1. ¿Tleka moneki tikchiuaskej ken sekimej kuajmej? (Noijki xikita dibujo).

 MIAKEJ kijtouaj tla se kuauitl mokuelpachoua amo posteki. Sekimej kuajmej ueli mokuelpachouaj ikinon ijkuak chikauak ejeka amitlaj kinpanoua uan ueli tlaxikouaj. Tejuan noijki moneki matiteajsikamatikan uan matimokuayejyekokan ken moneki. Tla ijkon tikchiuaj, okachi timouikaskej iuan Jehová. Moneki ijkon tikchiuaskej ijkuak itlaj mopatla itech tonemilis uan ijkuak tiktlakaitaj tlen oksekimej tokniuan kijtouaj uan tlen kipejpenaj kichiuaskej.

2. ¿Tlen techpaleuis ijkuak itlaj mopatlas itech tonemilis uan tlen timomachtiskej axkan?

² Tinochtin akinmej tiktekichiuiliaj Jehová moneki titeajsikamatiskej, tiyetoskej tiyolyamankej uan titeiknomatiskej. Sekimej tokniuan ijkon yokichijkej uan non okinpaleui ma tlaxikokan ijkuak itlaj omopatlak. Axkan timomachtiskej ken uelis tikchiuaskej ken yejuan. Pero achto timomachtiskej Jehová uan Jesús okachi teajsikamatij.

3. ¿Ken tikmatij Jehová teajsikamati?

³ Biblia kijtoua Jehová “ken se Tepexitl” porque chikajtok uan amo kipatla ken mokuayejyekoua (Deut. 32:4). Pero noijki teajsikamati. ¿Tleka ijkon tikijtouaj? Porque itech tlaltikpak miak tlamantli mopatlati uan Jehová noijki kipatla seki tlamantli para mamochiua tlen ye kineki. Tejuan noijki uelis ijkon tikchiuaskej porque Jehová  otechchijchi ijkon ken ye. Noijki itech iTlajtol tikinmajsij principios bíblicos tlen techpaleuia ijkuak titlajyouiaj. Tlen Jehová kichiua kiteititia ye amo kipatla ken mokuayejyekoua pero kema teajsikamati.

4. ¿Ken okiteititi Jehová okinmajsikamatiaya israelitas? (Levítico 5:7, 11).

⁴ Tlen Jehová tlanauatia kiteititia ye nochi kuali kichiua uan teajsikamati. Ye amo san niman kualani nion techchiualtia matikchiuakan tlen amo uelis tikchiuaskej. Matikitakan ken Jehová okinmajsikamatki israelitas. Ye amo okinchiualti israelitas tlen amo okipiayaj tomin makitlamanilikan ijkon ken israelitas tlen okipiayaj tomin. Ikinon itech Tlanauatil okijtouaya tlen uelis kitemakaskiaj israelitas akinmej amo okipiayaj tomin (xiktlajtolti Levítico 5:7, 11).

5. ¿Ken okiteititi Jehová yolyamanki uan teiknomati?

⁵ Jehová teajsikamati porque ye yolyamanki uan teiknomati. Ijkon okiteititi ijkuak kinmixpoloskia akinmej ochantiayaj Sodoma. Jehová okintitlanki sekimej ángeles makinmiluitij Lot uan ifamilia macholokan kanin tepeyo. Pero ye amo okinekiaya ompa yas porque omomojtiaya. Ikinon okitlatlaujti Jehová makikauili ye iuan ifamilia mokauaskiaj altepetl Zóar. Jehová uelis kichiualtiskia makitlakamati pero amo ijkon okichi. Ye okikauili Lot uan ifamilia ompa mauiaj maski noijki okinekiaya kipojpolos non altepetl (Gén. 19:18-22). Satepan Jehová noijki okinmiknomatki akinmej ochantiayaj Nínive. Jehová okititlanki profeta Jonás para makinmiluiti kinmixpoloskia porque okatkaj sapanoua amo yolkualmej. Pero Jehová okinmiknomatki uan okintlapojpolui porque yejuan omoyolkopkej (Jon. 3:1, 10; 4:10, 11).

6. ¿Ken okiteititi Jesús teajsikamati ijkon ken Jehová?

