1. Ijkon ken kijtoa Colosenses 2:4, 8, ¿ken kichiua Satanás para ma timokuayejyekokan ken ye?

SATANÁS amo kineki ma tiktlasojtlakan Jehová. Ik non, kineki ma tikpatlakan ken timokuayejyekoaj uan ma tikchiuakan ken ye. Kineki ma tikchiuakan tlen okachi techpaktia para techkajkayauas uan ijkon ma tikchiuakan ken ye kineki (xiktlajtolti Colosenses 2:4, 8).

2, 3. (1) ¿Tleka moneki ma tikchiuakan tlen kijtoa Colosenses 2:8? (2) ¿Tlen timomachtiskej?

² ¿Techijtlakos tla Satanás techkajkayauas? Kema. Ma tikilnamiktokan tlatitlanil Pablo amo okintlajkuilili akinmej amo okichiuayaj ken Cristo. Pablo okinmijkuilili tlapejpenalmej tlen kijtoa Colosenses 2:8 (Col. 1:2, 5). Yejuan noijki uelis kinmijtlakoskia Satanás uan tejuan noijki uelis techijtlakos (1 Cor. 10:12). ¿Tleka? Porque Satanás okiualtlamotlakej uan kineki kinkajkayauas itekipanojkauan toTajtsin Dios tlen yolmelajkej (Apoc. 12:9, 12, 17). Noijki tikatej itlamian tonalmej uan miakej “okachi kijtlakojtiaskeh inyolo” (2 Tim. 3:1, 13).

³ Itech nin tlamachtil tikitaskej ken kineki techkajkayauas Satanás para ma timokuayejyekokan ken ye. Kineki ma timokuayejyekokan tlen amo kuali uan tlen amitlaj ipati. Tikitaskej eyi tlamantli tlen Satanás kineki ika techkajkayauas (Efes. 6:11). Itech okse tlamachtil tikitaskej tlen tikchiuaskej uan ijkon amo techkajkayauas Satanás. Achto, ma  tikitakan ken okinkajkaya israelitas ijkuak yochantiayaj itech tlali tlen okinmakak Jehová uan noijki tikitaskej ken techpaleuis tlen okinpanok.

4. Ijkon ken kijtoa Deuteronomio 11:10-15, ¿ken omonekiaya tokaskej israelitas ijkuak ochantitoj itech tlali tlen Jehová okinmakak?

⁴ Satanás okinekiaya israelitas ma kinueyichiuakan teotsitsintin. Okimatiaya okinpoloaya tlakuali, ik non, okinekiaya kinkajkayauas. Ijkuak yochantiayaj itech tlali tlen Jehová okinmakak, omonekiaya kipatlaskej ken otokayaj. Ompa Egipto okapantiayaj atl uan ijkon okatekiayaj tlen okitokayaj. Pero ijkuak ochantitoj itech tlali tlen Jehová okinmakak, amo okatka se aueyatl. San otokayaj ijkuak okiauiaya (xiktlajtolti Deuteronomio 11:10-15; Is. 18:4, 5). Ik non, omonekiaya kipatlaskej ken otokayaj. Otlajyouijkej porque akinmej okimatiayaj tokaskej oixpolikej ijkuak okatkaj kanin tlauaki.

5, 6. ¿Tleka Jehová okinnejmachti israelitas?

⁵ Jehová okinmilui omopatlak seki tlamantli. Satepan okinnejmachti uan tlen okinmilui xamo israelitas kijtoskiaj amo omouikaya iuan ken otokayaj. Okinmilui: “Ximomaluikan uan amo xiktekauilikan ma kikajkayauakan namoyolo tlamo nankinueyichiuaskej teotsitsintin uan inmixpan nanmotlankuaketsaskej” (Deut. 11:16, 17). ¿Tleka Jehová okinnejmachti amo ma kinueyichiuakan teotsitsintin tla okinmiluijtoka ken omonekiaya tokaskej?

