1. ¿Tlen okijto Jehová ijkuak Adán uan Eva otlajtlakolchijkej? (Génesis 3:15).

 IJKUAK Adán uan Eva otlajtlakolchijkej, Jehová san niman okijto se profecía tlen kinpaleuiskia inkoneuan. Non profecía ijkuilitok itech Génesis 3:15 (xiktlajtolti).

2. ¿Tleka miak ipati tlen kijtoua Génesis 3:15?

² Non profecía ijkuilitok itech achto amochtli tlen kipia Biblia. Tlen kijtoua non amochtli mouika iuan okseki amochmej. Ijkon ken páginas tlen kipia se amochtli mosetilijtok. Noijki tlen kijtoua Génesis 3:15 mosetilijtok iuan tlen kijtouaj nochtin amochmej tlen kipia Biblia, ik non, san se tlamantli tlamachtiaj. ToTajtsin Dios kiualtitlaniskia akin techmakixtiskia para kinmixpolos Satanás uan nochtin akinmej kichiuaj ken ye. b ¡Non sapanoua kuali para akinmej tiktlasojtlaj Jehová!

3. ¿Tlen tikitaskej?

³ Axkan tiknankiliskej seki tlajtlanilmej tlen mouikaj ika tlen kijtoua Génesis 3:15: ¿Akinmej kinneskayotia  tlen kijtoua profecía? ¿Ken mochijtok? ¿Axkan ken techpaleuia?

4. ¿Akin kineskayotia kouatl uan ken tikmatij?

⁴ Itech Génesis 3:14, 15 tlajtoua itech se “kouatl” uan “ikoneuan” noijki tlajtoua itech se siuatl uan “ikoneuan”. Biblia techpaleuia matikajsikamatikan akinmej kinneskayotia. c Matikitakan akin kineskayotia “kouatl”. Ye amo melauak se kouatl, porque amo uelis kajsikamatiskia ijkuak Jehová okijto itech xochitlali Edén tlen kipanoskia. Okatka se ángel ixtlamatki, Biblia kiyekijtoua akin non kouatl. Apocalipsis 12:9 kijtoua: “Koatl non yowejka kajki, non noiwa itoka diablo iwa satanás”. ¿Akinmej ikoneuan kouatl?

5. ¿Akinmej pouij itech ikoneuan kouatl?

⁵ Ijkuak Biblia kijtoua “ikoneuan” kijtosneki kichiuaj uan mokuayejyekouaj ken intajtsin. Ángeles uan nochtin akinmej kixnamikij Jehová uan ialtepe pouij itech ikoneuan kouatl. Ompa pouij nonmej ángeles tlen oualtemokej nikan tlaltikpak ijkuak okatka Noé uan noijki pouij nochtin akinmej okichiuayaj ken intajtsin, Diablo (Gén. 6:1, 2; Juan 8:44; 1 Juan 5:19; Jud. 6).

6. ¿Tleka siuatl tlen kijtoua Génesis 3:15 amo ye Eva?

⁶ Axkan matikitakan akin kineskayotia siuatl. ¿Tikijtoskia Eva? Amo. Profecía kijtoua ikoneuan siuatl kikuaxajxamaniskiaj kouatl. Yotikitakej kouatl  kineskayotia se ángel amo yolkuali uan motokayotia Satanás. Ikoneuan Eva tlajtlakolejkej, ik non, nion se ikone amo uelis kixpoloskej Satanás. Pero ¿akin uelis kixpolos?

7. ¿Ken techpaleuia Apocalipsis 12:1, 2, 5, 10, matikajsikamatikan akin siuatl tlen kijtoua Génesis 3:15?

⁷ Saiktlami amochtli tlen kipia Biblia kijtoua akin siuatl, tlen kijtoua Génesis 3:15 (xiktlajtolti Apocalipsis 12:1, 2, 5, 10). Non siuatl amo ijkon ken siuamej tlen katej nikan tlaltikpak. Itlampa ikxiuan kipia metstli uan ipan itsonteko kipia “se korona non okimpiaya májtlaktli iwa ome sítlalteh”. Noijki kipia se ikone, ye kineskayotia iTekiuajkayo toTajtsin Dios. Non tekiuajkayotl kajki iluikak uan siuatl noijki moneki ompa yetos, ye kineskayotia akinmej kitechiuiliaj Jehová iluikak, ompa pouij nochtin ángeles (Gál. 4:26).

8. ¿Akin okachi ueyititok itech ikoneuan siuatl uan keman ijkon omochi? (Génesis 22:15-18).

