TLAMACHTIL 26
“Oksepa nouan xiyetokan”
“Oksepa nouan xiyetokan uan ne oksepa namouan niyetos” (MAL. 3:7).
TLAKUIKALI 102 “Nikinpaleuis akinmej tlajyouiaj”
XIKILNAMIKTO *
1. ¿Tlen kimachilia Jehová ijkuak se tokni oksepa monechikoua?
ITECH okse tlamachtil otikitakej Jehová se kuali tlajpixki porque kuali kinmaluia itekipanojkauan uan kintemoua akinmej ayakmo monechikouaj. Se tonal, okinmilui israelitas tlen okikajkej: “Oksepa nouan xiyetokan uan ne oksepa namouan niyetos”. Axkan noijki ijkon kichiua porque ye amo kipatla iyelis (Mal. 3:6, 7). Jesús okijto Jehová uan ángeles yolpakij ijkuak se tokni oksepa monechikoua (Luc. 15:10, 32).
2. ¿Tlen timomachtiskej?
2 Axkan timomachtiskej eyi tlamantli tlen Jesús okijto ken tikinpaleuiskej akinmej ayakmo kitekichiuiliaj Jehová. Noijki tikitaskej ken moneki tikpiaskej toyelis tla tiknekij tikinpaleuiskej tokniuan oksepa ma monechikokan uan tleka miak ipati ijkon ma tikchiuakan.
MA TIKTEMOKAN TOMIN TLEN OPOLIUIK
3, 4. ¿Tleka Lucas 15:8-10 kijtoua siuatl sapanoua omochijchika kitemos itomin?
3 Moneki timochijchikauaskej tla tiknekij tikmatiskej akinmej kinekij oksepa mouikaskej iuan Jehová. Evangelio tlen okijkuilo Lucas kijtoua, Jesús okijto se siuatl okipolo se tomin itoka dracma tlen miak ipati. Nin siuatl sapanoua omochijchika kitemos itomin (xiktlajtolti Lucas 15:8-10).
4 Nesi yiuejkika ijkuak omonamiktiayaj siuamej, innantsitsinuan okinmakayaj majtlaktli dracmas. Xamo siuatl tlen okijto Jesús okipolo se tomin tlen okimakakej. Ma tikijtokan ouetski ipan tlali. Siuatl okixotlalti se tlauili uan okitemo itomin pero amo okajsik. Xamo amo okachi otlauiaya itlauil uan amo okitak itomintsin. Ik non, opejki tlachpana. Satepan ijtik tlajsoli okitak opetlantoka itomin tlen sapanoua okipatioitaya. Jesús okijto non siuatl omoyolseui uan okinnotski iyolikniuan uan akinmej ik ompa ochantiayaj uan okinmilui okajsik itomin.
5. ¿Tleka moneki ma timochijchikauakan ma tikintemokan akinmej ayakmo monechikouaj?
5 Tlen okijto Jesús techmachtia moneki timochijchikauaskej tla tiknekij tikajsiskej tlen opoliuik. Noijki ijkon panoua ijkuak tikintemouaj tokniuan tlen ayakmo monechikouaj. Xamo yimiak xiuitl ayakmo monechikouaj. Xamo uejka ochantitoj uan tokniuan amo kinmixmatij. Pero xamo sekimej kinekij oksepa kitekichiuiliskej Jehová. Pero moneki ma tikinpaleuikan.
6. ¿Ken uelis tikintemoskej akinmej ayakmo monechikouaj?
6 ¿Akinmej uelis kinpaleuiskej tokniuan tlen ayakmo monechikouaj? Tinochtin uelis tikinpaleuiskej, infamiliares, tlayekankej, precursores uan oksekimej tokniuan. ¿Tikpiaj se toyolikni noso se tofamiliar tlen ayakmo monechikoua? ¿Kanin titetlapouiaj yotikajsikej se tokni tlen ayakmo monechikoua? Ma tikiluikan kox kineki ikaj ma kitlajpaloti uan techpaktiskia tikinmiluiskej tlayekankej kanin chanti.
