Nopapanuan sapanoua okinpaktiaya yetoskej católicos. Pero ijkuak okitakej itoka toTajtsin Dios itech Biblia, opakej mochiuaskej iTlaixpantijkauan Jehová. Nopapa okatka kojxinki pero ayakmo okinchijchi iimágenes Jesús uan okiyektlali tlakxitlan tokalijtik para ompa mamonechikokan tokniuan. Itech non kali achto opejki timonechikouaj ompa San Juan del Monte tlen poui altepetl Manila kanin okiualnauatiayaj Filipinas.

Onineski 1952 uan nopapanuan san niman onechpaleuijkej manikixmati Jehová ijkon ken yokinpaleuijtokaj chikome nokniuan. Ijkuak okachi onimoskaltijtiaya, nopapa onechiluiaya mostlatika maniktlajtolti se capítulo tlen kijtoua Biblia. Noijki nouan omomachtiaya seki amatlajkuilolmej. Ualeua nopapanuan okinkalotiayaj tlayekankej itech circuito uan tokniuan tlen otlapaleuiayaj Betel. Otechyolchikauayaj uan otipakiayaj ijkuak otechtlapouiayaj tlen okichiuayaj. Non otechpaleui okachi matikpatioitakan tiktekichiuiliskej Jehová.

Sapanoua onechpaleui tlen okichijkej nopapanuan porque yejuan nochipa okitekichiuilijkej Jehová. Nomama omokokouaya uan oixpoliuik ikinon 1971 ne uan nopapa opejki titlapaleuiaj ken precursores regulares. Pero nopapa oixpoliuik 1973 ijkuak ne onikpiaya 20 xiuitl. Onimomachiliaya noselti ijkuak ijkon opanok. Onechpaleui amo sapanoua manimoyolkoko nion manikkaua Jehová tlen onimomachti itech Biblia. Porque non yetoskia ken se tepostli tlen ika kiketsaltiaj barco (Heb. 6:19). Amo miak tonal opanok ijkuak oixpoliuik nopapa uan onechiluijkej manitlapaleuiti ken precursor especial itech se isla itoka Coron tlen kajki ompa Palawan.

Oniajsito Coron ijkuak onikpiaya 21 xiuitl. Sapanoua onimotlajtlachialti ijkuak oniajsito non isla porque amo okatka luz, atl, carros nion motos porque kanin ne onimoskalti otikpiayaj nochi non  tlamantli. Ompa amo miakej okatkaj tokniuan ikinon ualeua onitetlapouiaya noselti. Sapanoua onimoyolkokouaya ijkuak ompa oniajsito porque onikinmilnamikiaya nofamilia uan noyolikniuan. Ijkon onimomachili se metstli. Mojmostla onikinmitaya sitlalimej uan onichokaya. Ualeua oniknekiaya nimokopas nokalijtik uan ayakmo ompa nitlapaleuiskia.

Ijkuak onimomachiliaya noselti oniktlatlaujtiaya Jehová uan onikiluiaya ken onimomachiliaya. Onikilnamikiaya seki tlamantli tlen oniktlajtolti itech Biblia uan itech toamatlajkuiloluan uan non onechyolchikauaya. Onikilnamikiaya Salmo 19:14 kanin kijtoua Jehová ye ‘toTepexi uan techmakixtia’. Onikajsikamatki Jehová nechpaleuiskia tla nimokuayejyekoskia ken iyelis uan tlen okichijchi. Sapanoua onechpaleui se tlamachtil tlen kajki itech revista Akin Tetlapouijtok uan itoka “Usted nunca está solo”. a Oniktlajtolti miak uelta non tlamachtil. Sapanoua onikpatioitaya ijkuak ijkon onikchiuaya porque yetoskia ken onikatka iuan Jehová. Ijkuakon oniktlatlaujtiaya, onimomachtiaya uan onimokuayejyekouaya.

Ijkuak oniajsito Coron onechiluijkej manitlapaleui ken tlayekanki. Ompa san ne onitlapaleuiaya ken tlayekanki ikinon ne onikpanoltiaya tlamachtil Toteki akinmej tikchiuaj ken Cristo, tlamachtil para matitetlapouikan, nechikol para matimomachtikan Biblia uan revista Akin Tetlapouijtok. Noijki ne onikintemakaya tlamachtilmej saiktlami semana. Nochi tlen onikchiuaya onechpaleui ayakmo manimomachili noselti.

