneki yokitak Notajtsi” (Juan 14:9). Ye miak uelta okijto tlen kichiua Jehová uan ijkon okiteititi ye toTajtsin. Noijki itech naui Evangelios Jesús okitekitilti tlajtoli toTajtsin kanaj 165 veces ijkuak okinotski Jehová. ¿Tleka Jesús okinmilui oksekimej akin Jehová? Porque ye okinekiaya oksekimej ma kineltokakan Jehová ye toTajtsin uan techtlasojtla (Juan 17:25, 26).

7. ¿Tlen techmachtia Jehová ijkuak tikitaj ken okipaleui iKone?

⁷ Ma tikitakan Jehová ken okipaleui iKone uan tlen techmachtia. Ijkuak Jesús okitlatlaujtiaya Jehová, ye nochipa okikak uan okinankili (Juan 11:41, 42). Maski Jesús otlajyoui, okitak ken okipaleui iTajtsin uan noijki okitak okitlasojtlaya (Luc. 22:42, 43).

8. ¿Ken okiteititi Jehová okimalui Jesús?

⁸ Jesús okilnamiktoka iTajtsin okimakak yolilistli uan nochi tlen okipiaya. Ye okijto: “Niyolitok por Ye” (Juan 6:57). Jesús nochipa okineltokak iTajtsin kipaleuiskia uan ye okimakak tlen okipolouaya. Noijki okipaleui ma kipia chikauak itlaneltokilis (Mat. 4:4).

9. ¿Ken okiteititi Jehová okitlasojtlaya Jesús?

⁹ Jehová okimatilti Jesús ye nochipa okipaleuiaya uan ijkon okiteititi ye iTajtsin  tlen sapanoua tetlasojtla (Mat. 26:53; Juan 8:16). Maski amo okikixtili nochi ouijkayotl tlen okipixki, okipaleui ma tlaxiko. Jesús okimatiaya san panoskia nochi ouijkayotl tlen okipiaya (Heb. 12:2, TNM). Jehová okikakiaya iKone ijkuak okitlatlaujtiaya, okimakak tlen omonekiaya, okimachti uan okipaleui. Ijkon okiteititi okimaluiaya (Juan 5:20; 8:28). Axkan tikitaskej ken noijki techmaluia toTajtsin tlen kajki iluikak.

10. Ijkon ken kijtoua 1 Pedro 3:12, ¿ken kiteititia Jehová techtlasojtla?

¹⁰ Jehová techkaki ijkuak tiktlatlaujtiaj (xiktlajtolti 1 Pedro 3:12). Jehová techiluia nochipa iuan ma timotlapouikan uan amo san ualeua ma tiknotsakan (1 Tes. 5:17). Noijki uelis iuan timotlapouiskej san keman tiknekiskej uan san kanin tiyetoskej pero ma tikchiuakan ika tlakaitalistli. Ye nochipa techkaki ijkuak iuan timotlapouiaj. Okachi tiknekij timouikaskej iuan Jehová ijkuak tikajsikamatij ye techkaki. Salmista okijto: “Niktlasojtla Jehová porque ye nechkaki” (Sal. 116:1).

11. ¿Ken technankilia Jehová ijkuak tiktlatlaujtiaj?

¹¹ ToTajtsin amo san techkaki ijkuak tiktlatlaujtiaj ye noijki technankilia. Juan okijto: “Tikmatih Ye techkaki tla itla tiktlajtlaniliah non Ye kipaktia” (1 Juan 5:14, 15). Xamo Jehová ualeua amo technankilis ken tejuan tiknekij. Ye kimati tlen okachi techpaleuis, ik non, ualeua xamo amo technankilis noso kinekis ma timochiakan (2 Cor. 12:7-9).

12, 13. ¿Ken techmaka Jehová tlen techpoloua?

¹² Jehová techmaka tlen techpoloua. Ye kichiua ijkon ken kinnauatia tetajmej ma kinmaluikan akinmej inmiuan chantij (1 Tim. 5:8). Techmaka tlen ika timopanoltiskej. Ye amo kineki ma timotekipachokan tlen tikkuaskej, tlen tikonakiskej noso kanin tichantiskej (Mat. 6:32, 33; 7:11). Noijki yotechilui satepan techmakas nochi tlen techpolos porque techtlasojtla.

¹³ Pero Jehová okachi techpaleuia ma tikpiakan chikauak totlaneltokilis. ITlajtol techiluia akin ye, tlen kineki kichiuas, tleka tiyoltokej uan tlen panos satepan. Ye otechpaleui ma tikixmatikan ijkuak totatajuan uan oksekimej tokniuan otechpaleuijkej ma tikmatikan tlen tlamachtia Biblia. Axkan kintlalia tlayekankej itech tlanechikol ma techpaleuikan. Noijki techpaleuiaj oksekimej tokniuan tlen kipiaj chikauak intlaneltokilis. Noijki techmachtia ijkuak timonechikouaj iuan oksekimej tokniuan. Ijkon techititia ye toTajtsin uan kitekipachoua kuali ma tiyetokan (Sal. 32:8).

14. ¿Tleka techmachtia Jehová uan ken kichiua?

