1. ¿Tlen tikneltokaj uan tleka?

 ¿KEN TIMOMACHILIA ijkuak tikita nochi tlen panotok nikan tlaltikpak? Miakej familias ayakmo motlasojtlaj, miakej moteuiaj, amo kintekipachoua tlen kinpanoua oksekimej uan san niman kualanij. Miakej amo kinneltokiliaj akinmej kinyekanaj. Non techpaleuia matikneltokakan satepan kuali tiyetoskej, ¿tleka? Porque axkan mochijtok tlen kijtoua profecía panoskia itlamian tonalmej (2 Tim. 3:1-5). Amikaj uelis kijtos amo mochijtok tlen kijtoua non profecía. Tlen axkan panotok kiteititia Jesucristo yitlanauatijtok. Pero axkan ok timomachtiskej okseki profecías tlen noijki mochijtokej uan techpaleuiaj okachi matitlaneltokakan.

2. ¿Tlen tikitaskej uan ken techpaleuis? (Xikijto tlen tikita itech dibujo tlen kajki itech página 1).

² ¿Tlen tikitaskej? Se, tikitaskej se profecía tlen techpaleuis tikajsikamatiskej keman opejki tlanauatia iTekiuajkayo toTajtsin Dios. Ome, tikojpauiskej seki profecías tlen techpaleuis tikajsikamatiskej Jesús yitlanauatijtok maski amo tikitaj. Eyi, tikitaskej profecías tlen kijtoua tlen kinpanos akinmej kixnamikij iTekiuajkayo toTajtsin Dios. Tikitaskej nochi profecías mosetilijtokej, yetoskiaj ken ipiezas se rompecabezas uan non techpaleuis matikajsikamatikan, ayakmo miak poliui Jehová kipojpolos nochi tlen amo kuali.

3. ¿Tlen techyekiluia Daniel 7:13, 14?

³ Profecía tlen ijkuilitok itech Daniel 7:13, 14 techyekiluia amikaj okachi kuali tlanauatis, san Jesucristo. Kijtoua miakej yolpakiskej kitekichiuiliskej uan nion se tekiua kipatkayotis. ¿Keman opejki tlanauatia Jesús? Okse profecía tlen ijkuilitok itech amochtli Daniel, kijtoua tlanauatiskia ijkuak tlamiskia chikome tiempos. Matikitakan keman ijkon opanok.

4. ¿Ken techpaleuia Daniel 4:10-17, matikmatikan keman opejki tlanauatia Jesús? (Xikita nota).

⁴ (Xiktlajtolti Daniel 4:10-17). “Chikome tiempos” kijtosneki 2,520 xiuitl. Opejki itech 607 achto itech xiuitl se. Ijkuakon babilonios okikixtijkej saiktlami tekiua tlen Jehová okitlalijka matlanauati ompa Jerusalén. “Chikome tiempos” otlanki 1914, ijkuakon Jehová okitlali Jesús matlanauati porque san ye kinamiki (Ezeq. 21:25-27). b

5. ¿Ken techpaleuia tikajsikamatiskej profecía itech “chikome tiempos”?

⁵ ¿Ken techpaleuia nin profecía? Tla tikajsikamatij profecía itech “chikome tiempos” techpaleuia matikneltokakan Jehová kichiua tlen kijtoua ijkuak moneki. Ye okijto keman tlanauatiskia Jesús uan ijkon opanok. Noijki ijkon mochiuaskej okseki profecías ijkon ken yokijto. Ik non, tikneltokaj Jehová kipojpolos tlen amo kuali uan melauak mochiuas. “¡Amo uejkauas!” (Hab. 2:3).

6. (1) ¿Tlen kiteititia Jesús yitlanauatijtok iluikak? (2) ¿Uan ken kiyekijtoua Apocalipsis 6:2-8?

⁶ Ijkuak Jesús ayakmo tetlapouiskia nikan tlaltikpak. Okinmilui imachtijkauan panoskia seki tlamantli itech nochi tlaltikpak uan non kiteititiskia ye yitlanauatijtok iluikak. Ye okijto tlaloliniskia, yetoskia apistli uan yetoskia guerras. Noijki okijto san kanin miakej mokokoskiaj. Axkan ijkon panotok porque kajki COVID-19. Nochi non panoskia uan kiteititiskia Jesús yitlanauatijtoskia (Mat. 24:3, 7; Luc. 21:7, 10, 11). Ijkuak opanok kanaj 60 xiuitl oixpoliuik Jesús, omokopki iluikak uan oksepa okiyekilui apóstol Juan tlen panoskia (xiktlajtolti Apocalipsis 6:2-8). Tlen okijto Jesús opejki itech 1914, ijkuakon ye opejki tlanauatia.

7. ¿Tleka okachi opejki titlajyouiaj ijkuak Jesús opejki tlanauatia?

