1. ¿Tlen okipanouaya Pablo?

PABLO okijto ualeua okimachiliaya amitlaj ipati okatka. Okijto omochijchikauaya kichiuas tlen kuali pero ‘ikuerpo owewejtitiaya iwa otlantiaya’ uan Jehová amo nochipa okinankiliaya tlen okiluiaya (2 Cor. 4:16; 12:7-9; Rom. 7:21-23). Noijki akinmej okikokoliayaj okijtouayaj omotaya amo chikauak. * Pero amo okikak tlen oksekimej okijtouayaj uan amo okika ma kiyoltilana tlen amo kuali okinekiaya kichiuas (2 Cor. 10:10-12, 17, 18).

2. Ijkon ken kijtoua 2 Corintios 12:9, 10, ¿tlen okajsikamatki Pablo?

² Pablo okajsikamatki uelis yetoskia yolchikauak maski okimachiliaya amitlaj ipati (xiktlajtolti 2 Corintios 12:9, 10). Jehová okilui Pablo: “Noweletilis okachi motenextia itech non amo chikawakeh”. Nin kijtosneki Jehová kipaleuiskia. Achto ma tikitakan tleka amo ma techtekipacho ijkuak techuijuikaltiaj.

3. ¿Tleka ma tiyolpakikan ijkuak techuijuikaltiaj?

³ Amo techpaktia ma techuijuikaltikan. Pero timoyolkokoskej tla techtekipachoua ijkuak techuijuikaltiaj (Prov. 24:10). ¿Tlen tikchiuaskej tla ijkon techpanos? Ma tiyolpakikan ijkuak techuijuikaltiaj ijkon ken Pablo okichi (2 Cor. 12:10). ¿Tleka? Porque tikteititiskej tikchiuaj ken Cristo tla titlaxikouaj ijkuak techuijuikaltiaj uan ijkuak techchiuiliaj tlen amo kuali (1 Ped. 4:14). Jesús okijto titlajyouiskiaj tla tikchiuaskej ken ye (Juan 15:18-20). Ijkon okinpanok tokniuan tlen okatkaj achto siglo. Sekimej omokuayejyekouayaj ken griegos porque okijtouayaj amitlaj inpati okatkaj akinmej okichiuayaj ken Cristo. Noijki judíos okijtojkej amo “kanaj omoixtlamachtijkeh” ijkon ken okiluijkej Pedro uan Juan (Hech. 4:13). Miakej omokuayejyekouayaj akinmej okichiuayaj ken Cristo amitlaj inpati okatkaj porque amo omokajkalakiayaj itech política, amo omochiuayaj soldados uan okinkokoliayaj.

4. ¿Tlen okichijkej tokniuan ijkuak okinuijuikaltiayaj?

⁴ Tokniuan amo okikakej tlen oksekimej okijtouayaj. Pedro uan Juan okipatioitayaj kichiuaskej ken Cristo uan tlamachtiskej maski okintlajyouiltiayaj (Hech. 4:18-21; 5:27-29, 40-42). Tokniuan amo opinauayaj ijkuak okintlajyouiltiayaj. Yejuan okachi miakej okinpaleuijkej amo ken akinmej okinkokoliayaj. Noijki okinmijkuilojkej seki amochmej tlen kipia Biblia uan non miakej kinpaleuia ma kineltokakan tlen kichiuas toTajtsin Dios. Otetlapouiayaj iTekiuajkayo toTajtsin Dios tlen satepan tlanauatis ipan nochi tlaltikpak (Mat. 24:14). Oixpolikej tekiuajkej tlen okintlajyouiltiayaj tokniuan. Pero yejuan tlanauatiaj iluikak. Oixpolikej akinmej okinkokoliayaj uan tla kinyolitis toTajtsin Dios, monekis kinyekanas Tekiuajkayotl tlen otetlapouiayaj tokniuan (Apoc. 5:10).

