1. ¿Tlen kijtosneki ijkuak ikaj tiktlajtlaniaj keman opejki momachtia Biblia?

“¿KEN opejki timomachtia Biblia?”. “¿Motatajuan yomomachtiayaj ijkuak otineski?”. “¿Keski xiuitl kipia opejki timomachtia Biblia?”. Xamo ijkon yotechtlajtlanijkej noso tejuan ijkon yotikintlajtlanijkej oksekimej. ¿Tleka ijkon titetlajtlaniaj? Porque non kijtosneki tlen tikneltokaj, ken tikueyichiuaj toTajtsin Dios uan tlen tikchiuaj. Ijkuak timomachtiaj Biblia kijtosneki tikajsikamatij uan tikchiuaj tlen kijtoua. Ijkon ayakmo techkajkayauaj akinmej pouij itech okseki religiones uan okachi tiyolpakij (Juan 8:32).

2. Ijkon ken kijtouaj Juan 13:34, 35, ¿tlen okachi kinpaktia akinmej peuaj momachtiaj Biblia?

² ¿Tlen okachi otechpakti ijkuak opejki timomachtiaj Biblia? Xamo otikitakej kuali inyelis iTlaixpantijkauan Jehová (1 Ped. 2:12). Noijki xamo otikitakej yejuan motlasojtlaj. Miakej ijkuak yikin monechikouaj amo kilnamikij tlen omomachtijkej pero amo keman kilkauaj okitakej tokniuan motlasojtlaj. Ijkon panoua porque Jesús okijto imachtijkauan motlasojtlaskiaj (xiktlajtolti Juan 13:34, 35). Pero moneki tikchiuaskej okseki tlamantli tla tiknekij tikpiaskej chikauak totlaneltokilis.

3. ¿Tlen panos tla titlaneltokaj san porque tikitaj tokniuan motlasojtlaj?

³ Tejuan amo titlaneltokaj porque tikitaj tokniuan motlasojtlaj. ¿Tleka? Ma tikijtokan se tokni tlayekanki noso se precursor tlajtlakolchiua, techyolkokoua noso kikaua Jehová uan kijtoua amo melauak tlen tikneltokaj. ¿Tlen  tikchiuaskiaj tla ijkon panos? ¿Ayakmo tiktekichiuiliskiaj Jehová? Nin techmachtia tla tiknekij tikpiaskej chikauak totlaneltokilis moneki kuali ma timouikakan iuan Jehová. Amo san ma tikitakan tlen oksekimej kichiuaj. Tikpiaskej chikauak totlaneltokilis tla kuali timouikaj iuan Jehová uan tikchiuaj tlen kijtoua ialtepe. Pero noijki miak ipati kuali ma timomachtikan Biblia, ma tikajsikamatikan tlen kijtoua uan ma tikneltokakan tlen timomachtiaj. Ma tikneltokakan Biblia kijtoua akin Jehová (Rom. 12:2).

4. Ijkon ken kijtoua Mateo 13:3-6, 20, 21, ¿tlen kichiuaj sekimej ijkuak kixnamikij ouijkayotl?

⁴ Jesús okijto sekimej kinekiskiaj momachtiskej Biblia pero ayakmo tlaneltokaskiaj ijkuak kipiaskiaj ouijkayotl (xiktlajtolti Mateo 13:3-6, 20, 21). Xamo amo kajsikamatij akinmej kichiuaj ken Cristo kixnamikij ouijkayotl (Mat. 16:24). Xamo mokuayejyekouaj amo tlajyouiaj akinmej kichiuaj ken Cristo. Pero tinochtin titlajtlakolejkej uan tikixnamikij ouijkayotl. Tonemilis mopatla uan ualeua non kichiua ayakmo ma tiyolpakikan (Sal. 6:6; Ecl. 9:11).

5. ¿Ken kiteititiaj miakej tokniuan kineltokaj melauak tlen tlamachtia Biblia?

