1, 2. ¿Ken techpaleuia ma titlaxikokan ijkon ken kijtoua Isaías 65:16, 17?

“¡AMO ximosotlaua!”, ijkon omotokayoti ueyi nechikol regional tlen otikpixkej 2017. Itech non ueyi nechikol otimomachtijkej ken uelis titlaxikoskej ijkuak titlajyouiskej. Yopanok naui xiuitl uan ok tikxikojtokej nochi tlen amo kuali panotok.

² ¿Tlen yikin yotechpanok? Xamo titlajyouijtokej porque oixpoliuik se tofamiliar noso se toyolikni, timokokouaj noso yitikpiaj miak xiuitl, otlaxixinki itech toaltepej, techtlajyouiltiaj noso tikpiaj COVID-19. Xamo yitiknekij ma tlami nochi tlen techtlajyouiltia uan ayakmo keman ijkon ma techpano (xiktlajtolti Isaías 65:16, 17).

3. ¿Tlen moneki tikchiuaskej uan tleka?

³ Xamo satepan okachi titlajyouiskej (Mat. 24:21). Tla titlaxikouaj, satepan noijki titlaxikoskej. Jesús okiyekijto tleka moneki ijkon tikchiuaskej, ye okijto: “Iwa tla nochi nonkixikoskeh, nonmomakixtiskeh” (Luc. 21:19). Ma timokuayejyekokan ken tlaxikojtokej oksekimej tokniuan tlen noijki tlajyouijtokej, non noijki techpaleuis ma tlaxikojtokan.

4. ¿Tleka uelis tikijtoskej Jehová ye akin okachi kimati tlaxikos?

⁴ Jehová ye akin okachi kimati tlaxikos. Xamo non uelis techtlajtlachialtis pero noijki ma timokuayejyekokan seki tlamantli. Satanás tlayekana itech nin tlaltikpak, ik non, tinochtin titlajyouiaj. Jehová san niman uelis kipojpolos nochi tlen amo kuali pero kichixtok ma ajsi non tonal tlen ye yokijto (Rom. 9:22). Ye ok mochixtok hasta ijkuak kipojpolos nochi tlen amo kuali. Ma tikitakan chiknaui tlamantli tlen ye kixikoua.

5. ¿Ken okitlajtlakoltijkej Jehová uan ken timomachilia?

⁵ Amo okitlakaitakej itoka. Jehová kipatioita itoka uan kineki nochtin ma kitlakaitakan (Is. 42:8). Yikipia kanaj 6,000 xiuitl nochipa kitlajtlakoltijtokej Jehová (Sal. 74:10, 18, 23). Non opejki itech xochitlali Edén ijkuak Diablo (kijtosneki “kijtoua tlen amo melauak”) okitlajtlakolti toTajtsin Dios, okijto amo okinkauili Adán uan Eva itlaj ma kipiakan para ma yolpakikan (Gén. 3:1-5). Desde ijkuakon Diablo okitlajtlakolti toTajtsin Dios; kijtoua amo techkauilia ma tikpiakan tlen moneki. Jesús okitekipachouaya okachi okitlajtlakoltiayaj toTajtsin Dios. Ye okinmilui imachtijkauan tlen omonekiaya kijtoskej ijkuak motlatlaujtiskiaj: “ToTajtsin tlen tika iluikak, ma mochipaua motoka” (Mat. 6:9, TNM).

6. ¿Tleka Jehová yokika ma pano miak xiuitl uan ayamo kiteititia san ye kinamiki tlanauatis?

