Onineski 1954 ompa Estados Unidos itech se altepetl tlen itoka Saint Paul ompa Minnesota. Nofamilia okatkaj católicos uan amo okachi okipiayaj tomin. Onikinpixki naui nokniuan. Ijkuak onimoskalti onimomachti itech se escuela católica uan onikpaleuiaya teopixki. Pero amo okachi onikmatiaya tlen tlamachtia Biblia. Ayakmo oniknekiaya nias teopan maski onikneltokaya toTajtsin Dios okichijchi nochi tlen onka.

Ome tokniuan onechtlajpalotoj ijkuak yikin opejki nimomachtia itech escuela William Mitchell para niyetoskia abogado. Ne onimotlapakijtoka, ik non, tokniuan onechiluijkej satepan ualaskiaj. Ijkuak oksepa onechtlajpalotoj onikintlajtlani: “¿Tleka okachi yolpakij akinmej amo kuali inyelis?” uan “¿Tlen moneki tikchiuaskej tla tiknekij tiyolpakiskej?”. Onechmakakej amochtli La verdad que lleva a vida eterna uan se Biblia xoxoktik  itoka Traducción del Nuevo Mundo de las Santas Escrituras. Noijki opejki nimomachtia Biblia. Onimotlajtlachialti ijkuak onikmatki san iTekiuajkayo toTajtsin Dios uelis techpaleuis uan tlanauatis ipan nochi tlaltikpak. Onikajsikamatki tekiuajkej amo kimatij tlanauatiskej, ik non, san titlajyouiaj uan techchiuiliaj tlen amo kuali.

1982 onimotemakak ixpan Jehová uan onimoapolakti itech ueyi nechikol de Distrito “Verdad del Reino” ompa estadio St. Paul Civic Center. Chikometika onikchiuato noexamen tlen nechpaleuiskia ma nimochiua abogado uan octubre onikmatki niyetoskia abogado.

Itech ueyi nechikol onikixmatki tokni Mike Richardson, ye otlapaleuiaya Betel ompa Brooklyn tlen kajki Nueva York. Onechilui ompa Betel okinekiayaj ma tlapaleuikan tokniuan abogados. Onikilnamik tlen kijtoua Hechos 8:36 TNM, ninmej tlajtolmej okinmijto se tlakatl tlen oualaya Etiopía uan onimotlajtlani: “¿Tlen nechtsakuilia amo ma nitlapaleuiti Betel?”. Ik non, oniktemiti se amatl kanin onikijtouaya oniknekiaya nitlapaleuis.

Notatajuan amo okinpakti onimochi iTlaixpantijka Jehová. Notajtsin onechtlajtlani kox nechtlaxtlauiskiaj ompa Betel. Ne onikilui amo nechtlaxtlauiskiaj pero nechmakaskiaj tepitsin tomin ijkon ken nochtin betelitas okinmakayaj.

Onitekipanouaya itech se tribunal, ik non, onia Betel tlen okatka Brooklyn hasta 1984. Ompa onitlapaleui ken abogado. Onimomachti miak tlamantli itech tribunal kanin onitekipanouaya uan non onechpaleui.

Noviembre de 1983 tokniuan okikojkej Teatro Stanley tlen kajki ompa Nueva Jersey. Tokniuan okinmiluijkej tekiuajkej ma kinkauilikan ma kiyektlalikan luz eléctrica uan kanin opanouaya atl. Ijkuak omotlapouitoj iuan tekiuajkej, okinmiluijkej tokniuan okinekiayaj kipiaskej inueyi nechikol itech non teatro. Pero okipixkej se ouijkayotl. Tlanauatilmej okijtouayaj san uelis kiueyichiuaskiaj toTajtsin Dios kanin katej miakej kalmej. Non teatro kajki centro kanin miakej tlanemakaj, ik non, amo okinkauiliayaj ma kiyektlalikan.  Tokniuan oksepa okinmitatoj tekiuajkej pero okinmiluijkej amo uelis ompa monechikoskiaj.