Kualtsin otitetlapouiayaj ompa Coron uan sekimej tlen otikinmachtiayaj satepan omoapolaktijkej. Pero noijki okatka seki tlamantli oui. Ualeua otinejnemiayaj tlajko tonal para tiajsitiuij kanin otitetlapouiayaj uan amo otikmatiayaj kanin timokalotiskiaj ijkuak tlayouaskia. Noijki otitetlapouiayaj itech miakej islas tsikitsitsintin. Oniaya itech lancha ijkuak ompa onitetlapouiaya maski ualeua otechtlauitekiaya mar porque oejekakiauiaya uan ne amo onikmatiaya niajkuis. Pero Jehová nochipa onechmalui uan onechpaleui. Onikajsikamatki Jehová onechyektlalijtoka porque satepan nikchiuaskia okse tekitl okachi oui.

1978 onechiluijkej manitlapaleuiti Papúa Nueva Guinea tlen kajki ik norte ompa Australia. Non altepetl sapanoua tepeyo uan ueyi ijkon ken altepetl España. Ompa chantij kanaj tres millones uan tlajtouaj kanaj 800 tlajtolmej. Pero onechpaleui inuan manimotlapoui porque miakej otlajtouayaj tlajtoli tlen itoka pidgin de Nueva Guinea tlen noijki moixmati ken tok pisin.

Achto onechtitlankej manitlapaleuiti itech se tlanechikol kanin tlajtouaj inglés ompa Port Moresby kanin kiualnauatiaj Papúa Nueva Guinea. Pero satepan onitlapaleuito okse tlanechikol kanin tlajtouaj tok pisin uan opejki nimomachtia non tlajtoli. Onitetlapouiaya ika non tlajtoli uan non onechpaleui san niman manimomachti tok pisin. Noijki san niman opejki nitlamachtia itech tlanechikol ika non tlajtoli. Opanok se xiuitl uan onechtlajtlachialti tlen onechpanok. Onechiluijkej nitlapaleuiskia ken tlayekanki itech circuito uan niaskia nikintlajpaloti tokniuan tlen otlajtouayaj tok pisin. Yejuan ochantiayaj itech miakej altepemej.

 Uejka okatkaj tlanechikolmej ikinon nouian oniaya ijkuak otikinchiuayaj uejueyij nechikolmej. Onimomachiliaya noselti ijkuak opejki nitlapaleuia porque amo onikixmatiaya non altepetl, amo onikmatiaya tlajtoli nion onikinmixmatiaya incostumbres. Non altepetl tepeyo ikinon omonekiaya nias itech se avión uan ijkon onikchiuaya chichikometika. Ualeua noselti oniaya itech se avión tlen omotaya yiijtlakauiskia. Sapanoua onimomojtiaya ijkon ken ijkuak oniaya itech lancha.

Ompa san sekimej okipiayaj teléfono ikinon tokniuan tlen oniknekiaya nikintlajpaloti onikintitlaniliaya cartas. Ualeua ijkuak oniajsiaya kanin okatkaj tlanechikolmej, ayamo oajsiayaj nocartas ikinon onikintlajtlaniaya akinmej ik ompa ochantiayaj kanin uelis nikinmajsiskia tokniuan. Kualtsin onechseliayaj tokniuan ijkuak onikinmajsiaya uan non onechilnamiktiaya tleka onikintlajpalouaya. Miak uelta onikitak ken onechpaleui Jehová uan non okichi manikmachili nouan okatka.

Ijkuak achto onikintlajpaloto tokniuan ompa isla tlen itoka Bougainville, onechtlajpalojkej se tokni iuan isiua uan oixuetskayaj. Yejuan onechtlajtlanijkej: “¿Techilnamiki?”. ¡Kuali onikinmilnamikiaya! Yejuan onikintlapoui ijkuak oniajsito Port Moresby uan onikinmachtiaya tlen kijtoua Biblia. Satepan opejki kinmachtia okse tokni tlen ompa ochantiaya. Pero ijkuakon yomoapolaktijkaj. Ijkon Jehová sapanoua onechteochi ijkuak onikatka eyi xiuitl ompa Papúa Nueva Guinea.