⁶ Ijkuak Jesús okatka nikan tlaltikpak okiteititi teajsikamati ijkon ken Jehová. Maski Jesús san okintlapouiaya “n tlakah de Israel nonmoixpolojtinemih kemi ichkameh”, se tonal noijki okipaleui se siuatl tlen amo okatka israelita. Non siuatl okilui Jesús makipajti itakotsin porque okipiaya “se espíritu amokuali”. Jesús okiknomatki uan okipajti itakotsin (Mat. 15:21-28). Matikilnamikikan ijkuak Jesús opejki tetlapouia. Ye okijto: “Tla aka kijtos teixpa, amo nechixmati, Ne noiwa nikijtos [...] amo nikixmati” (Mat. 10:33). Pero Jesús ok omouikak iuan Pedro maski ye okijto amo okixmatiaya eyi uelta. Ye okitlapojpolui Pedro porque okitak melauak omoyolkopki uan okatka yolkuali. Ijkuak Jehová okiyoliti Jesús ye okimonextili Pedro uan xamo okilui okitlapojpolui uan okitlasojtlaya (Luc. 24:33, 34).

7. ¿Ken tikneki oksekimej matechitakan ijkon ken kijtoua Filipenses 4:5?

 ⁷ Yotimomachtijkej Jehová uan Jesús teajsikamatij uan Jehová noijki kineki ijkon matikchiuakan (xiktlajtolti Filipenses 4:5). Matimotlajtlanikan: “¿Oksekimej kitaj niteajsikamati, amo san niman nikualani uan nikinkaki oksekimej? Noso ¿san niman nikualani uan nikinchiualtia oksekimej makichiuakan tlen san ne nikneki? ¿Nikinmiluia oksekimej makichiuakan tlen san ne nechpaktia? Noso ¿nikinkaki oksekimej uan niktlakaita tlen kijtouaj?”. Tla titeajsikamatij, tikchiuaskej ken Jehová uan Jesús. Axkan matikitakan ken uelis titeajsikamatiskej ijkuak mopatla itlaj itech tonemilis uan ijkuak oksekimej amo mokuayejyekoua ken tejuan.

8. ¿Tlen techpaleuis ijkuak itlaj mopatlas itech tonemilis? (Noijki xikita nota).

⁸ Ijkuak mopatla itlaj itech tonemilis moneki kuali timokuayejyekoskej uan tikchiuaskej tlen moneki. Uelis tinochtin itlaj san niman techpanotikisas, xamo sapanoua timokokoskej, ayakmo tikpiaskej tomin noso mopatlas itlaj kanin tichantij. Ijkuak itlaj mopatla itech tonemilis ualeua titlajyouiaj (Ecl. 9:11; 1 Cor. 7:31). Noijki xamo timotekipachouaj ijkuak ayakmo tiktekichiuiliaj Jehová ken tiknekij noso kanin tiknekij. Tla tikchiuaj ninmej naui tlamantli, techpaleuis amo okachi matimotekipachokan: Se, maski seki tlamantli mopatla amo okachi matimotekipachokan. Ome, amo san matimokuayejyekojtokan tlen achto otikchiuayaj uan matikitakan tlen satepan uelis tikchiuaskej. Eyi, matikitakan tlen axkan kuali tikchiuaj uan naui, matikinpaleuikan oksekimej. b Matikitakan ken yokinpaleui sekimej non naui tlamantli.

9. ¿Tlen okichijkej Emanuele uan Francesca ijkuak otlajyouijkej?

⁹ Amo okachi matimotekipachokan. Emanuele uan Francesca tlapaleuiaj ken misioneros uan okintitlankej matlapaleuitij itech okse ueyi altepetl. Ijkuak ompa oajsitoj opejkej momachtiaj intlajtol akinmej ompa ochantiayaj uan noijki opejkej kinmixmatij tokniuan. Pero san niman opejki COVID-19 uan ayakmo oueliayaj kinmitaj tokniuan. Noijki inantsin Francesca oixpoliuik. Ye okinekiaya kitati ifamilia pero amo oueliaya porque miakej omokokouayaj. ¿Tlen okipaleui? Achto, Emanuele uan Francesca okitlatlaujtijkej Jehová uan okiluijkej makinpaleui mayetokan ixtlamatkej para uelis tlaxikoskiaj. Jehová okinnankili uan ika ialtepe okinmakak tlen omonekiaya para uelis tlaxikoskiaj. Tlen okijto se tokni itech se video okinyolchika, okijto: “Tla san niman timochijchikauaj tiyolpakiskej, amo oui tikitaskej tikchiuaskej tlen moneki ijkuak itlaj mopatla itech tonemilis”. c Satepan okachi omochijchikajkej tetlapouiskej ika teléfono uan hasta opejkej ikaj kimachtiaj. Noijki okikajkej tokniuan makinpaleuikan uan makinyolchikauakan. Yejuan okintlasojkamatilijkej tlen okichijkej tokniuan. Se tokni mojmostla okintitlaniliaya mensajes uan se texto bíblico uan ijkon okichi kanaj se xiuitl. Non techmachtiaj tla timochijchikauaj tikchiuaskej tlen moneki  ijkuak itlaj mopatla itech tonemilis, okachi tiyolpakiskej.