⁶ Jehová okimatiaya israelitas kinekiskiaj ma kinmititikan ken otokayaj tlen ik ompa ochantiayaj. Yejuan kuali okixmatiayaj tlali  uan okimatiayaj ken tokaskej uan uelis kinmachtiskiaj israelitas. Pero uelis kinmijtlakoskiaj. Porque akinmej ochantiayaj Canaán okiueyichiuayaj Baal. Okijtoayaj ye iaxka iluikak porque okichiuaya ma kiaui. Jehová amo okinekiaya ma kinkajkayauakan israelitas. Pero yejuan miak uelta okiueyichijkej Baal (Núm. 25:3, 5; Juec. 2:13; 1 Rey. 18:18). ¿Ken okinkajkaya Satanás? Ma tikitakan ken okichi.

7. ¿Tlen okinpanok sekimej israelitas ijkuak yochantiayaj itech tlali tlen Jehová okinmakak?

⁷ Achto tlamantli, Satanás okimatiaya israelitas okinekiayaj ma kiaui uan ijkon moskaltiskia tlen okitokayaj. Ompa kanin Jehová okinmakak tlali israelitas amo okachi okiauiaya. Opeuaya kiaui itlamian abril uan otlamiaya septiembre. Kuali otlakiaya tlen okitokayaj tla okitokayaj octubre porque ijkuakon okiauiaya. Tlen ik ompa ochantiayaj, omokuayejyekoayaj omonekiaya kinmiluichiuiliskej teotsitsintin uan ijkon kiauiskia. Satanás okichi ma kineltokakan kipiaskiaj miak tlamantli tla kichiuaskiaj ken akinmej ompa ochantiayaj. Akinmej amo okipiayaj chikauak intlaneltokilis, okineltokakej omonekiaya ijkon kichiuaskej tla okinekiaya ma kiaui, ik non, okiluichiuilijkej Baal.

8. Xikijto ika tlen okse tlamantli Satanás okinkajkaya israelitas.

⁸ Satanás noijki okinekiaya ma auilnemikan israelitas. Tlakamej uan siuamej tlen ik ompa ochantiayaj, oauilnemiayaj ijkuak okinueyichiuayaj teotsitsintin. Tlakamej omosiuakopayaj uan siuamej omotlakakopayaj uan amo okitayaj tlajtlakoli nochi non tlamantli (Deut. 23:17, 18; 1 Rey. 14:24). Okijtoayaj ijkon okinpaleuiayaj teotsitsintin ma kichiuakan ma tlaki tlen okitokayaj. Miakej israelitas opejki kinpaktia auilnemiskej ijkuak okinueyichiuayaj teotsitsintin. Amo okitakej ken okinkajkaya Satanás.

9. Ijkon ken kijtoa Oseas 2:16, 17, ¿ken okichi Satanás ayakmo kuali ma kixmatikan Jehová?

⁹ Eyi tlamantli, Satanás okichi ayakmo kuali ma kixmatikan Jehová. Ijkuak okatka profeta Jeremías, Jehová okijto sekimej tlen okijtoayaj okatkaj profetas okinekiayaj israelitas ma kitekitiltikan itoka Baal uan ayakmo ma kitekitiltikan itoka Jehová (Jer. 23:27). Israelitas opejki kitekitiltiaj itoka Baal, itoka kijtosneki “inteko”. Ijkon israelitas ayakmo okimatiayaj kox okitekichiuiliayaj Jehová noso Baal. Ijkon opejki kitekichiuiliaj Baal uan okinelojkej ken okiueyichiuayaj Jehová (xiktlajtolti Oseas 2:16, 17 uan xikita nota).

10. ¿Tlen kitekitiltia axkan Satanás?

¹⁰ Axkan Satanás noijki kitekitiltia seki tlamantli tlen ika okinkajkaya israelitas. Kineki ma tikchiuakan tlen techpaktia, kineki ma timokuayejyekokan amo tlajtlakoli tla tiauilnemiskej uan amo kineki kuali ma tikixmatikan Jehová. Achto ma tikitakan ken kichiua amo kuali ma tikixmatikan Jehová.

