1. ¿Tleka Jehová omoneskayoti ken se siuatl tlen kinpia ikoneuan?

IJKUAK okatka profeta Isaías, Jehová okinmilui israelitas: “¿Uelis kilkauas se siuatl ikone [...]? Ninmej siuamej uelis kinmilkauaskej inkoneuan pero ne amo keman nimitsilkauas” (Is. 49:15). Jehová amo nochipa moneskayotia ken se siuatl tlen kinpia ikoneuan pero non tonal ijkon okichi. Okiteititi okintlasojtlaya israelitas ijkon ken se siuatl kintlasojtla ikoneuan. Miakej siuamej mokuayejyekouaj ken tokni Jasmín. Ye okijto: “Ijkuak nikchichitia nokone, itlaj panoua tlen kichiua nochipa iuan ma nimouika”.

2. ¿Tlen kimachilia Jehová ijkuak se ikone ayakmo tetlapouia nion ayakmo monechikoua?

² Jehová kita ijkuak se ikone ayakmo tetlapouia nion ayakmo monechikoua. Moyolkokoua ijkuak kita miakej ayakmo tetlapouiaj nion monechikouaj. *

3. ¿Tlen kineki Jehová?

³ Miakej tokniuan oksepa touan monechikouaj uan tejuan tiyolpakij tikinseliaj. Jehová kineki oksepa touan ma yetokan uan tejuan noijki ijkon tiknekij (1 Ped. 2:25). ¿Ken tikinpaleuiskej? Achto ma tikitakan tleka sekimej ayakmo monechikouaj nion ayakmo tetlapouiaj.

4. ¿Tlen kinpanoua tokniuan tlen san tekipanouaj?

⁴ Sekimej sapanoua tekipanouaj. Se tokni itoka Hung * uan chanti Asia, okijto: “San onitekipanouaya. Oniknekiaya niktlanis miak tomin uan ijkon okachi niktekichiuiliskia Jehová. Pero satepan ayakmo onimonechiko. Satanás kineki techkajkayauas ika nochi tlen kiyekana uan ijkon ayakmo ma tiktekichiuilikan Jehová”.

5. ¿Tlen okipanok se tokni?

⁵ Sekimej tokniuan kixnamikij miak ouijkayotl. Ma tikitakan tlen okipanok tokni Anne tlen chanti Gran Bretaña uan kinpia makuili ikoneuan. Ye okijto: “Se nokone yomokokouaya ijkuak oneski. Satepan se nochpoch okikixtijkej itech tlanechikol uan okse nokone okajxilijkej se kokolistli itech itsonteko. Sapanoua onimoyolkoko, ik non, ayakmo onimonechikouaya nion ayakmo onitetlapouiaya”. Techyolkokoua miakej tokniuan tlajyouiaj ijkon ken Anne uan ifamilia.

6. ¿Tlen techpanos tla amo tikchiuaj tlen kijtoua Colosenses 3:13?

⁶ (Xiktlajtolti Colosenses 3:13). Sekimej tokniuan moyolkokouaj porque se tokni itlaj okinchiuili. Tlatitlanil Pablo okijto ualeua tokniuan itlaj techchiuiliskiaj maski amitlaj otikchijkej. Pero moneki timomaluiskej tlamo san tikilnamiktoskej tlen otechchiuilijkej uan tikkauaskej Jehová. Ma tikitakan tlen okipanok se tokni itoka Pablo uan chanti Sudamérica. Okitlajtlakoltijkej itlaj amo kuali okichi, ik non, ayakmo otlapaleui itech tlanechikol. ¿Tlen okichi? Okualanki uan ayakmo omonechikouaya.

7. ¿Ken momachiliaj tokniuan tlen otlajtlakolchijkej?

⁷ Sekimej tokniuan otlajtlakolchijkej uan moyolkokouaj, ik non, kijtouaj ayakmo kinnamiki ma kintlasojtla toTajtsin Dios. Kijtouaj ayakmo kinnamiki yetoskej itech tlanechikol maski yomoyolkopkej uan yokintlapojpolui toTajtsin Dios. Ijkon omomachiliaya tokni Francisco. Ye okijto: “Onechyektlalijkej porque oniauilnenki. Ok onimonechikouaya pero onimoyolkoko uan onikmachiliaya ayakmo onechnamikiaya niyetos itech tlanechikol. Onechkuejsouaya notlalnamikilis uan onimokuayejyekouaya Jehová amo onechtlapojpolui. Satepan ayakmo onimonechiko nion ayakmo onitetlapoui”. ¿Ken tikinmitaj tokniuan tlen ijkon momachiliaj? ¿Tikinmajsikamatij? ¿Ken kinmita toTajtsin Dios tokniuan?

