“¡PANOLTI! ¿Ken tika?”.

Xamo miak uelta ijkon yotitetlajpalo uan xamo hasta titemakitskia uan titenapaloa. Maski tlatlamantli titetlajpaloaj, tinochtin tikmatij miak ipati titetlajpaloskej. Tla amo titetlajpaloskej noso amo titlanankiliskej ijkuak techtlajpaloaj, tikteititiskej amo titetlakaitaj.

Pero sekimej kitaj oui tetlajpaloskej. Sekimej pinauaj noso amo okachi tlajtoaj, ik non, amo kinekij tetlajpaloskej. Oksekimej amo kinekij kintlajpaloskej tlen uitsej itech okseki altepemej noso porque kipiaj miak tomin. Pero tla titetlajpaloskej, uelis kinpaleuis oksekimej.

Ximotlajtlani: “¿Ken kinpaleuis oksekimej tla nikintlajpalos?”. ¿Kijtoa Biblia moneki titetlajpaloskej?”.

ToTajtsin “Dios amo kintlasojtla san sikimeh, iwa oksikimeh amó” (Hech. 10:34). Ijkon okijto tlatitlanil Pedro ijkuak okiseli itech tlanechikol Cornelio tlen amo okatka judío. Satepan Pedro okijkuilo toTajtsin Dios kineki “tinochteh matimoyolpatlakah inawak” (2 Ped. 3:9). Xamo tikijtoskej ninmej textos para akinmej momachtijtokej Biblia. Pero Pedro noijki okinmilui akinmej okichiuayaj ken Cristo: “Xikintlakitakah nochteh, xikintlasojtlakah n tokniwah” (1 Ped. 2:17). Ninmej textos techititia sapanoa kinpaleuis tla tikintlajpaloskej maski uitsej itech okseki altepemej uan kox ixchipajkej noso amo. Ijkon tikteititiskej titetlasojtlaj uan titetlakaitaj.

Pablo okintlajkuilili tokniuan: “Ximoselikah non nochteh, ijkó kemi Cristo otechseli” (Rom. 15:7). Pablo okijto okiyolchikauayaj tokniuan uan okipatioitaya. Axkan noijki moneki ma tikinyolchikauakan tokniuan porque Satanás sapanoa kitlajyouiltia ialtepe toTajtsin Dios (Col. 4:11; Apoc. 12:12, 17).

Biblia amo san kijtoa ma tiktlajpalokan akin tikseliaj. Ma tikitakan tleka.

Jehová okiualtitlanki se ángel ma motlapouiki iuan María ijkuak ayamo okitlaliliaya ijtik iKone. Okilui: “[Panolti] ¡Xipaki! Dios satlawel omitstiochi. N Toteko kajki mowa”. Maria amo okajsikamatiaya tleka ángel iuan omotlapouito, ik non, omotlajtlachialti. Ijkuak ángel okitak omotlajtlachialti, okilui: “María, amo ximawi, porke Dios yolpaki monawak”. Noijki okiyekilui Jehová okinekiaya ye ma kipia Mesías. Nin okiyolseui María uan okijto kichiuaskia tlen toTajtsin Dios okinekiaya uan okijto: “Ne iteska n Totajtsi Dios. Mamochiwa nowa ijkó kemi yokijto” (Luc. 1:26-38).

Non ángel sapanoa okipatioitak tlajtos ipatka toTajtsin Dios. Ye achto okitlajpalo María uan amo okijto amo kitlajpaloskia porque okatka tlajtlakole. ¿Tlen techmachtia tlen okichi ángel? Moneki ma titetlajpalokan uan ma titeyolchikauakan. Para tokniuan ma kimatikan Jehová kinpatioitaj katej itech ialtepe, amo moneki tikinmiluiskej miak tlamantli.