11. ¿Ken kichiua Satanás para amo kuali ma tikixmatikan Jehová?

¹¹ Satanás amo kineki kuali ma kixmatikan Jehová. Ijkuak otlanki oixpolikej tlatitlanilmej, sekimej tlakamej tlen okijtoayaj okichiuayaj ken Cristo opejki tlamachtiaj tlen amo melauak (Hech. 20:29, 30; 2 Tes. 2:3). Akinmej omoxelojkej amo kuali okitematiltijkej  akin toTajtsin Dios. Itech Biblia ayakmo okijkuiloayaj itoka Jehová uan opejki kinotsaj “toTeko” noso okse tlamantli. Ijkuak okitlajtoltiayaj Biblia okajsiayaj miak uelta tlajtoli “toteko”, ik non, ayakmo okimatiayaj akin melauak toTajtsin Dios (1 Cor. 8:5). San okijkuilojkej “toTeko” ijkuak otlajtoaya itech Jehová uan Jesús. Ijkon miakej amo okimatiayaj uan amo okajsikamatiayaj akin melauak toTajtsin Dios uan akin Jesús uan tlen tlamantli kichiuaj (Juan 17:3). Ijkon opejki kineltokaj trinidad uan nin tlamachtil amo kajki itech Biblia. Ik non, miakej kijtoaj amo uelis tikixmatiskej nion tikajsikamatiskej toTajtsin Dios. ¡Nin tlamachtil amo melauak! (Hech. 17:27).

12. (1) ¿Tlen kitekauiliaj akinmej kiyekanaj religión tlen amo melauak? (2) Ijkon ken kijtoa Romanos 1:28-31, ¿tlen kinpanoa akinmej amo kintlakamatij itlanauatiluan toTajtsin Dios?

¹² Satanás kineki ma tiauilnemikan. Ijkuak okatkaj israelitas, Satanás okitekitilti religión tlen amo melauak para ma auilnemikan. Axkan noijki ijkon kichiua. Akinmej kiyekanaj religión tlen amo melauak kitekauiliaj ma auilnemikan oksekimej uan kijtoaj amo tlajtlakoli. Miakej kijtoaj kitekichiuiliaj toTajtsin Dios pero amo kitlakamatij itlanauatil kanin kijtoa amo ma auilnemikan. ¿Tlen kinpanoa akinmej auilnemij? Pablo okijto tlen kinpanoa ijkuak okinmijkuilili se carta akinmej ochantiayaj Roma (xiktlajtolti Romanos 1:28-31). Ijkuak kijtoa “tlan amo moneki kichiwaskeh” noijki poui itech auilnemilistli uan noijki tlakamej tlen mosiuakopaj uan siuamej tlen motlakakopaj (Rom. 1:24-27, 32; Apoc. 2:20). Ik non, sapanoa ipati ma tikintlakamatikan tlanauatilmej tlen katej itech Biblia.

13. ¿Tlen okse tlamantli kitekitiltia Satanás?

¹³ Satanás kineki ma tikchiuakan tlen techpaktia. Tinochtin tiknekij ma kipiakan tlen ika mopanoltiskej tokalchanejkauan. Ik non, tiktemoaj ken tikinmakaskej tlen kinpoloa (1 Tim. 5:8). ¿Ken tikchiuaj? Tiauij escuela uan timochijchikauaj kuali timomachtiskej. Pero moneki ma timomaluikan. Porque itech seki altepemej amo tlamachtiaj tlen techpaleuis. Noijki tlamachtiaj ken mokuayejyekoaj ixtlamatkej. Itech escuela kinmiluiaj amo kajki toTajtsin Dios  uan amitlaj ipati tiktlakamatiskej iTlajtol. Ixtlamatkej kijtoaj nochi tlen onka omochi ika evolución uan san non moneki tikneltokaskej (Rom. 1:21-23). Nochi non tlamantli kixnamiki ixtlamatilis toTajtsin Dios (1 Cor. 1:19-21; 3:18-20).

14. ¿Ken kinekij ixtlamatkej ma mokuayejyekokan akinmej momachtiaj?

