1. ¿Tleka ipati matimoyektlalikan ijkuak ayamo itlaj panoua?

 AKINMEJ achto moyektlaliaj uelis momakixtiskej. Ijkuak kanaj tlaxixini, akinmej kuali moyektlaliaj okachi momakixtiaj uan kinpaleuiaj oksekimej. Ompa Europa se organización tlen kinpaleuia oksekimej okijto: “Akinmej kuali moyektlaliaj uelis kinmakixtiskej oksekimej”.

2. ¿Tleka moneki timoyektlaliskej ijkuak ayamo peua ueyi tlajyouilistli? (Mateo 24:44).

² Amo tikmatij keman peuas ueyi tlajyouilistli (Mat. 24:21). Pero ueyi tlajyouilistli amo ijkon ken ijkuak tlaxixini porque tejuan yitikmatij ijkon panos. Yikipia kanaj 2,000 xiuitl Jesús okijto imachtijkauan moneki moyektlaliskej ijkuak ayamo peua non tlajyouilistli (xiktlajtolti Mateo 24:44). Tejuan uelis titlaxikoskej tla tikchiuaskej tlen Jesús okijto. Noijki uelis tikinpaleuiskej oksekimej matlaxikokan (Luc. 21:36).

3. ¿Tleka moneki titlaxikoskej, titeiknomatiskej uan titetlasojtlaskej ijkuak ayamo peua ueyi tlajyouilistli?

³ Moneki tikchiuaskej eyi tlamantli para timoyektlaliskej uan ijkon titlaxikoskej itech ueyi tlajyouilistli. ¿Tlen tikchiuaskej tla techiluiskej matiktematiltikan itlaj tlen yetoskia ken tesiuitl uan oksekimej amo kinpaktis? (Apoc. 16:21). Tejuan moneki titlaxikoskej para uelis tikchiuaskej tlen technauatis Jehová uan tikneltokaskej ye techmaluis. ¿Tlen tikchiuaskej tla tokniuan kipoloskej nochi tlen kipiaj? (Hab. 3:17, 18). Tejuan moneki tikinmiknomatiskej para uelis tikinpaleuiskej uan tikinmakaskej tlen ika mopanoltiskej. Noijki ¿tlen tikchiuaskej ijkuak tekiuajkej mosetiliskej uan kinekiskej techteuiskej? ¿Tlen tikchiuaskej tla  techiluiskej kanaj keski tonal san sekan matiyetokan inmiuan tokniuan? (Ezeq. 38:10-12). Para uelis inmiuan tiyetoskej moneki sapanoua tikintlasojtlaskej.

4. ¿Ken tikmatij moneki timochijchikauaskej ok titlaxikoskej, titeiknomatiskej uan titetlasojtlaskej?

⁴ ITlajtol toTajtsin Dios techiluia matitlaxikokan, matiteiknomatikan uan matitetlasojtlakan. Lucas 21:19 kijtoua: “Iwa tla nochi nonkixikoskeh, nonmomakixtiskeh”. Colosenses 3:12 kijtoua matiteiknomatikan. Noijki 1 Tesalonicenses 4:9, 10 kijtoua: “Porke inewia Totajtsi Dios yonomechmachti kenijki moneki nonmotlasojtlaskeh non nochteh. [...] Pero axa tokniwah, tomechtlatlaujtiah okachi mamomiakili nomolasojtlalis”. Nonmej tlajtolmej okinmijkuililijkej akinmej yotlaxikojtokaj, yoteiknomatiayaj uan yotetlasojtlayaj. Pero omonekiaya ok mochijchikauaskej para ijkon kichiuaskej. Tejuan noijki moneki ijkon tikchiuaskej. Pero ¿tlen techpaleuis ijkon matikchiuakan? Axkan timomachtiskej tlen okinpaleui tokniuan itech achto siglo uan ken uelis tikchiuaskej ken yejuan. Ijkon uelis timoyektlaliskej para titlaxikoskej itech ueyi tlajyouilistli.

