MONEKI titetlapouiskej “pero amo miakeh akimeh kitematiltiskeh nin kualitlájtoli. Yika, xiktlajtlanilikah Totajtsi Dios makintitlani oksikimeh tekitkeh” (Luc. 10:2). Yikanaj dos mil xiuitl okijto nin Jesús uan ijkon panoa Myanmar. ¿Tleka? Porque ompa katej san kanaj 4,200 tokniuan uan moneki kintlapouiskej 55 millones.

Jehová kineki ma titetlapouikan uan yokinpaleui miakej tokniuan ma kinpaleuitij akinmej chantij Myanmar ma momachtikan Biblia. ¿Tlen okinpaleui ijkon ma kichiuakan? ¿Tlen okichijkej para yaskej Myanmar? ¿Tlen tlateochiuali yikipiaj? Ma tikitakan.

Yikipia seki xiuitl, se precursor itoka Kazuhiro tlen oneski Japón, opejki mimiki uan ayakmo itlaj okilnamikiaya uan okiuikakej hospital. Akin tlapajtia okilui ome xiuitl ayakmo ma kiuikatinemi icarro. Kazuhiro amo okineltokaya tlen okiluijkej uan okijto: “¿Tlen nikchiuas? Nechpaktia niyetos precursor uan amo nikneki nikkauas”. Okitlatlaujti Jehová ma kipaleui para ok yetoskia precursor.

Kazuhiro okijto: “Se metstli satepan se noyolikni tlen okatka Myanmar okimatki onimimikiaya. Onechnotski uan onechilui: ‘Nika Myanmar nochtin yauij itech autobús. Tla tiuits, uelis tiyetos precursor uan amo moneki tikuikatinemis mocarro’. Oniktlajtlani akin tlapajtia kox uelis nichantiti Myanmar maski nimimiki. Onechilui: ‘Se tepajti tlen chanti Myanmar ouala Japón. Uelis tikixmatis. Tla oksepa timimikis, ye uelis mitsitas’. Onimokuayejyeko Jehová melauak onechnankili”.

San niman Kazuhiro okititlanki se correo Betel tlen kajki Myanmar okijto ye uan isiua okinekiayaj ompa tetlapouitiuij ken precursores. Opanok makuili tonal, tokniuan tlen tekitij Betel otechtlajkuililijkej: “Xiualakan nikan monekij precursores”. Kazuhiro uan isiua tlen itoka Mari, okinnemakakej incarros, okinyektlalijkej inmiamauan uan okinkojkej inboletos para yaskej itech avión. Sapanoa yolpakij porque tlapaleuiaj itech se  grupo de señas ompa Mandalay. Kazuhiro okijto: “Nochi tlen yotechpanok techpaleuia okachi ma tikneltokakan tlen kijtoa Salmo 37:5 ‘Xikmaka Jehová moojui; itech xitlaneltoka uan ye mitspaleuis’”.

Itech 2014 iTlaixpantijkauan Jehová tlen katej Myanmar okinselijkej tokniuan tlen oyajkej ueyi nechikol. Miakej oualajkej itech okseki altepemej. Se tokni itoka Monique tlen oneski Estados Unidos uan kipia 34 xiuitl, okijto: “Ijkuak onimokuepato onikilui Jehová ma nechpaleui para nikmatiskia tlen nikchiuaskia. Noijki onikinmilui notatajuan tlen oniknekiaya nikchiuas. Okinpakti ma nitetlapouiti Myanmar. Pero achto oniktlatlaujti Jehová para nikmatiskia tlen nikchiuaskia”. Monique otechilui tleka ijkon okichi.

Ye okijto: “Jesús okinmilui imachtijkauan achto ma kitakan kox kinmajxiliskia tomin. Ik non, onimotlajtlani: ‘¿Nikpia tomin para nias Myanmar? ¿Nikpias tlen ika nimopanoltis uan amo miak nitekitis?’”. Monique okijto: “Onikitak amo onikpiaya miak tomin para niaskia Myanmar”. Pero ¿tlen okichi para yaskia? (Luc. 14:28).

Monique noijki okijto: “Se tonal, onechnotski akin onikpaleuiaya. Onimomojti uan onimokuayejyeko ayakmo okinekiaya ompa ma nitekiti. Pero ye onechilui kuali onitekitiaya, ik non, onechtliokoli tomin. Uan ika non oniktlaxtla nochi tlen onikteuikiliaya”.

