1. ¿Ken uelis tikchiuaskej ken Jehová?

TOTAJTSIN DIOS sapanoa techtlasojtla (Juan 3:16). Tejuan tiknekij tikchiuaskej ken ye. Ik non, moneki timochijchikauaskej titeajsikamatiskej, titetlasojtlaskej uan titeiknomatiskej pero okachi moneki ijkon tikchiuaskej iuan tokniuan (1 Ped. 3:8; Gál. 6:10). Tiknekij tikinpaleuiskej ijkuak tlajyouiaj.

2. ¿Tlen timomachtiskej?

² Nochtin akinmej kinekij yetoskej ikalchanejkauan Jehová kixnamikiskej ouijkayotl (Mar. 10:29, 30). Xamo okachi titlajyouiskej ijkuak yitlamis tlen amo kuali. ¿Ken uelis timopaleuiskej? Ma tikitakan tlen okipanok Lot, Job uan Noemí. Satepan tikitaskej tlen ouijkayotl kipiaj tokniuan uan ken uelis tikinpaleuiskej.

3. Ijkon ken kijtoa 2 Pedro 2:7, 8, ¿tlen amo kuali okipejpenki Lot uan tlen okipanok?

³ Amo kuali okichi Lot ijkuak ochantito itech altepetl Sodoma porque ompa sapanoa oauilnemiayaj (xiktlajtolti 2 Pedro 2:7, 8). Sapanoa otlajyoui maski ompa okatka miak tekitl uan tomin (Gén. 13:8-13; 14:12). Xamo isiua Lot okipaktiaya ompa chantis uan okintlasojtlaya akinmej ompa ochantiayaj, ik non, amo okitlakamatki Jehová. Omikik ijkuak Jehová okichi ma uetsi tlitl uan azufre itech non altepetl. Noijki ome ichpokauan  yomonamiktiskiaj iuan akinmej ik ompa ochantiayaj pero noijki omikej. Ik non, Lot okipolo ichan, nochi tlen okipiaya uan noijki isiua omikik (Gén. 19:12-14, 17, 26). Sapanoa otlajyoui ijkuak ijkon okipanok pero Jehová amo okika.

4. ¿Ken okiteititi Jehová kimati mochias? (Xikita ixko revista).

⁴ Maski Lot okipejpenki chantis Sodoma, Jehová okiknomatki uan okintitlanki ángeles ma kipaleuitij ye uan ikalchanejkauan. Pero amo san niman otetlakamatki ijkuak okiluijkej totoka ma cholo. Ik non, ángeles okinmatilantiajkej ye, isiua uan ichpokauan uan ijkon okinkixtijkej itech altepetl Sodoma (Gén. 19:15, 16). Ijkuakon, ángeles okinmiluijkej ma cholokan itech tepeyo. Pero Lot amo otetlakamatki. Okilui Jehová ma kikaua ma uia itech se altepetl tlen amo uejka okatka (Gén. 19:17-20). Jehová kuali okikak uan okika ma uia kanin okinekiaya yas. Satepan Lot omomojti ompa yetos, ik non, oyajki itech tepeyo kanin Jehová okiluijka ma uia (Gén. 19:30). Nikan tikitaj Jehová okiteititi kimati mochias. Ma tikitakan ken uelis noijki ijkon tikchiuaskej.

5, 6. ¿Ken techpaleuia 1 Tesalonicenses 5:14 ma tikchiuakan ken toTajtsin Dios?

⁵ Xamo se tokni noijki kichiuas ken Lot, amo kuali kipejpenas tlen kichiuas uan satepan tlajyouis. ¿Tlen tikchiuaskej tla ijkon kipanoa? Maski melauak itlajtlakol tlen kipanotok, xamo tiknekiskej tikiluiskej ma kixiko porque ijkon okinek kichiuas (Gál. 6:7). Pero okachi kuali tikchiuaskej tla tikpaleuiskej ken Jehová okipaleui Lot. ¿Ken okipaleui?

