1. ¿Tlen otechmachtijkej ijkuak yikin opejki timomachtiaj?

 ¿TIKILNAMIKIJ tlen otechmachtijkej ijkuak yikin opejki timomachtiaj? Xamo otiyolpakej otikmatkej toTajtsin Dios kipia itoka. Xamo noijki otiyolpakej otikmatkej ye amo tetlajyouiltia itech infierno. Noijki otiyolpakej otikmatkej toTajtsin Dios kinyolitis akinmej yoixpolikej uan uelis tiyetoskej inmiuan itech xochitlali.

2. ¿Tlen okachi otikchijkej ijkuak opejki timomachtiaj? (Efesios 5:1, 2).

² Opejki tiktlasojtlaj Jehová ijkuak opejki timomachtiaj Biblia. Ikinon opejki tikchiuaj tlen otimomachtijtokaj. Principios bíblicos otechpaleuijkej kuali matikpejpenakan tlen tikchiuaskej. Noijki otikpatlakej tlen otimokuayejyekouayaj uan tlen otikchiuayaj porque tiknekij tikyolpaktiskej Jehová. Opejki tikchiuaj tlen toTajtsin Dios kipaktia ijkon ken se chokotsin kichiua tlen itajtsin kipaktia (xiktlajtolti Efesios 5:1, 2).

3. ¿Tlen uelis timotlajtlaniskej?

³ Matimotlajtlanikan: “¿Axkan okachi niktlasojtla Jehová ijkon ken ijkuak onimoapolakti? ¿Okachi nikchiua ken Jehová uan nikintlasojtla tokniuan?”. Pero amo matimoyolkokokan tla ayakmo okachi titetlasojtlaj. Itech achto siglo ijkon okinpanok tokniuan. Pero Jesús okinpatioitak uan tejuan noijki techpatioitas (Apoc. 2:4, 7). Ye kimati uelis oksepa titetlasojtlaskej ijkon ken otikchiuayaj ijkuak opejki timomachtiaj Biblia.

4. ¿Tlen tikitaskej itech nin tlamachtil?

 ⁴ Itech nin tlamachtil tikitaskej tlen techpaleuis okachi matiktlasojtlakan Jehová uan noijki tokniuan. Noijki timomachtiskej ken techpaleuis uan ken kinpaleuis oksekimej tla ijkon tikchiuaskej.

5, 6. ¿Tlen okipanok Pablo uan tlen okipaleui nochipa makitekichiuili Jehová?

⁵ Apóstol Pablo oyolpakiaya ijkuak okitekichiuili Jehová pero ualeua noijki otlajyoui. Ye uejka oyaya maski uelis itlaj kipanoskia. Otlajyoui ijkuak opanouaya itech aueyatl uan porque kanin oyaya okatkaj ichtekej. Ualeua akinmej okikokoliayaj okitlajyouiltiayaj (2 Cor. 11:23-27). Noijki otlajyoui porque ualeua tokniuan amo okipatioitayaj tlen ye inpatka okichiuaya (2 Cor. 10:10; Filip. 4:15).

⁶ Pero ¿tlen okipaleui Pablo nochipa makitekichiuili Jehová? Ye okitekichiuili porque omomachtiaya iTlajtol uan non okipaleui kuali makixmati. Noijki tlen okipanok okipaleui makixmati uan okineltokaya ye okitlasojtlaya (Rom. 8:38, 39; Efes. 2:4, 5). Ikinon Pablo okitlasojtlaya Jehová uan ijkon okiteititi ijkuak okinpaleui tokniuan (Heb. 6:10).

7. ¿Tlen techpaleuis okachi matiktlasojtlakan Jehová?

⁷ Moneki timomachtiskej Biblia para okachi tiktlasojtlaskej toTajtsin Dios. Ijkuak tiktlajtoltiskej matikitakan ken techpaleuia matikixmatikan Jehová. Matimotlajtlanikan: “¿Ken nechititia tlen oniktlajtolti Jehová nechtlasojtla? ¿Ken nechpaleuia okachi maniktlasojtla Jehová?”.

8. ¿Ken techpaleuia okachi matiktlasojtlakan Jehová ijkuak timotlatlaujtiaj?

⁸ Noijki techpaleuis okachi matiktlasojtlakan Jehová tla mojmostla tiktlatlaujtiaj ika nochi toyolo (Sal. 25:4, 5). Biblia kijtoua ye technankilia ijkuak tiktlatlaujtiaj (1 Juan 3:21, 22). Se tokni tlen itoka Khanh b uan chanti Asia okijto: “Tlen onimomachti itech Biblia onechpaleui maniktlasojtla Jehová. Pero ijkuak onikitak ken onechnankiliaya ijkuak oniktlatlaujtiaya opejki okachi niktlasojtla. Non noijki onechpaleui manikchiua tlen ye kipaktia”.