1978 onikiski Coron uan oksekan onitlapaleuito. Pero ijkuak ayamo oniaya, onikixmatki se tokni yolkuali itoka Adel uan ye kuali okitekichiuiliaya Jehová uan chikauak otekipanouaya. Ye iselti okiskaltijtoka Samuel uan Shirley, okimaluiaya imama uan noijki otlapaleuiaya ken precursora regular. Mayo 1981 oksepa onia Filipinas para iuan nimonamiktis. San sekan opejki titlapaleuiaj ken precursores regulares uan otikmaluiayaj tofamilia.

1983 onechiluijkej manitlapaleui ken precursor especial maski onikpiaya nofamilia. Onechiluijkej matitlapaleuitij ompa isla Linapacan tlen poui altepetl Palawan. Ompa otiajkej maski uejka okatka uan ayamo okatkaj tokniuan. Oixpoliuik imama Adel ijkuak ompa yotitlapaleuijtokaj kanaj se xiuitl. Sapanoua otitetlapouiayaj uan non otechpaleui amo okachi matimoyolkokokan. Miakej akinmej otikinmachtiayaj okipatlayaj innemilis ikinon omonekiaya se kali kanin timonechikoskej itech non isla. Ikinon otikchijkej se kaltsintli. Sapanoua otipakej porque otimonechikojkej 110 ijkuak otikilnamikej imikilis Jesús uan yikin eyi xiuitl ompa otitlapaleuiayaj. Satepan miakej omoapolaktijkej ijkuak ayakmo ompa otikatkaj.

1986 onechtitlankej manitlapaleuiti itech se isla tlen itoka Culion. Ompa miakej omokokouayaj uan okipiayaj lepra. Satepan nosiua Adel noijki okiluijkej matlapaleui ken precursora especial. Otimomojtiayaj ijkuak opejki tikintlapouiaj akinmej okipiayaj lepra. Pero tokniuan tlen ompa ochantiayaj otechiluiayaj amo matimomojtikan porque yokinpajtijtokaj uan ayakmo techpanoltiliskiaj kokolistli. Sekimej tlen ok omokokouayaj omonechikouayaj ikalijtik se  tokni. Satepan ayakmo otimotekipachojkej uan otipakiayaj tikinmachtiskej kuali yetoskej satepan akinmej okipiayaj non kokolistli. Porque yejuan okimachiliayaj amo okintlasojtlaya toTajtsin Dios nion okintlasojtlayaj oksekimej. Ijkuak otikinmiluiayaj yejuan ayakmo keman mokokoskiaj sapanoua opakiayaj uan non noijki otechyolpaktiaya (Luc. 5:​12, 13).

¿Tlen okichijkej Samuel uan Shirley ijkuak otiajsitoj Culion? Otikinmiluijkej touan matlapaleuitij ome ichpochmej tlen ochantiayaj Coron uan ijkon Samuel uan Shirley kipiaskiaj akinmej inuan mouikaskiaj. Ijkon nonmej tokniuan uan tokoneuan opakiayaj kinmachtiskej oksekimej tlen kijtoua Biblia. Yejuan okinmachtiayaj konemej uan tejuan otikinmachtiayaj tetajmej. Ualeua otikinmachtiayaj hasta 11 familias. Satepan miakej opejkej tlaneltokaj uan ijkon omochi okse tlanechikol.

Ijkuakon san ne onitlapaleuiaya ken tlayekanki ik kanin otikatkaj. Ikinon tokniuan tlen otlapaleuiayaj Betel onechiluijkej manikyekana tlanechikol tlen okatka ompa Culion uan omonechikouayaj chikueyi tokniuan. Noijki onechiluijkej manikyekanati nechikol itech altepetsintli Marily kanin omonechikouayaj chiknaui tokniuan. Otiayaj itech mar para ompa tiajsiskiaj uan otiuejkauayaj eyi hora. Ijkuak otlamiaya tonechikol otiayaj titlamachtitiuij Biblia itech se altepetsintli itoka Halsey uan omonekiaya tinejnemiskej itech tepeyo.

