Notajtsin otlayekanaya itech Iglesia Unida de Canadá. Ikinon nochi domingos san kualkan ompa otechtitlaniaya nokni uan ne para matechmachtikan tlen kijtoua Biblia. Kanaj las once iuan otiayaj itech teopan. Satepan yitiotlak otiayaj iuan nonantsin kanin monechikouaj iTlaixpantijkauan Jehová. Otikitakej amo san se tlamantli otlamachtiayaj itech teopan uan kanin omonechikouayaj iTlaixpantijkauan Jehová.

Nonantsin okintlapoui tlen omomachtijtoka Bob Hutcheson uan isiua Marion. Yejuan okatkaj iyolikniuan uan noijki omochijkej iTlaixpantijkauan Jehová. Itech 1958 Bob uan Marion otechuikakej ne uan eyi inkoneuan itech se ueyi nechikol tlen omotokayotiaya “Voluntad Divina”. Non ueyi nechikol omochi Nueva York uan ouejka chikueyi tonal. Axkan nikajsikamati omochijchikajkej para nechuikaskej uan non sapanoua nikpatioita.

Ijkuak onikatka nitelpochtli kanin onichantiaya okatkaj yolkamej uan onechpaktiaya nikinmaluis. Ikinon oniknekiaya nimomachtis ken nikinpajtis yolkamej. Nonantsin okilui se tlayekanki tlen oniknekiaya nikchiuas uan ye nouan omotlapoui. Onechilnamikti yitikatej itlamian tonalmej uan onechilui tlen panoskia tla niaskia nimomachtiti universidad. Uelis ayakmo nimouikaskia iuan  Jehová (2 Tim. 3:1). Onimokuayejyeko tlen onechilui uan ayakmo onia onimomachtito.

Pero ayamo onikmatiaya tlen nikchiuas ijkuak niktlamiskia secundaria. Itlamian semana nochipa oniaya nitetlapouiti pero amo onechpaktiaya nitetlapouis uan amo oniknekiaya nimochiuas precursor. Notajtsin uan notío amo okatkaj iTlaixpantijkauan Jehová uan okinekiayaj nochipa manitekipano itech se empresa ompa Toronto. Notío okipiaya se tekitl miak ipati itech non empresa ikinon ne noijki opejki ompa nitekipanoua.

Ompa okachi miak horas onitekipanouaya uan onimouikaya inmiuan akinmej amo iTlaixpantijkauan Jehová. Ikinon ayakmo okachi oniktekichiuiliaya Jehová. Ijkuakon onichantiaya iuan nokoltsin uan ye amo okatka iTlaixpantijka Jehová. Satepan oixpoliuik uan omonekiaya niktemos kanin nichantiskia.

Bob uan Marion akinmej onechuikakej ueyi nechikol itech 1958, yejuan onechmaluijkej ken yetoskiaj notatajuan. Onechiluijkej inmiuan manichantiti uan onechpaleuijkej okachi manimouika iuan Jehová. Itech 1960 onimoapolakti iuan se intelpoch tlen omotokayotiaya John. John omochi precursor uan non onechpaleui okachi manitetlapoui. Tokniuan okitakej onimochijchikauaya ikinon satepan onechtlalijkej manikyekana Tlamachtil para Akinmej Tetlapouiaj. a

Itech 1966 onimonamikti iuan Randi Berge. Ye okatka precursora uan okinekiaya tetlapouis kanin okachi omonekiaya matetlapouikan. Tlayekanki itech circuito otechyolchika uan otechilui kox uelis titlapaleuitiuij ompa Orillia (Ontario). Otikololojkej tlen otikpiayaj uan otiajkej.

Tlen okichiuaya Randi onechpaleui ikinon san niman onimochi precursor ijkuak otiajsitoj Orillia uan onimochijchika kuali nitlamachtis. Oniyolpakiaya porque onitlamachtiaya ika Biblia uan onikinpaleui oksekimej makixmatikan Jehová. Ompa otikpaleuijkej se tlakatl uan isiua makipatlakan innemilis uan mamotemakakan ixpan Jehová.