Ijkuak yikin oniajsito Betel, tokniuan okinmitatoj jueces tlen otlapaleuiayaj tribunal federal de distrito. Ne onitekipano ome xiuitl itech tribunal federal de distrito tlen kajki Saint Paul ompa Minnesota uan onikmatiaya ken omochiuaya non tekitl. Se abogado okijto tla ompa otlatsotsonayaj uan okinmitayaj películas, uelis ompa kiueyichiuaskiaj toTajtsin Dios. Jueces okitakej non tlamantli uan okijtojkej tekiuajkej amo otechtlakaitakej porque amo otechkauilijkej ompa ma timonechikokan. Noijki okinmiluijkej ma techkauilikan ompa ma timonechikokan. Ijkon opejki nikita Jehová kiteochiua ialtepe para ma mochiua tekitl tlen ye kineki. Oniyolpakik porque onitlapaleui.

Tokniuan okiyankuilijkej non teatro uan amo ouejkajkej nion se xiuitl. 8 de septiembre de 1985 ompa okipixkej ingraduación tokniuan tlen okiselijkej tlamachtil 79 ompa Galaad. Ijkuakon non teatro omoixmatki kanin mochiuaj uejueyij nechikolmej ompa Nueva Jersey. Se tlateochiuali onikinpaleui tokniuan uan sapanoua niyolpaki porque amo onka okse tekitl ken nitlapaleuiskia Betel. Amo keman onimokuayejyeko Jehová nechmakaskia okachi tekitl.

Kanaj itech 1980, miakej akinmej tlapajtiaj okinekiayaj kintlaliliskej estli tokniuan maski yejuan amo okinekiayaj. Okachi okixnamikiayaj ouijkayotl akinmej kipiaskiaj inkone porque jueces okijtouayaj omonekiaya kintlaliliskej estli tlamo konetl iselti mokauaskia tla mikiskia inantsin.

29 de diciembre de 1988 tokni Denise Nicoleau sapanoua oeskiski ijkuak oneski ikonetsin. Ihemoglobina otemok uan tepajti okilui omonekiaya kitlaliliskej estli. Pero tokni amo okinek ma kitlalilikan. Mostlatika, tlapajtijkej okiluijkej se juez ma kinkauili ma kitlalilikan estli. Juez okijto ma kitlalilikan estli maski amitlaj okiluijkej tokni nion inamik.

Viernes 30 de diciembre tokni okitlalilijkej estli maski inamik uan ifamiliares okijtojkej amo ma kitlalilikan. Non tiotlak noijki okintsakej sekimej ifamiliares uan tlayekankej. Okinteluijkej amo okinkauiliayaj tlapajtijkej ma kitlalilitij estli tokni. Sábado kualkan 31  de diciembre okipanoltijkej itech noticias ompa Nueva York uan okseki altepetsitsintin nochi tlen opanok.

Otikitatoj okse juez uan lunes kualkan onimotlapoui iuan juez Milton Mollen tlen okitaya non ouijkayotl. Onikilui tlen opanok uan noijki onikilui se juez otlanauati ma kitlalilikan estli tokni uan amikaj okitlajtlani. Non juez onechilui non tiotlak ma nipano ioficina uan nikiluiskia nochi tlen opanok uan tikitaskiaj tlen tlanauatilmej techpaleuiskiaj. Nouan oyajki tokni Philip Brumley. Juez noijki okilui ma uia abogado tlen okipiaya hospital. Opejki timokualaniaj uan tokni Philip Brumley onechijkuilili itech icuaderno kanin okijtouaya “amo xikualani”. Onechpaleui tlen onechijkuilili porque yonechkualanijtoka tlen okijtojtoka abogado.

Kanaj se hora otimotlapouijkej uan juez Milton Mollen otechilui mostlatika kualkan kitaskiaj ouijkayotl tlen otikpiayaj. Ijkuak otikiskej, non juez okijto abogado tlen okipiaya hospital amo uelis mopaleuiskia. Ijkuakon onikmachili Jehová techpaleuiskia ma titlatlanikan. Onechtlajtlachialti Jehová otechpaleui ma tikchiuakan tlen ye kineki.

