TINOCHTIN tikmatij itlamian ninmej tonalmej Jehová kiyekana ialtepe uan kinpaleuia itekipanojkauan ma kipiakan chikauak intlaneltokilis (2 Tim. 3:1). Pero tejuan tikmatij kox tiktlakamatiskej. Tejuan techpanotok ken ijkuak israelitas okatkaj kanin tlauaki. Yejuan omonekiaya itlaj kichiuaskej ijkuak okinpitsayaj trompetas.

Jehová okinauati Moisés ma kinchijchiua ome trompetas ika plata. Ijkon kinnechikoskia israelitas uan noijki ijkuak kololoskiaj tlen inmiaxka uan oksekan yaskiaj (Núm. 10:2). Teopixkej omonekiaya tlatlamantli kinpitsaskej trompetas uan ijkon israelitas kimatiskiaj tlen kichiuaskej (Núm. 10:3-8). Axkan noijki yetoskia ken tlatlamantli kinpitsaj trompetas. Ma tikitakan eyi tlamantli tlen kiteititia kinpitsaj trompetas ken ijkuak okatkaj israelitas. Ijkuak techiluiaj tikpiaskej se ueyi nechikol, ijkuak kinmachtiaj tlayekankej uan ijkuak technauatiaj itlaj yankuik.

Teopixkej okinpitsayaj ome trompetas ijkuak Jehová okinekiaya ma monechikokan nochtin israelitas ixpan tabernáculo (Núm. 10:3). Nochtin tlen okatkaj ik kanin okatka tabernáculo, okikakiayaj ijkuak okipitsayaj trompeta. Xamo san niman otetlakamatiayaj israelitas tlen amo uejka okatkaj. Pero xamo amo totoka oajsiayaj tlen uejka okatkaj. Jehová okinekiaya ma monechikokan nochtin israelitas uan ma kikakikan tlen kinnauatiskia.

Axkan Jehová noijki kineki ma timonechikokan. Pero tejuan amo timonechikouaj ixpan se tabernáculo. Tejuan timonechikouaj ijkuak tikinpiaj uejueyij nechikolmej uan okseki nechikolmej kanin techmachtiaj tlen techpaleuis. Nochtin tokniuan tlen tetlakamatij, yolpakij ijkuak Jehová techmachtia. Sekimej moneki uejka yaskej tla kinekij monechikotiuij. Pero yolpakij maski uejka yauij.

¿Ken monechikouaj tokniuan tlen uejka chantij ijkuak tikpiaj se ueyi nechikol? Axkan onka miak tlamantli yankuik tlen kinpaleuia ma kipiakan inueyi nechikol uan noijki ma momachtikan. Se tokni okintlajpaloto tokniuan tlen tlapaleuiaj Betel ompa Benín.  Ijkuak omonechikojkej, tokniuan tlen chantij Arlit, Níger tlen kajki kanin tlauaki Sahara, yejuan noijki okitakej nechikol. Omonechikojkej 21 tokniuan uan oksekimej tlen okinmachtiayaj. Yejuan uejka ochantiayaj pero okimachilijkej ken okatkaj inmiuan 44,131 tokniuan tlen omonechikojkej ompa Benín. Se tokni okijkuilo: “Timechtlasojkamatiliaj porque otikitakej tlen otlamachti tokni. Nin techititia nantechtlasojtlaj”.

Ijkuak teopixkej okipitsayaj san se trompeta, san omonechikouayaj akinmej otlayekanayaj ompa Israel (Núm. 10:4). Moisés okinmachtiaya ken kinmaluiskiaj akinmej okinyekanayaj. Tla tiyetoskiaj titlayekankej, noijki timochijchikauaskiaj tiaskej ma techmachtikan.

Axkan, tlayekankej amo kinnauatiaj tokniuan nion kiteititiaj kinekij tlanauatiskej (1 Ped. 5:1-3). Yejuan mochijchikauaj kuali kinmaluiskej tokniuan. Ik non, mochijchikauaj kipiaskej Tlamachtil itech Tekiuajkayotl. Ijkon kinmachtiaj ken kinpaleuiskej tokniuan. Noijki kinpaleuia okachi ma mouikakan iuan Jehová. Tejuan noijki techpaleuis tlen tlayekankej yikimatij maski amo tikseliaj non tlamachtil.

Ualeua teopixkej amo uejkika okinpitsayaj trompetas. Ijkon israelitas okimatiayaj oksekan yaskiaj (Núm. 10:5, 6). Nochtin okimatiayaj tlen kichiuaskej pero omonekiaya mochijchikauaskej. Xamo sekimej okitayaj oui ijkon kichiuaskej. ¿Tleka?

Sekimej omokuayejyekouayaj miak uelta okinpitsayaj trompetas uan amo okimatiayaj keman kinpitsaskiaj. Biblia kijtoua ualeua mixtli tlen okinyekanaya israelitas san se youak omoketsaya, ualeua omoketsaya ome tonal, se metstli noso okachi (Núm. 9:21, 22). ¿Keski uelta oksekan oyajkej israelitas? Números capítulo 33, kijtoua israelitas omokajkej kanaj itech cuarenta altepemej.

Ualeua israelitas omokauayaj kanin amo okachi otlatotoniaya porque sapanoua tlatotonia uan temomojti kanin tlauaki (Deut. 1:19). Ik non, uelis mokuayejyekoskiaj san tlajyouiskiaj tla oksekan yaskiaj.

Nochtin okikakiayaj ijkuak amo uejkika okinpitsayaj trompetas pero amo san niman nochtin oyayaj. Xamo sekimej israelitas omosotlauayaj. Ijkuak amo uejkika okinpitsayaj trompetas okijtosnekiaya achto yaskiaj akinmej okatkaj ik kanin kisa tonaltsin. Omonekiaya yaskej akinmej opouiayaj itech tlanechikol Judá, Isacar uan Zabulón (Núm. 2:3-7; 10:5, 6). Satepan teopixkej oksepa okinpitsayaj trompetas uan oyayaj akinmej okatkaj sur. Okinpitsayaj trompetas hasta ijkuak nochtin oyayaj.

Xamo tikitaj oui tikchiuaskej itlaj yankuik tlen technauatia ialtepe Jehová. Xamo timosotlauaj ijkuak kipatlaj seki tlamantli. Uelis achto okachi otechpaktiaya ken otitekipanouayaj itech tlanechikol uan amo otiknekiayaj ma kipatlakan. Tikmatij oui tikchiuaskiaj tlen otechnauatijkej pero yolik otikchijkej. Jehová techteochiuas tla timochijchikauaj tiktlakamatiskej.

Jehová okinyekanki sapanoua miakej tlakamej, siuamej uan konemej kanin tlauaki ijkuak okatka Moisés. Yejuan amo tlaxikoskiaj tla ye amo kinmaluiskia. Axkan tikatej itlamian tonalmej uan Jehová noijki techyekana uan techpaleuia ma tikpiakan chikauak totlaneltokilis. Ik non, ma titetlakamatikan ken israelitas okichiuayaj ijkuak okinkakiayaj trompetas.