⁷ ¿Tleka okachi opejki titlajyouiaj ijkuak Jesús opejki tlanauatia? Apocalipsis 6:2 kijtoua Jesús omoteui iuan Diablo uan amo kuali iejekauan. Apocalipsis capítulo 12 kijtoua okintlanilijkej Satanás uan amo kuali iejekauan uan okiualtlamotlakej nikan tlaltikpak. Ik non, ye sapanoua kualani uan techtlajyouiltia. Biblia kijtoua: “¡Miálmasteh akimeh chantitokeh ipan tlaltíkpaktli iwa itech weyi atl!” (Apoc. 12:7-12).

8. ¿Ken techpaleuia tikajsikamatiskej yimochijtok profecías itech iTekiuajkayo toTajtsin Dios?

⁸ ¿Ken techpaleuia ninmej profecías? Miakej kichiuaj tlen amo kuali uan nochi tlen axkan panotok, kiteititia Jesús yitlanauatijtok. Ik non, amo techtekipachoua ijkuak tikinmitaj miakej  tekokoliaj uan amo kintekipachoua tlen kinpanoua oksekimej. Tikmatokej tlen yejuan kichiuaj kiteititia mochijtok tlen kijtoua Biblia. ¡Axkan okachi tikajsikamatij iTekiuajkayo toTajtsin Dios yitlanauatijtok! (Sal. 37:1). Noijki tikmatokej panos okachi tlen amo kuali porque ayakmo miak poliui uits Armagedón (Mar. 13:8; 2 Tim. 3:13). ToTajtsin Dios techtlasojtla uan techpaleuia matikajsikamatikan tleka sapanoua titlajyouiaj. Ik non, sapanoua tiktlasojkamatiliaj.

9. ¿Ken kineskayotia Daniel 2:28, 31-35, tekiua ueyititok uan keman opejki tlanauatia?

⁹ (Xiktlajtolti Daniel 2:28, 31-35). Axkan noijki mochijtok nin profecía. Tekiua Nabucodonosor okitemik tlen panoskia itlamian tonalmej, ijkuak Jesús yitlanauatijtoskia. Saiktlami tekiua ueyititok tlanauatijtoskia uan kixnamikiskia Jesús ijkon ken kijtoua Biblia. Non tekiua kineskayotia “ikxiuan estatua tlen ochijchitoka ika hierro uan sokitl” axkan yitlanauatijtok. Opejki tlanauatia itech Primera Guerra Mundial, ijkuak Reino Unido uan Estados Unidos opejki mouikaj. Estatua tlen okitemik Nabucodonosor kiteititia saiktlami tekiua ueyititok, amo yetoskia ken oksekimej tekiuajkej ueyititokej porque kipiaskia ome tlamantli tlen yejuan amo okiteititijkej.

10. (1) ¿Tlen okijto Daniel kipiaskia saiktlami tekiua ueyititok? (2) ¿Tleka moneki timomaluiskej? (Xikita recuadro “ ¿Tlen uelis mitspanos?”).

¹⁰ Matikitakan achto tlamantli, saiktlami tekiua ueyititok tlen ompa poui  Reino Unido uan Estados Unidos. Oksekimej tekiuajkej ueyititokej ochijchitokaj ika oro noso ika plata pero saiktlami tekiua ueyititok chijchitok ika sokitl uan hierro. Sokitl kijtosneki nochtin akinmej katej nikan tlaltikpak (Dan. 2:43, nota). Miakej kitaj saiktlami tekiua tlen ueyititok oui tlanauatis porque tlakamej uan siuamej kipejpenaj akin kinekij makinnauati, monechikouaj uan yauij itech ojtli para kijtoskej tlen kinekij kichiuaskej uan amo kinekij makinnauatikan.

11. ¿Tlen techpaleuia matikneltokakan tikatej itlamian tonalmej?

¹¹ Matikitakan okse tlamantli tlen kipia saiktlami tekiua ueyititok tlen kineskayotia ikxiuan estatua. Ompa pouij Reino Unido uan Estados Unidos yejuan kinneskayotia tekiua ueyititok tlen ijkuilitok itech Biblia. Non kijtosneki ayakmo yetos okse tekiua ueyititok. San niman iTekiuajkayo toTajtsin Dios kinpojpolos itech Armagedón non tekiua ueyititok uan oksekimej tekiuajkej (Apoc. 16:13, 14, 16; 19:19, 20). c

12. ¿Tlen ok kiteititia tlen okijkuilo Daniel uan ken techyolchikaua?

¹² ¿Ken techpaleuia nin profecía? Profecía tlen okijkuilo Daniel kiteititia tikatej itlamian tonalmej, ijkon otlajkuilo yikipia kanaj 2,500 xiuitl. Satepan ijkuak okimoaxkatijkej Babilonia ok naui tekiuajkej ueyititokej kintlajyouiltiskiaj itekipanojkauan toTajtsin Dios. Noijki okijto yetoskia saiktlami tekiua ueyititok tlen kineskayotia Reino Unido uan Estados Unidos. Techyolchikaua tikmatiskej ayakmo miak poliui iTekiuajkayo toTajtsin Dios tlanauatis nikan tlaltikpak uan kinmixpolos nochtin tekiuajkej (Dan. 2:44).

13. ¿Akin “chikweyi tlanawati” uan akinmej “májtlaktli tlanawatijkeh” tlen ijkuilitok itech Apocalipsis 17:9-12 uan ken mochijtok non profecía?