7. ¿Tlen techmachtia tlen okijto se tlayekanki itoka Thomas?
7 ¿Tlen uelis kichiuaskej tlayekankej tla kinekij kintemoskej akinmej ayakmo monechikouaj? Ma tikitakan tlen kichiua se tlayekanki itoka Thomas * tlen chanti España. Ye yokinpaleui kanaj cuarenta tokniuan oksepa ma kitekichiuilikan Jehová. Okijto: “Achto nikintlajtlania sekimej tokniuan kox kimatij kanin chantij akinmej ayakmo monechikouaj. Noijki nikintlajtlania kox kixmatij se tokni tlen ayakmo monechikoua. Tokniuan yolpakij ijkuak techpaleuiaj tikintemouaj tlen ayakmo monechikouaj. Ijkuak nio nikintlajpaloti, nikintlajtlania ken katej inkoneuan uan infamiliares. Sekimej tokniuan okinuikayaj inkoneuan ijkuak omonechikouayaj uan xamo noijki yotetlapouiayaj. Yejuan noijki uelis tikinpaleuiskej oksepa ma kitekichiuilikan Jehová”.
MA TIKINPALEUIKAN TOKNIUAN OKSEPA MA KITEKICHIUILIKAN JEHOVÁ
8. Ijkon ken kijtoua Lucas 15:17-24, ¿ken okiseli se teta ikone tlen omoyolkopki?
8 ¿Ken moneki tikpiaskej toyelis tla tiknekij tikinpaleuiskej tokniuan oksepa ma monechikokan? Ma tikitakan tlen techmachtia telpochtli tlen okauilti itomin (xiktlajtolti Lucas 15:17-24). Jesús okijto non telpochtli omoyolkopki uan omokopki ikalijtik. Itajtsin okinamikito uan okinapalo (okinauajteki) ijkon okititi ok okitlasojtlaya. Telpochtli omoyolkokouaya porque okichi tlen amo kuali uan omokuayejyekouaya ayakmo okinamikiaya ma yeto ikone itajtsin. Itajtsin okiknomatki porque omoyolkopki. Ik non, otlanauati ma kitlakualchiuilikan uan ma kimakakan se yankuik tlakemitl. Ijkon teta okiteititi okiseli ikone ika nochi iyolo uan amo ken se tlakeuali.
9. ¿Ken moneki tikpiaskej toyelis tla tiknekij tikinpaleuiskej akinmej ayakmo monechikouaj? (Xikita recuadro “ ¿Ken tikinpaleuiskej tokniuan tlen kinekij oksepa kitekichiuiliskej Jehová?”).
9 Jehová kichiua ken non teta. Kintlasojtla tokniuan tlen ayakmo monechikouaj uan kineki oksepa ma kitekichiuilikan. Tikinpaleuiskej tla noijki ijkon tikchiuaskej. Pero moneki tikmatiskej timochiaskej, tikinmajsikamatiskej uan tikintlasojtlaskej. ¿Tleka moneki ijkon tikpiaskej toyelis uan ken tikteititiskej?
10. ¿Tleka amo ma timosotlauakan ijkuak tikinpaleuiaj tokniuan tlen ayakmo monechikouaj?
10 Amo ma timosotlauakan porque ualeua tokniuan uejkauaj oksepa kitekichiuiliskej Jehová. Miakej tokniuan tlen ayakmo omonechikouayaj okijtojkej, tlayekankej uan oksekimej tokniuan miak uelta okinyolchikauatoj oksepa ma kitekichiuilikan Jehová. Se tokni itoka Nancy uan chanti Asia, okijkuilo: “Onechpaleui se noyolikni. Okiteititi nechtlasojtla ken se nokni. Onechilnamiktiaya ken otiyolpakiayaj ijkuak san sekan otiktekichiuiliayaj Jehová. Kuali onechkakiaya uan onechyolchikauaya ijkuak onikiluiaya tlen onimomachiliaya. Kuali iuan nimouika uan ye nochipa onechpaleui”.