Itech diciembre 2014 Monique ochantito Myanmar. ¿Ken momachilia? Ye okijto: “Sapanoa niyolpaki uan eyi nikinmachtijtok. Se siuatsintli tlen kipia 67 xiuitl uan ijkuak nio nikmachtiti yolpaki uan nechnapaloa (nechnauateki). Ye ochokak ijkuak okimatki tlen itoka toTajtsin Dios. Onechilui: ‘Yikin axkan onikmatki tlen itoka toTajtsin Dios. Te ok tiichpochtli uan otechmachti itlaj tlen miak ipati’. Ne noijki onichokak. Ijkuak ijkon nechpanoa melauak niyolpaki”. Amo yiuejkika Monique oyajki Tlamachtil para ma tetlapouikan Tekiuajkayotl.

Tlen omoijto itech Myanmar itech Anuario 2013 noijki okinpaleui oksekimej ma uian itech non altepetl. Se tokni itoka Li tlen kipia 30 xiuitl uan ochantiaya sureste asiático otekitiaya miak. Pero ijkuak okitlajtolti anuario okipaleui ma tetlapouiti Myanmar. Okijto: “Itech 2014 ijkuak onia se ueyi nechikol itech altepetl Yangón, onikixmatki se tokni uan isiua tlen otetlapouiayaj ika tlajtoli chino ompa Myanmar. Nitlajtoa chino, ik non, onichantito Myanmar para nitlapaleuiskia itech grupo chino. Monique uan ne otiajkej otitetlapouitoj Mandalay. Jehová otechteochi uan san otitekitiayaj tlajkotonal itech se escuela. Uan noijki amo uejka timokalotiaj. Maski sapanoa tlatotonia uan tikpiaj seki ouijkayotl, sapanoa niyolpaki nikan nitlapaleuia. Akinmej chantij Myanmar amo kipiaj miak tlamantli pero tetlasojtlaj uan kinpaktia kikakiskej iTlajtol toTajtsin Dios. Niyolpaki ijkuak nikita Jehová techteochiua ijkuak titetlapouiaj. Ijkon nikmati Jehová kineki ma nitetlapoui nikan Mandalay”.

Miakej tokniuan tlen tlapaleuiaj kanin okachi moneki, yokitakej Jehová kinnankilia. Jumpei uan isiua tlen itoka Nao, yikipiaj kanaj treinta xiuitl uan otlapaleuiayaj itech se tlanechikol ika señas  ompa Japón. ¿Tleka oyajkej Myanmar? Jumpei okijto: “Ne uan nosiua otiknekiayaj titetlapouitiuij itech okse altepetl. Se tokni tlen touan omonechikoaya oyajki Myanmar. Tejuan noijki otiajkej mayo 2010 maski amo otikpiayaj miak tomin. Uan tokniuan tlen ompa chantij kuali otechselijkej”. Pero ¿ken momachilia Jumpei ompa Myanmar? Okijto: “Miakej kinekij momachtiskej iTlajtol toTajtsin Dios. Akinmej amo tlakakij motlajtlachialtiaj ijkuak kinmitaj videos ika señas. Sapanoa tiyolpakij otiualajkej itech nin altepetl”.

¿Tlen kichiua Jumpei uan Nao para kipiaskej tlen ika mopanoltiskej? Okijto: “Ijkuak opanok eyi xiuitl, ayakmo otikpiayaj tomin uan ayakmo otikpiayaj tlen ika tiktlaxtlauaskej kanin otimokalotiayaj. Sapanoa otiktlatlaujtijkej Jehová. Otimotlajtlachialtijkej ijkuak otechiluijkej tokniuan tlen tekitij Betel ma tiyetokan precursores especiales seki metstli. Otikneltokakej Jehová techpaleuiskia uan ijkon okichi. Nochipa techmaluia”. Amo yiuejkika Jumpei uan Nao oyajkej Tlamachtil para ma tetlapouikan Tekiuajkayotl.