¹³ (Xiktlajtolti Apocalipsis 17:9-12). Tlen opanok itech Primera Guerra Mundial okichi noijki mapano okse profecía tlen noijki kiteititiskia tikatej itlamian tonalmej. Tekiuajkej tlen katej itech nochi tlaltikpak okinekiayaj mayeto yolseuilistli, ik non, itech enero 1920 okitlalijkej Sociedad de Naciones, satepan itech octubre 1945 okitokayotijkej Naciones Unidas. Biblia kijtoua yetoskia “chikweyi tlanawati” pero amo se tekiua ueyititok porque tla itlaj kineki kichiuas moneki kipaleuiskej tekiuajkej. Nonmej tekiuajkej Biblia kintokayotia “májtlaktli tlanawatijkeh”.

14, 15. (1) ¿Tlen kijtoua Apocalipsis 17:3-5 itech “weyi Babilonia”? (2) ¿Tlen kinpanotok religiones tlen tlakajkayauaj?

¹⁴ (Xiktlajtolti Apocalipsis 17:3-5). Jehová okichi apóstol Juan makita se siuatl tlen auilnentinemi uan kitokayotiaj “weyi Babilonia”. Non siuatl kineskayotia nochi religiones tlen tlakajkayauaj. ¿Tlen techmachtia? Yiuejkika nochi religiones tlen tlakajkayauaj kinpaleuiaj nochtin tekiuajkej uan kinteochiua. Ayakmo miak poliui Jehová kintlalilis itech inyolo tekiuajkej makichiuakan tlen ye mokuayejyekoua. ¿Tlen panos satepan? Tekiuajkej kinmixnamikiskej nochi religiones tlen tlakajkayauaj uan kinpojpoloskej (Apoc. 17:1, 2, 16, 17).

 ¹⁵ ¿Ken tikmatij yikipojpoloskej “weyi Babilonia”? Para titlanankiliskej, matikilnamikikan aueyatl Éufrates okipaleuiaya altepetl Babilonia. Amochtli Apocalipsis kijtoua akinmej kipaleuiaj “weyi Babilonia” yetoskiaj ken aueyatl. (Apoc. 17:15). Noijki kijtoua aueyatl uakiskia, non kiteititia miakej ayakmo kinpaleuiskiaj religiones tlen tlakajkayauaj (Apoc. 16:12). Non profecía yimochijtok porque axkan miakej ayakmo monechikouaj uan oksekan kitemouaj ken kiyektlaliskej tlen kinpanotok.

16. ¿Ken techpaleuia tikajsikamatiskej profecías ijkuak okitlalijkej Naciones Unidas uan kipojpoloskej “weyi Babilonia”?

¹⁶ ¿Ken techpaleuia ninmej profecías? Ijkuak okitlalijkej Naciones Unidas uan axkan miakej ayakmo kinneltokiliaj religiones tlen tlakajkayauaj, non kiteititia tikatej itlamian tonalmej. Maski miakej ayakmo kipaleuia “weyi Babilonia” amo ijkon kinpojpoloskej. Ken yotikitakej, Jehová ‘kintlalilis itech inyolo n májtlaktli tlanawatijkeh’ makichiuakan tlen ye mokuayejyekoua. San  niman kinpojpoloskej religiones tlen tlakajkayauaj, ijkuak ijkon panos miakej motlajtlachialtiskej (Apoc. 18:8-10). d Miakej momojtiskej ijkuak kipojpoloskej “weyi Babilonia” uan xamo titlajyouiskej. Pero akinmej tiktekichiuiliaj Jehová techpaleuis ome tlamantli matiyolpakikan. Se, kinpojpoloskej nochi religiones tlen tlakajkayauaj. Ome, ayakmo miak poliui techmakixtiskej (Luc. 21:28).

17, 18. (1) ¿Tlen uelis tikchiuaskej para okachi titlaneltokaskej? (2) ¿Tlen tikitaskej itech okse tlamachtil?

¹⁷ Daniel okijto: “Momiaktilis tlamatilistli tlen melauak”. Axkan ijkon panotok porque kuali tikajsikamatij profecías (Dan. 12:4, 9, 10). Profecías melauak mochijtokej, non techpaleuia matiktlakaitakan Jehová uan matikpatioitakan iTlajtol (Is. 46:10; 55:11). Ik non, okachi matitlaneltokakan. ¿Ken uelis tikchiuaskej? Mojmostla matimomachtikan Biblia uan matikinpaleuikan oksekimej mamouikakan iuan Jehová. Ye kinpaleuis nochtin akinmej kitemouaj uan kichiuas mayetokan ika yolseuilistli (Is. 26:3).

¹⁸ Itech okse tlamachtil, tikitaskej seki profecías tlen kinpaleuia itekipanojkauan Jehová uan tikitaskej ken mosetiliaj iuan okseki profecías tlen mochijtokej itlamian tonalmej. Noijki tikitaskej tlen okseki tlamantli kiteititia Jesús yitlanauatijtok uan kinyekantok akinmej melauak tlaneltokaj.