1. Ijkon ken kijtoua 3 Juan 3, 4, ¿tlen kichiua ma tiyolpakikan?

JUAN sapanoua oyolpakik ijkuak okimatki tokniuan okipiayaj chikauak intlaneltokilis tlen okinpaleui ma kixmatikan Jehová. Ye okinmitaya ken ikoneuan. Okinyolchika porque okixnamikiayaj miak ouijkayotl. Tejuan noijki tiyolpakij ijkuak tikitaj tokoneuan noso oksekimej motemakaj ixpan Jehová uan kitekichiuiliaj (xiktlajtolti 3 Juan 3, 4).

2. ¿Tleka Juan okinmijkuilo eyi cartas?

² Itech xiuitl 98, Juan xamo ochantiaya ik Éfeso. Xamo ompa ochantito ijkuak okikixtijkej Patmos kanin otsaktoka. Ijkuakon iespíritu santo Jehová okipaleui ma kinmijkuilo eyi cartas. Ijkon kinyolchikauaskia tokniuan ma kineltokakan Jesús uan ma kichiuakan tlen ye okinnauati.

3. ¿Tlen tlajtlanilmej tikinnankiliskej?

³ Ijkuakon ayakmo okatkaj oksekimej tlatitlanilmej. San ye Juan okatka uan okitekipachouaya sekimej okinkajkayauayaj tokniuan (1 Juan 2:18, 19, 26). * Akinmej otlakajkayauayaj okijtouayaj okixmatiayaj toTajtsin Dios pero amo okitlakamatiayaj. Itech nin tlamachtil tikitaskej tlen okinmilui Juan nonmej tokniuan uan tikinnankiliskej eyi tlajtlanilmej: ¿Tlen kijtosneki tikchiuaskej tlen  kijtoua Biblia? ¿Tlen ouijkayotl tikixnamikij? ¿Ken timopaleuiskej iuan tokniuan ma tikchiuakan tlen kijtoua Biblia?

4. Ijkon ken kijtoua 1 Juan 2:3-6 uan 2 Juan 4, 6, ¿ken tikchiuaskej tlen kijtoua Biblia?

⁴ Moneki achto ma tikmatikan tlen kijtoua Biblia tla tiknekij tikchiuaskej tlen ompa kijtoua. Noijki ma tikintlakamatikan itlanauatiluan Jehová (xiktlajtolti 1 Juan 2:3-6; 2 Juan 4, 6). Jesús nochipa okitlakamatki Jehová. Ik non, tiktlakamatiskej Jehová tla tikchiuaj ken Jesús (Juan 8:29; 1 Ped. 2:21).

5. ¿Tlen moneki tikneltokaskej?

⁵ Tiktlakamatiskej Jehová tla tikneltokaj ye nochipa kijtoua tlen melauak uan mochiuas nochi tlen kijtoua iTlajtol. Noijki ma tikneltokakan Jesús ye Mesías tlen omoijto ualaskia. Axkan miakej amo kineltokaj Jesús kiyekana iTekiuajkayo toTajtsin Dios. Juan okijto yetoskiaj “miakeh tekajkayajkeh” uan kinkajkayauaskiaj akinmej amo kineltokaj Jehová uan Jesús (2 Juan 7-11). Juan okijkuilo: “¿Akin non tekajkaya? Ye akin kijtoa Jesús amo ye n Cristo” (1 Juan 2:22). Ma timomachtikan Biblia tla amo tiknekij ikaj ma techkajkayaua. Ijkon tikixmatiskej Jehová uan Jesús (Juan 17:3). Ijkon tikneltokaskej melauak tlen kijtoua Biblia.

6. ¿Tlen ouijkayotl kixnamikij telpokamej uan ichpokamej?

⁶ Akinmej tiktekichiuiliaj toTajtsin Dios moneki timomaluiskej uan ijkon amo techkajkayauaskej oksekimej (1 Juan 2:26). Pero moneki okachi ma momaluikan telpokamej uan ichpokamej. Se tokni itoka Alexia * tlen chanti Francia uan kipia 25 xiuitl, okijto: “Ijkuak oniaya escuela onimomachti evolución uan tlen tlamachtiaj ixtlamatkej. Tlen onimomachtiaya okichi ma nimotlajtlani kox melauak tlen tlamachtia Biblia. Ualeua okachi oniknekiaya nikmatis tlen  onechmachtiayaj escuela. Pero amo san omonekiaya nikkakis tlen okijtouayaj escuela noijki omonekiaya nimomachtis tlen kijtoua Jehová”. Alexia omomachti amochtli La vida... ¿cómo se presentó aquí? ¿Por evolución, o por creación? Ijkon okajsikamatki melauak tlen kijtoua Biblia. Ye kilnamiki: “Onikneltokak melauak tlen kijtoua Biblia. Niyolpakis uan nikpias yolseuilistli tla niktlakamatis”.

7. ¿Tlen amo moneki tikchiuaskej uan tleka?

