1, 2. (1) Xikijto eyi tlamantli tlen miak ipati tlen Jehová yotechmakak. (2) ¿Tlen timomachtiskej?

NOCHI tlen onka iaxka Jehová (1 Crón. 29:11, 12). Ye se teta tlen kipaktia kitemakas tlen kipia, ik non, techmaka sapanoa miak tlamantli tlen miak ipati. Nin seki tlamantli tlen techmaka: iTekiuajkayo, titetlapouiskej uan tlen tlamachtia Biblia. ¿Tiktlasojkamatiliaj Jehová nin tlamantli? Pero tla amo timomaluiaj, ayakmo tikpatioitaskej nin tlamantli. Para amo ijkon techpanos moneki ma tikselikan uan okachi ma tikpatioitakan. Jesús okijto: “Porke kan yetos tlan nomoaxka, ompa yetos nomoyolo” (Luc. 12:34).

² Ma tikitakan ken uelis okachi tikpatioitaskej uan ken tiktlasojkamatiskej iTekiuajkayo toTajtsin Dios, tetlapouilistli uan tlen tlamachtia Biblia. Ijkuak timomachtijtiaskej, ma timokuayejyekokan ken okachi tikpatioitaskej nin tlamantli.

3. ¿Tlen okichi tlakatl tlen okinsemanaya perlas? (Xikita tlaixkopinal tlen ika peua tlamachtil).

³ (Xiktlajtolti Mateo 13:45, 46). Jesús otlajto itech se tlasemanki tlen okintemoaya perlas. Uelis okinko miakej uan okinnemakak. Pero se tonal, non tlakatl okajsik se perla tlen sapanoa okipakti. Okinemakak nochi tlen okipiaya para kimokouis non perla uan ijkon tikajsikamatij sapanoa okipatioitaya.

4. ¿Tlen tikchiuaskej tla tikpatioitaj iTekiuajkayo toTajtsin Dios ken se perla ijkon ken okichi tlasemanki?

⁴ ¿Tleka moneki tikajsikamatiskej tlen okichi nin tlakatl? ITekiuajkayo toTajtsin Dios kajki ken non perla. Tla melauak tikpatioitaj ken tlasemanki okipatioitaya perla, tikkauaskej nochi tlen tikpiaj uan tikpaleuiskej Tekiuajkayotl (xiktlajtolti Marcos 10:28-30). Ma tikitakan akinmej ijkon okichijkej.

5. ¿Tlen okichi Zaqueo porque okipatioitaya Tekiuajkayotl?

⁵ Zaqueo okololoaya tomin uan sapanoa okipiaya miak tomin porque otlachtekiaya (Luc. 19:1-9). Ijkuak okikak Jesús otlapojtoka itech Tekiuajkayotl, okipatioitak uan san niman itlaj okichi. Okijto: “Noteko, nikinmakas n próbesteh tlajko de nochi tlan nikpia; iwa tla aka oniktlachtekili, nikkopilis nawi welta okachi”. Ye okinekiaya kikuepas tlen okichteki uan ayakmo okinekiaya kipias miak tomin.

6. ¿Tlen tlamantli ayakmo okichi Rose uan tleka?

⁶ Se siuatl tlen tiktokayotiskej Rose oauilnemiaya iuan se siuatl pero okitlapouijkej itech iTekiuajkayo toTajtsin Dios. Noijki ye okinpaleuiaya akinmej mosiuakuepaj iuan akinmej motlakakuepaj. Ijkuak omomachti Biblia, sapanoa okipatioitak tlen melauak itech iTekiuajkayo toTajtsin Dios uan okajsikamatki omonekiaya kipatlas inemilis (1 Cor. 6:9, 10). Nochi nin okiyolini ma kikaua tlen okichiuaya uan okika siuatl tlen iuan oauilnemiaya. Omoapolakti itech 2009 uan se xiuitl satepan omochi precursora. Okachi okitlasojtlaya Jehová, okipatioitaya Tekiuajkayotl uan amo tlen amo kuali okichiuaya (Mar. 12:29, 30).

7. ¿Tleka moneki timomaluiskej para nochipa tikpatioitaskej Tekiuajkayotl ika nochi toyolo?