11. ¿Tleka moneki ma tikinmajsikamatikan tokniuan tlen moyolkokouaj?
11 Ijkuak tikinmajsikamatij tokniuan tlen moyolkokouaj yetoskia ken tikintlaliliaj pomada kanin kinkokoua. Sekimej ayakmo monechikouaj porque okinyolkokojkej uan san kilnamiktokej tlen okinchiuilijkej. Ik non, ayakmo kinekij kitekichiuiliskej Jehová. Oksekimej xamo mokuayejyekouaj okinchiuilijkej itlaj amo kuali. Xamo moneki ikaj ma kinkaki uan ma kinmajsikamati (Sant. 1:19). Se tokni itoka María miak xiuitl ayakmo omonechikouaya, okijto: “Oniknekiaya ikaj nikiluis tlen onikmachiliaya, nouan ma choka uan ma nechyolseui”.
12. ¿Tleka tikijtouaj Jehová techtlasojtla uan techyoltilana ken yetoskia se mekatl?
12 Biblia kijtoua Jehová techtlasojtla uan techyoltilana ken yetoskia se mekatl. ¿Tleka? Ma tikijtokan ikaj melsima ijtik aueyatl uan ikaj kitlamochilia se mekatl. Motlasojkamati uan ijkon amo kiuikas aueyatl. Pero amo san moneki kikitskijtos mekatl. Aueyatl motlalojtok uan moneki ikaj kitilanas mekatl uan ijkon ajsiti itempa aueyatl. Jehová noijki ijkon okinpaleui israelitas ijkuak okinmilui okinyoltilanaya uan okintlasojtlaya (Os. 11:4). Jehová ijkon kineki kinpaleuis akinmej ayakmo monechikouaj uan kixnamikij miak tlamantli. Kineki kinpaleuis uan kineki ma kimatikan ye kintlasojtla. Ye noijki techpaleuia ma tikintlasojtlakan ken ye kintlasojtla.
13. ¿Tlen kiteititia tlen okipanok Pablo?
13 Moneki ma tikinmiluikan tokniuan tlen ayakmo monechikouaj, Jehová kintlasojtla uan tejuan noijki tikintlasojtlaj. Se tokni itoka Pablo tlen chanti Sudamérica, kanaj treinta xiuitl amo okitekichiuili Jehová. Okijto: “Se tonal oniknamik se tokni tlen yikipia miak xiuitl, ye onechtlajpalo (onechnauajteki) uan kualtsin onechtlapoui. Onichokak ken se chokotsin. Onikilui yetoskia ken Jehová onechualtitlanili nouan ma motlapouiki. Non tonal onikijto oksepa niktekichiuiliskia Jehová”.
MA TIKINPALEUIKAN AKINMEJ TLAJYOUIAJ
14. Ijkon ken kijtoua Lucas 15:4, 5, ¿tlen kichiua se tlajpixki ijkuak kajsi ichkatsin?
14 Tla se tokni oksepa peua kitekichiuilia Jehová, moneki tikpaleuiskej uan tikyolchikauaskej. Xamo moyolkokoua ken telpochtli tlen okauilti itomin. Noijki xamo amo kipia chikauak itlaneltokilis porque okatka iuan akinmej kinyekana Satanás. Ik non, moneki tikinpaleuiskej oksepa ma kipiakan chikauak intlaneltokilis. Jesús okijto ijkuak poliui se ichkatsin, tlajpixki kitemoua uan kinapaloua ijkuak kajsi uan kiuika kanin katej oksekimej ichkamej. Pero kimati moneki kipaleuis porque amo iselti kinmajsiti oksekimej ichkamej (xiktlajtolti Lucas 15:4, 5).
15. ¿Ken tikinpaleuiskej tokniuan tlen oksepa monechikouaj? (Xikita recuadro “ Se amatlajkuilol tlen sapanoua techpaleuia”).