8. ¿Ken tikmatij Jehová amo kinmilkaua akinmej okitekichiuilijkej?

⁸ Jehová amo kinmilkaua akinmej okitekichiuilijkej maski sekimej ayakmo monechikouaj nion ayakmo tetlapouiaj (Heb. 6:10). Profeta Isaías okijto Jehová kintlasojtla itekipanojkauan uan kinmaluia. Okijkuilo: “Kinmaluis  ichkauan ken se tlajpixki. Ye kinmololos ichkauan uan kinnapalojtias” (Is. 40:11). ¿Tlen kimachilia Jehová ijkuak se itekipanojka ayakmo kitekichiuilia? Jesús okiteititi tlen kimachilia Jehová ijkuak okintlajtlani imachtijkauan: “¿Kenomi nonkitah? Tla se tlakatl kimpia se siento iichkawah, iwa kipoloa se, ¿amo kinkajtewa n nawi póali iwa n káxtoli iwa n nawi (99) ichkameh kan tepeyo iwa kontemoa non opoliwik? Iwa tla okajsik iichkatsi non opolika, okachi paki ke por non oksikimeh ichkameh non amo opolikah” (Mat. 18:12, 13).

9. ¿Tlen kichiua se kuali tlajpixki? (Xikita ixko revista).

⁹ ¿Tleka uelis tikijtoskej Jehová ye se kuali tlajpixki? Porque se kuali tlajpixki kintlasojtla ichkauan. Yiuejkika David okimikti se león uan se oso uan ijkon ichkauan amitlaj okinpanok (1 Sam. 17:34, 35). Se kuali tlajpixki kimati keman poliui se ichka (Juan 10:3, 14). Jesús okijto tlajpixki kintsakua noventa y nueve ichkamej noso ikaj kiluia ma kinmaluili uan yaui kitemoti tlen opoliuik. Jesús ijkon okijto porque okinekiaya techmachtis itlaj miak ipati: “Totajtsi non kajki ilwikak amo kineki mapoliwi nion se de ninteh pípilteh” (Mat. 18:14).

10. Ijkon ken kijtoua Ezequiel 34:11-16, ¿ken kinpaleuia Jehová itekipanojkauan tlen ayakmo monechikouaj?

¹⁰ Jehová techtlasojtla uan noijki akinmej ayakmo monechikouaj. Profeta Ezequiel okijto, Jehová kintemoskia itekipanojkauan tlen ayakmo monechikouaj uan kinpaleuiskia oksepa ma kipiakan chikauak intlaneltokilis. Kichiuaskia ijkon ken okichiuaya se tlajpixki israelita ijkuak okipolouaya se ichka (xiktlajtolti  Ezequiel 34:11-16). Tlajpixki okitemouaya ichka maski amo san niman okajsiaya. Ijkuak okajsiaya, okiuikaya iuan oksekimej ichkamej. Noijki okipajtiaya tla omokokouaya, okinapalouaya uan okitlamakaya. Tlayekankej noijki ijkon moneki kinpaleuiskej akinmej ayakmo monechikouaj (1 Ped. 5:2, 3). Yejuan kintemouaj, kinpaleuiaj oksepa ma monechikokan uan oksepa ma mouikakan iuan Jehová. *

11. ¿Tlen kimati se kuali tlajpixki?

¹¹ Se kuali tlajpixki kimati ichkamej mopolouaj. Ik non, amo kitlajyouiltia ijkuak se poliui. Ma tikitakan tlen okichi Jehová ijkuak sekimej itekipanojkauan amo okichijkej tlen okinnauati.

12. ¿Tlen okichi Jehová para kipaleuis Jonás?

¹² Profeta Jonás ocholo porque amo okinekiaya kichiuas tlen okinauati Jehová. Pero Jehová amo okijto ayakmo kitekitiltiskia. Ye okichi ken se kuali tlajpixki, okimakixti uan okipaleui ma kichiua tlen okinauati (Jon. 2:7; 3:1, 2). Satepan, Jehová okimachti ika se ayojkilitl ye amo okinekiaya ikaj ma ixpoliui (Jon. 4:10, 11). ¿Tlen techmachtia? Tla se tokni ayakmo monechikoua, tlayekankej amo moneki kijtoskej ayakmo kitemotiuij. Moneki kajsikamatiskej tleka ayakmo monechikoua uan kiseliskej ika tlasojtlalistli tla oksepa mokopas.

