1, 2. (1) ¿Keman tikitaj oui titetlapojpoluiskej? (2) ¿Ken okiteititi Denise otetlapojpolui?

 ¿TIKITAJ oui titetlapojpoluiskej? Miakej kitaj oui tetlapojpoluiskej. Pero okachi kitaj oui kitlapojpoluiskej akin itlaj kijtoua noso itlaj kichiua tlen sapanoua teyolkoko. Pero uelis titetlapojpoluiskej uan tikilkauaskej tlen otechtoktijkej. Matikitakan ken otetlapojpolui se tokni itoka Denise. a 2017 Denise uan ifamilia oyajkej otlaixmatitoj kanin kajki kali kanin techyekanaj tiiTlaixpantijkauan Jehová. Ijkuak omokopatoj uan oyayaj itech incarro, se tlakatl okinkuitikiski ika icarro. Denise ayakmo okimatki tlen opanok pero ijkuak oijsako okiluijkej ikoneuan sapanoua omokojkojkej uan inamik oixpoliuik. Ye okijto ken omomachiliaya. Okijto: “Sapanoua onimoyolkokouaya uan ayakmo onikmatiaya tlen nikchiuas”. Satepan okimatki non tlakatl amo okinkuititiski porque otlauanki noso okintekitilti drogas. Ikinon okitlatlaujti Jehová makiyolseui uan ayakmo makikualani tlen okichi tlakatl.

² Okiteluijkej non tlakatl uan okijtojkej amo okinekiaya kimiktis inamik tokni pero uelis kitsakuaskiaj tla kitaskiaj ye itlajtlakol. Pero se policía okilui Denise omonekiaya kijtos tlen opanok uan ijkon kimatiskiaj kox kitsakuaskiaj non tlakatl. Denise okijto: “Amo oniknekiaya oksepa nikilnamikis tlen opanok. Onikmachili ken yetoskia oksepa okitlapojkej kanin onimotek uan onechtlalilijkej miak istatl”. Opanok seki semanas uan Denise oyajki kanin kixkomakaskiaj non tlakatl uan kijtoskia  tlen opanok. Denise okilui akin tlaixkomaka makiknomati non tlakatl. b Ijkuak ijkon okijto, akin tlaixkomaka opejki choka uan okijto: “Yinikuika 25 xiuitl nitlaixkomaka uan amo keman ikaj ijkon onechiluiaya. Yikin axkan nikita ikaj melauak tetlasojtla uan tetlapojpoluia porque nochtin oksekimej amo kinekij manikiknomati akin itlaj okintokti”.

3. ¿Tlen okipaleui Denise matetlapojpolui?

³ ¿Tlen okipaleui Denise matetlapojpolui? Ye omokuayejyeko ken Jehová tetlapojpoluia (Miq. 7:18). Tikintlapojpoluiskej oksekimej tla melauak tiktlasojkamatiliaj Jehová techtlapojpoluia.

4. ¿Tlen kineki Jehová matikchiuakan? (Efesios 4:32).

⁴ Jehová melauak techtlapojpoluia uan kineki tejuan noijki matikintlapojpoluikan oksekimej (xiktlajtolti Efesios 4:32). Ye kineki matikintlapojpoluikan akinmej techyolkokouaj (Sal. 86:5; Luc. 17:4). Axkan timomachtiskej eyi tlamantli tlen techpaleuis matitetlapojpoluikan.

MATIKIJTOKAN KEN TIMOMACHILIAJ

5. ¿Ken timomachiliaj ijkuak ikaj techyolkokoua? (Proverbios 12:18).

⁵ Xamo ikaj kijtos noso kichiuas itlaj tlen sapanoua techyolkokos pero okachi timoyolkokouaj ijkuak se toyolikni noso se tofamiliar itlaj techtoktia (Sal. 55:​12-14). Ualeua ijkuak sapanoua timoyolkokouaj xamo tikmachiliaj ken yetoskia ikaj techtsopitia ika se espada (xiktlajtolti Proverbios 12:18). Xamo tikijtoskej amo timoyolkokouaj uan amitlaj techpanoua. Pero tla ijkon tikchiuaskej yetoskia ken techtsopitiskiaj ika se cuchillo uan ompa mokaua uan amitlaj tikchiuaj para tikmokixtiliskej. Amo techpaleuis kuali matimomachilikan tla tikijtoskej amitlaj techpanoua.