⁵ Miakej itekipanojkauan Jehová kiteititiaj kineltokaj melauak tlen tlamachtia Biblia. ¿Ken tikmatij? Porque kiteititiaj kipiaj chikauak intlaneltokilis maski se tokni kinyolkokoua noso kichiuaj itlaj tlen amo kuali (Sal. 119:165). Okachi tlaneltokaj ijkuak kixnamikij ouijkayotl (Sant. 1:2-4). ¿Tlen techpaleuis ma tikpiakan chikauak totlaneltokilis?

6. ¿Tleka otlaneltokayaj tokniuan tlen okatkaj achto siglo?

⁶ Tokniuan tlen okatkaj achto siglo otlaneltokayaj porque okajsikamatiayaj iTlajtol toTajtsin Dios uan “kualitlájtoli” tlen otlamachti Jesucristo (Gál. 2:5). “Kualitlájtoli” kijtosneki nochi tlen tikneltokaj, noijki ompa poui ken otechmakixti Jesús uan ken toTajtsin Dios okiyoliti. Tlatitlanil Pablo okineltokaya iTlajtol toTajtsin Dios. ¿Ken tikmatij? Porque ye “okinmajsikamatiltiaya Cristo tlaijyowiskia, iwa satepa de mikiskia, moyolitiskia oksepa kemi nestok itech itlajkuilol Dios” (Hech. 17:2, 3). Akinmej opejki kichiuaj ken Cristo, okiselijkej tlen tlamachtia iTlajtol toTajtsin Dios uan okikauilijkej espíritu santo ma kinyekana. Yejuan omomachtijkej uan ijkon okajsikamatkej nochi tlen okineltokayaj okatka iTlajtol toTajtsin Dios (Hech. 17:11, 12; Heb. 5:14). Yejuan amo okitekichiuiliayaj Jehová porque okinpaktiaya yetoskej iuan tokniuan nion okinyolkokouaya tlen oksekimej okichiuayaj. Yejuan otlaneltokayaj porque kuali okixmatiayaj toTajtsin Dios (Col. 1:9, 10).

7. ¿Ken techpaleuia tla tikneltokaj tlen tlamachtia Biblia?

⁷ ITlajtol toTajtsin Dios amo keman mopatla (Sal. 119:160). Tejuan titlaneltokaj maski se tokni techyolkokoua, tlajtlakolchiua uan maski tikixnamikij ouijkayotl. Kuali ma timomachtikan Biblia uan ijkon tikneltokaskej melauak tlen kijtoua. Ijkuak se kuauitl kuali moneluayotia, tlaxikoua maski chikauak ejekakiaui. Tejuan  noijki titlaxikoskej ijkuak tikpiaskej ouijkayotl tla tikpiaj chikauak totlaneltokilis. ¿Tlen okachi techpaleuis ma tikneltokakan tlen tlamachtia Biblia?

8. Ijkon ken kijtoua 2 Timoteo 3:14, 15, ¿tleka Timoteo okineltokaya iTlajtol toTajtsin Dios?

⁸ Timoteo okineltokaya iTlajtol toTajtsin Dios. ¿Tleka? (Xiktlajtolti 2 Timoteo 3:14, 15). Inantsin uan isitsin yejuan achto okimachtijkej “itlajkuilol Dios”. Pero ye noijki iselti omomachtiaya. Ik non, okineltokak “itlajkuilol Dios” ika nochi iyolo. Satepan ye, inantsin uan isitsin omomachtijkej tlen otlamachti Cristo. Timoteo omotlajtlachialti ijkuak okitak imachtijkauan Jesús omotlasojtlayaj uan okinekiaya yetos iuan tokniuan uan kinmaluis (Filip. 2:19, 20). Ye otlaneltokaya porque kuali omouikaya iuan toTajtsin Dios uan amo porque omouikaya iuan oksekimej. Tejuan noijki moneki timomachtiskej Biblia uan ijkon okachi tikixmatiskej Jehová uan tikpiaskej chikauak totlaneltokilis.

9. ¿Tlen eyi tlamantli miak ipati moneki ma tikneltokakan?

