Miakej tlen uitsej Filipinas tekipanouaj ik kanin chantij Mary uan Juan a ikinon yejuan kintlapouiaj. Mary opejki kinmachtia tlen kijtoua Biblia akinmej chantij ik kanin chanti pero noijki akinmej chantij itech okseki altepemej ijkuak opanotoka kokolistli COVID-19. ¿Tlen okichi para ijkon peuas tlamachtis?

Mary okintlajtlaniaya akinmej okinmachtiaya: “¿Tikixmati ikaj akin kipaktiskia momachtis Biblia?”. Tla okijtouayaj kema, ye okinmiluiaya: “¿Uelis nikinmixmatis?”. Ijkuak ijkon okintlajtlaniaya okipaleui makinmixmati akinmej uelis kinmachtiskia. ¿Tleka? Porque akinmej kinpaktia tlen kijtoua iTlajtol toTajtsin Dios kinekij noijki makimatikan infamilia uan inyolikniuan tlen yejuan momachtijtokej. Matikitakan tlen okipanok Mary.

Mary okimachtiaya Jasmin. Ye okipaleui makinmixmati naui personas tlen noijki okinekiayaj momachtiskej Biblia. Se siuatl tlen opejki momachtia uan itoka Kristine okijto okinekiaya sejse semana ome uelta makimachtikan porque sapanoua okipaktiaya. Mary okitlajtlani kox okixmatiaya ikaj akin kipaktiskia momachtis Biblia. Kristine okijto: “Kema, nikinmiluis noyolikniuan para xikinmixmati”. Opanok seki semanas uan okipaleui makinmixmati naui iyolikniuan tlen okinekiayaj momachtiskej. Satepan Kristine okipaleui makinmixmati oksekimej iyolikniuan. Yejuan noijki okipaleuijkej Mary makinmixmati oksekimej tlen noijki okinekiayaj momachtiskej Biblia.

Kristine noijki okinekiaya ifamilia tlen chanti Filipinas mamomachtikan tlen kijtoua Biblia. Ikinon omotlapoui iuan ichpoch tlen itoka Andrea. Ye omokuayejyeko: “Yankuik religión kanin pouij iTlaixpantijkauan Jehová. Yejuan amo kineltokaj Jesús uan san momachtiaj Antiguo Testamento”. Pero Andrea okitak amo melauak tlen omokuayejyekouaya ijkuak opejki momachtia. Ijkuak omomachtiaya okijtouaya: “Melauak tla ijkon kijtoua Biblia”.

Satepan Andrea okipaleui Mary makinmixmati ome iyolikniuan uan se siuatl tlen iuan otekipanouaya uan yejuan noijki opejki momachtiaj. Andrea kipia itía tlen itoka Angela uan ye amo tlachia. Ye okikakiaya ijkuak Mary okimachtiaya Andrea. Se tonal Angela okilui Andrea makilui Mary makimachti tlen kijtoua Biblia. Angela sapanoua okipaktiaya tlen omomachtiaya. Kanaj se metstli yokimatiaya miakej textos bíblicos uan sejse semana okinekiaya naui uelta momachtis Biblia. Andrea  okipaleui nochipa mamonechiko ika videoconferencia.

Kristine kipia inamik tlen itoka Joshua. Ye okikakiaya ijkuak Mary okimachtiaya Kristine. Ijkuak Mary okimatki, okilui Joshua kox kipaktiskia momachtis iuan isiua. Ye okijto: “Kuali pero amitlaj techtlajtlani. Ne san nikneki nikkakis tlen titlamachtia. Tlamo nias”. Opanok san kanaj makuili minutos uan Joshua miak tlamantli yokitlajtlanijka Mary uan noijki okilui okinekiaya momachtis Biblia.

Miakej opejki momachtiaj ijkuak Mary okintlajtlani akinmej okinmachtiaya kox okixmatiayaj ikaj akin kipaktiskia momachtis Biblia. Ikinon okinmilui oksekimej tokniuan makipaleuikan makinmachtikan. 28 personas opejki momachtiaj Biblia uan yejuan ochantiayaj itech naui uejueyij altepemej.

Jasmin tlen achto opejki momachtia Biblia, omoapolakti abril 2021. Kristine omoapolakti mayo 2022 uan axkan oksepa chanti Filipinas iuan ifamilia. Noijki omoapolaktijkej ome personas tlen Kristine okipaleui Mary makinmixmati uan makinmachti. Opanok seki metstli uan omoapolakti Angela uan axkan tlapaleuia ken precursora regular. Joshua inamik Kristine uan inmichpoch tlen itoka Andrea kuali momachtijtokej tlen kijtoua Biblia. Non kinpaleuijtok kuali mamouikakan iuan Jehová uan noijki oksekimej tlen momachtijtokej Biblia.

Achto siglo miakej opejkej momachtiaj porque okintlapouiayaj infamiliares uan inyolikniuan (Juan 1:​41, 42a; Hech. 10:​24, 27, 48; 16:​25-33). ¿Uelis tikintlajtlanis akinmej tikinmachtia noso akinmej kinekij momachtiskej kox kixmatij ikaj akin kipaktiskia momachtis Biblia? ¡Amo tikmatij keski personas uelis momachtiskej tla ijkon tikintlajtlaniaj!