5. ¿Tlen okinpaleui matlaxikokan tokniuan itech achto siglo?

⁵ Tokniuan tlen okatkaj itech achto omonekiaya tlaxikoskej (Heb. 10:36). Yejuan okintekipachouaya seki tlamantli pero noijki otlajyouiayaj porque okiueyichiuayaj toTajtsin Dios. Miakej tokniuan otlajyouiayaj porque infamilia, tekiuajkej romanos uan tlayekankej judíos okintlajyouiltiayaj (Mat. 10:21). Noijki amo omonekiaya kinkakiskej akinmej okikajkej Jehová uan okixnamikiayaj. Porque yejuan otlamachtiayaj tlen amo melauak uan okinekiayaj kinxexeloskej tokniuan (Hech. 20:29, 30). Pero tokniuan otlaxikojkej maski ijkon okinpanok (Apoc. 2:3). ¿Tlen okinpaleui matlaxikokan? Yejuan omokuayejyekouayaj ken otlaxiko Job uan oksekimej itekipanojkauan Jehová tlen yiuejkika okatkaj (Sant. 5:10, 11). Noijki okitlatlaujtiayaj Jehová makinyolchikaua (Hech. 4:29-31). Yejuan noijki okilnamiktokaj Jehová kinteochiuaskia tla tlaxikoskiaj (Hech. 5:41).

6. ¿Tlen techmachtia tlen okichi Merita para titlaxikoskej ijkuak techtlajyouiltiaj?

⁶ Tejuan noijki uelis titlaxikoskej tla nochipa timokuayejyekouaj ken otlaxikojkej itekipanojkauan Jehová tlen kijtoua Biblia uan amatlajkuilolmej. Non okipaleui se tokni tlen itoka Merita uan chanti Albania. Tokni otlaxiko maski ifamilia sapanoua okitlajyouiltiaya. Ye okijto: “Ijkuak onimomachti itech Biblia tlen okipanok Job oajsik itech noyolo. Ye sapanoua otlajyoui uan amo okimatiaya akin okitlajyouiltijtoka. Pero ye okijto: ‘¡Hasta ijkuak nimikis nikpias noyolo ajsitok!’ (Job 27:5). Non onechpaleui manikita ne amo sapanoua nitlajyouia ken Job uan nikmati tleka titlajyouiaj”.

7. ¿Tlen moneki tikchiuaskej axkan maski amo sapanoua titlajyouiaj?

⁷ Noijki techpaleuis matitlaxikokan tla nochipa tikiluiaj Jehová ken timomachiliaj (Filip. 4:6; 1 Tes. 5:17). Uelis axkan amo sapanoua titlajyouijtokej. Pero ¿tlen tikchiuaj ijkuak itlaj amo techpaktia, amo tikmatij tlen tikchiuaskej noso timotekipachouaj? ¿Tikiluiaj Jehová matechpaleui? Tla axkan nochipa tikiluiaj Jehová matechpaleui, noijki ijkon tikchiuaskej ijkuak okachi techtlajyouiltiskej.  Tikneltokaskej Jehová techpaleuis ijkuak monekis (Sal. 27:1, 3).

8. ¿Ken techpaleuia tlen okichi Mira matikmatikan tla titlaxikouaj axkan uelis titlaxikoskej satepan? (Santiago 1:2-4; noijki xikita foto).

