1. ¿Tlen okachi kipatioitaj akinmej kitekichiuiliaj Jehová?

 ¿TIKPATIOITA timouikas iuan Jehová? Tikneltokaj tikpatioita pero amo san tejuatsin ijkon tikchiua. Yiuejkika noijki miakej okipatioitayaj mouikaskej iuan Jehová (Sal. 104:​33, 34). Miakej okikajkej seki tlamantli para kitekichiuiliskej. Ijkon okichijkej nazareos tlen yiuejkika opouiayaj itech altepetl Israel. Pero xamo timotlajtlaniaj akinmej okatkaj uan tlen techmachtia tlen okichijkej.

2. (1) ¿Akinmej okatkaj nazareos? (Números 6:​1, 2). (2) ¿Tlen okinyoliniaya sekimej israelitas mamochiuakan nazareos?

² Tlajtoli “nazareo” kajki ika hebreo uan kijtosneki ikaj okipejpenkej noso ikaj omotemakaya para kichiuas itlaj miak ipati. Nin tlajtoli kinnamiki ijkon makinmiluikan akinmej okatkaj nazareos porque yejuan okikauayaj seki tlamantli para kitekichiuiliskej Jehová. Tlanauatil tlen okijkuilo Moisés okijtouaya se tlakatl noso se siuatl uelis kiluiskia Jehová kitekichiuiliskia ken nazareo kanaj keski xiuitl (xiktlajtolti Números 6:​1, 2). a Akin omochiuaya nazareo omonekiaya kintlakamatis seki tlanauatilmej tlen israelitas amo omonekiaya kintlakamatiskej. ¿Tlen okiyoliniaya ikaj mamochiua nazareo? Ikaj omochiuaya nazareo  porque okitlasojtlaya Jehová uan omotlasojkamatiaya porque okiteochiuaya (Deut. 6:5; 16:17).

3. ¿Tlen tikchiuaj ijkon ken nazareos okichiuayaj?

³ Itlanauatil Cristo okipatkayoti Tlanauatil tlen okijkuilo Moisés. Ikinon akinmej kitekichiuiliaj toTajtsin Dios ayakmo uelis mochiuaskej nazareos (Gál. 6:2; Rom. 10:4). Nazareos okitekichiuilijkej Jehová ika nochi inyolo. Tejuan noijki tiknekij tiktekichiuiliskej Jehová ika nochi toyolo, ika nochi toyolilis, ika nochi totlayejyekol uan ika nochi tochikaualis (Mar. 12:30). Ijkon tikiluiaj Jehová tikchiuaskej ijkuak ixpan timotemakaj uan tikiluiaj nochipa tiktekichiuiliskej. Ikinon moneki tikchiuaskej tlen Jehová kineki uan tikkauaskej seki tlamantli para okachi tiktekichiuiliskej. Axkan tikitaskej ken nazareos okichijkej tlen okiluijkej Jehová uan ken techpaleuis noijki matikchiuakan tlen tejuan otikiluijkej (Mat. 16:24). b

MATIKKAUAKAN SEKI TLAMANTLI PARA OKACHI TIKTEKICHIUILISKEJ JEHOVÁ

4. ¿Tlen amo okichiuayaj nazareos ijkon ken kijtoua Números 6:​3, 4?

⁴ (Xiktlajtolti Números 6:​3, 4). Amo otlakoniayaj akinmej okatkaj nazareos, amo okikuayaj uvas nion pasas. Pero oksekimej okoniayaj uan okikuayaj nochi non tlamantli porque amo tlajtlakoli. Biblia kijtoua toTajtsin Dios techtliokolia vino uan yolpaki akin koni (Sal. 104:​14, 15). Miakej oyolpakiayaj ijkuak okoniayaj vino. Pero akinmej okatkaj nazareos amo okikuayaj nochi non tlamantli nion okoniayaj porque okinekiayaj kitekichiuiliskej Jehová ika nochi inyolo. c

5. ¿Tlen okichijkej Madián uan Marcela uan tleka?