⁸ Biblia techpaleuia matikajsikamatikan akin okachi ueyititok itech ikoneuan siuatl, nin yetoskia se ixui Abrahán (xiktlajtolti Génesis 22:15-18). Omochi ken kijtoua profecía porque Jesús okatka iuejka ixui Abrahán (Luc. 3:23, 34). San ye yetoskia okachi chikauak para kixpolos Satanás. Ik non, ijkuak Jesús okipiaya 30 xiuitl toTajtsin Dios okipejpenki ika iespíritu santo, ijkuakon ye omochi akin okachi ueyititok itech ikoneuan siuatl (Gál. 3:16). Satepan ijkuak oixpoliuik uan toTajtsin Dios okiyoliti, okichi “maweyixto iwa matlanawati” itech iluikak uan tlaltikpak. San ye kinamiki kipojpolos “nochi tlan kichiwa n diablo” (Heb. 2:7; Mat. 28:18; 1 Juan 3:8).

9, 10. (1) ¿Akinmej noijki pouij itech ikoneuan siuatl uan ken kinpejpenaj? (2) ¿Tlen tikitaskej?

⁹ Itech ikoneuan siuatl noijki oksekimej iuan opejki pouij. Apóstol Pablo okijto akinmej opejki pouij, ijkuak okintlajkuilili tlapejpenalmej judíos uan oksekimej, ye okijto: “Tla nomejwah non iaxkawah Cristo, milák nonteixwiwah de Abraham, iwa nonkiseliskeh tlan Dios okisentlalili kimakas” (Gál. 3:28, 29). Ijkuak Jehová kipejpena se itekipanojka ika espíritu santo, kijtosneki poui inmiuan ikoneuan siuatl. Ompa pouij Jesucristo uan 144,000 tlen iuan tlanauatiskej (Apoc. 14:1). Yejuan mochijchikauaj mokuayejyekoskej uan kichiuaskej ken toTajtsin Jehová.

¹⁰ Yotikajsikamatkej akinmej ikoneuan siuatl uan ikoneuan kouatl tlen kijtoua Génesis 3:15. Axkan tikitaskej ken kichijtok Jehová tlen okijto, satepan tikitaskej ken techpaleuia axkan non profecía.

11. ¿Ken okikojkojkej ikxitolon ikoneuan siuatl?

¹¹ Génesis 3:15, kijtoua kouatl kikojkoskia ikxitolon ikoneuan siuatl. Non omochi ijkuak Satanás okichi judíos uan romanos makimiktikan iKone toTajtsin Dios (Luc. 23:13, 20-24). Ijkuak ikaj kikokoua ikxitolon, xamo amo uelis nejnemis seki tonal, ijkon opanok ijkuak Jesús okimiktijkej, seki tonal amitlaj ueli okichi porque okatka eyi tonal itech mikakoyoktli (Mat. 16:21).

12. ¿Keman uan ken kikuaxajxamaniskej kouatl?

 ¹² Para uelis mochiuaskia tlen kijtoua Génesis 3:15 omonekiaya toTajtsin Dios san niman makiyoliti Jesús porque profecía kijtoua ikoneuan siuatl kikuaxajxamaniskiaj kouatl. Non kijtosneki omonekiaya pajtis ikxitolon Jesús. Ijkon opanok, ipan eyi tonal Jehová okiyoliti uan ayakmo keman ixpoliuis. Jesús kixajxamanis uan kixpolos Satanás ijkon ken toTajtsin Dios yokijto (Heb. 2:14). Cristo uan akinmej iuan tlanauatiskej kinmixpoloskej nochtin akinmej pouij itech ikoneuan kouatl uan kikokoliaj toTajtsin Dios (Apoc. 17:14; 20:4, 10). d

13. ¿Axkan ken techpaleuia yimochijtok profecía?

¹³ Tlen kijtoua profecía yimochijtok, ik non, techpaleuia tla tiktekichiuilijtokej toTajtsin Dios. Ijkuak Jesús ouala nikan tlaltikpak okichi ken iTajtsin (Juan 14:9). Tlen okichi techpaleuia matikixmatikan uan matiktlasojtlakan Jehová. Noijki yotechpaleui tlen otlamachti uan ken techyekana itech nochi tlaltikpak. Noijki techmachtia ken uelis tikyolpaktiskej Jehová. Ijkuak okikojkojkej ixitolon noso okimiktijkej Jesús, tinochtin uelis techpaleuis. Ijkuak toTajtsin Dios okiyoliti, okitemakak ieso ken tlamanali uan ‘kichipawa nochteh totlajtlakolwah’ (1 Juan 1:7).