5. Ijkon ken kijtoua Juan 15:19, ¿tleka miakej techkokoliaj?

⁵ Axkan miakej noijki techkokoliaj, techpinauiaj uan techitaj amitlaj topati. ¿Tleka? Porque amo tikchiuaj ken yejuan kichiuaj. Miakej kinpaktia oksekimej ma moueyinekikan uan amo ma tetlakamatikan. Pero tejuan timochijchikauaj tiyetoskej tiyolyamankej, amo san niman tikualanij uan titetlakamatij. Noijki amo timokajkalakiaj itech política nion timochiuaj soldados. Ik non, techitaj amitlaj topati porque amo tikchiuaj tlen oksekimej kichiuaj (xiktlajtolti Juan 15:19; Rom. 12:2).

6. ¿Ken techpaleuia Jehová ma tiktekichiuilikan?

⁶ Jehová techpaleuia ma tikchiuakan miak tlamantli tetlajtlachialti maski miakej techkokoliaj. Techpaleuia ma titetlapouikan ipan nochi tlaltikpak. Titetlapouiaj ika miakej revistas tlen kintlajtolkopaj ika miakej tlajtolmej. Noijki titetlapouiaj ika Biblia uan ijkon tikinpaleuiaj oksekimej ma kipatlakan innemilis. Jehová techpaleuia ma tiktekichiuilikan maski miakej techitaj amitlaj topati. Pero, ¿ken tikitaj ijkuak  tiktekichiuiliaj Jehová? ¿Techpaleuis Jehová ma tiktekichiuilikan? ¿Tlen tikchiuaskej para ma techpaleui Jehová? Ma tikitakan eyi tlamantli tlen okichi Pablo.

7. ¿Tlen otechmachti Pablo?

⁷ Pablo otechmachti amo ma timokuayejyekokan tiktekichiuiliaj Jehová porque tiixtlamatkej uan tikpiaj chikaualistli. Pablo uelis moueyinekiskia uan san ye uelis kichiuaskia miak tlamantli. Omoskalti ompa Roma itech altepetl Tarso. Ompa okipiayaj miak tomin uan kuali otlamachtiayaj. Pablo omochi ixtlamatki porque okimachti Gamaliel se tlayekanki judío tlen sapanoua okitlakaitayaj (Hech. 5:34; 22:3). Miakej judíos okixmatiayaj Pablo. Ye okijto: “Itech intlamachtilis n judíojteh, miakeh non inwah onimoskalti onikintlaniaya” (Gál. 1:13, 14; Hech. 26:4). Pero amo omokuayejyeko san ye iselti nochi kichiuaskia.

8. (1) Ijkon ken kijtoua Filipenses 3:8, ¿ken okitak Pablo nochi tlen okika? (2) ¿Tleka Pablo okijto oyolpakiaya ijkuak itlaj okiyoltilanaya?

⁸ Pablo okika miak tlamantli uan okijto okitaya “kemi tlájsoli” (xiktlajtolti Filipenses 3:8). Pablo okipixki miak ouijkayotl ijkuak omochi imachtijka Cristo. Okikokoliayaj tlen ochantiayaj itech non altepetl (Hech. 23:12-14). Akinmej ochantiayaj Roma okiuitekej uan okitsakej (Hech. 16:19-24, 37). Noijki okimatiaya okatka tlajtlakole uan oui okichiuaya tlen kuali (Rom. 7:21-25). Pero omochijchika kichiuas ken Cristo maski oksekimej okikokoliayaj. Ye okijto: “Nipaki keman itla nechyoltilana”. ¿Tleka ijkon okijto? Porque ijkuak okimachiliaya amitlaj uelis kichiuaskia, okitaya ken okipaleuiaya toTajtsin Dios (2 Cor. 4:7; 12:10).

9. ¿Tleka amo ma tikijtokan amo uelis tiktekichiuiliskej Jehová?