⁷ Maski yitikpiaj miak xiuitl noso amo, amo ma tikpiakan ome toixko. Juan okijto amo uelis tikchiuaskej tlen kijtoua Biblia uan tiauilnemiskej (1 Juan 1:6). Ma tikpiakan kuali toyelis ken yetoskia nochtin kitaj tlen tikchiuaj uan ijkon toTajtsin Dios techselis. Amikaj uelis ichtaka tlajtlakolchiuas porque Jehová kita nochi tlen panoua (Heb. 4:13).

8. ¿Tlen moneki ma tikixtopeuakan?

⁸ Amo ma titlajtlakolchiuakan ken akinmej amo kitekichiuiliaj Jehová. Juan okijkuilo: “Tla tikijtoah amo tikpiah tlajtlákoli, san tejwah timokajkayawah” (1 Juan 1:8). Ijkuak okatka Juan, akinmej otlakajkayauayaj okijtouayaj uelis tlajtlakolchiuaskiaj uan mouikaskiaj iuan toTajtsin Dios. Axkan miakej noijki ijkon mokuayejyekouaj. Kijtouaj kineltokaj toTajtsin Dios pero amo kitlakamatij ijkuak kinmiluia amo ma tlajtlakolchiuakan. Yejuan auilnemij uan kijtouaj amo tlajtlakoli ijkon kichiuaskej.

9. ¿Ken kinpaleuis telpokamej uan ichpokamej tla kichiuaskej tlen kijtoua Biblia?

⁹ Telpokamej uan ichpokamej moneki okachi momaluiskej uan ijkon amo auilnemiskej ken akinmej inmiuan momachtiaj noso tlen inmiuan tekipanouaj. Ma  tikitakan tlen okipanok se tokni itoka Aleksandar. Ye okijto: “Ichpokamej tlen inmiuan onimomachtiaya okinekiayaj inmiuan ma nimoteka. Okijtouayaj onechpaktiayaj tlakamej porque amo onikpiaya nonovia”. Xamo oksekimej telpokamej uan ichpokamej noijki ijkon kinpanoua. Pero ma kilnamiktokan tla kichiuaj tlen kijtoua Biblia, amo tlajtlakolchiuaskej, amo kinkuejsos intlalnamikilis, amo mokokoskej uan kuali mouikaskej iuan Jehová. Kitlakamatiskej toTajtsin Dios tla amo kichiuaj tlen amo kuali. Ye Satanás kineki ma auilnemikan, ik non, kixnamikij ijkuak amo kichiuaj tlen oksekimej kinmiluiaj (1 Juan 2:14).

10. ¿Ken techpaleuia 1 Juan 1:9 ma tiktekichiuilikan Jehová uan amo ma techkuejso totlalnamikilis?

¹⁰ Tikmatij san Jehová kinamiki techiluis tlen tlajtlakoli. Ik non, timochijchikauaj amo titlajtlakolchiuaj. Pero ijkuak titlajtlakolchiuaj tiktlatlaujtiaj ma techtlapojpolui (xiktlajtolti 1 Juan 1:9). Noijki tla titlajtlakolchiuaj ma tikinmiluikan tlayekankej ma techpaleuikan porque ye Jehová okintlali ma techmaluikan (Sant. 5:14-16). Pero amo ma timoyolkokojtokan tla otitlajtlakolchijkej. ¿Tleka? Porque toTajtsin Dios okitemakak iKone ma techtlapojpolui. Jehová melauak techtlapojpoluia. Ik non, uelis tiktekichiuiliskej uan amo techkuejsos totlalnamikilis (1 Juan 2:1, 2, 12; 3:19, 20).

11. ¿Tlen uelis tikchiuaskej tla amo tiknekij ma techkajkayauakan akinmej okikajkej Jehová uan kixnamikij ialtepe?

¹¹ Amo ma tikkakikan tlen kijtouaj akinmej okikajkej Jehová uan kixnamikij ialtepe. Diablo kichiua oksekimej ma kinkajkayauakan itekipanojkauan Jehová. Ik non, moneki tikmatiskej tlen melauak uan  tlen amo melauak. * Akinmej techkokoliaj kitekitiltiaj Internet para ayakmo ma tikneltokakan Jehová uan ayakmo ma tikintlasojtlakan tokniuan. Ma tikilnamiktokan Satanás kineki techkajkayauas, ik non, ma tikixtopeuakan (1 Juan 4:1, 6; Apoc. 12:9).

12. ¿Tlen tikchiuaskej tla tiknekij tikpiaskej chikauak totlaneltokilis?