⁵ Tejuan noijki tikchiuaj ijkon ken nazareos ijkuak tikkauaj seki tlamantli para okachi tiktekichiuiliskej Jehová. Matikitakan tlen okichijkej Madián uan Marcela. Nin tokni uan isiua oneskej Colombia uan amitlaj okinpolouaya. Madián okitlaniaya miak tomin ikinon kualtsin okatka inkal. Pero yejuan okipatlakej seki tlamantli porque okinekiayaj okachi kitekichiuiliskej Jehová. Yejuan okijtojkej: “Otikijtojkej  ayakmo miak timotlakouiskiaj, otichantitoj itech se kali okachi tsikitsin uan otiknemakakej tocarro”. Madián uan Marcela amo omonekiaya ijkon kichiuaskiaj. Pero ijkon okichijkej porque okinekiayaj okachi tetlapouiskej. Yejuan pakij porque okipejpenkej ijkon kichiuaskej.

6. ¿Tleka sekimej tokniuan kikauaj seki tlamantli? (Noijki xikita dibujo).

⁶ Tejuan techpaktia tikkauaskej seki tlamantli para okachi tiktekichiuiliskej toTajtsin Dios (1 Cor. 9:​3-6). Jehová amo techiluia moneki ijkon tikchiuaskej. Noijki amo kijtosneki tlajtlakoli tikpiaskej miak tlamantli uan moneki tikkauaskej. Matikitakan tlen kichiuaj sekimej tokniuan para okachi kitekichiuiliskej Jehová. Sekimej kikauaj inkal, oksekimej kikauaj se tekitl kanin kuali okintlaxtlauiayaj uan oksekimej amo kimokouiaj se yolkatsintli para kimaluiskej. Sekimej tokniuan mokauaj inselti kanaj keski xiuitl noso amo san niman kinpia inkoneuan ijkuak monamiktiaj. Oksekimej tokniuan yauij tetlapouitiuij kanin okachi moneki maski nin kijtosneki kinkajteuaskej infamilia uan akinmej inuan mouikaj. Miakej tokniuan ijkon kichiuaj porque kinekij okachi kitekichiuiliskej Jehová. Jehová kipatioita nochi tlen tikchiuaj para okachi tiktekichiuiliskej (Heb. 6:10).

MATIYETOKAN TIYOLCHIKAUAKEJ

7. ¿Tleka ualeua se israelita okitaya oui yetos nazareo? (Números 6:5; noijki xikita dibujo).

⁷ (Xiktlajtolti Números 6:5). Amo omotsonkaltekiayaj akinmej okatkaj nazareos. Ijkon okiteititiayaj san Jehová okitlakamatiayaj. Se israelita omotaya kox yokipiaya miak xiuitl okatka nazareo porque omoskaltiaya itsonkal uan nochtin okitayaj. Akin okijtouaya yetos nazareo amo okitaya oui ijkon kichiuas tla oksekimej okipaleuiayaj uan okiyolchikauayaj. Pero ualeua israelitas amo okinpaleuiayaj akinmej okatkaj nazareos nion okintlakaitayaj. Matikitakan tlen okichijkej sekimej israelitas. Ijkuak okatka profeta Amós, sekimej israelitas tlen okixnamikiayaj Jehová okinmakayaj vino akinmej okatkaj nazareos. Xamo ijkon okintoktiayaj porque amo okinekiayaj makichiuakan tlen okiluijkej Jehová (Amós 2:12). Ualeua nonmej israelitas okitayaj oui yetoskej nazareos uan omonekiaya yetoskej yolchikauakej.

8. ¿Tlen omitspakti tlen okichi Benjamin?