Yiyouak otitlankej porque kuali otimokuayejyekojkej tlen tikijtoskiaj. Betel tlen okatka Brooklyn amo uejka okatka kanin otekipanouayaj jueces. Ik non, tokniuan tlen inmiuan onitekipanouaya onejnentiajkej. Naui jueces okikakej tlen otikijtojkej uan okijtojkej amo omonekiaya kitlaliliskej estli tokni. Jueces okipaleuijkej tokni Nicoleau uan okijtojkej amo okichiuilijkej ken kijtouaj tlanauatilmej.

Satepan jueces tlen tekipanouaj Nueva York okijtojkej uelis kipajtiskiaj tokni Nicoleau uan amo kitlaliliskej estli. Naui uelta otitlatlankej porque jueces tlen katej Estados Unidos otechpaleuijkej amo ma kintlalilikan estli tokniuan uan niyolpaki onitlapaleui (xikita recuadro “ Otitlatlankej inmixpan tekiuajkej”). Noijki onitlapaleui Betel iuan oksekimej abogados tlen kitaj akinmej kinmaluiskej konemej, akinmej mokajkauaj inmixpan  tekiuajkej uan ijkuak kitaj akin kimokauis se tlali noso se kali.

Onikixmatki Dawn uan okinpiaya eyi ikoneuan pero inamik okikajka inmixpan tekiuajkej. Ye otekipanouaya uan okatka precursora. Onechtlajtlachialti okitekichiuiliaya Jehová maski otlajyouiaya. 1992 Ompa Nueva York otikpixkej ueyi nechikol de Distrito tlen omotokayoti “Portadores de Luz” uan onikilui Dawn oniknekiaya okachi nikixmatis. Ipan se xiuitl otimonamiktijkej uan ok onikinpaleui tokniuan tlen tlapaleuiaj Betel. Ne nikita nosiua onechtliokoli Jehová porque kipia chikauak itlaneltokilis uan yolpaki. Ijkon ken kijtoua Proverbios 31:12, ye nochipa kichiua tlen kuali uan nechpaleuia.

Otimonamiktijkej ijkuak ikoneuan Dawn yokatkaj telpokamej. Se okipiaya 11, okse 13 uan okse 16 xiuitl. Ne oniknekiaya kuali nikinmiskaltis, ik non, onikintlajtolti amatlajkuilolmej tlen kijtouaj ken tikinmiskaltiskej totlakpakoneuan uan onimochijchika nikchiuas tlen ompa kijtoua. Otikpixkej ouijkayotl pero niyolpaki porque telpokamej nechitaj ken niintajtsin tlen kintlasojtla uan nouan mouikaj. Nochipa kuali otikinseliayaj akinmej inmiuan omouikayaj uan otechpaktiaya ma yetokan tokalijtik.

2013 Dawn uan ne otichantitoj Wisconsin porque omonekiaya tikinmaluiskej totatajuan. Sapanoua oniyolpakik ijkuak onikmatki ok nikinpaleuiskia tokniuan tlen tlapaleuiaj Betel. Onechiluijkej ma nitlapaleui ken abogado seki metstli.

Septiembre 2018 onikmachili itlaj omotsikouaya nokechtla uan amo kuali onitlajtouaya. Tepajti amo okimatiaya tleka ijkon onechpanouaya. Satepan okse tepajti onechilui ma nikitati se neurólogo. Enero 2019 okse tepajti onechilui onikpiaya se kokolistli tlen kijtlakoskia nochi notlalnakayo.

Opanok eyi tonal, oninemito ipan setl uan onimomaposteki. Nochipa onechpaktiaya ninemis ipan setl pero onikitak ayakmo uelis ijkon nikchiuaskia. Opejki okachi nimokokoua uan ayakmo kuali onitlajtouaya, ayakmo onimoliniaya uan ayakmo itlaj oniktolouaya.

Sapanoua oniyolpakik onikpaleui ialtepe Jehová. Noijki niyolpaki onikinmijkuilo miakej revistas tlen kintlajtoltiaj abogados uan jueces. Noijki ipan nochi tlaltikpak onikinmilui tlapajtijkej uan tekiuajkej, tejuan tiiTlaixpantijkauan Jehová amo tikseliaj estli. Ne noijki nimokuayejyekoua ijkon ken kijtoua Lucas 17:10, amitlaj nopati uan san onikchi tlen omonekiaya nikchiuas.