13. ¿Tlen techmachtia tlen okichi Jehová ijkuak salmista okijkuilo Salmo 73?

¹³ Akin okijkuilo Salmo 73 omoyolkoko ijkuak okitak okachi oyolpakiayaj akinmej okichiuayaj tlen amo kuali. Omokuayejyeko amitlaj ipati tiktekichiuiliskej toTajtsin Dios (Sal. 73:12, 13, 16). ¿Tlen okichi Jehová? Amo okajuak  uan okichi ma moijkuilo itech iTlajtol tlen okijto. Satepan salmista okajsikamatki okachi tiyolpakij ijkuak timouikaj iuan Jehová (Sal. 73:23, 24, 26, 28). ¿Tlen techmachtia? Tlayekankej amo san niman ma kinteuakan tokniuan tlen mokuayejyekouaj kox ipati kitekichiuiliskej toTajtsin Dios. Amo ma kinmajuakan uan ma kinmajsikamatikan tleka ijkon kijtouaj uan tleka ijkon kichiuaj. Ma kinyolchikauakan tokniuan ika tlen kijtoua Biblia.

14. ¿Tleka Elías okinekiaya ikaj ma kipaleui uan ken okipaleui Jehová?

¹⁴ Profeta Elías ocholo porque Jezabel okinekiaya kimiktis (1 Rey. 19:1-3). Omokuayejyeko ayakmo okatkaj oksekimej profetas tlen noijki okitekichiuiliayaj Jehová uan amitlaj ipati tlen okichijtoka. Sapanoua omoyolkoko uan okinekiaya mikis (1 Rey. 19:4, 10). Jehová amo okajuak Elías. Okilui amo keman kikauaskia uan kipaleuiskia porque omonekiaya kichiuas miak tlamantli. Jehová kuali okikak Elías ijkuak okilui tlen okitekipachouaya uan oksepa okinauati itlaj ma kichiua (1 Rey. 19:11-16, 18). ¿Tlen techmachtia? Tejuan uan noijki tlayekankej ma tikintlasojtlakan tokniuan. Tlayekankej moneki kajsikamatiskej tla se tokni kijtoua tleka kualani uan mokuayejyekoua Jehová amo keman kitlapojpoluis.  Noijki ma kiluikan tokni Jehová sapanoua kitlasojtla.

15. Ijkon ken kijtoua Juan 6:39, ¿ken okinmitaya Jesús tokniuan?

¹⁵ ¿Ken kineki Jehová ma tikinmitakan tokniuan? Jesús okiteititi ken moneki tikinmitaskej porque okimatiaya Jehová kinpatioita itekipanojkauan. Ik non, omochijchika okinpaleui “tlakah de Israel nonmoixpolojtinemih kemi ichkameh” oksepa ma mouikakan iuan Jehová (Mat. 15:24; Luc. 19:9, 10). Jesús kuali tlajpixki uan okinmalui imachtijkauan amo ma poliuikan (xiktlajtolti Juan 6:39).

16, 17. ¿Tleka tlayekankej mochijchikauaj kinpaleuiskej tokniuan tlen ayakmo monechikouaj? (Xikita recuadro “ ¿Tlen kimachiliaj tokniuan tlen ayakmo kitekichiuiliaj Jehová?”).

¹⁶ Pablo okinmilui tlayekankej tlen okatkaj Éfeso ma kichiuakan ken Jesús. Okinmijkuilili: “Nochipa onomechititi kenijki moneki nontekitiskeh para nonkimpalewiskeh akimeh amitla kipiah, iwa xikilnamiktokah tlan okijto n Toteko Jesús: ‘Okachi makipia pakílistli n tlakatl non tlapalewia ika tlan kipia, iwa amo akin kipalewiah’” (Hech. 20:17, 35). Nin kiteititia tlayekankej moneki kinmaluiskej tokniuan. Se tlayekanki itoka Salvador uan chanti España, okijto: “Jehová sapanoua kintlasojtla itekipanojkauan, ik non, nimochijchikaua nikinpaleuis. Jehová kineki ma nikinmalui tokniuan”.

¹⁷ Tokniuan tlen otimotlapouijkej itech nin tlamachtil, okinpaleuijkej oksepa ma kitekichiuilikan Jehová. Miakej kinekij oksepa touan monechikoskej. Pero ¿ken tikinpaleuiskej? Itech okse tlamachtil tikitaskej ken tikinpaleuiskej.