15 Ma tiyetokan iuan tokniuan tlen oksepa monechikouaj uan ijkon tikinyolchikauaskej (Rom. 15:1). Jehová techpaleuia ika iespíritu santo, iTlajtol uan amatlajkuilolmej tlen techmaka ialtepe. ¿Ken tikinpaleuiskej tokniuan tlen oksepa monechikouaj? Se tokni tlen yikipia miak xiuitl tlayekana, okijto: “Akinmej oksepa monechikouaj moneki ikaj kinpaleuis ma momachtikan Biblia”. * Ik non, ma tikinmachtikan ika pakilistli tla tlayekankej techiluiaj ma tikinpaleuikan. Tlayekanki noijki okijto: “Akinmej kinpaleuiaj tokniuan oksepa ma monechikokan moneki mochiuaskej inyolikniuan”.
YOLPAKIJ AKINMEJ KATEJ ILUIKAK UAN AKINMEJ KATEJ TLALTIKPAK
16. ¿Ken tikmatij ángeles techpaleuiaj?
16 Miak tlamantli kiteititia ángeles techpaleuiaj ma tikinmajsikan tokniuan tlen kinekij oksepa kitekichiuiliskej Jehová (Apoc. 14:6). Se tokni itoka Silvio uan chanti Ecuador, okilui Jehová ma kipaleui oksepa ma monechiko. Ijkuak omotlatlaujtijtoka, ome tlayekankej oajsitoj ikalijtik. Non tonal opejki kipaleuiaj tokni.
17. ¿Tlen tlateochiuali tikseliskej tla tikinpaleuiskej akinmej ayakmo kitekichiuiliaj Jehová?
17 Tiyolpakiskej tla tikinpaleuiskej tokniuan tlen ayakmo omonechikouayaj ma kitekichiuilikan Jehová. Ma tikitakan tlen kichiua se precursor itoka Salvador. Ye mochijchikaua kinpaleuis tokniuan tlen ayakmo monechikouaj. Okijto: “Ualeua nichoka porque niyolpaki ijkuak nikita Jehová kinpaleuia tokniuan tlen oksepa kitekichiuiliaj uan ayakmo katej kanin Satanás kinyekana” (Hech. 20:35).
18. ¿Tlen uelis tikneltokas tla ayakmo timonechikoua?
18 Tla ayakmo timonechikoua iuan tokniuan, xikmato toTajtsin Dios mitstlasojtla uan kineki oksepa xiktekichiuili. Pero moneki tikchiuas seki tlamantli. Xikilnamikto itajtsin telpochtli tlen okauilti itomin. Jehová kineki ximonechiko iuan tokniuan uan kichixtok mitsselis.
TLAKUIKALI 103 ToTajtsin Dios okintlali tlayekankej
^ párr. 5 Jehová kinmiluia oksepa iuan ma yetokan akinmej ayakmo tetlapouiaj nion ayakmo monechikouaj. Tinochtin uelis tikinyolchikauaskej akinmej kinekij oksepa mouikaskej iuan Jehová. Itech nin tlamachtil tikitaskej ken tikinpaleuiskej oksepa ma monechikokan.
^ párr. 7 Sekimej otikinpatilijkej intoka.
^ párr. 15 Sekimej tokniuan tlen oksepa monechikouaj, uelis momachtiskej seki tlamantli tlen kijtoua amochtli “Xiyetokan itech itlasojtlalis toTajtsin Dios”. Pero oksekimej xamo kinpaleuis seki capítulos tlen kipia amochtli Acerquémonos a Jehová. Akinmej kiyekanaj tlanechikol kijtoskej akinmej kinmachtiskej tokniuan.
^ párr. 68 FOTOS: Eyi tokniuan kipaleuiaj se tokni oksepa ma kitekichiuili Jehová. Tokniuan kipaleuiaj, kiluiaj kitlasojtlaj uan kajsikamatij.