10. ¿Tlen okichi se tokni ijkuak itlaj omopatlak itech inemilis?

¹⁰ Matikitakan tlen satepan uelis tikchiuaskej uan tlen axkan kuali tikchiuaj. Se tokni tlen ialtepe Rumanía uan itoka Christina ochantito Japón. Ompa omonechikouaya kanin otlajtouayaj inglés pero ye omoyolkoko porque satepan ayakmo ompa omonechikojkej. Pero ye amo san omoyolkokojtoka, omochijchika monechikos uan tetlapouis ika tlajtoli japonés. Ye okilui se siuatl tlen iuan otekipanouaya makimachti okachi kuali matlajto japonés ika Biblia uan amatlajkuilol Tiyoltos uan tiyolpakis. Siuatl opejki kimachtia Christina uan ye okachi kualtsin otlajto japonés. Pero noijki non siuatl okinek okachi momachtis Biblia. Non techmachtia tla itlaj mopatla itech tonemilis amo san matimokuayejyekokan tlen achto otikchiuayaj uan matikitakan tlen kema uelis tikchiuaskej. Tla ijkon tikchiuaj, xamo non techpaleuis.

11. ¿Tlen okichi se tokni uan isiua ijkuak okipolojkej inteki?

¹¹ Matikinpaleuikan oksekimej. Se tokni uan isiua chantij kanin amo kitekauiliaj matitetlapouikan. Yejuan okipolojkej inteki porque kanin chanti ayakmo okatka miak tomin. ¿Tlen okichijkej? Achto, omochijchikajkej amo kipiaskej miak tlamantli. Noijki amo san okintekipachouayaj tlen okinpanok uan omochijchikajkej kinpaleuiskej oksekimej ijkuak otetlapouiayaj (Hech. 20:35). Tokni okijto: “Otimochijchikajkej titetlapouiskej ikinon amo okachi otimokuayejyekouayaj tlen amo kuali otechpanok uan ijkon okachi otiktekichiuiliayaj Jehová”. Non techmachtiaj tla techpanos itlaj, ok matimochijchikauakan titetlapouiskej ijkon tikinpaleuiskej oksekimej.

12. ¿Ken uelis tikchiuaskej ken Pablo ijkuak titetlapouiaj?

¹² Ijkuak titetlapouiaj moneki titeajsikamatiskej. Porque tikintlapouiaj akinmej tlaneltokaj, akinmej uitsej itech oksekimej altepemej uan noijki tlatlamantli mokuayejyekouaj. ¿Tleka miak ipati matikchiuakan ken apóstol Pablo? Porque ye oteajsikamatiaya ikinon Jesús okilui ‘makinmatiltiti itlajtol akimeh amo judíojteh’ (Rom. 11:13). Ye nochtin okintlapoui, judíos, griegos, ixtlamatkej, akinmej otlatokayaj uan tekiuajkej. Ye okijto: “Ne nikinmoiknitia”. Ijkon Pablo okintlapoui miakej (1 Cor. 9:19-23). Ijkuak okintlapouiaya okitaya kanin oualayaj uan tlen okineltokayaj. Non techmachtia okachi kuali tikintlapouiskej oksekimej tla tikinmajsikamatij uan tikitaj ken uelis tikinpaleuiskej.

13. ¿Tleka moneki tikinmajsikamatiskej oksekimej? (1 Corintios 8:9).

¹³ Tla titeajsikamatij, amo oui tikitaskej tiktlakaitaskej tlen oksekimej mokuayejyekouaj. Sekimej tokniuan kinpaktia kimotlaliliskej maquillaje pero oksekimej amo kinpaktia. Noijki sekimej tokniuan konij tepitsin alcohol pero oksekimej amo konij. Tinochtin tiknekij kuali tiyetoskej pero tlatlamantli timopajtiaj. Tla san tiknekij tikchiuaskej tlen tejuan techpaktia uan tikinchiualtiaj oksekimej noijki ijkon makichiuakan, tikinyolkokoskej tokniuan noso inmiuan timokualaniskej. ¡Tejuan amo tikneki ijkon tikchiuaskej! (xiktlajtolti 1 Corintios 8:9; 10:23, 24).  Tla tikchiuaj tlen kijtoua principios bíblicos, tikchiuaskej tlen moneki uan timoyolseuijtoskej inmiuan tokniuan. Matikitakan ken uelis tikchiuaskej.