⁶ Okixnamikej iTekiuajkayo toTajtsin Dios. Jehová kinamiki tlanauatis itech iluikak uan tlaltikpak, san ye kimati ken tlanauatis (Apoc. 4:11). Pero Diablo kitemoua ken kinkajkayauas ángeles uan nochtin akinmej tikatej itech tlaltikpak para ma timokuayejyekokan toTajtsin Dios amo kinamiki tlanauatis. Moneki panos miak xiuitl para motas san ye kinamiki tlanauatis. Yiuejkika kinkauilijtok akinmej chantij nikan tlaltikpak inselti ma monauatikan para ijkon ma mota amo uelis inselti monauatiskej uan tla ijkon kichiuaj, tlajyouijtoskej (Jer. 10:23). Ken Jehová kimati mochias, san niman motas san ye kinamiki tlanauatis iluikak uan tlaltikpak. Ijkuakon nochtin kitaskej san Jehová kuali tlanauatia uan ika iTekiuajkayo kichiuas kuali ma tiyetokan.

7. ¿Akinmej amo okitlakamatkej Jehová uan tlen kinpanos?

⁷ Sekimej ikoneuan Jehová amo okitlakamatkej. Ye okinchijchi ángeles uan tlaltikpaktlakamej uan amo okipiayaj tlajtlakoli. Pero se ángel amo okitlakamatki toTajtsin Dios, ye Satanás, (kijtosneki “teixnamiki”) uan okichi Adán uan Eva amo ma kitlakamatikan Jehová, okichi ma kixnamikikan. Oksekimej ángeles uan oksekimej tlaltikpaktlakamej noijki amo okitlakamatkej Jehová (Jud. 6). Satepan sekimej israelitas amo okitlakamatkej uan opejkej kinueyichiuaj teotsitsintin (Is. 63:8, 10). Ik non, Jehová sapanoua omoyolkoko. Pero ok tlaxikojtok uan tlaxikojtos hasta ijkuak kinpojpolos nochtin tlen amo yolkualmej. Ijkuakon kuali yetoskej itekipanojkauan tlen nochipa kitlakamatij uan kixikojtokej nochi tlen amo kuali.

8, 9. ¿Ken kitlajtlakoltiaj Jehová uan tlen tikchiuaj?

⁸ Diablo nochipa kijtoua tlen amo melauak. Ijkuak okitelui Job, okijto itekipanojkauan toTajtsin Dios kitekichiuiliaj porque kinpaleuia (Job 1:8-11; 2:3-5). Hasta axkan non kijtoua Diablo (Apoc. 12:10). Tla titlaxikouaj ijkuak titlajyouiaj tikteititiskej ye tlakajkayaua uan nochipa tiktlakamatij Jehová porque tiktlasojtlaj. Uan Jehová techteochiuas ijkon ken okiteochi Job (Sant. 5:11).

⁹ Satanás kichiua akinmej tlayekanaj itech religiones tlen amo melauak ma kijtokan Jehová techtlajyouiltia. Ijkuak ixpoliui se konetl sekimej kijtouaj toTajtsin Dios okiuikak porque okinekiaya okse angelito ompa iluikak. ¡Sapanoua kiteneuaj Jehová! Pero tejuan tikmatij  Jehová amo ijkon kichiua. Ik non, amo ma tiktlajtlakoltikan toTajtsin Dios ijkuak sapanoua timokokouaj noso ijkuak ixpoliui akin otiktlasojtlayaj. Tikneltokaj ye tlayektlalis para ayakmo ma titlajyouikan. Nochtin akinmej kinekiskej, ma tikinmiluikan Jehová kintlasojtla. Ijkon Jehová kuali kinankilis akin kixnamiki (Prov. 27:11).

10. ¿Ken kiteititia Salmo 22:23, 24 ken iyelis Jehová?

¹⁰ Ijkuak tlajyouiaj itekipanojkauan. Jehová teiknomati, ik non, kiyolkokoua ijkuak kita titlajyouiaj, ijkuak timokokouaj, techtlajyouiltiaj noso ijkuak kita itlaj amo kuali tikchiuaj porque titlajtlakolejkej (xiktlajtolti Salmo 22:23, 24). Jehová kajsikamati ijkuak itlaj techyolkokoua uan kipojpolos nochi tlen techtlajyouiltia (noijki xikita Éxodo 3:7, 8; Isaías 63:9). Ajsis tonal uan kichiuas tlen yokijto: “Kinmixayowajwatsas nochteh, iwa ayakmó yetos mikílistli, nion chokílistli, nion neyolkókoli” (Apoc. 21:4).