6. ¿Ken timomachiliaj ijkuak ikaj itlaj techtoktia?

⁶ Xamo san niman tikualanij ijkuak ikaj itlaj techtoktia. Biblia kijtoua uelis ijkon techpanos pero noijki kijtoua amo san matikualantokan (Sal. 4:4; Efes. 4:26). ¿Tleka ijkon kijtoua? Porque ualeua ijkuak tikualanij xamo tikchiuaskej itlaj amo kuali (Sant. 1:20). Matikilnamiktokan tinochtin tikualanij ijkuak itlaj techtoktiaj pero tejuan tikijtoskej kox nochipa tikualantoskej.

7. Xikyekijto ken timomachiliaj ijkuak ikaj techyolkokoua.

⁷ Amo kuali timomachiliaj ijkuak ikaj techyolkokoua. Matikitakan tlen okipanok se tokni itoka Ann. Ye okijto: “Ijkuak onikatka nitakotsin, nopapa okikajte nomama uan omonamikti iuan siuatl tlen onechmaluiaya. Onikmachili noselti onikatka. Ijkuak yejuan okinpixkej inkoneuan onikmachili nopapa ayakmo onechtlasojtlaya. Onimokuayejyekouaya amikaj onechtlasojtlaya”. Noijki se tokni tlen itoka Georgette okijto ken omomachili ijkuak okimatki inamik okikajkaya. Ye okijto: “Sapanoua onimoyolkoko porque kuali otimouikayaj desde ijkuak otikatkaj tikonemej. Uan san sekan otiktekichiuiliayaj Jehová ken precursores”. Okse tokni tlen itoka Naomi okijto: “Amo keman onimokuayejyeko nonamik nechyolkokoskia. Okiteititi ayakmo onechtlasojtlaya ijkuak onechilui san ichtaka okitaya pornografía”.

8. (1) ¿Tleka moneki matitetlapojpoluikan? (2) ¿Ken techpaleuia ijkuak titetlapojpoluiaj? (Noijki xikita recuadro “ ¿Tlen nikchiuas tla nimoyolkokoua porque itlaj onechtoktijkej?”).

⁸ Tejuan amo uelis tikinmiluiskej oksekimej tlen moneki kijtoskej noso tlen kichiuaskej. Pero  uelis tikpejpenaskej tlen tikchiuaskej ijkuak oksekimej itlaj techtoktiaj. Uan ¿tlen moneki tikchiuaskej? Moneki matitetlapojpoluikan. Ijkon tikchiuaj porque tiktlasojtlaj Jehová uan ye kineki ijkon matikchiuakan. Tla san tikualantoskej uan amo titetlapojpoluiskej, tikchiuaskej tlen amo kuali uan xamo timokokoskej (Prov. 14:​17, 29, 30). Matikitakan tlen okijto se tokni itoka Christine: “Ijkuak san nimoyolkokoua ayakmo niixuetska, ayakmo kuali nitlakua uan ayakmo kuali nikochi. Ayakmo nikmati tlen nikchiuas ikinon ayakmo kuali nimouika iuan nonamik uan noijki ayakmo kuali nimouika inuan oksekimej”.

9. ¿Tleka moneki matikilkauakan tlen oksekimej techtoktiaj?

⁹ Tla akin otechyolkoko amo keman techiluia matiktlapojpoluikan uelis tikchiuaskej seki tlamantli para amo san matimoyolkokojtokan. Tokni Georgette tlen otimotlapouijkej itech párrafo 7 okijto: “Amo san niman onikilka tlen onechtokti akin iuan onimonamiktijka uan sapanoua onechkualani pero satepan kuali onimomachili uan ayakmo onikualanki”. Amo tikinkokoliaj oksekimej ijkuak tikilkauaj tlen otechtoktijkej. Non sapanoua techpaleuia porque amo san tikilnamiktokej tlen otechtoktijkej uan okachi tipakij (Prov. 11:17). Xamo yotikijtojkej ken timomachiliaj pero ok tikitaj oui titetlapojpoluiskej. Matikitakan okse tlamantli tlen techpaleuis matitetlapojpoluikan.