Satepan otikchijchijkej se kali kanin timonechikoskiaj ompa Marily uan noijki otikchijkej okse ompa Halsey porque miakej omochijkej iTlaixpantijkauan Jehová. Tokniuan uan akinmej omomachtiayaj otlapaleuijkej uan okitemakakej tlen omonekiaya para makinchijchiuakan nonmej kalmej ijkon ken okichijkej akinmej ochantiayaj ompa Linapacan. Kali tlen okatka ompa Marily oakiayaj kanaj 200 personas uan noijki okiyektlaliayaj ijkuak ompa okinchiuayaj uejueyij nechikolmej.

1993 opejki titlapaleuiaj itech circuito ompa Filipinas porque Samuel uan Shirley yomoskaltijkaj. Satepan itech xiuitl 2000 onia onimomachtito Tlamachtil tlen kiseliaj tlayekankej uan siervos ministeriales para ijkon uelis nitlamachtiskia non tlamachtil. Ne onikmachiliaya amo uelis nikchiuaskia  non tekitl pero Adel nochipa onechyolchikauaya uan onechiluiaya Jehová nechpaleuiskia manikchiua (Filip. 4:13). Adel onechyolchikauaya porque ye kuali okitekichiuiliaya Jehová maski omokokouaya.

2006 tepajtijkej okiluijkej nosiua okipiaya párkinson ijkuak ne onitlamachtijtoka. Sapanoua otechtlajtlachialti tlen otechiluijkej. Ikinon onikilui nosiua matimokopakan tokalijtik para nikmaluiskia pero ye onechilui: “Ne nikneltoka Jehová techpaleuis matiktekichiuilikan ken moneki ikinon xiktemo se tepajti para manechpaleui”. Adel ok okitekichiuili Jehová chikuase xiuitl uan amo okijtouaya kox sapanoua omokokouaya. Ye otetlapouiaya itech isilla de ruedas porque ayakmo onejnemiaya. Noijki ijkuak otimonechikouayaj ye otlanankiliaya san tepitsin porque ayakmo okachi otlajtouaya. Tokniuan okitlajkuililiayaj porque otlaxikouaya uan ijkon okichijkej hasta 2013 ijkuak oixpoliuik. 30 xiuitl onikatka iuan nosiua tlen nochipa onechpaleuiaya uan onechtlasojtlaya. Pero oksepa opejki nimomachilia noselti ijkuak ayakmo nouan okatka uan onimoyolkokouaya.

Adel kinekiskia maniktekichiuili Jehová ijkon ken otiktekichiuiliayaj ikinon ijkon onikchi. Desde 2014 hasta 2017 onechiluijkej manikintlajpaloti tokniuan tlen tlajtouaj tagalo itech altepemej kanin amo techkauiliaj matiktekichiuilikan Jehová. Satepan onikintlajpaloto tokniuan tlen noijki tlajtouaj tagalo ompa Taiwán, Estados Unidos uan Canadá. 2019 onia onitlamachtito Tlamachtil para matetlapouikan Tekiuajkayotl tlen okichiuayaj ika inglés ompa India uan Tailandia. Sapanoua onipaki ijkuak ijkon onitlapaleui. Okachi nipaki ijkuak okachi niktekichiuilia Jehová.

Sapanoua nikintlasojtla tokniuan kanin nitlapaleuia. Ikinon nikita oui nikinkauas ijkuak oksekan nitlapaleuiti. Pero nikkauilia Jehová manechpaleui ijkuak ijkon nechpanoua. Ye miak uelta yonechpaleui uan non nechyolchikaua ijkuak mopatla nonemilis. Axkan nitlapaleuijtok ken precursor especial ompa Filipinas. Sapanoua nipaki kanin axkan nimonechikoua porque tokniuan nikinmita ken nofamilia tlen nechtlasojtlaj uan nechmaluiaj. Noijki sapanoua nipaki porque Samuel uan Shirley tlaneltokaj ijkon ken otlaneltokaya inmama (3 Juan 4).

Yonikixnamik miak tlamantli ijkon ken ijkuak onikitak nosiua sapanoua otlajyoui porque omokokouaya. Noijki miak uelta yomopatlak nonemilis. Pero yonikitak Jehová miak uelta yonechpaleui porque ye touan kajki (Hech. 17:27). “Ima Jehová amo tsikitsin para tikijtoskej amo uelis” techpaleuis noso amo techyolchikauas maski uejka tiyetoskej (Is. 59:1). Sapanoua nimotlasojkamati porque Jehová amo keman onechka noselti ken yetoskia se tepexitl kanin nimopaleuia.