⁸ Uelis titlaxikoskej ijkuak panos ueyi tlajyouilistli tla axkan titlaxikouaj ijkuak itlaj techpanoua (Rom. 5:3). Miakej tokniuan kijtouaj okachi tlaxikouaj ijkuak itlaj yokinpanok. Yejuan kitaj Jehová kinpaleuia ijkuak tlajyouiaj uan okachi kineltokaj ye kineki kinpaleuis. Ijkon satepan okachi tlaxikouaj (xiktlajtolti Santiago 1:2-4). Se precursora tlen itoka Mira uan chanti Albania noijki ijkon mokuayejyekoua. Ye kijtoua ualeua kita amikaj tlajyouia ijkon ken ye. Ijkuak ijkon kipanoua mokuayejyekoua ken yokipaleui Jehová 20 xiuitl tlen yopanok. Ye kimoluia: “Jehová sapanoua yomitspaleui ijkuak otitlajyoui ikinon amo xikkaua tiktekichiuilis”. Tejuan noijki matimokuayejyekokan ken yotechpaleui Jehová matitlaxikokan. Matikneltokakan ye kita ijkuak titlaxikouaj uan satepan techteochiuas (Mat. 5:10-12, TNM). Ijkon ijkuak peuas ueyi tlajyouilistli, tikmatiskej tlen tikchiuaskej uan nochipa titlaxikoskej.

9. ¿Ken okiteititijkej oteiknomatiayaj tokniuan tlen ochantiayaj Antioquía de Siria?

⁹ Matikitakan tlen opanok ijkuak tokniuan tlen ochantiayaj Judea otlajyouijkej porque amo okipiayaj tlen kikuaskej. Tokniuan tlen ochantiayaj Antioquía de Siria okinmiknomatkej ijkuak okimatkej otlajyouijtokaj. Pero yejuan okiteititijkej okinmiknomatiayaj. “Omotlapowijkeh iwa omokajkeh kimpalewiskeh ika tlan weletis, iwa kintitlaniliskeh n tokniwah non ochantitokah Judea” (Hech. 11:27-30). Tokniuan tlen ochantiayaj Antioquía okinpaleuijkej tokniuan tlen otlajyouijtokaj maski ochantiayaj uejka (1 Juan 3:17, 18).

10. ¿Ken uelis tikteititiskej tikinmiknomatij tokniuan ijkuak tlajyouiaj? (Noijki xikita foto).

¹⁰ Tejuan noijki uelis tikteititiskej tikinmiknomatij tokniuan ijkuak tlajyouiaj. Uelis tikintlajtlaniskej tlayekankej ken titlapaleuiskej, tiktemakaskej totomin ika nochi toyolo uan timotlatlaujtiskej inpatka tokniuan tlen tlajyouijtokej (Prov. 17:17). b Itech 2020 ipan nochi tlaltikpak okintlalijkej 950 grupos tlen okinpaleuijkej tokniuan ijkuak opanotoka COVID-19. Tikintlasojkamatiliaj nochtin akinmej tlapaleuiaj. Yejuan kinmiknomatij tokniuan ikinon kinmakaj tlen kinpoloua, kinyolchikauaj ika Biblia uan ualeua kinyektlaliliaj inkalijtik uan noijki kanin monechikouaj (noijki xikita 2 Corintios 8:1-4).

11. ¿Ken tikueyichiuaj toTajtsin Dios ijkuak titeiknomatij?

¹¹ Ijkuak tlaxixini oksekimej kitaj tikinpaleuiaj tokniuan. Itech 2019 ompa Bahamas oxixinki se kali kanin omonechikouayaj tokniuan porque opanok huracán Dorian. Ijkuak tokniuan okiyektlalijtokaj non kali, okitlajtlanijkej se tlakatl makinmilui kech omonekiaya para tlayektlaliskej. Ye okinmilui: “Nikneki namechpaleuis. Nikneki namechtliokolis tlen ika nantekipanoskej, tlen nankitekitiltiskej uan nikintlaxtlauis akinmej namechpaleuiskej. Nechpaktia nikitas ken nankinpaleuiaj namoyolikniuan”. Miakej  amo kixmatij Jehová pero kitaj tlen tejuan tikchiuaj. Tiyolpakij tikmatij tla tikinmiknomatij tokniuan uelis kinpaleuis oksekimej makixmatikan toTajtsin Dios tlen “satlawel teiknoma” (Efes. 2:4).

