TLAMACHTIL 6
TLAKUIKALI 18 Tiktlasojkamatij imikilis Jesús
Tiktlasojkamatiliaj Jehová porque techtlapojpoluia
“ToTajtsin Dios sapanoua okintlasojtlak akinmej chantij tlaltikpak ikinon okitemakak san ye se iKone” (JUAN 3:16).
NIN TLEN TIMOMACHTISKEJ
Tla tikajsikamatij tleka Jehová techtlapojpoluia, techpaleuis okachi matikpatioitakan tlen kichiua ijkuak techtlapojpoluia.
1, 2. ¿Tleka tikijtouaj otechpanok ijkon ken telpochtli tlen ipapanuan otlateuikiliayaj miak?
MATIMOKUAYEJYEKOKAN ipapanuan se telpochtli kipiaj miak tomin. Pero satepan kiluiaj ipapanuan itlaj okinpanok uan oixpolikej. Noijki okimatki ipapanuan omotomintlamijkej uan sapanoua otlateuikiliayaj uan ye moneki kitlaxtlauas. Noijki akinmej okintlanetijkej tomin kinekij makinkopili pero amo uelis tlatlaxtlauas porque sapanoua miak tlateuikiliaj ipapanuan.
2 Matikijtokan tinochtin otechpanok ijkon ken non telpochtli. Adán uan Eva amo okatkaj tlajtlakolejkej uan ochantiayaj itech se kualtsin xochitlali (Gén. 1:27; 2:7-9). Ompa nochipa yoltoskiaj, yolpakiskiaj uan kipiaskiaj nochi tlen omonekiaya. Pero otlajtlakolchijkej ikinon okinkixtijkej itech xochitlali uan satepan oixpolikej. ¿Tlen otechkajteuilijkej Adán uan Eva? Biblia kijtoua: “Onka tlajtlakoli ipan tlaltikpak porque se tlakatl otlajtlakolchi uan tlajtlakoli kichiua matimikikan, ikinon tinochtin timikij porque tinochtin titlajtlakolejkej” (Rom. 5:12). Timikij porque Adán otechkajteuili tlajtlakoli. Tlajtlakoli yetoskia ken itlaj tikteuikiliaj uan amo uelis ikaj kitlaxtlauas (Sal. 49:8).
3. ¿Tleka moijtoua tlajtlakoli yetoskia tlen itlaj tikteuikiliaj?
3 Biblia kijtoua tlajtlakoli yetoskia ken itlaj tikteuikiliaj (Mat. 18:32-35). Ijkuak titlajtlakolchiuaj, yetoskia ken itlaj tikuikiliaj Jehová uan moneki tiktlaxtlauiliskej. Ikinon tla Jehová amitlaj kichiuaskia, tejuan omonekiaya timikiskej (Rom. 6:7, 23).
4. (1) ¿Tlen techpanoskia tla Jehová amo techpaleuiskia? (Salmo 49:7-9). (2) ¿Tlen kijtosneki tlajtlakoli? (Xikita recuadro “ Tlajtlakoli”).
4 San tejuan toselti amo uelis tiktlaxtlauaskiaj tlen Adán uan Eva okipolojkej (xiktlajtolti Salmo 49:7-9). Tla Jehová amo techpaleuiskia, amo uelis tikchiaskiaj satepan nochipa tiyoltoskej nion amo kinyolitiskej akinmej yoixpolikej. Techpanoskia ijkon ken yolkamej mikij porque yejuan amo kinyolitiskej (Ecl. 3:19; 2 Pedro 2:12).
5. ¿Ken otechpaleui Jehová? (Xikita foto).