Se tonal onia Toronto uan ompa onikixmatki se tokni tlen otlayekanaya Betel uan omotokayotiaya Arnold MacNamara. Ye onechtlajtlani kox otiknekiayaj tiyetoskej precursores especiales. Ne san niman onikilui kema techpaktiskia pero noijki onikilui amo oniknekiya nias Quebec. Onikinchikoitaya akinmej otlajtouayaj francés tlen ochantiayaj Quebec ompa Canadá. Onikchiuaya ijkon ken okichiuayaj akinmej otlajtouayaj inglés tlen ochantiayaj Canadá. Itech non xiuitl akinmej ochantiayaj Quebec ayakmo okinekiayaj makinnauati tekiua tlen otlanauatiaya Canadá.

Arnold MacNamara onechilui Betel okintitlantoka precursores especiales san ompa Quebec. Onikijto tiaskiaj porque onikmatiaya Randi okinekiaya ompa tlapaleuiti. Satepan onikajsikamatki non tlen okachi kuali otikchijkej.

Ompa makuili semanas otechmachtijkej tlajtoli francés. Satepan otechtitlankej altepetl Rimouski, Randi, ne uan okse tokni uan isiua. Non altepetl mokaua kanaj 540 kilómetros ik noreste Montreal. Amo okachi otitlajtouayaj francés uan ijkon onikteititi ijkuak onikijto seki tlamantli kanin otimonechikouayaj. Omonekiaya nikijtos itech ueyi nechikol tlen tikpiaskiaj ualaskiaj tokniuan tlen ochantiayaj Austria pero ne onikijto ualaskiaj tokniuan avestruces.

Ompa Rimouski otichantiayaj inmiuan akinmej otechtitlankej pero noijki ompa okatkaj naui tokniuan ichpochmej. Noijki ompa okatka okse tokni, isiua uan ome ichpochuan. Non familia okitemo se kali tlen okipiaya chikome cuartos uan san sekan otiktlaxtlauayaj renta. Non kali otikiluiayaj “La Casa Blanca” porque nochi okatka istak uan ompa otichantiayaj 12 noso 14. Randi uan ne otitetlapouiayaj nochi tonal porque otikatkaj precursores especiales. Ikinon otikintlasojkamatiliayaj tokniuan porque nochipa touan otetlapouiayaj maski sapanoua oseuaya.

Sapanoua otimouikayaj inmiuan nonmej precursores uan otikatkaj ken se familia. Otitlatlatiayaj uan san sekan ompa otimototoniayaj. Noijki otikpiayaj se tonal ijkuak san sekan otitlakualchiuayaj uan otikinchiuayaj seki empanadas tlen intoka pierogis. Seki sábados youak se tokni otlatsotsonaya uan tejuan otitlakuikayaj uan otimijtotiayaj.

Ompa Rimouski miakej okinekiayaj momachtiskej tlen kijtoua Biblia. Opanok makuili xiuitl uan miakej omoapolaktijkej. Noijki opejki tetlapouiaj kanaj 35 tokniuan. Sapanoua otiyolpakej porque miakej opejki monechikouaj.

Tlen otikchijkej Quebec sapanoua otechpaleui okachi kuali matiktekichiuilikan Jehová. Ye otechpaleui matitetlapouikan uan amitlaj otechpolo. Noijki kuali otikinmixmatkej akinmej tlajtouaj francés, otechpakti ken tlajtouaj uan tlen kichiuaj. Non otechpaleui matikintlasojtlakan oksekimej tlen oksekan chantij (2 Cor. 6:13).

Satepan tokniuan tlen katej Betel otechiluijkej kox uelis titlapaleuitoskiaj Tracadie. Non altepetl kajki ik este ompa Nueva Brunswick. Oui otikitakej ijkuak ijkon otechiluijkej porque yikin otiktemokaj se kali kanin tichantiskiaj uan kanaj keski tonal onitlamachtiaya itech se escuela. Noijki sekimej tlen otikinmachtiayaj yikin opejka tetlapouiaj uan otikchijchijtokaj se kali kanin timonechikoskiaj.