⁷ Tejuan noijki otimochijchikajkej otikpatlakej tonemilis para tikpaleuiskej iTekiuajkayo toTajtsin Dios (Rom. 12:2). Pero ok timochijchikauaj, ik non, moneki ma timomaluikan para amo tiknekiskej tikpiaskej miak tlamantli uan tiknekiskej tiauilnemiskej porque nin kichiuas ayakmo ma tikpatioitakan Tekiuajkayotl (Prov. 4:23; Mat. 5:27-29). Jehová yotechmakak okse tlamantli tlen miak ipati para nochipa tikpatioitaskej iTekiuajkayo ika nochi toyolo.

8. (1) ¿Tleka Pablo okijto miak ipati titetlapouiskej? (2) ¿Ken okiteititi Pablo okipatioitaya tetlapouis?

⁸ Ma tikilnamiktokan Jesús otechnauati ma titetlapouikan uan ma titlamachtikan kuali tlajtolmej itech Tekiuajkayotl (Mat. 28:19, 20). Tlatitlanil Pablo okijto tetlapouis itech yankuik tlajtolsenkaualistli yetoskia ken itlaj tlen sapanoa “miak ipati ijtik [se] xoktsi” (2 Cor. 4:7; 1 Tim. 1:12). Maski  titlajtlakolejkej uan tikatej ken xoktsimej tlen chijchitokej ika sokitl, tlen titetlapouiaj uelis kichiuas tejuan uan oksekimej ma tikpiakan yolilistli tlen amo keman tlamis. Ik non, Pablo okijto: “Ne ijkó nikchiwa para miakeh makikakikah n kualitlájtoli, iwa ne noiwa manikseli n tlatiochiwálistli” (1 Cor. 9:23). Ye okipatioitaya tetlapouis, ik non, sapanoa omochijchika kinchiuas imachtijkauan Jesús (xiktlajtolti Romanos 1:14, 15; 2 Timoteo 4:2). Ken okipatioitaya kuali tlajtolmej, okixiko nochi ouijkayotl (1 Tes. 2:2). ¿Ken uelis noijki ijkon tikpatioitaskej?

9. ¿Ken uelis tikteititiskej okachi tikpatioitaj titetlapouiskej?

⁹ Pablo okiteititi okipatioitaya tetlapouis, ik non, nochtin okintlapouiaya. Ijkon ken tlatitlanilmej uan oksekimej tlen okichiuayaj ken Cristo itech achto siglo, tejuan san kanin titetlapouiaj, kanin miakej panoaj uan noijki inkalijtik tlaltikpaktlakamej (Hech. 5:42; 20:20). Ma tiktemokan ken uelis nochtin tikintlapouiskej. Se neskayotl, tla tiuelij ma timochiuakan precursores auxiliares noso regulares, ma timomachtikan okse tlajtoli noso ma tiakan oksekan ma titetlapouitij (Hech. 16:9, 10).

10. ¿Tlen tlateochiualistli yokiseli Irene?

¹⁰ Ma timokuayejyekokan itech se tokni iselti tlen itoka Irene tlen chanti Estados Unidos, ye okinekiaya kintlapouis akinmej tlajtoaj ruso. Opejki itech 1993, ijkuakon san okatkaj veinte tlen otetlapouiayaj ika tlajtoli ruso itech Nueva York. Opanok 20 xiuitl uan ye kijtoa ayamo kuali kimati ruso maski sapanoa momachtia. Pero Jehová yokiteochi porque mochijchikaua uan yolpaki uan oksekimej kichiuaj tlen ye kichiua. Axkan katej chikuase tlanechikolmej ika tlajtoli ruso itech Nueva York. Irene okinmachti quince uan omoapolaktijkej, sekimej tekitij Betel, sekimej precursores uan tlayekankej. Ye okijto: “Ualeua nimokuayejyekoa itech seki tlamantli tlen uelis nikchiuaskia pero kuali nikmati amo niyolpakiskia”. Melauak kiyolpaktia tetlapouis.

11. ¿Tlen panos tla titetlapouiskej maski techtojtokaskej?