⁸ Jehová techpaleuis matiyetokan tiyolchikauakej maski ualeua timomojtiaj titlajtoskej.  Matikitakan tlen okipanok se tokni tlen itoka Benjamin tlen chanti Noruega uan kipia majtlaktli xiuitl. Kanin momachtia omonechikojkej para kiteititiskej kipaleuiaj altepetl Ucrania porque ompa kajki guerra. Benjamin okijto san uejka yetoskia uan ijkon kiteititiskia amo kichiuaskia non tlamantli. Pero akin kimachtia okitak uan okilui: “Touan xiuiki. Xiualmotlalo. Timitschixtokej”. Benjamin omoyolchika uan omotoki inauak akin kimachtia uan okilui: “Ne amo nimokajkalakia itech política nion nikchiua tlen yejuan kichiuaj. Miakej akinmej kitekichiuiliaj Jehová tsaktokej porque amo yauij guerra”. Ye okajsikamatki tlen okijto Benjamin uan ayakmo itlaj okilui. Pero akinmej inuan omomachtiaya opejki kitlajtlaniaj tleka amo inuan otlakuikaya. Benjamin omomojti uan yokinekiaya chokas. Pero omoyolchika uan okinmilui tlen yokiluijka akin kinmachtia. Satepan okinmilui ipapanuan Jehová okipaleui makiyekijto tlen kineltoka.

9. ¿Ken uelis tikyolpaktiskej Jehová?

⁹ Oksekimej kitaj ijkuak tejuan tiktlakamatij Jehová uan kitaj okse tlamantli toyelis. Moneki tiyetoskej tiyolchikauakej tla tiknekij tikinmiluiskej akinmej inuan titekipanouaj noso akinmej inuan timomachtiaj tejuan tiiTlaixpantijkauan Jehová. Pero ualeua yetos okachi oui timoyekanaskej ika principios bíblicos porque oksekimej okachi kichiuaskej tlen amo kuali. Noijki tikitaskej oui tikintlapouiskej oksekimej kuali tlajtoli (2 Tim. 1:8; 3:13). Pero matikilnamiktokan tikyolpaktiaj Jehová ijkuak tikteititiaj amo tikchiuaj ijkon ken akinmej amo kitekichiuiliaj (Prov. 27:11; Mal. 3:18).

OKACHI MATIKPATIOITAKAN TIMOUIKASKEJ IUAN JEHOVÁ

10. ¿Tleka akinmej okatkaj nazareos okitayaj oui kichiuaskej tlen kijtoua Números 6:​6, 7?

¹⁰ (Xiktlajtolti Números 6:​6, 7). Akinmej okatkaj nazareos amo ueli yetoskiaj inauak se akin oixpoliuik. Xamo timokuayejyekouaj amo oui ijkon kichiuaskiaj. Se nazareo kitaskia oui ijkon kichiuaskia tla oixpoliuia se ifamiliar. ¿Tleka? Porque ijkuakon okitlaliliayaj seki tlamantli akin oixpoliuiaya uan omonekiaya yetoskej inauak akin oixpoliuik (Juan 19:​39, 40; Hech. 9:​36-40). Pero akinmej okatkaj nazareos  amo okichiuayaj non tlamantli. Yejuan okiteititiayaj otlaneltokayaj ijkuak amo okatkaj innauak infamiliares ijkuak oixpoliuiayaj. Pero nazareos amo inselti okatkaj porque Jehová nochipa okinpaleuiaya.

11. ¿Tlen moneki tikilnamiktoskej ijkuak itlaj tikpejpenaskej tikchiuaskej? (Noijki xikita dibujo).

¹¹ Tejuan amo tikajauilmatij otimotemakakej ixpan Jehová. Ikinon timochijchikauaj kuali tikpejpenaskej tlen tikchiuaskej uan timochijchikauaj kuali timouikaskej iuan tofamilia (Mat. 10:​35-37; 1 Tim. 5:8). Ualeua tikpejpenaskej itlaj tlen amo kinpaktis tofamiliares pero tejuan tiknekij tikyolpaktiskej Jehová.

12. ¿Tlen okichi Alexandru ijkuak okiluijkej ayakmo mamomachti uan tlen amo okichi?