Itlamian semana sapanoua otimotlatlaujtijkej para tikmatiskiaj tlen tikchiuaskiaj. Satepan otiajkej Tracadie uan otikitakej ompa amo okatka ken  altepetl Rimouski. Pero otikijtojkej ompa titlapaleuiskiaj porque Jehová okinekiaya ompa matiktekichiuilikan. Otikkauilijkej Jehová matechpaleui uan otikitakej ken ye otechpaleui (Mal. 3:10). Amo oui otikitakej otiajkej altepetl Tracadie porque Randi kuali omouikaya iuan Jehová, oyolpakiaya uan nochipa okinpaleuiaya oksekimej.

Ompa Tracadie okatka se tlayekanki tlen itoka Robert Ross. Ye uan isiua tlen itoka Linda okatkaj precursores uan ompa otlapaleuitoj pero satepan okipixkej se inkone uan ompa omokajkej. Yejuan sapanoua otechyolchikajkej maski okiskaltijtokaj inkonetsin porque otechmakayaj tlen okipiayaj uan sapanoua okinpaktiaya tetlapouiskej.

Yotitlapaleuijtokaj ome xiuitl ken precursores ompa Tracadie uan onechiluijkej manitlapaleui ken tlayekanki itech circuito. Chikome xiuitl otikintlajpalojkej tokniuan tlen otlajtouayaj inglés uan satepan otechtitlankej matikintlajpalotij tokniuan tlen otlajtouayaj francés ompa Quebec. Ijkuak onitlamachtiaya b tokni tlayekanki itech distritto tlen itoka Léonce Crépeault onechiluiaya kuali tlen onikchiuaya pero onechtlajtlaniaya: “¿Tlen uelis tikchiuas para okachi mamoajsikamati tlen titlamachtia?”. Ye onechpaleui amo oui manitlamachti uan mamoajsikamati.

Amo keman nikilkauas ueyi nechikol Internacional tlen omochi Montreal itech xiuitl 1978 uan omotokayoti “Fe Victoriosa”. Ne onikinpaleui tokniuan tlen tetlamakaskiaj uan itech non ueyi nechikol monechikoskiaj kanaj 80,000. Pero itech non tonal okse tlamantli tetlamakaskiaj porque okipatlakej tlen ika otlakualchiuayaj uan okipatlakej tlen kitemakaskiaj. Otikinpiayaj kanaj 20 refrigeradores uejueyij pero ualeua oijtlakauiayaj. Noijki amo ueli achto otitlayektlalitoj itech estadio kanin mochiuaskia ueyi nechikol porque se tonal achto ompa omauiltijkej. Otikalakej ijkuak yokatka tlajko youak uan hornos omonekiaya yetoskej totonikej ijkuak ayamo otlanesiaya para kualkan uelis titetlamakaskiaj. Non tonal sapanoua otisotlauakej pero tokniuan tlen inmiuan onitekipano onechmachtijkej miak tlamantli porque kuali omouikayaj iuan Jehová uan oyolpakiayaj. Tlen otechpanok non tonal otechpaleui kuali matimouikakan uan hasta axkan kuali timouikaj. Kanaj itech xiuitl 1940 uan 1950 otechtlajyouiltijkej akinmej otechkokoliayaj ompa  Quebec. Ikinon tikitaj sapanoua miak ipati ueyi nechikol tlen otikpixkej itech non altepetl.

Itech uejueyij nechikolmej tlen omochiuayaj Montreal onechpaleui miak tlen okichiuayaj oksekimej tlayekankej itech circuito. Se tonal tokni David Splane tlen axkan poui itech Cuerpo Gobernante okiyekanki ueyi nechikol. Satepan onechiluijkej ne manikyekana ueyi nechikol uan David Splane onechpaleui miak.