14. ¿Ken tikmatij amo san niman mochiuaskia profecía tlen okijto Jehová itech xochitlali Edén?

¹⁴ Tlen okijto Jehová itech xochitlali Edén okiteititi amo san niman mochiuaskia profecía. Siuatl uejkauaskia para kinpiaskia ikoneuan uan Diablo noijki uejkauaskia para kintemoskia akinmej kipaleuiskej moteuiskej iuan siuatl. Non techpaleuia porque tikmatij akinmej kinyekana Satanás techkokoliskej. Jesús noijki non okinmilui imachtijkauan (Mar.13:13; Juan 17:14). Melauak mochijtok tlen kijtoua profecía uan okachi itech ninmej tonalmej. ¿Tleka ijkon tikijtouaj?

15. ¿Tleka axkan okachi miakej techkokoliaj uan tleka amo moneki techmomojtis Satanás?

¹⁵ Itech 1914 Jesús opejki tlanauatia iluikak, satepan okiualtlamotlakej Satanás. Ye tlanauatijtok nikan tlaltikpak uan kimati kixpoloskej (Apoc. 12:9, 12). Ik non, kualankamiki uan kitemojtinemi ken techtlajyouiltis (Apoc. 12:13, 17). Akinmej kinyekana Satanás okachi techkokoliaj pero amo matimomojtikan. Matitlaneltokakan ijkon ken Pablo, ye okijto: “Tla Dios kajki towah, ¿akin weletis itla techtoktis?” (Rom. 8:31). Moneki tikneltokaskej Jehová porque yomochi miak tlamantli tlen okijto itech Génesis 3:15.

16-18. ¿Ken yokinpaleui Curtis, Ursula uan Jessica okajsikamatkej tlen kijtoua Génesis 3:15?

¹⁶ Maski san tlen techpanos, tlen Jehová okijto itech Génesis 3:15 techpaleuia matitlaxikokan. Se tokni tlen itoka Curtis uan tlapaleuia ompa Guam, okijto: “Ualeua itlaj nechtekipachoua noso nitlajyouia uan non kichiua oui manikita niktlakamatis Jehová. Pero onimokuayejyeko tlen  kijtoua Génesis 3:15 non nechpaleuia nochipa manikneltoka toTajtsin Dios”. Curtis yikineki Jehová makipojpolo nochi tlen techtlajyouiltia.

¹⁷ Se tokni tlen itoka Ursula uan chanti ompa Baviera (Alemania), okijto ijkuak okajsikamatki tlen kijtoua Génesis 3:15 okineltokak Biblia iTlajtol toTajtsin Dios. Noijki sapanoua okitlajtlachialti okseki profecías mouikaj iuan tlen kijtoua Génesis 3:15. Noijki okijto: “Onechyolchika ijkuak onikmatki Jehová san niman okichi itlaj para tlayektlalis”.

¹⁸ Se tokni tlen itoka Jessica uan chanti Micronesia, okijto: “Ok nikilnamiki ken onimomachili ijkuak onikmatki tlen melauak tlamachti Biblia. Onikajsikamatki tlen kijtoua Génesis 3:15 melauak mochijtok uan nechilnamiktia Jehová amo okinekiaya matitlajyouikan. Tlen kijtoua non profecía nechpaleuia manikneltoka tla tiktekichiuiliaj Jehová kuali tiyetoskej axkan uan noijki satepan”.

19. ¿Tleka tikneltokaj mochiuas tlen ok poliui itech profecía?

¹⁹ Yotikitakej tlen kijtoua Génesis 3:15 yimochijtok. Axkan tikmatij akinmej ikoneuan siuatl uan ikoneuan kouatl. Jesús okachi ueyititok itech ikoneuan siuatl uan ikxitolon opajtik, axkan ye tekiua uan amo keman mikis. Ayakmo miakej poliui para Jehová makinpejpena nochtin akinmej tlanauatiskej iuan Jesús. Yomochi seki tlamantli tlen kijtoua profecía, non techpaleuia matikneltokakan noijki mochiuas tlen ok poliui, kikuaxajxamaniskej kouatl. Tiitekipanojkauan Jehová sapanoua tiyolpakiskej ijkuak kixpoloskej Satanás. Ik non, amo ximosotlaua, xikneltoka Jehová ika ikoneuan siuatl kinteochiuas nochtin akinmej mokauaskej nikan tlaltikpak (Gén. 22:18).