Jesús omochi ueyi teopixki ijkuak omoapolakti itech xiuitl 29. ¿Ken tikmatij? Ma tikitakan seki tlamantli. Ijkuak Jesús omoapolakti okiteititi okinekiaya kichiuas tlen kineki toTajtsin Dios. Noijki okiteititi okinekiaya topatka kitemakas iyolilis (Gál. 1:4; Heb. 10:5-10, TNM). Tlen kineki kichiuas Jehová kajki ken se altar. Ik non, ijkuak Jesús okitemakak iyolilis yetoskia ken okichi se tlamanali ipan altar. Non altar okitlalijkej ijkuak omoapolakti Jesús. Jehová okichi chipauak ma kiueyichiuakan uan non yetoskia ken teokali. Teokali noijki okitlalijkej ijkuak omoapolakti Jesús. Miak ipati altar tlen okipiaya teokali. Noijki ijkon miak ipati tlen kineki kichiuas toTajtsin Dios para chipauak ma kiueyichiuakan (Mat. 3:16, 17, TNM; Heb. 5:4-6).

Omonekiaya se teopixki ijkuak Jehová okichi chipauak ma kiueyichiuakan, ik non, okipejpenki Jesús uan “okimák weletílistli” uan espíritu santo (Hech. 10:37, 38; Mar. 1:9-11, TNM). Pero ¿ken tikmatij Jesús okitlalijkej ueyi teopixki ijkuak ayamo okimiktiayaj uan ayamo okiyolitiaya Jehová? Techpaleuia ma tikajsikamatikan tlen okipanok Aarón uan oksekimej teopixkej ijkuak omoyekanayaj ika Tlanauatil tlen okijkuilo Moisés.

Tlanauatil okijtouaya san teopixki uelis kalakiskia kanin okatka Santísimo uan satepan okalakiaya teokali. Okatka se cortina tlen ika okitlajkoxelojkej Santo uan Santísimo uan teopixki opanouaya ijkuak okintlapojpoluiayaj israelitas (Heb. 9:1-3, 6, 7, TNM). Aarón uan oksekimej okintlalijkej ma yetokan teopixkej achto kalakiskiaj ik kanin okatka cortina tlen okitlajkoxelouaya Santísimo. Jehová okitlali Jesús ma yeto ueyi teopixki itech iteokal ijkuak ayamo okimiktiayaj uan satepan yetoskia ken okipanoui “kortina” ijkuak oyajki iluikak (Heb. 10:20). Ik non, Pablo okijto: “Cristo yowala, iwa axa Ye n Tiopixkatlayákanki” uan satepan “amo okalak itech tabernákulo non san tlakah okichijchijkeh. Noni okatka san se tlachijchiwali kemi n milák tabernákulo non kajki ilwikak” (Heb. 9:11, 24).

¿Keman omochi yankuik tlajtolsenkaualistli? Ijkuak Jesús oyajki iluikak uan topatka okitemakak iyolilis tlen amo kipia tlajtlakoli. Ijkon opejki yankuik tlajtolsenkaualistli. Omonekiaya mochiuas eyi tlamantli.

Achto, Jesús oyajki ixpan Jehová. Ome, okimaktili Jehová iyolilis. Eyi, Jehová okiseli ieso Jesús tlen okinoki. Yankuik tlajtolsenkaualistli opejki mochiua ijkuak opanok ninmej eyi tlamantli.

Biblia amo kijtoua keman okiseli Jehová iyolilis Jesús. Ik non, amo kuali tikmatij keman opejki mochiua yankuik tlajtolsenkaualistli. Pero tikmatij Jesús oyajki iluikak ijkuak opoliuiaya majtlaktli tonal ijkuak yimochiuaskia iluitl Pentecostés (Hech. 1:3). Xamo nonmej tonalmej Jesús okimaktili Jehová iyolilis uan ye okiseli (Heb. 9:12). Itech Pentecostés Jehová okiteititi yankuik tlajtolsenkaualistli yomochijtoka (Hech. 2:1-4, 32, 33). Non tonal opejki yankuik tlajtolsenkaualistli.

Nochi nin kiteititia opejki uan omochi yankuik tlajtolsenkaualistli ijkuak Jehová okiseli ieso Jesús tlen okinoki noijki okichi ma pouikan tlapejpenalmej itech non tlajtolsenkaualistli. Ijkuakon, Jehová okitlali Jesús ma yeto teopixki uan techpaleuiskia ma techtlapojpoluikan (Heb. 7:25; 8:1-3, 6; 9:13-15).