¹¹ Tla tikpatioitaj titetlapouiskej, tikchiuaskej maski tikpiaskej ouijkayotl ken Pablo (Hech. 14:19-22). Itech 1930 uan 1940, tokniuan tlen chantij Estados Unidos okipixkej miak ouijkayotl. Pero yejuan okichijkej ken Pablo, otetlapouijkej uan amo itlaj itech omokajkalakijkej. Para mopaleuiskej, oyajkej miak uelta inmixpan jueces. Itech  1943 ijkuak tokniuan otlatlankej inmixpan jueces itech Estados Unidos, tokni Nathan Knorr okijto: “Nin namejuan onankichijkej. Tla akinmej tetlapouiaj ayakmo tetlapouijtoskiaj, amo itlaj uelis tikinmiluiskiaj jueces; namejuan onankintlanilijkej akinmej techkokoliaj. Namejuan akinmej nantetlapouiaj uan nochtin tokniuan itech nochi Tlaltikpak tlen ok tetlapouijtokej. Nochi nin opanok porque ialtepe toTeko amo keman omosotla”. Ken tokniuan otlaxikojkej, yotikintlanilijkej miak uelta jueces itech miakej altepemej. Tikpatioitaj titetlapouiskej, ik non, uelis tikintlaniliskej akinmej techtojtokaj.

12. ¿Tlen tiknekij tikchiuaskej ika nochi toyolo?

¹² Tla tikitaj tetlapouilistli ken itlaj tlen sapanoa miak ipati tlen otechmakak Jehová, amo san tikchiuaskej “miak horas”. Okachi kuali, timochijchikauaskej titetlapouiskej kuali tlajtolmej (Hech. 20:24; 2 Tim. 4:5). ¿Pero tlen titlamachtiskej ijkuak titetlapouiskej? Ma tikitakan okse tlamantli tlen miak ipati tlen techmaka toTajtsin Dios.

13, 14. ¿Itech tlen tlamantli miak ipati otlajto Jesús itech Mateo 13:52 uan ken okachi tikpatioitaskej?

¹³ Tlen tlamachtia Biblia otechmakak Jehová akin melauak toTajtsin Dios, nin tlamantli eyi miak ipati uan itech timotlapouiskej (2 Sam. 7:28; Sal. 31:5). Jehová kipaktia kinmachtis tlen melauak akinmej kitlakaitaj. Ijkuak otechtlapouijkej, opejki tikmatij tlen melauak ijkuak opejki tiktlajtoltiaj Biblia, amatlajkuilolmej, opejki tiauij nechikolmej uan uejueyij nechikolmej. Opanok kauitl uan yotikpiayaj tlen Jesús okitokayoti tlamantli tlen yikipia miak xiuitl uan tlamantli tlen yankuik (xiktlajtolti Mateo 13:52). Jehová techpaleuis okachi ma tikpatioitakan tlen tlamachtia Biblia uan tla tiktemoaj ken itlaj tlen sapanoa miak ipati (xiktlajtolti Proverbios 2:4-7). ¿Ken tikchiuaskej?

¹⁴ Moneki okachi kuali timomachtiskej Biblia uan noijki amatlajkuilolmej. Ijkon tikajsiskej tlen amo otikmatiayaj uan tikitaskej ken itlaj yankuik (Jos. 1:8, 9; Sal. 1:2, 3). Achto revista tlen okiski itech 1879, okijto: “Tlen melauak, kajki ken se xochitsintli tlen kajki kanin tlauaki uan yixijpachitok ika nochi xiuitl tlen amo kuali. Tla tikneki tikajsis nin xochitsintli, moneki tiijsatos [...] uan tla tikneki tiktekis, moneki timotolos. Amo xiyolpaki san ika se xochitl itech tlen melauak. [...] Xikinteki miakej uan xikintemojto”. Moneki okachi tikpatioitaskej tlen melauak tlamachtia Biblia.

15. (1) ¿Tlen tlamantli uelis tikijtoskej yikipia miak xiuitl? (2) ¿Uan katli okachi tikpatioita?

¹⁵ Otikajsikej tlen miak ipati ijkuak opejki timomachtiaj Biblia. Pero uelis tikijtoskej nin yikipia miak xiuitl porque non tlen achto otimomachtijkej uan otikpatioitakej. Achto otikmatkej Jehová otechchijchi uan tlen kichiuas para tinochtin. Noijki otikmatkej Jehová sapanoa techtlasojtla uan okitemakak iKone para techmakixtis itech tlajtlakoli uan mikilistli. Noijki otimomachtijkej iTekiuajkayo Jehová kitlajtlamis tlajyouilistli uan uelis tichantiskej nochipa itech Xochitlali ika yolpakilistli uan ika yolseuilistli (Juan 3:16; Apoc. 4:11; 21:3, 4).