Otitlapaleuijkej 36 xiuitl itech circuito uan itech 2011 onechyolejkej manikinmachti tokniuan tlayekankej itech tlamachtil tlen kiseliaj. Itech ome xiuitl Randi uan ne otikochkej ipan 75 tlatlamantli camas. Oui otikitakej pero tlen otikchijkej okinpaleui oksekimej porque ijkuak otlamiaya semana tlayekankej omotlasojkamatiayaj. Yejuan okitayaj Cuerpo Gobernante okinpaleuiaya kuali mamouikakan iuan Jehová.

Satepan onechiluijkej manikinmachti akinmej oyayaj itech Tlamachtil para ma tetlapouikan Tekiuajkayotl. Tokniuan tlen oyayaj momachtitiuij ualeua omotekipachouayaj porque omonekiaya kichiuaskej miak tlamantli. Omonekiaya momachtiskej chikome horas, omonekiaya kichiuaskej tareas eyi horas uan omonekiaya kiyektlaliskej naui noso makuili tlamachtilmej tlen kipanoltiskiaj itech se semana. Ne uan okse tokni tlen noijki otlamachtiaya otikinmiluiayaj san Jehová uelis kinpaleuiskia makichiuakan nochi non tlamantli. Amo keman nikilkauas ijkuak onikinmitaya tokniuan sapanoua oyolpakiayaj porque Jehová okinpaleuiaya makichiuakan tlen yejuan omokuayejyekouayaj amo uelis kichiuaskiaj.

Sekimej tlen okinmachtiaya nonantsin opejki kitekichiuiliaj Jehová porque ye okinpaleui uan noijki okipaleui notajtsin. Eyi tonal satepan ijkuak oixpoliuik nonantsin otikitakej notajtsin oajsito kanin otimonechikouayaj uan okikak tlamachtil tlen okipanoltijkej. Ye omonechiko 26 xiuitl tlen opanok. Amo keman omoapolakti pero tlayekankej onechiluijkej ye achto oajsiaya kanin monechikouaj tokniuan.

Nonantsin kuali otechmachti ne uan eyi nokniuan. Yejuan uan innamik kitekichiuilijtokej Jehová. Se kajki Betel tlen kajki Portugal uan okse kajki Betel tlen kajki Haití.

Randi uan ne axkan titlapaleuijtokej ken precursores especiales ompa Hamilton (Ontario). Ijkuak otitlapaleuiayaj itech circuito, otechpaktiaya tiaskej inmiuan tokniuan ijkuak oyayaj tlamachtitiuij uan okinchiuayaj inrevisitas. Pero axkan tipakij porque tejuan titlamachtiaj uan tikitaj ken peuaj mouikaj iuan Jehová akinmej tikinmachtiaj. Noijki kuali tikinmixmatij tokniuan kanin timonechikouaj uan techyolchikaua ijkuak tikitaj Jehová nochipa kinpaleuia.

Tejuan timotlasojkamatij porque oksekimej otechpaleuijkej. Ikinon timochijchikauaj tikinyolchikauaskej oksekimej para okachi makitekichiuilikan Jehová (2 Cor. 7:6, 7). Otikixmatkej se tokni tlen isiua, itelpoch uan ichpoch okatkaj precursores. Se tonal oniktlajtlani tokni kox okinekiaya noijki yetos precursor, pero ye onechilui yokipaleuijtoka ifamilia para mayetokan precursores. Ikinon oniktlajtlani: “¿Timokuayejyekoua Jehová amo uelis okachi kinmaluis?”. Onikyolchika mayeto precursor ijkon ken ifamilia okichijtoka. Opanok chikuase metstli uan ye omochi precursor.

Randi uan ne okachi tikintlapouiskej oksekimej tlen okichijchi Jehová. Tiknekij mayolpakikan makitekichiuilikan Jehová ijkon ken tejuan tikchiuaj (Sal. 71:17, 18).