⁹ Moneki tikneltokaskej eyi tlamantli miak ipati. Achto, ma tikneltokakan Jehová okichijchi nochi tlen onka (Éx. 3:14, 15; Heb. 3:4; Apoc. 4:11). Ome, ma tikneltokakan toTajtsin Dios techtlapouia ika Biblia (2 Tim. 3:16, 17). Eyi, san iTlaixpantijkauan Jehová kichiuaj tlen toTajtsin Dios kineki uan Cristo kinyekana (Is. 43:10-12; Juan 14:6; Hech. 15:14). Amo moneki tikmatiskej nochi tlen kijtoua Biblia tla tiknekij tikneltokaskej ninmej eyi tlamantli. Kuali ma timokuayejyekokan uan ijkon tikneltokaskej tlen kijtoua Biblia (Rom. 12:1, TNM).

10. ¿Tlen moneki tikchiuaskej tla yitikmatij tlen tlamachtia Biblia?

¹⁰ Tikmatiskej ken tikinmachtiskej oksekimej tla kuali tikixmatij Jehová, iTlajtol uan ialtepe. ¿Tleka? Porque akinmej tikchiuaj ken Cristo moneki tikinmachtiskej oksekimej tlen tikneltokaj (1 Tim. 4:16). * Noijki ijkuak tikinpaleuiaj oksekimej ma kineltokakan tlen tlamachtia Biblia techpaleuia okachi ma titlaneltokakan.

11. ¿Ken tikchiuaskej ken Pablo ijkuak titlamachtiaj?

¹¹ Ijkuak Pablo otlamachtiaya “okichiwaya makineltokakah n Jesús ika itlanawatil Moisés iwa ika intlajkuilol n profetas” (Hech. 28:23). ¿Ken tikchiuaskej ken Pablo ijkuak titlamachtiaj? Amo san ma tikijtokan tlen opanok. Moneki ma tikinpaleuikan akinmej tikinmachtiaj ma mokuayejyekokan uan ijkon kuali mouikaskej iuan Jehová. Amo tiknekij ma momachtikan san porque kinpaktia ken tikinmachtiaj. Moneki ma tikinpaleuikan ma kajsikamatikan uan ma kineltokakan melauak tlen kijtoua toTajtsin Dios.

12, 13. ¿Ken kinpaleuiskej tetajmej inkoneuan ma kineltokakan melauak tlen tlamachtia Biblia?

¹² Tetajmej kinekij inkoneuan ma kineltokakan tlen tlamachtia Biblia. Xamo mokuayejyekouaj kipiaskej chikauak intlaneltokilis tla kinpiaj inyolikniuan itech tlanechikol. Pero inkoneuan moneki kichiuaskej okseki tlamantli tla kinekij kineltokaskej melauak tlen kijtoua Biblia. Kuali ma mouikakan iuan toTajtsin Dios uan ma kineltokakan Biblia kijtoua tlen melauak.

¹³ Tetajmej moneki kichiuaskej tlen kijtoua Biblia tla kinekij kinmachtiskej inkoneuan ma kineltokakan toTajtsin Dios. Ma mokuayejyekokan tlen momachtiaj uan ma kinmachtikan inkoneuan noijki ijkon ma kichiuakan. Ma kinmititikan ken uelis momachtiskej ijkon ken kichiuaj ijkuak tlamachtiaj. Ijkon kinpaleuiskej inkoneuan ma kitlasojtlakan Jehová. Noijki ma kineltokakan “tlakeuali yolmelajki uan ixtlamatki” techmaka tlen ika tikchikauaskej totlaneltokilis (Mat. 24:45-47, TNM). Amo san ma kinmachtikan tlen amo oui. Ma kinpaleuikan ma kajsikamatikan tlen okachi oui uan ijkon kipiaskej chikauak intlaneltokilis. Pero ma kitakan  keski xiuitl kipiaj uan kox kajsikamatij tlen kinmachtiaj (1 Cor. 2:10).

14. ¿Tleka moneki ma timomachtikan profecías? (Xikita recuadro “ ¿Uelis tikinyekijtoskej ninmej profecías?”).