5 Matimotlapouikan ken momachiliskia telpochtli tlen otimotlapouijkej itech párrafo 1. Tla se tlakatl kiluiskia kitlaxtlauas nochi tlen kiteuikilia, xamo kikauiliskia makipaleui uan sapanoua kitlasojkamatilis. ToTajtsin Dios noijki ijkon okichi porque sapanoua techtlasojtla. Ikinon itlaj okichi para kitlaxtlauas tlajtlakoli tlen otechkajteuili Adán. Jesús okiyekijto tlen okichi Jehová: “ToTajtsin Dios sapanoua okintlasojtlak akinmej chantij tlaltikpak ikinon okitemakak san ye se iKone. Ijkon akin kiteititis kineltoka amo ixpoliuis uan nochipa yoltos” (Juan 3:16). Tlen okichi Jehová techpaleuia kuali iuan matimouikakan.
Jesús okitematilti Jehová techtlapojpoluiskia porque ye topatka motemakaskia (Juan 3:16). Satepan topatka omotemakak ika miak pakilistli. (Xikita párrafo 5).
6. ¿Tlen timomachtiskej uan tleka miak ipati?
6 ¿Ken techpaleuia tlen Jehová yokichi para techtlapojpoluis? Achto matikitakan tlen kijtosneki ijkuak Biblia kijtoua toTajtsin Dios techkauilia oksepa iuan matimouikakan, techtlapojpoluia, otechtlaxtla, otechmakixti uan techita tiyolkualmej. Tla tikajsikamatij nin tlamantli, techpaleuis okachi matiktlasojkamatilikan tlen Jehová yokichi para techtlapojpoluis.
JEHOVÁ TECHKAUILIA OKSEPA IUAN MATIMOUIKAKAN
7. (1) ¿Tlen okipolojkej Adán uan Eva ijkuak otlajtlakolchijkej? (2) ¿Tlen moneki tikchiuaskej? (Romanos 5:10, 11).
7 Adán uan Eva omouikayaj iuan toTajtsin Dios uan opouiayaj itech ifamilia (Luc. 3:38). Pero ijkuak otlajtlakolchijkej, Jehová okinkixti itech ifamilia uan opejki ixpoliuij. Ijkon opanok ijkuak yejuan ayamo okinpiayaj inkoneuan (Gén. 3:23, 24; 4:1). Ikinon tejuan moneki oksepa timouikaskej iuan Jehová (xiktlajtolti Romanos 5:10, 11). Nin kijtosneki timouikaskej iuan Jehová ijkon ken ijkuak Adán uan Eva iuan omouikayaj. Se amochtli kiyekijtoua tlen kijtosneki “oksepa ikaj iuan timouikaskej” uan kitlalia se tlajtoli ika griego tlen xamo kijtosneki timouikaskej iuan akin techkokolia. Tetlajtlachialti tlen okichi Jehová para oksepa iuan matimouikakan. ¿Tlen okichi?
JEHOVÁ TECHTLAPOJPOLUIA
8. ¿Tlen kijtosneki toTajtsin Dios techtlapojpoluia?
8 ToTajtsin Dios techtlapojpoluia porque kineki oksepa iuan matimouikakan. Ikinon Jehová itlaj okichi para oksepa matikpiakan tlen Adán okipolo. Escrituras Griegas Cristianas kipia se tlajtoli tlen noijki moajsikamati toTajtsin Dios techtlapojpoluia (Rom. 3:25). Ijkuak ye techtlapojpoluia, techpaleuia kuali iuan matimouikakan uan kuali timomachiliaj.
9. ¿Tlen okinnauati Jehová makichiuakan israelitas para kintlapojpoluiskia?
9 Jehová okinmilui israelitas tlen omonekiaya kichiuaskej para kintlapojpoluiskia uan oksepa iuan mouikaskiaj. Yejuan sejse xiuitl okinuikayaj yolkamej uan ijkon teopixkej okinmiktiayaj uan okinmakayaj Jehová para makintlapojpolui. Pero non tetliokolil tlen okitemakayaj israelitas amo okipojpolouaya nochi intlajtlakol porque yolkamej amo kipiaj inpati ijkon ken tejuan. Jehová okintlapojpoluiaya israelitas ijkuak melauak omoyolkopayaj uan okinmakayaj yolkamej ijkon ken ye okinekiaya (Heb. 10:1-4). Yolkamej tlen okinmakayaj Jehová okinmilnamiktiaya yejuan okatkaj tlajtlakolejkej uan omonekiaya ikaj inpatka mamotemaka tlen sepa kipojpoloskia intlajtlakol.