¹² Tla tiknekij tikixnamikiskej Satanás, ma tikneltokakan Jesús tlapaleuia ma mochiua tlen kineki toTajtsin Dios. Noijki ma tikinneltokilikan tokniuan tlen kiyekanaj ialtepe Jehová (Mat. 24:45-47, TNM). Ma timomachtikan iTlajtol toTajtsin Dios uan ijkon tikpiaskej chikauak totlaneltokilis ijkon ken se kuauitl tlen uejkatlan moneluayotia. Pablo ijkon okinmilui tokniuan tlen ochantiayaj Colosas: “Ijkó kemi ononkiselijkeh n Toteko Cristo Jesús, ijkó ixpa xinemikah, ximoyektlakxilikah iwa ximoskaltijtiwiah itech Ye, iwa xiyektlaneltokakah” (Col. 2:6, 7). Tla tikpiaj chikauak totlaneltokilis, amo techkajkayauas Satanás nion akinmej kinnauatia (2 Juan 8, 9).

13. ¿Tlen tikilnamiktokej uan tleka?

¹³ Tikilnamiktokej miakej techkokoliaj (1 Juan 3:13). Juan okijto: “Nochteh n tlaltikpaktlakah non amo kineltokah Dios kinnawatijtok n satanás” (1 Juan 5:19). Yitlamis tlen amo kuali, ik non, Satanás kualankamiki (Apoc. 12:12). Amo san kineki ma tiauilnemikan uan ma techkajkayauakan akinmej okikajkej Jehová uan kixnamikij ialtepe. Ye kichiua oksekimej ma techtlajyouiltikan. Ye kimati san niman kipojpoloskej, ik non, ayakmo kineki ma titetlapouikan nion ma titlaneltokakan. Amo techtlajtlachialtia tlen kichiua porque okseki altepemej ayakmo kinkauiliaj tokniuan ma tetlapouikan nion ma monechikokan. Pero tokniuan tlaxikojtokej. Yejuan kiteititiaj amo keman tikkauaskej toTajtsin Dios maski Diablo techtlajyouiltis.

14. ¿Ken tikinpaleuiskej tokniuan ma kichiuakan tlen kijtoua Biblia?

¹⁴ Ma tikinmiknomatikan tokniuan uan ijkon tikinpaleuiskej ma kichiuakan tlen kijtoua Biblia (1 Juan 3:10, 11, 16-18). Ma timotlasojtlakan maski ualeua titlajyouiaj. Ma tikinyolseuikan uan ma tikinpaleuikan tokniuan tla oixpoliuik ikaj tlen okitlasojtlayaj. Noijki ma tikinpaleuikan tokniuan tlen chantij kanin otlaxixinki. Tikinpaleuiskej tokniuan amo san kijtosneki tikijtoskej tikintlasojtlaj uan tikinmiknomatij.

15. Ijkon ken kijtoua 1 Juan 4:7, 8, ¿tlen moneki tikchiuaskej?

¹⁵ Tikchiuaj ken toTajtsin Dios tla titetlasojtlaj (xiktlajtolti 1 Juan 4:7, 8). Tikteititiskej tikintlasojtlaj tokniuan tla tikintlapojpoluiaj. Tla se tokni techyolkokoua, tiktlapojpoluiskej porque tiktlasojtlaj uan amo san tikilnamiktoskej tlen otechchiuili (Col. 3:13). Ma tikitakan tlen okipanok se tokni itoka Aldo. Ye omoyolkoko ijkuak okikak se tokni tlen okitlakaitaya okinpinaui akinmej ochantiayaj ialtepe. Aldo okijto: “Onikiluiaya Jehová  ma nechpaleui amo ma niktlauelita tokni”. Noijki okilui okinekiaya iuan tetlapouis uan okilui ken omomachiliaya. Ye okijto: “Tokni onechilui ma niktlapojpolui ijkuak okajsikamatki onechyolkoko tlen okijto. Omotaya melauak okinekiaya ma niktlapojpolui. Otimotlapojpoluijkej uan otikilkajkej tlen opanok”.

16, 17. ¿Tlen moneki tikchiuaskej?

¹⁶ Juan okintlasojtlaya tokniuan uan okinekiaya ma kipiakan chikauak intlaneltokilis. Ijkon okiteititi ijkuak okinmijkuilili eyi cartas. Sapanoua techyolchikaua tikmatiskej akinmej tlanauatiskej iuan Cristo ompa iluikak noijki kipiaj inyelis ken Juan (1 Juan 2:27).

¹⁷ Ma tikchiuakan tlen yotimomachtijkej. Ma tikchiuakan tlen kijtoua Biblia uan nochipa ma tiktlakamatikan Jehová. Ma timomachtikan Biblia uan ma tikneltokakan tlen kijtoua. Noijki ma tikneltokakan Jesús. Ma tikixtopeuakan tlen tlamachtiaj ixtlamatkej uan noijki akinmej okikajkej Jehová uan kixnamikij ialtepe. Amo ma tikpiakan ome toixko uan amo ma titlajtlakolchiuakan. Ma tikkauilikan Jehová ma techyekana ika itlanauatiluan. Ma tikintlapojpoluikan akinmej techyolkokouaj uan ma tikinpaleuikan tokniuan ijkuak moneki uan ijkon kipiaskej chikauak intlaneltokilis. Ijkon nochipa tikchiuaskej tlen kijtoua Biblia maski tikixnamikiskej ouijkayotl.