AMO SAN MATIKILNAMIKTOKAN TLEN OTECHTOKTIJKEJ

10. ¿Tleka amo san niman tikilkauaj tlen otechtoktijkej? (Noijki xikinmita dibujos).

¹⁰ ¿Tlen techpaleuis ayakmo matikilnamiktokan tlen otechtoktijkej? Matikilnamikikan amo san niman tikilkauaskej tlen otechtoktijkej. Matimokuayejyekokan ikaj itlaj omochi uan omokojko. Akin ijkon okipanok moneki mochias porque amo san niman pajtis. Tejuan noijki amo san niman tikilkauaskej tlen otechtoktijkej uan amo san niman titetlapojpoluiskej (Ecl. 3:3; 1 Ped. 1:22).

11. ¿Ken techpaleuia matitetlapojpoluikan ijkuak timotlatlaujtiaj?

¹¹ Noijki matikiluikan Jehová matechpaleui  matitetlapojpoluikan. c Tokni Ann tlen otimotlapouijkej itech párrafo 7 okijto ken okipaleui ijkuak omotlatlaujti. Ye okijto: “Onikilui Jehová matechtlapojpolui porque amo kuali tlen otikchijkej. Satepan onikinmijkuilili se carta nopapa uan isiua kanin onikinmilui yonikintlapojpolui”. Non tokni okitak oui ijkon kichiuas pero ye okijto: “Onimochijchika nitetlapojpoluis ijkon ken Jehová kichiua uan xamo se tonal nopapa uan isiua kinekiskej momachtiskej Biblia”.

12. ¿Tleka moneki matikneltokakan tlen Jehová techiluia uan amo tlen tejuan tiknekij? (Proverbios 3:​5, 6).

¹² Matikneltokakan tlen techiluia Jehová uan amo matimokuayejyekokan tejuan okachi tikmatij tlen tikchiuaskej (xiktlajtolti Proverbios 3:​5, 6). Jehová okachi kimati tlen okachi techpaleuis (Is. 55:​8, 9). Ye amo keman techiluis matikchiuakan itlaj tlen techtlajyouiltis. Ikinon ijkuak techiluia matitetlapojpoluikan matikneltokakan sapanoua techpaleuis tla ijkon tikchiuaskej (Sal. 40:4; Is. 48:​17, 18). Amo keman titetlapojpoluiskej tla san tikchiuaskej tlen tejuan tiknekij (Prov. 14:12; Jer. 17:9). Tokni Naomi tlen otimotlapouijkej itech párrafo 7 okijto: “Achto onimokuayejyekouaya amo keman niktlapojpoluis nonamik porque okitaya pornografía. Amo oniknekiaya oksepa manechyolkoko noso makilkaua tlen onechtokti. Ikinon onikijtouaya Jehová onechajsikamatiaya uan okimatiaya ken onimomachiliaya. Pero satepan onikajsikamatki maski Jehová kimati ken onimomachiliaya amo kijtosneki kita kuali tlen onikchijtoka. Ye kimati ken nimomachilia uan kimati amo san niman nikilkauas tlen onechtokti nonamik pero ye kineki manitetlapojpolui”. d

MATIKITAKAN TLEN KUALI KICHIUAJ OKSEKIMEJ

13. ¿Tlen moneki tikchiuaskej ijkon ken kijtoua Romanos 12:​18-21?

¹³ Ijkuak tiktlapojpoluiaj akin otechyolkoko amo san kijtosneki ayakmo tikijtoskej tlen otechtokti. Ok moneki itlaj tikchiuaskej. Moneki matiktlapojpoluikan tokni tlen otechyolkoko  (Mat. 5:​23, 24). Ayakmo matikualantokan uan matikteititikan titetlasojtlaj. Noijki ayakmo matikilnamikikan tlen otechtoktijkej uan matitetlapojpoluikan (xiktlajtolti Romanos 12:​18-21; 1 Ped. 3:9). ¿Tlen techpaleuis ijkon matikchiuakan?