¹⁴ Tlen tlamachtiaj ixtlamatkej kixnamiki itlanauatiluan Jehová uan amo kinekij ma tikintlakamatikan. Amo kinyolchikauaj oksekimej ma kichiuakan nochi tlen poui itech iespíritu santo toTajtsin Dios. Tlamachtiaj ma kichiuakan tlen kinekij (Gál. 5:19-23). Ik non, miakej moueyinekij uan san yejuan motlasojtlaj (2 Tim. 3:2-4). Nochi nin tlamantli kixnamiki tlen Jehová kineki ma tikchiuakan. Ye kineki ma tiyetokan tiyolyamankej uan amo ma timoueyinekikan (2 Sam. 22:28). ¿Tlen kinpanoa sekimej tokniuan tlen yomomachtijkej universidad? Kinpaktia ken mokuayejyekoaj ixtlamatkej uan ayakmo mokuayejyekoaj ken toTajtsin Dios. Ma tikitakan tlen okipanok se tokni.

15, 16. ¿Tlen techmachtia tlen okipanok se tokni?

¹⁵ Se tokni tlen yokipiaya quince xiuitl okitekichiuilijtoka Jehová, okijto: “Ne yonikatka iTlaixpantijka Jehová ijkuak onimomachtiaya universidad. Miak uelta oniktlajtolti uan onikkak uelis nimoouijtiliskia tla okachi nimomachtiskia. Pero amo onitetlakamatki. Onimokuayejyeko amitlaj nechpanoskia”. ¿Tlen okipanok? Okijto: “Sapanoa onimomachtiaya uan ayakmo onimotlapouiaya iuan Jehová. Ayakmo oniyolpakiaya nitetlapouis uan  ayakmo kuali onimomachtiaya ijkuak onimonechikoaya porque sapanoa onisotlauaya. Ijkuakon onikajsikamatki ayakmo kuali onimouikaya iuan Jehová porque sapanoa onimomachtiaya. Omonekiaya nikkauas universidad uan ijkon onikchi”.

¹⁶ ¿Ken opejki mokuayejyekoa se tokni ijkuak omomachtiaya universidad? Tokni okijto: “Nipinaua nikijtos ompa onechmachtijkej ma nikita tlen amo kuali kichiuaj oksekimej. Noijki ayakmo kuali onikinmitaya tokniuan. Onikchiaya ma kichiuakan seki tlamantli tlen ne oniknekiaya uan ayakmo kuali inmiuan onimouikaya. Ouejka oksepa nimokuayejyekos ken moneki. Tlen onechpanok onechititi timoouijtiliskej tla amo tiktlakamatiskej tlen techiluia ialtepe Jehová. Jehová okachi techixmati. ¡Amo ijkon nechpanoskia tla nikchiuaskia tlen technauatia!”.

17. (1) ¿Tlen amo ma tikkauilikan Satanás? (2) ¿Tlen tikitaskej itech okse tlamachtil?

¹⁷ Amo ma tikinkauilikan ma techkajkayauakan “nekateh tlamachtijkeh ika tlamachtílisteh non amitla impati, [...] tlan kiyejyekoliah n tlaltikpaktlakah” uan kinyekana Satanás. Nochipa ma timomaluikan (1 Cor. 3:18; 2 Cor. 2:11). Amo keman ma tikkauilikan Satanás ma kichiua ma tikilkauakan Jehová uan ayakmo ma tiktekichiuilikan. Ma tikintlakamatikan itlanauatiluan Jehová kanin kijtoa amo ma tiauilnemikan. Amo ma tikkakikan Satanás ijkuak kijtoa amo ma tikintlakamatikan itlanauatiluan toTajtsin Dios. Pero ¿tlen tikchiuaskej tla yotikitakej timokuayejyekoaj ken akinmej amo kitekichiuiliaj Jehová? Itech okse tlamachtil tikitaskej ken techpaleuis iTlajtol toTajtsin Dios ma tikixtopeuakan ken mokuayejyekoaj oksekimej (2 Cor. 10:4, 5, TNM).