 ⁹ Tla tiknekij Jehová ma techpaleui, amo ma timokuayejyekokan san toselti tikchiuaskej miak tlamantli porque tichikauakej, tiixtlamatkej noso tikpiaj miak tlamantli. Nochi non tlamantli Jehová amo kipatioita. Akinmej kitekichiuiliaj Jehová amo okachi ixtlamatkej, amo moueyinekij nion kipiaj tomin. Pero Jehová “okimpéjpenki non amo chikawakeh” (1 Cor. 1:26, 27). Ik non, amo ma tikijtokan amo uelis tiktekichiuiliskej Jehová uan ma tikitakan ken techpaleuia. Ma tikiluikan Jehová ma techpaleui ma tikinyekinmiluikan akinmej techiluiaj amo melauak tlen tikneltokaj (Efes. 6:19, 20). Noijki ma tikiluikan Jehová ma techpaleui ma tiktekichiuilikan maski timokokouaj. Ijkuak tikitaj Jehová techpaleuia, okachi titlaneltokaj uan timochiuaj tichikauakej.

10. ¿Ken techpaleuis tla tikchiuaskej ken akinmej moijtouaj itech Hebreos 11:32-34?

¹⁰ Pablo omomachtiaya iTlajtol toTajtsin Dios. Ijkon omochi ixtlamatki pero noijki omomachti tlen okichijkej itekipanojkauan Jehová. Pablo okintlajkuilili hebreos ma kitakan tlen okichijkej itekipanojkauan Jehová tlen yiuejkika okatkaj (xiktlajtolti Hebreos 11:32-34). Ma tikitakan tlen okichi tekiua David. Ye okitlajyouiltijkej akinmej okikokoliayaj uan noijki sekimej tlen okatkaj iyolikniuan. Tikitaskej ken okipaleui Pablo tlen okichi David uan ken tikchiuaskej tlen okichi Pablo.

11. ¿Tleka David omotaya amo okatka chikauak? (Xikita ixko revista).

¹¹ Goliat okatka chikauak uan okimatiaya tlateuis. Ik non, okipinaui David porque okitak amo okatka chikauak. Goliat okatka uejkapantik, okiuikaya miak tepostli uan okimatiaya tlateuis. Pero David san okatka se telpochtli uan omotaya amo okimatiaya tlateuis. Pero okineltokaya Jehová kipaleuiskia. David okatka yolchikauak uan Jehová okipaleui ma kimikti Goliat (1 Sam. 17:41-45, 50).

12. ¿Tlen ouijkayotl okipixki David?

¹² David noijki okipixki se ouijkayotl uan xamo omokuayejyeko amitlaj ipati okatka. David okipaleuiaya tekiua Saúl tlen okitlali Jehová ma kinauati altepetl Israel. Saúl okitlakaitaya David pero satepan opejki moueyineki uan okikokoliaya. Okitlajyouiltiaya uan okinekiaya kimiktis (1 Sam. 18:6-9, 29; 19:9-11).

13. ¿Tlen okichi David ijkuak Saúl okitlajyouilti?

¹³ David okitlakaitaya Saúl maski okitlajyouiltiaya porque okimatiaya Jehová okipejpenki ma yeto tekiua (1 Sam. 24:6). Amo okijto itlajtlakol toTajtsin Dios nochi tlen Saúl okichiuili. David okineltokaya toTajtsin Dios kipaleuiskia ma tlaxiko (Sal. 18:1, kanin peua).

14. ¿Tlen okipanok Pablo ijkon ken David?

¹⁴ Pablo noijki okikokoliayaj ken David. Sekimej tlayekankej tlen miakej okinmixmatiayaj okikokoliayaj, otlanauatijkej ma kiuitekikan uan ma kitsakuakan. Ijkon ken David noijki okitlajyouiltijkej  sekimej tlen okatkaj iyolikniuan. Noijki sekimej tokniuan okixnamikej (2 Cor. 12:11; Filip. 3:18, TNM). Pero Pablo nochipa otlaxiko uan otetlapoui maski okitlajyouiltijkej. Okinpaleui tokniuan maski sekimej okiyolkokojkej. Nochipa okitekichiuili toTajtsin Dios (2 Tim. 4:8). Maski okipixki miak ouijkayotl otlaxiko porque okineltokaya Jehová uan ye okipaleui.