Pablo okinmixmatki miakej tokniuan ompa Asia Menor uan Europa. Ijkuak okinmijkuilo cartas, okinmijkuilo intoka akinmej okintlajpaloaya. Ma tikitakan carta tlen okinmijkuilili Romanos  itech capítulo 16. Ijkuak otlajto itech Febe, okijto “tokni siwatl” uan okinmilui tokniuan: “Xikselikah itech Itoka n Toteko, kemi moneki iwan tokniwah tlaneltokakeh” uan noijki omonekiaya kipaleuiskiaj. Pablo noijki okijto: “Xiktlajpalokah n Priscila iwa n Aquila” uan noijki okijto nochtin tokniuan okitlajpaloayaj uan okintlasojkamatiliayaj. Noijki okintlajpalo tokniuan tlen amo okachi nesij itech Biblia. Okijto: “Xiktlajpalokah notlasoj Epeneto” uan noijki “xikontlajpalokah n Trifena iwa n Trifosa” yejuan sapanoa okinpaktiaya tlapaleuiskej. Pablo nochipa okintlajpalo tokniuan (Rom. 16:1-16).

Xamo sapanoa oyolpakej tokniuan ijkuak okimatkej Pablo okinmilnamiktoka ika tlasojtlalistli. Xamo okachi okitlasojtlakej Pablo uan oksekimej tokniuan. Ijkuak oksekimej okimatkej, omoyolchikajkej uan okinpaleui ma yetokan yolmelajkej. Ijkuak titetlajpaloaj uan titeyolchikauaj tikteititiaj timotekipachoaj intech tokniuan, okachi kuali timouikaj uan san sekan tikatej.

Ijkuak Pablo otemok itech barco ompa Puteoli uan oyajki Roma, tokniuan okiselitoj. Ijkuak Pablo uejka okinmitak “omotlasojkama inawak Dios iwa omoyolchika” (Hech. 28:13-15). Ualeua xamo san tikinmixuetskiliskej tokniuan noso san uejka tikintlajpaloskej. Pero non kinyolchikauas akinmej moyolkokoaj noso motekipachoaj.

Ma tikitakan tlen okichi Santiago. Ye okinmajuak sekimej tokniuan porque ‘okimoknitiayah tlan amokuali onka itech nin tlaltíkpaktli’ (Sant. 4:4). Pero ma tikitakan tlen okijto itech icarta:

“Ne, Santiago (Jacobo), ni itlakewal n Totajtsi Dios iwa n Toteko Cristo Jesús, nikintlajpaloa n májtlakteh iwa n ome tribus non xitintokeh itech nochi n tlaltíkpaktli” (Sant. 1:1). Tokniuan okiselijkej tlen Santiago okinmilui porque okintlajpalo uan noijki amo omoueyineki. Tla tiyolyamankej uan titetlajpaloaj, techpaleuis para ijkuak monekis itlaj tikyektlaliskej.

Ijkuak titetlajpaloskej amo moneki tiuejkauaskej pero miak ipati ma tikchiuakan ika nochi toyolo maski amo ikaj kita (Mat. 22:39). Se tonal, se tokni tlen chanti Irlanda oajsito ijkuak nechikol yipeuaskia. Totoka okalak uan se tokni okixuetskili uan okilui: “¡Panolti! Nipaki nimitsita”. Tokni amo itlaj okijto uan omotlali.

Opanok seki semanas, tokni okilui ye uan ikalchanejkauan okipiayaj ouijkayotl. Okilui: “Sapanoa onimoyolkokoaya uan amo oniknekiaya nimonechikoki. Amo nikilnamiki tlen otechmachtijkej. Pero nikilnamiki otechtlajpalo. Nimitstlasojkamatilia porque non okichi kuali ma nimomachili”.

Tokni tlen otetlajpalo amo okimatiaya sapanoa okiyolchika tokni tlen omotekipachoaya. Tokni okijto: “Ijkuak onechtlapoui ken okiyolchika ijkuak oniktlajpalo, sapanoa oniyolpakik. Uan kuali onimomachili”.

Ueyi tekiua Salomón okijkuilo: “Xiktlamotla mopan ijtik atl uan oksepa tikpias ijkuak panos miakej tonalmej” (Ecl. 11:1). Tla tikintlajpaloaj tokniuan uan noijki oksekimej, timoyolchikauaskej. Ik non, nochipa ma tikilnamiktokan uelis tikinpaleuiskej oksekimej tla tikintlajpaloaj.