12. ¿Tleka techpaleuis ijkuak yetos ueyi tlajyouilistli tla axkan titeiknomatij? (Apocalipsis 13:16, 17).

¹² ¿Tleka moneki titeiknomatiskej ijkuak panotos ueyi tlajyouilistli? Porque Biblia kijtoua akinmej amo kinpaleuiaj tekiuajkej kintlajyouiltiskej axkan uan noijki ijkuak yetos ueyi tlajyouilistli (xiktlajtolti Apocalipsis 13:16, 17). Ijkuakon xamo monekis tikinmakaskej tokniuan tlen ika mopanoltiskej. Ijkuak totekiua Jesucristo tlaixkomakas tiknekij makita tejuan titeiknomatij. Ijkon ye techiluis: “Xikselikah nochi tlan nomechaxkatiliskeh” (Mat. 25:34-40).

13. ¿Tlen okichijkej tokniuan itech achto siglo para okachi motlasojtlaskej? (Romanos 15:7).

¹³ Itech achto siglo nochtin okimatiayaj tokniuan omotlasojtlayaj. Pero yejuan okitakej oui motlasojtlaskej. Porque tokniuan tlen omonechikouayaj Roma okatkaj tlatlamantli. Sekimej okatkaj judíos uan okinmachtijkej makichiuakan tlen okijtouaya iTlanauatil Moisés. Pero noijki okatkaj sekimej tokniuan tlen oualayaj itech okseki altepemej uan tlatlamantli okinmiskaltijkej. Xamo sekimej okatkaj tlakeualmej uan oksekimej amo. Noijki xamo sekimej okinpiayaj intlakeualuan. ¿Tlen okinpaleui mamotlasojtlakan maski tlatlamantli okatkaj? Apóstol Pablo okinmilui: “Ximoselikah non nochteh” (xiktlajtolti Romanos 15:7). ¿Tlen kijtosneki tlen okijto Pablo? Tlajtoli “ximoselikah non nochteh” kijtosneki ijkuak ikaj kiteititia tetlasojtla uan kitemaka tlen kipia. Ijkon kichiua akin kuali kinselia oksekimej ikalijtik uan kuali inmiuan mouika. Matikitakan tlen okipanok Onésimo. Ye okatka se tlakeuali uan ocholo, ikinon Pablo okilui Filemón ken omonekiaya kiselis. Ye okilui: “Xikyekseli n Onésimo” (Filem. 17). Noijki Priscila uan Áquila kuali okiselijkej Apolos uan okiuikakej inkalijtik maski yejuan okimatiayaj okachi miak tlamantli tlen okichi Cristo (Hech. 18:26). Nonmej tokniuan omotlasojtlayaj maski tlatlamantli okatkaj. Yejuan kuali okinseliayaj oksekimej uan kuali omouikayaj.

14. ¿Ken okiteititijkej Anna uan inamik otetlasojtlayaj?

¹⁴ Tejuan noijki uelis tikteititiskej tikintlasojtlaj tokniuan tla kuali inmiuan timouikaj. Ijkon yejuan noijki techtlasojtlaskej (2 Cor. 6:11-13). Matikitakan tlen okinpanok Anna uan inamik tlen otlapaleuitoj ken misioneros ompa África Occidental. Ijkuak oajsitoj itech okse altepetl ompa África, san niman opejki COVID-19 uan ayakmo ueli omonechikojkej inmiuan tokniuan. ¿Tlen okichijkej para kiteititiskiaj okintlasojtlayaj tokniuan? Okinnotsayaj ika videoconferencia uan okinmiluiayaj okinekiayaj okachi kinmixmatiskej. Tlen okichijkej oajsik itech inyolo tokniuan uan opejkej kinnotsaj ika teléfono uan okintitlaniliayaj mensajes. ¿Tleka Anna uan inamik omochijchikajkej mouikaskej inmiuan tokniuan? Anna okijto: “Ika nochi noyolo nikilnamiki ken achto tokniuan nochipa otechititijkej techtlasojtlaj. Non axkan nechpaleuia noijki manikintlasojtla tokniuan”.