15. ¿Tlen tiknekij tikchiuaskej uan tlen techpaleuis?

¹⁵ ¿Techtlajyouiltiaj uan techuijuikaltiaj akinmej inmiuan timomachtiaj, akinmej inmiuan titekipanouaj noso tofamiliares tlen amo momachtiaj Biblia? ¿Otechyolkoko se tokni? Tla ijkon yotechpanok, ma tikilnamiktokan tlen okipanok David uan Pablo. ‘Ika tlan kuali ma tiktlanilikah tlan amokuali’ (Rom. 12:21). Tejuan amo tiknekij ikaj tikixkuakoyoniskej ijkon ken okichi David. Tiknekij tikinpaleuiskej akinmej yolkualmej ma kixmatikan Jehová ika iTlajtol. ¿Ken tikchiuaskej? Ijkuak itlaj techtlajtlaniaj ma tikinnankilikan ika Biblia, ma tikintlakaitakan akinmej techtlajyouiltiaj uan nochtin ma tikinchiuilikan tlen kuali (Mat. 5:44; 1 Ped. 3:15-17).

16, 17. ¿Tlen amo keman okilka Pablo?

¹⁶ Ijkuak Pablo ayamo okatka imachtijka Jesús, okixmatiayaj ken Saulo, ye omoueyinekiaya uan okintlajyouiltiaya tokniuan (Hech. 7:58; 1 Tim. 1:13). Pero Jesús okiualtlapoui, okichi ayakmo ma tlachia uan ayakmo okikauili ma kintlajyouilti tokniuan. Pablo okinmilui tokniuan tlen okintlajyouilti ma kipaleuikan. Omochi yolyamanki, okikauili Ananías ma kipaleui uan ijkon oksepa otlachixki (Hech. 9:3-9, 17, 18).

¹⁷ Satepan Pablo opejki tlayekana itech  tlanechikol uan amo keman okilka tlen Jesús okimachti ijkuak oyaya Damasco. Omochi yolyamanki uan okiseli ma kipaleuikan tokniuan. Okijto yejuan okipaleuijkej uan okiyolchikajkej (Col. 4:10, 11).

18. ¿Tleka ualeua amo tikinkauiliaj tokniuan ma techpaleuikan?

¹⁸ ¿Tlen techmachtia tlen okichi Pablo? Ijkuak opejki timomachtiaj, otikinkauilijkej tokniuan ma techpaleuikan porque amo otikajsikamatiayaj tlen kijtoua Biblia (1 Cor. 3:1, 2). Pero xamo axkan yitikpiaj miak xiuitl tiktekichiuiliaj Jehová uan amo tikinkauiliaj ma techpaleuikan tokniuan tlen yikin okixmatkej Jehová. Pero Jehová kichiua tokniuan ma techyolchikauakan (Rom. 1:11, 12). Moneki ma tikinkauilikan tokniuan ma techpaleuikan tla tiknekij ma techpaleui Jehová.

19. ¿Tleka Pablo okichi miak tlamantli tetlajtlachialti?

¹⁹ Pablo okichi miak tlamantli tetlajtlachialti ijkuak omochi tokni. ¿Tleka? Okajsikamatki kuali kisa nochi tlen tikchiuaj tla tiyolyamankej uan tikneltokaj Jehová uan amo porque tichikauakej, tiixtlamatkej noso tikpiaj tomin. Ik non, ma titlaneltokakan ken Pablo, ma timomachtikan tlen okichijkej itekipanojkauan toTajtsin Dios uan ma tikinkauilikan tokniuan ma techpaleuikan. Jehová techpaleuis maski ualeua tikmachiliskej amo tichikauakej.