11. ¿Ken momachilia Jehová yoixpolikej miakej itekipanojkauan?

¹¹ Ijkuak ixpoliuij iyolikniuan. ¿Ken momachilia Jehová yoixpolikej miakej itekipanojkauan? Ye kinektok oksepa kinmitas (Job 14:15). Ma timokuayejyekokan ken sapanoua kilnamiki iyolikni Abrahán (Sant. 2:23). Noijki Moisés akin iuan omotlapouiaya (Éx. 33:11). Noijki kineki kinkakis ma kitlakuikilikan David uan oksekimej salmistas (Sal. 104:33). Maski oixpolikej, Jehová amo kinmilkaua (Is. 49:15). Jehová kilnamiki ken okatkaj, Biblia kijtoua: “Porke ixpa n Ye nochteh yolitokeh” (Luc. 20:38). Ye kinyolitis uan oksepa kitlatlaujtiskej uan ye yolpakis porque kiueyichiuaskej.  Tla oixpoliuik ikaj akin otiktlasojtlayaj, techyolchikaua tlen Jehová kichiuas.

12. ¿Tlen kitekipachoua Jehová?

¹² Akinmej amo yolkualmej kintlajyouiltiaj oksekimej. Ijkuak amo okitlakamatkej Jehová itech xochitlali Edén, ye yokimatiaya panoskia miak tlamantli tlen amo kuali. Ye amo kipaktia ijkuak kintlajyouiltiaj oksekimej. Nochipa kintekipachoua akinmej moneki ikaj kinmaluis ken: iknomej uan siuamej tlen oixpoliuik innamik (Zac. 7:9, 10). Noijki kiyolkokoua ijkuak kita kintlajyouiltiaj uan kintsakuaj itekipanojkauan. Namejuan tlen nantlaxikojtokej, Jehová namechtlasojtla.

13. ¿Tlen kita Jehová kichiuaj miakej uan tlen kichiuas ye?

¹³ Axkan okachi auilnemij. Jehová otechchijchi para ma tikchiuakan ken ye. Pero Satanás nochipa kineki ma tikchiuakan tlen amo kuali. Yiuejkika ijkuak okatka Noé, “Jehová okitak tlaltikpaktlakamej sapanoua okichiuayaj tlen amo kuali” uan “omotekipacho porque okinchijchi tlaltikpaktlakamej uan sapanoua omoyolkoko” (Gén. 6:5, 6, 11). Axkan miakej noijki kichiuaj tlen amo kuali. Diablo kipaktia kitas axkan okachi miakej auilnemij; tlakamej uan siuamej, tlakamej uan tlakamej, siuamej uan siuamej (Efes. 4:18, 19). Satanás yolpaki ijkuak se itekipanojka Jehová ijkon kichiua. Jehová ok mochixtok pero ijkuak ye kijtos kinpojpolos nochtin akinmej auilnemij.

14. ¿Tlen kichiuaj miakej?

¹⁴ Kijtlakojtokej tlaltikpak. Biblia kijtoua: “Nochtin san nochipa motlajyouiltiaj ijkuak san yejuan monauatiaj”. Jehová okinekiaya ma kimaluikan tlaltikpak uan yolkamej pero amo ijkon kichiuaj (Ecl. 8:9; Gén. 1:28). Sekimej ixtlamatkej kijtouaj ijkuak panos cien xiuitl, ayakmo yetoskej kanaj se millón yolkamej. Ik non, miakej kintekipachoua. Tiktlasojkamatiliaj Jehová porque ye yokijto kinpojpolos “akimeh kijtlakoah n tlaltíkpaktli” (Apoc. 11:18; Is. 35:1).

15, 16. ¿Tlen techyolinia ma titlaxikokan ijkon ken Jehová kichiua? Xikijto se neskayotl.