9. ¿Ken okiteititi Timoteo okintlasojtlaya tokniuan?

⁹ Ijkuak Pablo opejki kichiua ken Cristo, opanok seki xiuitl uan okixmatki Timoteo. Timoteo okitlasojtlaya Jehová uan noijki okintlasojtlaya oksekimej. Satepan Pablo okinmilui ninmej tlajtolmej tokniuan tlen ochantiayaj Filipos: “Sanwel Timoteo satlawel motlamia [noso motekipachoua] por nomejwah kemi ne” (Filip. 2:20). Pablo amo okijto Timoteo kuali kichiua seki tlamantli noso kuali tlamachtia. Ye okitak ken sapanoua okintlasojtlaya tokniuan. Xamo tokniuan san okichixtokaj Timoteo makintlajpaloti (1 Cor. 4:17).

10. ¿Ken okiteititijkej Anna uan inamik okintlasojtlayaj tokniuan?

¹⁰ Tejuan noijki tikitaj ken tikinpaleuiskej tokniuan (Heb. 13:16). Matikitakan  tlen okichi Anna tlen otimomachtijkej yichikome. Ye uan inamik oyajkej okintlajpalotoj sekimej tokniuan ijkuak otlaxixinki. Yejuan okitakej oxixinki inkal tokniuan ikinon amo okipiayaj intlaken chipauak para kimokentiskej. Anna okijto: “Otikuikakej intlaken, otikpakej uan oksepa otikinmakatoj. Amo oui tlen otikchijkej pero non otechpaleui okachi kuali inmiuan matimouikakan”. Anna uan inamik okinpaleuijkej nonmej tokniuan porque okintlasojtlayaj (1 Juan 3:17, 18).

11. (1) ¿Ken kinpaleuia oksekimej tla kitaj tikintlasojtlaj? (2) Ijkon ken kijtoua Proverbios 19:17, ¿ken kita Jehová ijkuak tikinpaleuiaj oksekimej?

¹¹ Ijkuak tikintlasojtlaj oksekimej, tikteititiaj tikchiuaj uan timokuayejyekouaj ken Jehová. Tlen tikchiuaj kitaj oksekimej. Pero xamo amo keman tikmatiskej ken kinpaleuia oksekimej tlen tikchiuaj. Khanh tlen otikitakej itech párrafo 8 amo kinmilkaua tokniuan tlen okipaleuijkej. Ye okijto: “Nikintlasojkamatilia nochtin tokniuan tlen onechpaleuijkej manitetlapoui. Yejuan onechtlasojtlayaj ikinon oyayaj nechnotsatiuij, inmiuan onitlakuaya uan satepan oyayaj nechkauatiuij nokalijtik. Tlen okichijkej okatka oui pero omochijchikajkej nechpaleuiskej porque nechtlasojtlaj”. Pero amo nochtin techtlasojkamatiliskej porque tikinpaleuiaj. Khanh noijki okijto: “Niknekiskia nochtin nikintlasojkamatilis akinmej onechpaleuijkej pero axkan amo nikmati kanin chantij. Pero Jehová kema kimati uan niktlatlaujtia makinteochiua”. Jehová kimati tlen tikchiuaj maski amo sapanoua ueyi. Kita ken timochijchikauaj uan kineki techteochiuas  (xiktlajtolti Proverbios 19:17).

12. ¿Ken uelis kiteititiskej tokniuan tlakamej tetlasojtlaj? (Noijki xikinmita fotos).

¹² Tla te tikchiua ken Cristo, xikinpaleui tokniuan uan ijkon tikinmititis tikintlasojtla. Se telpochtli tlen itoka Jordan okitlajtlani se tlayekanki ken okachi kinpaleuiskia tokniuan. Tlayekanki okilui tlen kuali okichijtoka uan okilui tlen okachi uelis kichiuaskia. Okilui kualkan maajsiti ijkuak timonechikouaj uan makintlajpalo tokniuan. Noijki matlanankili ijkuak timonechikouaj, okachi matetlapoui iuan igrupo uan makita ken kinpaleuis tokniuan. Jordan okichi tlen okilui tlayekanki para okachi tlapaleuiskia pero non noijki okipaleui okachi makintlasojtla tokniuan. Ye okajsikamatki se tokni uelis kinpaleuis tokniuan maski ayamo mochiua siervo ministerial. Ijkon ijkuak mochiuas siervo ministerial okachi kinpaleuis tokniuan (1 Tim. 3:8-10, 13).

13. ¿Tlen okipaleui Christian oksepa mayeto tlayekanki?