¹⁴ Jehová techmachtia. Tejuan titlajtlakolejkej pero Jesús amo okatka tlajtlakole. Ik non, toTajtsin Dios techyektlalia ijkuak moneki uan amo san techmachtia. ITlajtol techiluia ye “kimilawa akin kitlasojtla” (Heb. 12:6, 7). Tlatlamantli techyektlalia. Ijkuak tiktlajtoltiaj Biblia noso ijkuak timonechikouaj tikkakij se tlamachtil tlen techpaleuis ma tikpatlakan seki tlamantli. Noijki techpaleuia ijkuak tlayekankej techiluiaj tlen moneki tikchiuaskej. Maski tlatlamantli techyektlalia Jehová, ye techyektlalia porque techtlasojtla (Jer. 30:11).

15. ¿Ken techmaluia Jehová?

¹⁵ Jehová techpaleuia ma titlaxikokan  ijkuak titlajyouiaj. ToTajtsin akin kajki iluikak techmaluia ijkuak titlajyouiaj ijkon ken se teta tlen kintlasojtla ikoneuan. Techpaleuia ika iespíritu santo uan ijkon ma tikpiakan chikauak totlaneltokilis (Luc. 11:13). Noijki techpaleuia kuali ma timomachilikan. Ye techiluia satepan kuali tiyetoskej uan non techpaleuia ma titlaxikokan ijkuak titlajyouiaj. Ma tikilnamiktokan toTajtsin akin sapanoua techtlasojtla kiyektlalis nochi tlen axkan techtlajyouiltia. Tlen axkan techtlajyouiltia san panos pero tlen Jehová techmakas amo keman tlamis (2 Cor. 4:16-18).

16. ¿Tlen opanok ijkuak Adán amo okitlakamatki iTajtsin?

¹⁶ Jehová itlaj okichi ijkuak Adán amo okitlakamatki uan ijkon okiteititi ye techtlasojtla. Adán amo okitlakamatki, ik non, ixuiuan ayakmo opouiayaj iuan ifamilia Jehová uan ayakmo oyolpakiayaj (Rom. 5:12; 7:14). Pero Jehová itlaj okichi.

17. ¿Tlen san niman okichi Jehová ijkuak Adán amo okitlakamatki?

¹⁷ Jehová okitlajyouilti Adán pero ixuiuan okinmilui itlaj kichiuaskia. Ye san niman okijto akinmej kitlakamatiskiaj oksepa pouiskiaj iuan ifamilia (Gén. 3:15; Rom. 8:20, 21). Ijkon okiteititi ijkuak Jesús topatka omotemakak. Jehová okitemakak iKone ijkon okiteititi sapanoua techtlasojtla (Juan 3:16).

18. ¿Tleka tikneltokaj Jehová techtlasojtla ken tiikoneuan maski titlajtlakolejkej?

¹⁸ Jehová kineki ma tipouikan iuan ifamilia maski titlajtlakolejkej uan amo keman kijtoua tikkuejsouaj. Xamo ualeua tikyolkokoskej noso ualeua tikkauaskej pero ye amo keman techilkauas. Jesús okiteititi Jehová  sapanoua techtlasojtla ijkuak okijto se telpochtli okauilti itomin (Luc. 15:11-32). Itajtsin non telpochtli okimatiaya se tonal oksepa mokopaskia. Teta kuali okiseli itelpoch ijkuak oksepa omokopki ikalijtik. Tejuan noijki tla otitlajtlakolchijkej uan timoyolkopaj, toTajtsin Jehová oksepa techselis.

19. ¿Tlen kichiuas Jehová para kiyektlalis nochi tlen okijtlako Adán?

¹⁹ ToTajtsin kiyektlalis nochi tlen okijtlako Adán. Adán amo otetlakamatki, ik non, Jehová okinpejpenki 144,000 tlen yetoskiaj tekiuajkej uan teopixkej iuan Jesús ompa iluikak. Jesús uan akinmej tlanauatiskej kinpaleuiskej ayakmo ma yetokan tlajtlakolejkej akinmej chantiskej itech xochitlali. Saiktlami kiteititiskej kox tetlakamatij uan ijkuakon kiseliskej yolilistli tlen amo keman tlamis. Ijkuakon toTajtsin yolpakis porque ipan tlaltikpak chantiskej ikoneuan tlen ayakmo tlajtlakolejkej. Yetos sapanoua kuajkualtsin.

20. ¿Ken yokiteititi Jehová sapanoua techtlasojtla uan tlen tikitaskej itech okse tlamachtil?

²⁰ Jehová ye toTajtsin uan yokiteititi sapanoua techtlasojtla uan amo onka okse ken ye. Techkaki ijkuak tiktlatlaujtiaj, techmaka tlen techpoloua, techpaleuia ma tikpiakan chikauak totlaneltokilis, techmachtia uan techmaluia. Noijki sapanoua techteochiuas. Tiyolpakij porque toTajtsin techtlasojtla uan techmaluia. Itech okse tlamachtil tikitaskej ken tiktlasojkamatiliskej tejuan ken tiikoneuan porque techtlasojtla.