¹⁵ Ma timokuayejyekokan ken Jehová yiuejkika yokixiko miak tlamantli amo kuali (xikita recuadro “ Jehová kixikojtok miak tlamantli”). Jehová san niman uelis kinpojpolos nochtin akinmej kichiuaj tlen amo kuali. Pero ye ok mochixtok uan non techpaleuia. Ma timokuayejyekokan nin: sekimej tetajmej kipiaskej se inkonetsin pero tepajtijkej kinmiluiaj sapanoua mokokos uan ixpoliuis. Maski tetajmej kimatij sapanoua tlajyouis inkonetsin, ijkuak nesi sapanoua kitlasojtlaj. Nochi kixikouaj uan kuali kimaluiaj inkonetsin porque kitlasojtlaj.

¹⁶ Noijki ijkon ken tiikoneuan Adán uan Eva, tinochtin titlajtlakolejkej pero Jehová techtlasojtla uan techmaluia (1 Juan 4:19). Tetajmej tlen itech yotimotlapouijkej amitlaj uelis kichiuaskej para amo ma tlajyoui inkonetsin pero Jehová kema uelis techpaleuis para ayakmo ma titlajyouikan. Uan yokitlali se tonal para ijkon kichiuas (Mat. 24:36). Jehová techtlasojtla, ik non, ma titlaxikokan hasta ijkuak ye kipojpolos nochi tlen techtlajyouiltia.

17. ¿Ken techpaleuia ma titlaxikokan tlen kijtoua Hebreos 12:2, 3, TNM?

 ¹⁷ Jehová kuali kimati tlaxikos uan Jesús noijki ijkon okichi. Ijkuak okatka nikan tlaltikpak okixiko nochi tlen okichiuilijkej: okiuijuikaltijkej, okitlajyouiltijkej uan okimiktijkej itech kuauitl (xiktlajtolti Hebreos 12:2, 3, TNM). Otlaxiko porque okitak iTajtsin ijkon tlaxikoua. Uan tejuan noijki uelis techyolchikauas tlen Jehová kichiua.

18. ¿Ken techpaleuia 2 Pedro 3:9 ma tikajsikamatikan tlen panotok kiteititia Jehová kimati mochias?

¹⁸ (Xiktlajtolti 2 Pedro 3:9). Jehová kimati keman kipojpolos nochi tlen amo kuali. Ayamo ijkon kichiua porque kimati mochias, ik non, axkan sapanoua miakej kiueyichiuaj uan kitekichiuiliaj. Tinochtin tiktlasojkamatiliaj Jehová porque yotlaxiko miak uan otechkauili ma tinesikan, ma timomachtikan, ma tiktlasojtlakan uan otimotemakakej ixpan. Tla titlaxikoskej hasta ijkuak ye kipojpolos nochi tlen amo kuali, Jehová techteochiuas. Ijkuakon motas kuali okipejpenki okixiko miak tlamantli amo kuali.

19. ¿Tlen moneki tikchiuaskej uan ken techteochiuas Jehová?

¹⁹ Jehová techmachtia ma titlaxikokan uan ma tiyolpakikan. Maski Satanás tetlajyouiltia, Jehová tlaxikoua uan nochipa yolpaki (1 Tim. 1:11, TNM). Tejuan noijki uelis nochipa tiyolpakiskej hasta ijkuak Jehová kichipauas itoka, kiteititis san ye kinamiki tlanauatis uan kipojpolos nochi tlen techtlajyouiltia. Nochipa ma titlaxikokan, ma tikilnamikikan toTajtsin Dios tlaxikojtok uan non ma techyolchikaua. Tla ijkon tikchiuaj, techpanos tlen kijtoua Biblia: “Miak pakílistli kipias n tlakatl akin kixikoa nochi tlan kiyoltilana, porke ijkuak kixikoa, [amo] ok mikkis. Iwa kiselis ikorona non kijtosneki yolitos nochipa [...], non Dios okijto kinmakas akimeh kitlakitah” (Sant. 1:12).