14. ¿Tlen techpaleuis kuali matikpejpenakan ken timotlakentiskej uan ken timoyektlaliskej?

¹⁴ Ken timotlakentiaj uan ken timoyektlaliaj. Jehová amo techiluia ken moneki timotlakentiskej pero kema techmaka principios bíblicos tlen techpaleuia. Tla timotlakentiaj ken moneki uelis tikueyichiuaskej toTajtsin Dios, tikteititiskej tiktlakamatij uan titeajsikamatij (1 Tim. 2:9, 10; 1 Ped. 3:3). Amo tiknekij oksekimej san matechitakan porque amo kuali timotlakentiaj. Principios bíblicos kinpaleuis tlayekankej amo matlanauatikan ken moneki motlakentiskej tokniuan. Itech se tlanechikol sekimej telpochmej amo kuali okiyektlaliayaj itsonkal porque miakej ijkon okichiuayaj. Tlayekankej okinekiayaj kinpaleuiskej nonmej telpochmej pero amo okinekiayaj kinnauatiskej ken omonekiaya moyektlaliskej. Tokni tlen otlayekanaya itech non circuito okinmilui tlayekankej tlen omonekiayaj kinmiluiskej nonmej telpochmej. Ye okijto: “Tla titlamachtia pero oksekimej san kitaj ken otimotlakenti uan ken otimoyektlali uan amo kikakij tlen tikijtoua, xamo amo kuali ken otimotlakenti noso ken otimoyektlali”. Non okinpaleui telpochmej uan amo san okinnauatijkej ken omonekiayaj moyektlaliskej. d

15. ¿Ken uelis timoyekanaskej ika Biblia ijkuak tikpejpenaskej ken timopajtiskej? (Romanos 14:5).

¹⁵ Ken timopajtiskej. Tisejse moneki tikpejpenaskej ken timopajtiskej (Gál. 6:5). Ijkuak timopajtiskej moneki timoyekanaskej  ika tlen kijtoua Biblia uan amo tikmotlaliliskej estli nion amo tikinmitatiuij akinmej tetlajchiuiaj (Hech. 15:20; Gál. 5:19, 20). Tisejse moneki tikpejpenaskej ken timopajtiskej, sekimej yauij iuan tepajti noso oksekimej inselti mopajtiaj. Maski tejuan yitikmatij ken timopajtiskej moneki tiktlakaitaskej ken oksekimej tokniuan mopajtiaj. Ikinon matikilnamiktokan: Se, san ika iTekiuajkayo toTajtsin Dios timopajtiskej uan ayakmo timokokoskej (Is. 33:24). Ome, “nochteh kuali makimatokah” tlen moneki tikchiuaskej (xiktlajtolti Romanos 14:5). Eyi, amo matikinteneuakan tokniuan uan amo matikchiuakan itlaj tlen makinyolkoko (Rom. 14:13). Naui, tinochtin timotlasojtlaj uan tikmatij okachi ipati timouikaskej inmiuan tokniuan uan amo tlen tejuan timokuayejyekouaj (Rom. 14:15, 19, 20). Tla tikchiuaj non naui tlamantli, kuali timouikaskej uan timoyolseuijtoskej inmiuan tokniuan.

16. ¿Ken uelis se tlayekanki kiteititis kinmajsikamati oksekimej tlayekankej? (Noijki xikinmita fotos).

¹⁶ Tlayekankej moneki kiteititiskej yejuan kuali teajsikamatij (1 Tim. 3:2, 3). Se tlayekanki maski yikipia miak xiuitl amo kinchiualtia oksekimej tlayekankej makichiuakan san tlen ye kipaktia. Porque kimati iespíritu santo Jehová uelis kipaleuis okse tlayekanki makijto tlen uelis kichiuaskej. Ikinon tla amo kixnamiki itlanauatiluan Jehová, se tlayekanki tlen teajsikamati kichiuas tlen oksekimej tlayekankej okipejpenkej maski ye mokuayejyekoua okse tlamantli.

17. ¿Ken techteochiua Jehová tla titeajsikamatij?

¹⁷ Tla tejuan titeajsikamatij, Jehová techteochiuas. Porque kuali timouikaskej inmiuan tokniuan uan inmiuan timoyolseuijtoskej. Tiyolpakij porque tinochtin san sekan tikatej itech ialtepe Jehová, maski tlatlamantli timokuayejyekouaj uan tlatlamantli otechiskaltijkej. Noijki tiyolpakij porque tikmatij tikchiuaj ken Jehová uan ye akin okachi teajsikamati.