Se tokni itoka Simone tlen oneski Italia kipia 43 xiuitl uan isiua itoka Anna oneski Nueva Zelanda uan kipia 37 xiuitl, ochantitoj Myanmar. ¿Tleka ompa oyajkej? Anna okijto: “Otechyolchika tlen omoijto itech Myanmar itech Anuario 2013”. Simone noijki okijto: “Se tlateochiualistli tikatej Myanmar. Nikan amo moneki tikpiaskej miak tlamantli, ik non, timajxiliaj tiktekichiuiliskej Jehová. Melauak tikitaj Jehová techmaluia ijkuak tiktekichiuiliaj kanin okachi moneki” (Sal. 121:5). Anna noijki okijto: “Amo keman sapanoa oniyolpakiaya. Axkan san tikpiaj tlen ika timopanoltiskej, ik non, okachi san sekan tikatej iuan nonamik uan okachi kuali timouikaj. Nikan amo techikoitaj uan miakej kinekij kimatiskej tlen tlamachtia Biblia”. ¿Tleka ijkon kijtoa?

Anna okiyekijto: “Se tonal ompa tiankisko, oniktlapoui se ichpochtli tlen yaui universidad uan onikilui oksepa nikitati. Ijkuak onikitato, okatka iuan iyolikni. Ijkuak oksepa onia okinualikak oksekimej. Satepan oksepa oksekimej okinualikak. Uan axkan makuili momachtiaj”. Simone okijto: “Kuali inyelis akinmej tikintlapouiaj uan miak tlamantli techtlajtlaniaj. Kinekij kimatiskej tlen tlamachtia Biblia uan amo timajxiliaj nochtin tikinmachtiskej”.

¿Tlen okichijkej tokniuan achto yaskiaj Myanmar? Se tokni itoka Mizuho uan oneski Japón okijto: “Nonamik Sachio uan ne otiknekiayaj tiaskej titetlapouitiuij kanin okachi omonekiaya. ¿Pero kanin tiaskiaj? Otechpaleui tlen omoijto  itech Myanmar itech Anuario 2013. Ik non, otimokuayejyekojkej ompa titetlapouitiuij”. Sachio okijto: “Otitlachiatoj se semana ompa Yangón tlen poui Myanmar. Non otechpaleui ompa ma tiakan”.

Se tokni itoka Rodney uan isiua tlen itoka Jane oneskej Australia uan kipiaj kanaj cincuenta xiuitl. Yejuan otetlapouitoj Myanmar itech 2010 iuan inkoneuan tlen intoka Jordan uan Danica. Rodney okijto: “Otikinmiknomatkej akinmej ompa chantij porque kinekij kimatiskej tlen tlamachtia Biblia. Nikinyoleua oksekimej tokniuan ma tetlapouitij itech se altepetl ken Myanmar”. ¿Tleka ijkon okijto? “Yotikselijkej miak tlateochiualistli. Miakej telpokamej uan ichpokamej kinekij kipiaskej se teléfono, se carro, se tekitl uan okseki tlamantli. Pero tokoneuan momachtiaj ken tetlapouiskej. Kinekij kinpaleuiskej akinmej amo kixmatij Biblia uan kinekij kuali tlanankiliskej ijkuak timonechikoaj. Yejuan kintekipachoa non tlamantli tlen miak ipati”.

Se tokni itoka Oliver kipia 37 xiuitl uan oneski Estados Unidos, okijto tleka moneki ma titlapaleuitij itech okse altepetl: “Nechpaleuia niktekichiuilis Jehová kanin okachi moneki. Ken uejka nika nechpaleuia okachi ma nitlaneltoka itech Jehová uan nochipa nechmaluis maski san tlen nikixnamikis. Maski amo onikinmixmatiaya tokniuan pero san se tlamantli tikneltokaj uan non nechpaleuia okachi ma nikpatioita nitetlapouis iTekiuajkayo toTajtsin Dios”. Oliver uan Anna yolpakij tetlapouiaj ika chino.

Se tokni itoka Trazel, kipia 52 xiuitl uan oneski Australia, opejki tetlapouia Myanmar itech 2004. Okijto: “Nikinyoleua nochtin tokniuan ma tetlapouitij kanin okachi moneki. Yonikitak Jehová techteochiua ijkuak timochijchikauaj tiktekichiuiliskej. Amo keman ijkon onimokuayejyeko nechpanoskia. Melauak niyolpaki”.

Tiknekij ma namechyolchikaua tlen okijtojkej tokniuan tla noijki nankinekij nantetlapouiskej kanin okachi moneki. Yetoskia ken namechiluiaj tokniuan tlen ompa tetlapouiaj: “¡Xiualakan Myanmar uan techpaleuikan!”.