¹⁴ Biblia kipia profecías uan techpaleuiaj ma tikneltokakan Jehová. ¿Tlen profecías yotechpaleuijkej ma titlaneltokakan? Xamo tlen kijtouaj tlen panoskia itlamian tonalmej (2 Tim. 3:1-5; Mat. 24:3, 7). Noijki profecías tlen yomochijkej techpaleuiaj ma titlaneltokakan. ¿Uelis tikinyekijtoskej ken yomochijkej uan ken mochijtokej profecías tlen moajsij itech amochtli Daniel capítulo 2 uan 11? * Uelis titlaxikoskej ijkuak titlajyouiskej tla tikneltokaj melauak tlen kijtoua Biblia. Ma tikitakan ken otlaxikojkej tokniuan ijkuak okintlajyouiltijkej ompa Alemania ijkuak omochi Segunda Guerra Mundial. Yejuan okineltokayaj tlen kijtoua Biblia maski amo nochi kuali okinmajsikamatiayaj profecías tlen okijtouayaj tlen panoskia itlamian tonalmej.

15-17. ¿Tlen okinpaleui tokniuan ma tlaneltokakan ijkuak nazis okintlajyouiltijkej?

¹⁵ Ompa Alemania, nazis okintlajyouiltijkej miakej tokniuan. Hitler uan Heinrich Himmler okinkokoliayaj iTlaixpantijkauan Jehová. Se tokni okijto tlen okinmilui Heinrich Himmler sekimej tokniuan: “¡Tla namejuan nankinekij Jehová uelis tlanauatis iluikak pero tejuan titlanauatiaj nikan tlaltikpak! ¡Nankitaskej akin okachi uejkauas, tejuan noso namejuan!”. ¿Tlen okinpaleui tokniuan amo ma kikauakan Jehová?

¹⁶ Tokniuan okimatiayaj iTekiuajkayo toTajtsin Dios opejki tlanauatia 1914. Ik non, amo omotlajtlachialtijkej ijkuak  okintlajyouiltijkej. Yejuan okimatiayaj nion se tekiua uelis kitsakuilis ma mochiua tlen kineki Jehová. Hitler amo uelis kichiuaskia ayakmo ma kiueyichiuakan Jehová. Noijki amo uelis kitlaliskia se tekiua tlen kipojpoloskia iTekiuajkayo toTajtsin Dios. Tokniuan okimatiayaj se tonal ayakmo tlanauatiskia Hitler.

¹⁷ ¡Melauak ijkon opanok! San niman opojpolikej nazis uan Heinrich Himmler ocholo. Ijkuak ocholo okinamik se tokni tlen okipiaya iapellido Lübke. Okixmatki porque ye achto otsaktoka. Heinrich Himmler okilui tokni: “Te akin timomachtia Biblia, ¿axkan tlen panos?”. Tokni okilui iTlaixpantijkauan Jehová yokimatiayaj se tonal ayakmo tlanauatiskia Hitler uan kinmakixtiskiaj. Ijkuak tokni ijkon okilui non tlakatl ayakmo itlaj okijto uan satepan omomikti. ¿Tlen techmachtia? Tikpiaskej chikauak totlaneltokilis ijkuak titlajyouiskej tla timomachtiaj Biblia (2 Ped. 1:19-21).

18. Ijkon ken kijtoua Juan 6:67, 68, ¿tleka moneki ma tikpiakan “ixtlamatílistli iwa tlalnamikílistli”?

¹⁸ Tinochtin ma timotlasojtlakan pero moneki okachi ma tikpiakan “ixtlamatílistli iwa tlalnamikílistli” (Filip. 1:9). Tlamo timomachtiskej, tikpapatlaskej tlen tikneltokaj uan ‘techkajkayawaskeh nekateh akimeh kinekih techkuatlapololtiskeh’ uan noijki akinmej okikajkej Jehová uan kixnamikij ialtepe (Efes. 4:14). Achto siglo ijkuak sekimej imachtijkauan Jesús okikajtejkej, tlatitlanil Pedro okijto Jesús kipia “tlájtoli non kitemaka yolílistli non ayik tlami” (xiktlajtolti Juan 6:67, 68). Pedro amo nochi okajsikamatiaya nonmej tlajtolmej pero ye amo okika Jesús porque okimatiaya akin okatka ye. Tejuan noijki tla tikneltokaj melauak tlen kijtoua Biblia, titlaxikoskej ijkuak titlajyouiskej uan tikinpaleuiskej oksekimej ma kipiakan chikauak intlaneltokilis (2 Juan 1, 2).