⁶ Jehová amo san okinualtitlanki ángeles ma kinejmachtikij Lot kipojpoloskia Sodoma. Noijki okinualtitlanki ma kipaleuikij ma cholo ye uan ikalchanejkauan. Xamo noijki moneki tiknejmachtiskej se tokni tla tikitaj kichijtok itlaj tlen satepan kitlajyouiltis. Pero satepan xamo noijki monekis tikpaleuiskej. Amo ma timosotlauakan porque ualeua amo san niman kichiuas tlen toTajtsin Dios technauatia itech Biblia. Ma tikchiuakan ken ángeles. Ma tiktemokan ken tikpaleuiskej tokni uan amo ma tikkauakan (1 Juan 3:18). Xamo noijki monekis tikmatilanaskej ken ángeles okichijkej. Nin kijtosneki tikpaleuiskej ma kichiua tlen kijtoa iTlajtol toTajtsin Dios (xiktlajtolti 1 Tesalonicenses 5:14).

7. ¿Tlen techititia Jehová ijkuak okipaleui Lot?

⁷ Jehová amo san okitaya tlen amo kuali okichiuaya Lot. Satepan tlatitlanil Pedro okijkuilo Lot okatka yolkuali. Tiyolpakij porque Jehová amo san kita tlen amo kuali tikchiuaj (Sal. 130:3). Ma tikchiuakan ken Jehová uan ma tikitakan tlen kuali kichiuaj tokniuan. Ijkon tikteititiskej tikmatij timochiaskej uan okachi kinekiskej ma tikinpaleuikan.

8. ¿Tlen tikchiuaskej tla titeiknomatij?

⁸ Job noijki otlajyoui. Pero amo otlajyoui porque itlaj amo kuali okipejpenki ken okichi Lot. Ye okipolo nochi tlen okipiaya, kanin ochantiaya, ayakmo okitlakaitayaj uan noijki omokoko. Pero okachi omoyolkoko ijkuak omikej nochtin ikoneuan. Noijki eyi tlakamej tlen okijtoayaj  okatkaj iyolikniuan okijtojkej itlajtlakol tlen okipanoaya uan amo okiyolseuijkej. ¿Tleka amo okiknomatkej? Amo okinekej kajsikamatiskej tlen okipanotoka. Ik non, san tlen amo okiluijkej porque amo kuali omokuayejyekojkej. ¿Tlen techpaleuis amo ijkon ma tikchiuakan? Achto moneki ma tikmatokan san Jehová kimati nochi tlen kipanoa se tokni. Noijki kuali ma tikkakikan ijkuak se tokni techiluia tlen kipanotok. Noijki ma tikajsikamatikan ken momachilia. Ijkon tikteititiskej tikajsikamatij.

9. ¿Tlen amo tikchiuaskej tla titeiknomatij uan tleka?

⁹ Tla titeiknomatij, amo tikijtojtinemiskej tlen kipanoa se tokni. Akin ijkon kichiua, amo kinpaleuia tokniuan uan san kinxexeloa (Prov. 20:19; Rom. 14:19). Amo tetlasojtla uan tlen kijtojtinemi uelis okachi kitlajyouiltis tokni (Prov. 12:18; Efes. 4:31, 32). Ik non, moneki ma tikitakan tlen kuali kichiuaj tokniuan uan ma timokuayejyekokan ken tikinpaleuiskej ijkuak tlajyouiskej.

10. ¿Tlen techmachtia tlen kijtoa Job 6:2, 3?