15. ¿Tlen techmachtia tlen okichi Vanessa? (Noijki xikita foto).

¹⁵ Kanin timonechikouaj katej tlatlamantli  tokniuan uan tlatlamantli okinmiskaltijkej. ¿Tlen techpaleuis nochtin matikintlasojtlakan? Matikitakan tlen kuali kichiuaj. Se tokni tlen itoka Vanessa uan chanti Nueva Zelanda okitaya oui mouikas inmiuan sekimej tokniuan porque amo okipaktiaya tlen okichiuayaj. Pero tokni omochijchika inmiuan mouikas uan non okipaleui makita tleka Jehová okintlasojtlaya. Ye okijto: “Nonamik okiluijkej matlayekana itech circuito ikinon opejki timouikaj inmiuan tlatlamantli tokniuan. Axkan ayakmo nikita oui nimouikas inmiuan oksekimej. Nechpaktia nikinmixmatis tlatlamantli tokniuan. Jehová kinyoltilana akinmej tlatlamantli okinmiskaltijkej uan non techititia ye noijki kipaktia mayetokan tlatlamantli akinmej pouij itech ialtepe”. ¿Ken uelis tikteititiskej tikintlasojtlaj tokniuan? Matimochijchikauakan tikinmitaskej ijkon ken Jehová kinmita (2 Cor. 8:24).

16. ¿Tleka moneki timotlasojtlaskej ijkuak panotos ueyi tlajyouilistli? (Noijki xikita foto).

¹⁶ Moneki tikintlasojtlaskej tokniuan ijkuak panotos ueyi tlajyouilistli. ¿Ken techmaluis Jehová ijkuak peuas ueyi tlajyouilistli? Matikilnamikikan tlen okilui Jehová ialtepe ijkuak kipojpoloskiaj Babilonia uan ijkon momakixtiskiaj. Ye okijto: “Noaltepe, xikalaki itech mocuartos tlen katej tlaijtik uan ximokaltsakua. San seki tonal ximotlati hasta mapano ikualanilis toTajtsin Dios” (Is. 26:20). Xamo tejuan noijki monekis ijkon tikchiuaskej ijkuak panotos ueyi tlajyouilistli. Tlajtoli ‘cuartos tlen katej tlaijtik’ xamo kijtosneki tlanechikolmej. Jehová techmaluis ijkon ken yokijto tla san sekan tiyetoskej inmiuan tokniuan ijkuak panos ueyi tlajyouilistli. Ikinon moneki melauak tikintlasojtlaskej tokniuan uan amo san tikijtoskej tikintlasojtlaj. Tla amo ijkon tikchiuaskej, xamo amo uelis timomakixtiskej.

17. ¿Tlen tikchiuaskej ijkuak panos ueyi tlajyouilistli tla axkan timoyektlaliskej?

¹⁷ Ijkuak ajsiki “iueyi tonal Jehová” nochtin sapanoua tlajyouiskej (Sof. 1:14, 15). Tiitlaixpantijkauan Jehová noijki titlajyouiskej pero tla axkan timoyektlaliskej, amo okachi timotekipachoskej uan uelis tikinpaleuiskej oksekimej. Tla titlaxikouaj, amitlaj techsotlauas. Tla titeiknomatij, timochijchikauaskej tikinpaleuiskej tokniuan uan tikinmakaskej tlen kinpolos. Noijki san sekan tiyetoskej inmiuan tokniuan tla tikintlasojtlaj. Jehová techteochiuas porque kichiuas nochipa matiyoltokan uan kipojpolos nochi tlen techtlajyouiltia (Is. 65:17).