10. ¿Tlen okichi Jehová para sepa techtlapojpoluis?
10 ¿Tlen okichi Jehová para sepa techtlapojpoluis? Jehová okitemakak iKone “san se uelta para kiuikas intlajtlakol miakej” (Heb. 9:28). Jesús “okitemakako iyolilis para miakej kintlaxtlauas” (Mat. 20:28). ¿Tlen kijtosneki Jehová otechtlaxtla?
JEHOVÁ OTECHTLAXTLA
11. (1) ¿Tlen kijtosneki Jehová otechtlaxtla? (2) ¿Akin uelis techtlaxtlauaskia?
11 Biblia kijtoua Jehová otechtlaxtla para techmakixtis uan ijkon uelis techtlapojpoluis uan kuali iuan matimouikakan. Matikilnamikikan Adán uan Eva otlajtlakolchijkej uan oixpolikej. Ikinon Jehová omonekiaya kitlaxtlauas tlen Adán uan Eva okipolojkej (1 Tim. 2:6). San uelis kitlaxtlauaskia se tlakatl tlen amo kipia tlajtlakoli, tlen nochipa yoltoskia nikan tlaltikpak uan tla kinekiskia topatka motemakas. Tla yetoskia se tlakatl tlen uelis ijkon kichiuaskia, uelis kitlaxtlauaskia tlen omonekiaya uan ijkon techtlapojpoluiskiaj.
12. ¿Tleka Jesús ouelik otechtlaxtla?
12 Matikitakan eyi tlamantli tlen kiteititia san Jesús uelis techtlaxtlauaskia. Ye amo kipia tlajtlakoli, nochipa yoltoskia nikan tlaltikpak uan okinek topatka motemakas (1 Ped. 2:22, Heb. 10:9, 10). Jesús amo kipia tlajtlakoli ijkon ken okatka Adán ijkuak ayamo otlajtlakolchiuaya (1 Cor. 15:45). Ikinon ijkuak omikik okitlaxtla itlajtlakol Adán (Rom. 5:19). Ijkon Jesús omochi “saiktlami Adán”. Ikinon axkan ayakmo moneki okse tlakatl makitlaxtlaua tlen Adán okichi. Jesús “san se uelta omotemakak uan amo moneki oksepa motemakas” (Heb. 7:27; 10:12).
13. ¿Tlen techpaleuia matimouikakan iuan toTajtsin Dios?
13 ¿Tlen techpaleuia matimouikakan iuan toTajtsin Dios? Jehová okitemakak iKone porque kineki techtlapojpoluis. Jesús topatka omotemakak para techtlaxtlauas porque titlajtlakolejkej (Efes. 1:7; Heb. 9:14).
OTECHMAKIXTI UAN TECHITA TIYOLKUALMEJ
14. ¿Tlen tikitaskej uan ken techpaleuis?
14 ¿Ken techpaleuia tlen Jehová topatka okichi? Matikitakan ome tlajtoli tlen kipia Biblia uan techpaleuis matikajsikamatikan ken techpaleuia ijkuak Jehová techtlapojpoluia.
15, 16. (1) ¿Tlen kijtosneki Jehová otechmakixti? (2) ¿Ken timomachiliaj porque ayakmo tiyetoskej titlajtlakolejkej nion tiixpoliuiskej?
15 Ijkuak Biblia kijtoua Jehová otechmakixti kijtosneki kilkaua totlajtlakol porque ye yokitemakak iKone. Apóstol Pedro okijto: “Namejuan onamechmakixtijkej imak namonemilis tlen amitlaj ipati tlen onamechpanoltilijkej namouejkatatajuan. Pero nankimatij amo onamechmakixtijkej ika plata noso oro tlen ijtlakaui. Onamechmakixtijkej ika ieso Cristo tlen miak ipati ken yetoskia ieso se ichka tlen chipauak uan amo kipia itlaj tlen amo kuali” (1 Ped. 1:18, 19).