¹⁰ (Xiktlajtolti Job 6:2, 3). Ualeua Job san tlen amo okijtoaya. Pero satepan omoyolkopki (Job 42:6). Ualeua se tokni kichiua ken Job. San tlen amo kijtoa uan satepan moyolkopa. ¿Tlen moneki tikchiuaskej ijkuak ijkon kichiuas? Ma tikiknomatikan uan amo san ma tikteneuakan. Ma tikilnamiktokan Jehová amo okinekiaya ikaj ma kipano itlaj amo kuali. Ik non, moneki tikajsikamatiskej ijkuak se tokni san tlen amo kijtoa porque tlajyouia.  Amo san niman ma tikualanikan ijkuak tokni kijtoa itlaj amo kuali itech Jehová noso kijtoa itlaj tlen amo melauak tikchiuaj (Prov. 19:11).

11. ¿Ken uelis kichiuaskej tlayekankej ken Elihú?

¹¹ Ijkuak se tokni kixnamiki se ouijkayotl ualeua noijki moneki tikiluiskej tlen amo kuali kichijtok (Gál. 6:1). ¿Ken uelis kipaleuiskej tlayekankej? Ma kajsikamatikan ken Elihú okajsikamatki Job (Job 33:6, 7). Tlayekankej uelis kichiuaskej ken Elihú ijkuak kuali kikakij tokni tlen tlajyouijtok uan mochijchikauaj kajsikamatij. Satepan ma kiluikan tlen moneki kichiuas. Ijkon ajsis itech iyolo tlen kiluiskej.

12. ¿Ken omomachili Noemí ijkuak oixpoliuik inamik uan noijki ome ikoneuan?

¹² Noemí okatka yolmelajki uan okitlasojtlaya Jehová. Pero ijkuak oixpoliuik inamik uan ome ikoneuan, okinekiaya motokayotis Mará uan nin tlajtoli kijtosneki “chichik” (Rut 1:3, 5, 20, nota, 21). Rut okatka isiuamon Noemí uan amo iselti okika ijkuak otlajyoui. Rut amo san okipaleui imonna. Noijki okiyolseui uan okilui okitlasojtlaya uan amo keman kikauaskia (Rut 1:16, 17).

13. ¿Tleka moneki ma tikinpaleuikan tokniuan tlen ixpoliui innamik?

¹³ Noijki moneki ma tikpaleuikan ijkuak se tokni ixpoliui inamik. Ijkuak se tokni kipia inamik, yetoskia ken ome kuajmej san sekan moskaltiaj. Ijkuak panoa miak xiuitl, mosetiliaj inneluayo ome kuajmej. Ijkuak se kiuiuitlaj uan uaki, okse oui moneluayotis. Ijkon panoa ijkuak se tokni ixpoliui inamik. Miak xiuitl tlajyouia. Ma tikitakan tlen okipanok Paula. * Inamik san oualixpoliuik. Ye okijto: “Nonemilis omopatlak uan onikmachili sepa noselti onimoka. Onikpolo noyolikni. San nonamik nochipa onikiluiaya tlen onechpanoaya. Otiyolpakiayaj uan onechpaleuiaya ijkuak amo kuali onimomachiliaya. Onikmachili ken itlaj onechkixtilijkej”.

14, 15. ¿Ken uelis tikyolseuiskej se tokni tla oixpoliuik inamik?

¹⁴ ¿Ken uelis tikyolseuiskej se tokni tla oixpoliuik inamik? Achto iuan ma timotlapouikan maski ualeua amo tikmatij tlen tikiluiskej noso maski amo kuali timomachiliaj. Paula okijto: “Nikajsikamati amikaj kipaktia touan motlapouis ijkuak se tokalchanejka ixpoliui. Kintekipachoa kijtoskej itlaj amo kuali. Pero okachi amo kuali tla amitlaj kijtoskej”. Akin oixpoliuik inamik amo kichia ma tikiluikan miak tlamantli. Paula okijto: “Nikintlasojkamatilia noyolikniuan maski san onechiluijkej kinyolkokoa tlen onechpanok”.