¹³ ¿Otikatka titlayekanki noso siervo ministerial? Jehová amo kilkaua tlen otikchi uan ken otikteititi titetlasojtla (1 Cor. 15:58). Noijki kita ken ok titetlasojtla. Se tokni tlen itoka Christian omoyolkoko ijkuak okiluijkej ayakmo yetoskia tlayekanki. Pero amo omosotla uan okijto: “Ok niktekichiuilijtoskia Jehová porque niktlasojtla maski ayakmo niyetoskia nitlayekanki”. Satepan oksepa omochi tlayekanki. Noijki okijto: “Amo onikmatiaya kox oksepa nikseliskia non tekitl. Pero onimokuayejyeko Jehová nechiknomati  uan nechmakatok non tekitl para manikinpaleui tokniuan, ikinon nikseliskia porque niktlasojtla ye uan noijki nikintlasojtla tokniuan”.

14. ¿Tlen techmachtia tlen okijto Elena?

¹⁴ Akinmej tikchiuaj ken Cristo noijki tikintlasojtlaj akinmej amo iTlaixpantijkauan Jehová (Mat. 22:37-39). Se tokni tlen itoka Elena uan chanti Georgia okijto: “Achto onitetlapouiaya porque oniktlasojtlaya Jehová. Pero ijkuak opejki okachi niktlasojtla Jehová noijki opejki nikintlasojtla akinmej onikintlapouiaya. Onimokuayejyekouaya tlen okintekipachouaya uan tlen uelis kinpaleuiskia. Non onechpaleui okachi manikinpaleui” (Rom. 10:13-15).

15, 16. Ijkon ken mota itech fotos, ¿ken kinpaleuia oksekimej tla titetlasojtlaj?

¹⁵ Oksekimej noijki kinpaleuia ijkuak tikintlasojtlaj tokniuan. Ijkuak opejki COVID-19 Paolo uan isiua okinpaleuijkej tokniuan tlen yikipiaj miak xiuitl matetlapouikan ika intabletas uan incelulares. Se tokni okitaya oui kintekitiltis pero satepan omomachti uan okinyole ifamiliares ijkuak otikilnamikej imikilis Jesús. Omonechikojkej 60 ifamiliares tokni ika videoconferencia. Tlen okichi Paolo uan isiua okipaleui tokni uan noijki okinpaleui ifamiliares. Tokni okitlajkuilili Paolo uan okilui: “Tlasojkamati porque onantechpaleuijkej maski yitikpiaj  miak xiuitl. Amo keman tikilkauaskej ken Jehová otechtlasojtlak uan onanmochijchikajkej onantechpaleuijkej”.

¹⁶ Tlen okipanok Paolo okimachti itlaj miak ipati. Okajsikamatki maski tikmatiskej noso tikchiuaskej miak tlamantli okachi ipati titetlasojtlaskej. Ye okijto: “Ne onikatka nitlayekanki itech circuito. Xamo tokniuan ayakmo kilnamikij ken onitlamachtiaya pero kema kilnamikij ken onikinpaleui”.

17. ¿Ken techpaleuia ijkuak titetlasojtlaj?

¹⁷ Tejuan noijki techpaleuia ijkuak titetlasojtlaj. Ijkon okipanok se tokni tlen chanti Nueva Zelanda. Se sábado Jonathan okitak se precursor iselti otetlapouijtoka maski sapanoua otonaya. Non tokni opejki tetlapouia iuan precursor sábados teotlak. Jonathan okiteititi kitlasojtla precursor pero amo omokuayejyeko noijki kipaleuiskia tlen okichi. Jonathan okijto: “Ne amo onechpaktiaya nitetlapouis. Pero onikitak non precursor kualtsin otlamachtiaya uan miakej okikakiayaj. Non onechpaleui okachi manechpakti nitetlapouis. Noijki omochi noyolikni porque onechpaleui maniyolpaki, okachi maniktekichiuili Jehová uan iuan manimouika”.

18. ¿Tlen kineki Jehová matikchiuakan?

¹⁸ Jehová kineki tinochtin okachi matiktlasojtlakan uan matikintlasojtlakan oksekimej. Yotikitakej para okachi tiktlasojtlaskej Jehová moneki tiktlajtoltiskej Biblia, timokuayejyekoskej tlen tiktlajtoltiaj uan mojmostla timotlatlaujtiskej. Noijki moneki tikinpaleuiskej tokniuan para tikteititiskej tikintlasojtlaj. Ijkuak okachi titetlasojtlaj, okachi timouikaj iuan Jehová uan noijki inmiuan tokniuan. Ijkon uelis nochipa inmiuan timouikaskej.