16. ¿Tlen tikchiuaskej ijkuak itlaj okachi kuali moajsikamati itech Biblia?

 ¹⁶ Ualeua moneki mopatlas ken tikajsikamatij se profecía noso itlaj itech Biblia. Uan ijkuak ijkon panoa, moneki timajxiliskej kuali timomachtiskej itech non tlamantli uan itech timokuayejyekoskej (Hech. 17:11; 1 Tim. 4:15). Amo san tikajsikamatiskej tlen okachi moneki, noijki okseki tlamantli maski mota amo miak ipati uan noijki ken achto otikajsikamatiayaj non tlamantli. Tla ijkon tikchiuaskej, nin yankuik tlamachtil tikpiaskej itech tlamantli tlen yankuik uan tikpatioitaskej. ¿Tleka miak ipati ma timomachtikan?

17, 18. ¿Ken techpaleuia iespíritu santo toTajtsin Dios?

¹⁷ Jesús okijto iespíritu toTajtsin Dios techilnamiktis tlen otimomachtijkej (Juan 14:25, 26). ¿Ken techpaleuis ijkuak titetlapouiaj? Ma tikitakan tlen okipanok Peter itech 1970, ijkuakon ye okipiaya 19 xiuitl uan yikin oajsito Betel tlen kajki itech Gran Bretania. Se tonal otetlapouito uan okiski se tlakatl tlen yokipiaya kanaj 50 xiuitl uan okipiaya ibarba. Peter okitlajtlani kox okinekiaya kajsikamatis tlen kijtoa Biblia. Tlakatl okatka tlamachti judío uan omotlajtlachialti ijkuak nin telpochtli okitlajtlani kox okinekiaya momachtis Biblia. Nin tlakatl para kiyejyekoskia Peter, okitlajtlani: “¿Tikmati ika tlen tlajtoli okijkuilojkej amochtli Daniel?”. Peter okilui seki okinmijkuilojkej ika arameo. Uan Peter okijto: “Non tlamachti judío sapanoa omotlajtlachialti ijkuak ijkon oniknankili uan ne okachi onimotlajtlachialti. ¿Ken ueli ijkon oniknankili? Ijkuak onia nokalijtik uan onikitak revista Akin Tetlapouijtok uan ¡Despertad! onikajsik se tlamachtil kanin okiyekijtoaya amochtli Daniel okijkuilojkej ika arameo” (Dan. 2:4, nota). Iespíritu santo toTajtsin Dios uelis techilnamiktis tlen yotiktlajtoltijkej uan tlen yotiktlatijkej ken itlaj miak ipati (Luc. 12:11, 12; 21:13-15).

¹⁸ Tla tikpatioitaj tlen Jehová techmachtia, techyolinis okachi ma tiktemokan tlamantli tlen miak ipati, tlen yikipia miak xiuitl uan tlen yankuik. Ijkon sejse tonal okachi tikpatioitaskej uan tiktlasojkamatiliskej Jehová ixtlamatilis uan kuali tikinmachtiskej akinmej tikintlapouiskej.

19. ¿Tleka moneki tikpatioitaskej tlamantli tlen miak ipati?

¹⁹ Satanás uan nochi tlen kiyekana mochijchikauaj para techsotlauaskej noso ayakmo ma tikpatioitakan tlen axkan otimomachtijkej. Tla amo timomaluiskej, uelis timokajkayauaskej ijkuak tiknekiskej okachi tiktlaniskej tomin noso tiknekij tikpiaskej okachi miak tlamantli. Tlatitlanil Juan okijto nochi tlen onka itech nin Tlaltikpak yitlanti (1 Juan 2:15-17). Ik non, moneki okachi timochijchikauaskej tikpatioitaskej tlamantli tlen miak ipati.

20. ¿Tlen tikchiuas para okachi tikpatioitas tlamantli tlen miak ipati?

²⁰ San niman xikkaua tlen kichiua ayakmo xikpatioita iTekiuajkayo toTajtsin Dios. Xitetlapouijto ika nochi moyolo uan nochipa xikpatioita nin tekitl. Nochipa xiktemo tlen tlamachtia Biblia. Ijkon tikololos tlen miak ipati kanin “amo onka ichtek nion n tlalxinachi tlaixpoloa”. Ken okijto Jesús “porke kan yetos tlan nomoaxka, ompa yetos nomoyolo” (Luc. 12:33, 34).