¹⁵ Yikipia seki xiuitl tokni William noijki oixpoliuik isiua. Okijto: “Nechpaktia oksekimej ma nechiluikan tlen kualtsin okichiuaya nosiua. Non kiteititia okitlasojtlayaj uan okipatioitayaj. Tlen nechiluia nechyolchikaua uan nechyolseuia porque sapanoa oniktlasojtlaya nosiua uan sapanoa onikpatioitaya”. Bianca okijto: “Nechyolseuia ijkuak tokniuan nopatka motlatlaujtiaj uan nechtlajtoltiliaj se noso ome textos. Nechyolchikaua  ijkuak nechiluiaj tlen okichiuaya nonamik. Noijki nechyolchikaua ijkuak nechkakij ijkuak nikinmiluia tlen okichiuaya”.

16. (1) ¿Ken moneki tikinpaleuiskej tokniuan tlen ayakmo kipiaj innamik? (2) ¿Tlen kijtoa Santiago 1:27 ma tikchiuakan?

¹⁶ Rut nochipa okipaleui Noemí. Tejuan noijki moneki ma tikinpaleuikan akinmej ayakmo kipiaj innamik. Paula noijki okijto: “Sapanoa onechpaleuijkej ijkuak oixpoliuik nonamik. Pero satepan ayakmo onechualtlajpaloayaj. Nonemilis omopatlak, ik non, sapanoa techpaleuia oksekimej ma kimatokan xamo miak metstli noso miak xiuitl monekis techpaleuiskej”. Noijki nochtin tlatlamantli timomachiliaj. Sekimej miak xiuitl tlajyouiaj ijkuak ixpoliui innamik uan oksekimej amo. Noijki oksekimej kinyolkokoa kichiuaskej itlaj tlen okichiuayaj iuan akin okitlasojtlayaj. Amo ma tikilkauakan Jehová techkauilia ma tikinpaleuikan tokniuan tlen ayakmo kipiaj innamik (xiktlajtolti Santiago 1:27).

17. ¿Tleka moneki ma tikpaleuikan se tokni tla okikajte inamik?

¹⁷ Noijki se tokni sapanoa moyolkokoa uan motekipachoa ijkuak kikaua inamik. Ijkon okipanok Joyce ijkuak inamik oyajki iuan okse siuatl. Ye okijto: “Okachi onimoyolkoko ijkuak otimokajkajkej inmixpan tekiuajkej. Amo ijkon nikmachiliskia tla nonamik ixpoliuiskia. Tla ixpoliuiskia  porque omokokoaya noso itlaj kipanoskia, amo ye kipejpenaskia noselti nechkauas. Pero okipejpenki nechkauas, ik non, yetoskia ken onechpinaui”.

18. ¿Ken tikinpaleuiskej akinmej ayakmo kipiaj innamik?

¹⁸ Tokniuan tlen ayakmo kipiaj innamik okachi moneki kinpiaskej inyolikniuan (Prov. 17:17). ¿Ken uelis tikinmititiskej tikintlasojtlaj? Uelis tikinmiluiskej ma tlakuatij tokalijtik, ma tikintlajpaloti, inmiuan kanaj ma tiakan uan inmiuan ma titetlapouitij. Ma tikinmiluikan touan ma kiueyichiuakan Jehová ken kalchanejkej. Tla ijkon tikchiuaskej, tikyolpaktiskej Jehová porque ye kajki inmiuan akinmej moyolkokoaj uan kineki kinpaleuis akinmej ayakmo kipiaj innamik (Sal. 34:18; 68:5).

19. ¿Tlen kijtoa 1 Pedro 3:8 ma tikchiuakan?

¹⁹ Nochi tlen axkan techtlajyouiltia tikilkauaskej ijkuak iTekiuajkayo toTajtsin Dios ualtlanauatis. Tiknekij ma ajsi tonal ijkuak “ayakmo moilnamikis, nion ayakmo yetos itech toyolo” nochi tlen techtlajyouiltia (Is. 65:16, 17). Pero axkan ok moneki ma timopaleuikan uan ma tikteititikan tikintlasojtlaj nochtin tokniuan (xiktlajtolti 1 Pedro 3:8).