14. ¿Tlen moneki tikchiuaskej uan tleka?

¹⁴ Matimochijchikauakan matikinmitakan akinmej itlaj otechtoktijkej ijkon ken Jehová kinmita. Ye kita tlen kuali tikchiuaj (2 Crón. 16:9; Sal. 130:3). Moneki matimochijchikauakan matikitakan tlen kuali kichiuaj tokniuan uan amo san matikitakan tlen amo kuali kichiuaj. Amo oui tikintlapojpoluiskej tla tikitaj kuali tlen kichiuaj. Se tokni itoka Jarrod okijto: “Nikita amo oui niktlapojpoluis se tokni maski itlaj onechtokti porque nikita tlen kuali kichiua”.

15. ¿Tleka moneki matikiluikan akin itlaj otechtokti yotiktlapojpoluijkej?

¹⁵ Noijki moneki matikiluikan tiktlapojpoluiaj akin itlaj otechtokti. ¿Tleka moneki ijkon matikchiuakan? Matikitakan tlen okijto Naomi: “Nonamik onechtlajtlani kox yoniktlapojpolui. Ne oniknekiaya nikiluis yoniktlapojpolui  pero amo ueli ijkon onikilui. Onikajsikamatki ayamo oniktlapojpoluiaya. Pero satepan onikilui yoniktlapojpolui. Ochokak nonamik ijkuak ijkon onikilui. Onechtlajtlachialti porque omoyolseui uan ne noijki kuali onimomachili. Ijkuakon oksepa opejki nikneltokilia uan oksepa kuali timouikaj”.

16. ¿Tlen techpaleuis matitetlapojpoluikan?

¹⁶ Jehová kineki matitetlapojpoluikan (Col. 3:13). Pero ualeua tikitaj oui ijkon tikchiuaskej. Pero uelis titetlapojpoluiskej tla tikijtouaj ken timomachiliaj, amo san matikilnamiktokan tlen otechtoktijkej uan matikitakan tlen kuali kichiuaj oksekimej (xikita recuadro “ Eyi tlamantli tlen techpaleuis matitetlapojpoluikan”).

MATIMOKUAYEJYEKOKAN KEN TECHPALEUIA IJKUAK TITETLAPOJPOLUIAJ

17. ¿Tleka moneki matitetlapojpoluikan?

¹⁷ Miak ipati matitetlapojpoluikan. Matikitakan tleka ijkon tikijtouaj. Tikyolpaktiaj Jehová ijkuak titetlapojpoluiaj porque ye ijkon kichiua uan teiknomati (Luc. 6:36). Tikteititiaj tiktlasojkamatiliaj toTajtsin Dios porque ye techtlapojpoluia ika nochi iyolo (Mat. 6:12). Noijki amo timokokoskej uan kuali timouikaskej inuan oksekimej.

18, 19. ¿Tlen panos tla titetlapojpoluiaj?

¹⁸ Ualeua amo tikmatij ken uelis kinpaleuis oksekimej ijkuak titetlapojpoluiaj. Matikitakan tlen okipanok Denise tlen otimotlapouijkej kanin peua nin tlamachtil. Ye amo okimatiaya tlakatl tlen okinkuitikiski ika icarro okinekiaya momiktis ijkuak tlamiskia kixkomakaskej. Non tlakatl sapanoua okitlajtlachialti ijkuak Denise okitlapojpolui ikinon opejki momachtia inuan tokniuan.

¹⁹ Noijki tejuan xamo tikitaskej oui titetlapojpoluiskej. Pero miak ipati ijkon matikchiuakan porque techpaleuia kuali matiyetokan (Mat. 5:7). Ikinon matimochijchikauakan matitetlapojpoluikan ika nochi toyolo ijkon ken Jehová tetlapojpoluia.