¹² Matikitakan tlen okichi Alexandru uan isiua tlen itoka Dorina. Yejuan yomomachtiayaj se xiuitl. Pero Dorina okijto ayakmo momachtiskia uan okinekiaya Alexandru noijki ayakmo mamomachti. Pero ye okiyekilui ok okinekiaya momachtis. Dorina amo okipakti uan okilui ayakmo mamomachti. Ye okitak oui maski omochijchikauaya kajsikamatis isiua. Ualeua ayakmo okinekiaya momachtis porque Dorina okiteneuaya uan okitoktiaya tlen amo kuali. Pero Alexandru okachi okipatioitaya mouikas iuan Jehová uan noijki okitlasojtlaya isiua uan okitlakaitaya. Kuali tlen okichi Alexandru porque satepan isiua opejki momachtia Biblia uan omoapolakti. (Xikalaki itech jw.org uan xikita video Alexandru uan Dorina Văcar: Akin tetlasojtla kimati mochias uan yolkuali uan kajki itech sección “Okipatlakej innemilis ijkuak opejki momachtiaj”).

13. ¿Ken uelis tikteititiskej tiktlasojtlaj Jehová uan tofamilia?

¹³ Jehová okitlali familia ikinon kineki matipakikan (Efes. 3:​14, 15). Tla tiknekij tipakiskej, moneki tikchiuaskej tlen technauatia Jehová ijkon ken ye kineki. Jehová kita uan kipatioita nochi tlen tikchiuaj para okachi tiktekichiuiliskej. Pero noijki kineki matikinmaluikan akinmej pouij itech tofamilia, matikintlasojtlakan uan matikintlakaitakan (Rom. 12:10).

MATIKINYOLCHIKAUAKAN OKSEKIMEJ MAKICHIUAKAN IJKON KEN NAZAREOS OKICHIUAYAJ

14. ¿Akinmej moneki tikinyolchikauaskej?

¹⁴ Moneki tikkauaskej seki tlamantli tla tiktlasojtlaj Jehová uan tiknekij okachi tiktekichiuiliskej. Ualeua tikitaj oui ijkon  tikchiuaskej. ¿Ken uelis timosepanyolchikauaskej para okachi tiktekichiuiliskej Jehová? Uelis ijkon tikchiuaskej ika tlen tikijtouaj (Job 16:5). ¿Tikixmati ikaj tlen mochijchikaua kikauas seki tlamantli porque kineki okachi kitekichiuilis Jehová? ¿Tikixmati se telpochtli tlen mochijchikaua kiteititis amo kichiua ijkon ken akinmej inuan momachtia? ¿Tikixmati se tokni noso se akin momachtijtok tlen ifamiliares amo kinpaktia mamouika iuan Jehová? Matimochijchikauakan nochipa matikinyolchikauakan oksekimej uan matikinmiluikan kiteititiaj yolchikauakej porque kikauaj seki tlamantli para okachi kitekichiuiliskej Jehová (Filem. 4, 5, 7).

15. ¿Tlen kichiuaj sekimej tokniuan para kinpaleuiskej akinmej okachi kitekichiuiliaj Jehová?

¹⁵ Uelis okachi tikinpaleuiskej tokniuan tlen okachi kitekichiuiliaj Jehová (Prov. 19:17; Heb. 13:16). Ijkon okichi se tokni tlen yikipia miak xiuitl uan chanti Sri Lanka. Ye okiluijkej okachi kimakaskiaj tomin. Ikinon okijto kinpaleuiskia ome tokniuan tlen okitayaj oui yetoskej precursoras porque amo okipiayaj tomin. Sejse metstli okixelouaya tomin uan okinmakaya para makitlaxtlauakan inteléfono. Kualtsin tlen okichi nin tokni.

16. ¿Tlen techmachtia tlen okichijkej akinmej okatkaj nazareos?

¹⁶ Axkan otikitakej miak ipati tlen okichiuayaj akinmej okatkaj nazareos. Noijki otikitakej Jehová kimati tiknekij tikyolpaktiskej. Ye kipatioita ijkuak timochijchikauaj tikkauaskej seki tlamantli para okachi tiktekichiuiliskej ijkon ken otikiluijkej ijkuak ixpan otimotemakakej. Noijki techkauilia matikteititikan tiktlasojtlaj (Prov. 23:​15, 16; Mar. 10:​28-30; 1 Juan 4:19). Tlen okichijkej akinmej okatkaj nazareos techititia Jehová kipatioita ijkuak tikkauaj seki tlamantli para okachi tiktekichiuiliskej. Ikinon nochipa matiktekichiuilikan Jehová ika nochi toyolo.