16 Satepan ayakmo ikaj yetos tlajtlakole nion ikaj ixpoliuis uan ayakmo ikaj tlajyouis porque yotechtlaxtlajkej (Rom. 5:21). Sapanoua tiktlasojkamatiliaj Jehová porque yotechmakixti uan noijki Jesús porque topatka omotemakak (1 Cor. 15:22).
17, 18. (1) ¿Tlen kijtosneki tiyetoskej tiyolkualmej? (2) ¿Ken techpaleuia tiyetoskej tiyolkualmej?
17 Jehová techita tiyolkualmej. Nin kijtosneki ye kipojpoloua totlajtlakol uan kilkaua tlen otikchijkej. Pero non amo kijtosneki toTajtsin Dios techtlapojpoluia porque technamiki matechtlapojpolui. Noijki amo kijtosneki uelis tikchiuaskej tlen san tejuan tiknekij. Jehová techtlapojpoluia porque tikneltokaj tlen ye uan iKone topatka yokichijkej (Rom. 3:24; Gál. 2:16).
18 ¿Ken techpaleuia ijkuak Jehová techita tiyolkualmej? Sekimej yokinpejpenki matlanauatikan iuan Jesús ompa iluikak uan kinnotsa ikoneuan (Tito 3:7; 1 Juan 3:1). ToTajtsin Dios yokintlapojpolui ikinon uelis tlanauatiskej itech iTekiuajkayo (Rom. 8:1, 2, 30). Oksekimej kichiaj nochipa yoltoskej nikan ipan tlaltikpak, mouikaj iuan toTajtsin Dios uan noijki yokintlapojpolui (Sant. 2:21-23). Noijki akinmej kinmakixtiskej itech Armagedón amo keman ixpoliuiskej (Juan 11:26). Kinyolitiskej “akinmej yolkualmej uan akinmej amo yolkualmej” (Hech. 24:15; Juan 5:28, 29). Satepan nochtin akinmej kitekichiuiliaj toTajtsin Dios tlen chantiskej nikan tlaltikpak, “mochiuaskej ikoneuan toTajtsin Dios uan tetlajtlachialti yetos ijkuak kinmakixtiskej” (Rom. 8:21). Sapanoua tiyolpakij porque axkan timouikaj iuan Jehová porque yotechtlapojpolui.
19. ¿Ken techpaleuia tlen topatka okichijkej Jehová uan Jesús? (Noijki xikita recuadro “ Jehová techtlapojpoluia”).
19 Xamo otimomachiliayaj ijkon ken telpochtli tlen otikitakej itech achto párrafo. Ye ayakmo okipiaya tomin uan omonekiaya kitlaxtlauas tlen okiteuikiliayaj ipapanuan. Tejuan noijki ijkon otechpanotoka pero tiktlasojkamatiliaj Jehová porque okichi miak tlamantli para techtlapojpoluis. Noijki tiktlasojkamatiliaj Jesús ika nochi iyolo topatka omotemakak. Tejuan tikneltokaj Jesucristo porque otechmakixti imak tlajtlakoli uan mikilistli. Ijkon Jehová techtlapojpoluia uan kilkaua ken yetoskia amo keman otitlajtlakolchijkej. Pero noijki tikpatioitaj non tlamantli porque techpaleuia iuan matimouikakan.
20. ¿Tlen timomachtiskej chikome?
20 Sapanoua tikintlasojkamatiliaj Jehová uan Jesús ijkuak timokuayejyekouaj nochi tlen topatka yokichijkej (2 Cor. 5:15). Tla amo techpaleuiskiaj, amo tikseliskiaj tlen Jehová kijtoua techmakas. Satepan timomachtiskej okseki tlamantli tlen techpaleuis matikajsikamatikan tlen kijtosneki Jehová techtlapojpoluia.
TLAKUIKALI 10 ¡Ma ueyitito Jehová!
